Marcu 14
14
Da te dasima ãma irowa'õtõ za'ra zé wasu'u, Zezusihi wĩrĩzéb da na
Mateu 26.1-5; Luca 22.1-2; Zuwã 11.45-57
1Maparane te oto sô rowaptâ bâtâ zô hã, dato hã da te 're i'manharĩ za'ra mono zéb u hã, 'Re ihâimana u'âsi mono, Ezitu hawi te te idawaibuzém na ãma dasipo're pu'u za'ra da, Pascowa na dato nhisi na hã. Tawapsi dasi'rã'õtõ ré, te za romhuri na i'u'ẽtẽ duptoi'õ hã huri ni. Tawamhã bâdâ iwa waptã'ã õ ré, te sasedoti ipire norĩ hã rowahutu'wa norĩ me, sima ãma rosa'rata za'ra, Zezusi hã pi'uriwi te te siwi âri da, da te dasiwi wĩrĩ da. 2Ãne te sima ãma roti za'ra:
— Dato hã hâimana ré, wa te wasiwi âri õ di za, wama dazahi za'ra õ'umnhasite, uburé hã wazada hâimana za'ra tõ da.
Betãnha ãma, Zezusihi ma, pi'õ nhoprubzé wasu'u
Mateu 26.6-13; Zuwã 12.1-8
3Tawamhã Zezusi hã Betãnha ãma, te a'â tihâiba, Simahã nhorõwa ãma, i'wa're ré, aré ta hã. Tame sai ma, sãmra ré, ma tô we pi'õ hã ãzé, 'ri para u. Wedewa'u zadaze ẽtẽ 'manharĩ 'remhã, ma siré hã ãwisi. Wedewa'u zadaze hã, nadu na isisi hã, iwa'âbâ za'ẽne. Tawamhã isé hã ma tô sô pru. Taha pari, ma Zezusihi 'rã nhisiwi sa'wa. 4Ni'wam norĩ hã tame ihâimana za'ra hã ma tô ãma wẽ'õ za'ra. Tahawa, ma tô sima rowasu'u za'ra, ãne:
— E niha, ma taré ãma si'uba, wedewa'u zadaze na hã. 5Te te dama wede 'wa'âhã, aré iwa'â hã isa'ẽtẽ uptabi 300 na te aré tihâiba, rob'uiprazé isapotore hã, isibrob'õ norĩ ma, te te sõmri mono da.
Pi'õi ãma, ma tô duré ãhã wamhã wasété za'ra. 6Tawamhã Zezusi hã te tãma nharĩ za'ra, ãne:
— Tô'ã. Pi'õ hã rowẽ na si hâimana. E marĩ da, ma tô sada asahi za'ra wa'wa. Pi'õ hã iwẽ uptabi hã ma tô ĩma 'manha. 7Isibrob'õ norĩ hã te ai'rata 're si'ubumroi u'âsi 'wa. Nimahã bâtâ na, asima 're iwẽ za'ra wa'aba mono zéb uwaibaba si, te za 're ipawaptob za'ra wa'aba mo, isimarĩ'õ norĩ hã. Tanei õ di, wa hã. Ai'rata 're ĩnhamra u'âsi aba mono õ di za oto. 8Pi'õ hã ma tô i'uwaibaba tô ĩma 'manha, iwẽ hã. Ã hã ĩdâ'â wana ré, ma tô ãma ĩhâiba zadaze, da te iré ĩnherẽzéb u. 9Tô sena, wa ãne aima waihu'u za'ra wa'wa. Daro mono bâ te za ĩwasu'uwẽ na da te 're dapo're pu'u za'ra. Tawamhã pi'õ hã te te ĩma i'manharĩ wẽ zém na zama, te za da te dasima 're wasu'u u'âsi za'ra, ãma 're dasipo're pu'u za'ra mono da.
Zuda hã, Zezusi za te te dama ihâiba nhomrizé wasu'u
Mateu 26.14-16; Luca 22.3-6
10Tawamhã Zuda Icarioti hã te mo, sasedoti ipire norĩ u. Aibâ 12 na Zezusihi siré 're inomro mono norĩ siré 're imorĩ, Zuda hã. Zezusihi ãma te te tãma ãma roti za'ra da, te itẽme timorĩ za'ra, te te tãma ãma rowairébé za'ra da, Zezusi za te te tãma ihâiba nhomri za'ra zém na hã. 11Tawamhã Zudaha mreme te te wapari za'ra wamhã, tãma rowẽ uptabi za'ra di. Tahawa, ma tô rob'uiprazém na tãma ropisutu za'ra, te te tãma wa'âbâ za'ra da. Tawamhã Zuda hã te oto sima rosa'rata, nimahã bâtâ na te te dama ihâiba nhomri da hã.
Zezusi norĩ hã, dasai 'manharĩzém na, siré isaihurizém na rowasu'u
Mateu 26.17-30; Luca 22.7-23; Zuwã 13.21-30; 1 Corĩtu 11.23-25
12Tawamhã bâdâ ma tô oto iwa waptãrã, i'u'ẽtẽ duptoi'õ, da te ihurizéb da hã. Ã bâtâ na, imorĩ'rata na zudeu norĩ hã te za pone'ẽrebâ 'ra hã te te sima 're simro, tisa te te ãma ihurizéb da hã, Pascowa na dato nhisi na hã. Tawamhã Zezusihi siré 're inomro mono norĩ hã, te ãne siwi sadanha:
— E momo ma tô asima iwẽ, asô iwa'manhipizéb da hã, Pascowa na dato nhisi na iwasaihurizéb da hã.
13Tawamhã Zezusi hã ma tô tisiré 're inomro mono norĩ hã 'mazatõrĩ zahuré. Ãne ma tô tãma rob'ru zahuré:
— 'Ri ahâ u, ane wa'aba. Tame te za aibâ hã isõpẽtẽ 'wa, piza'a te te i'âri hã, â ré. Tawamhã isarina te za ane wa'wa, 'ri tẽme. 14Aibâ hã nimomo sébré wamhã, te za 'ri tede'wa hã isadanharĩ 'wa: “Rowahutu'wa hã te tinha: E ma niwĩ 'ri 're wa'wa hã, ĩsiré 're inomro mono norĩ me, iwa iwasaihurizéb da hã, Pascowa na dato nhisi na hã.” 15Tawamhã 'ri tede'wa hã, hâimo 'ri 're wa'wa za'ẽne hã te za aima 'mazabui wa'wa. Tame te uburé iwa romhaimasa wedeza hã, danhamrazé hã. Tame te za wazô irobza'ra pese 'wa.
16Tawamhã te oto tineb zahuré, 'ri ahâ u. Tamomo simasisi wamhã, Zezusi te te tãma iwaihu'u zahuré zéb uwaibaba, ma tô sabu zahuré. Tawamhã tinhipi ma tô 'manharĩ zahuré, Pascowa na dato nhisi na da hã.
17Tawamhã ma'rã wi, ma tô aihutu Zezusi norĩ hã 'ri tẽme, aibâ 12 na ihâiba za'ra norĩ me. 18Tawamhã sai ma, si'ubumroi ré, ma tô Zezusi hã tãma waihu'u siromo za'ra, ãne:
— Tô sena, wa aima waihu'u siromo za'ra wa'wa. A norĩ wa'wa hã ĩsiré asaihuri aba nherẽ, misire te za dama ĩ'maihâiba nhomri 'wa za.
19Tawamhã ãne te te sina wapari za'ra wamhã, ma tô tiwi tirobzei'õ za'ra. Tahawa, ma tô sidâpâsi nasi si'mahârâ za'ra, ãne:
— E wa hã, merẽ.
20Tawamhã Zezusi asa ma tãma waihu'u za'ra:
— Misire te za tô dama ĩ'maihâiba nhomri 'wa. I'u'ẽne hã ĩsiré piza'a 're te te idi hã, te za dama ĩhâiba nho. 21Ti'ai ãma Dasiré Ipoto na duréihã ma tô idâ'âzém na rob'ui'éré siromo za'ra ibaihâ na, 'Re ihâimana u'âsi mono zadawa 'mahârâ'wa norĩ hã. Ãma irob'ui'érézéb zarina te za tô mo, tidâ'âzéb u. Tane nherẽ, aibâ ma, tãma 're ropipa uptabi mono di za, za te te dama ihâiba nhomri'wai ma hã. 'Re ihâimana u'âsi mono, za te te azâri wamhã, te za sima rosa'rata, ãne: “Ĩpoto õ 'wa'âhã, aré wẽ di, ãne na hã te aré 're robzépata mono õ wa.” Ãne te za 'râwi si'ãma rosa'rata, za dama ihâiba nhomri'wa hã.
22Tawamhã saihuri ré, ma tô ti'â, i'u'ẽne hã. 'Re ihâimana u'âsi mono ãma te tiwata, sõpru wa. Taha pari, ma tô te te wẽ'ẽ, i'u'ẽne hã. Te te wẽ'ẽi mono parimhã, tisiré 're inomro mono norĩ ma, ma tô te te sõmri. Ãne ma tãma sina waihu'u za'ra:
— Ã, i'u'ẽne hã huri aba. Ã hã ĩhâiba, te wasu'u.
23Taha pari, ma duré ti'â hâsizé hã, uwa 'rãi wa'ui ré hã. 'Re ihâimana u'âsi mono ãma te duré tiwata, sõpru wa. Taha pari, ma tô tãma sõmri za'ra, uwa 'rãi wa'ui ré hã. Tawamhã aihĩni ma âhu. 24Ãne ma duré tãma sina waihu'u za'ra, Zezusi hã:
— Ã hã ĩwapru, te wasu'u. Rob'rãi wa'u za'wari ne, te za ĩwapru hã ĩwi asa'wa, da'ahâ zada ĩdâ'â wamhã. Ã hã ĩwapru hã ĩwi sisa'wari wamhã, 'Re ihâimana u'âsi mono hã tinhib'a'uwẽ ma, te te tãma iropisutuzé hã tô sena za te te tãma ãma 're i'uwaimrami mono zé, te wasu'u. 25Tô sena wa za aima ĩsiwasu'u za'ra wa'wa. Ã hã rob'rãi wa'u hã te 're hâsi mono õ di za oto, a'â. 'Re ihâimana u'âsi mono hã za uburé da'ãma isib'a'uwẽzéb ãma si, wa za duré te 're hâsi.
26Tawamhã Zezusi norĩ hã tinho're na te oto ãma tiwata za'ra, 'Re ihâimana u'âsi mono ãma. Taha pari, ma tô wairé, Oriwera na ẽtẽ 'rãihâ nhisi u si'aba'ré da.
Pedru hã za te te dawi i'udâzém na, Zezusi te te tãma iwaihu'u siromo zé wasu'u
Mateu 26.31-35; Luca 22.31-34; Zuwã 13.36-38
27Tawamhã ãne ma Zezusi hã tisiré 're inomro mono norĩ ma, waihu'u za'ra:
— A norĩ wa'wa hã ĩzadawa para õ nherẽ, te za aihĩni asiwi ĩrẽme 'wa. Duréihã 'Re ihâimana u'âsi mono zadawa 'mahârâ'wa hã ma tô ãne na ĩ'ãma rob'ui'éré siro, 'Re ihâimana u'âsi mono mreme na hã: “Pone'ẽrebâ 'madâ'â'wa hã wa za tiwĩ. Tawamhã pone'ẽrebâ hã te za ropé.” Ãne ĩ'ãma rowasu'u na rob'ui'éré, ibaihâ na hã. 28Tane nherẽ, ab're hawi apâ ĩhâiwa'utu parip si, wa za aiwana ĩmorĩ 'wa, Galiléa u, tamomo ĩnhopẽtẽ za'ra wa'aba da.
29Tawamhã Pedru hã te Zezusihi ma tinha, ãne:
— Aihĩni za te te airẽme za'ra nherẽ, wa hã te airẽme õ di za.
30Tawamhã Pedruhu ma, te Zezusi hã asa tinha, ãne:
— Tô sena wa za aima waihu'u. Ã bara na, si'a hã tihârâ na te te sahu õ ré, te za si'ubdatõ dawi ĩ'udâ, aima ĩza'rese õ na.
31Tawamhã mreme tete sina, te asa tãma tinha, Pedru hã, ãne:
— Wa hã asiré ĩdâ'â da nherẽ, te dawi ai'udâ õ di za.
Tawamhã uburé isiré 're inomro mono norĩ hã ma tô õhõ na si tãma siwasu'u za'ra, za te te dawi i'udâ za'ra õ na hã.
Zezusi hã, Zésemani ãma isãmrazém na rowasu'u
Mateu 26.36-46; Luca 22.39-46
32Tawamhã Zezusi norĩ hã ma tô aihutu, Zésemani na rob're nhisi u. Sihutu wamhã, ãne te tãma nharĩ za'ra:
— Ãme ĩzô asimroi wa'aba. Wa hã wa za a'â asiti ĩmorĩ 'wa, romnhiwasi Ĩmama ma, ĩmreme da.
33Tawamhã Pedru norĩ hã te siré te te simro, Tiagu norĩ hã, Zuwãhã me. Tawamhã te te sina rosa'rata pese wamhã, sina pẽ'ẽzé uptabi di. 34Tahawa, Pedru norĩ ma, ma ãne sina tãma rowaihu'u za'ra:
— Ĩpẽ'ẽzé hã sa'ẽtẽ na te ĩma tihâiba. Ĩpẽ'ẽzé uptabi wa, wa aré dârâ. Ãme a'â asimroi wa'aba ĩ'rata, asõtõ za'ra wa'aba ãna. Asõpré u'âsi aba.
35Tawamhã romhâ prã na te isiti timorĩ za'ra. Tawamhã hi'rãtitõ ma tô nhamra. Sãmra wamhã, ma tô aiwẽ'ẽ, ti'ai u. Tawamhã Timama wi, te rowaptẽ, robzépada hã te te tãma ba'a da. 36Ãne ma tô Timama wi rowaptẽ:
— Ĩmama, uburé marĩ hã aima waihu'u pese di. Tahawa, ma'ãpé robzépada hã ĩma ba'a za, te robzépata za'ẽtẽ tõ da. Tane nherẽ, ãne aima ĩsiwasu'uzéb uwaibaba, te ĩsina uwaimrami da, wa hã te ĩsima iwẽzém na ĩma pisutu õ di za. A hã ĩma iwẽzéb uwaibaba si, te ĩsina uwaimrami da, te za ĩma ipisu.
37Tawamhã Timama ma, mreme pari, te apâ mo, si'ubdatõ tisiré 're inomro mono norĩ u. Tawamhã sõtõ za'ra ré, ma tô siza za'ra. Tahawa, te Pedru 'mahâ, utu da:
— Sima, e niha te asõ. E niha asimiza'rese rob'madâ'â waihu'u õ di, suru na. 38Satanasihi zada, asiptete sina 're aihâimana za'ra wa'aba mono da, asima 're wẽ za'ra wa'aba mono nherẽ, asi'uihâ na hã sada 're asiptete waihu'u za'ra wa'aba mono õ di. Tahawa, asimiza'rese te za ai'ubumroi wa'wa ãhã na hã, 'Re ihâimana u'âsi mono wi, asima rowaptẽrẽ za'ra wa'aba da, Wa'uburé nhimiwada'urizé wi, te te aipawaptob za'ra wa'aba da.
39Tawamhã Pedru norĩ nhiti, te duré apâ mo, Timama ma mreme da. Tawamhã õhõ na si, te duré Timama wi rowaptẽ. 40Timama ma, mreme pari, te duré apâ itẽme timorĩ za'ra. Tawamhã sõtõ za'ra ré, ma duré siza za'ra. Tãma aptâ'â uptabi za'ra wa, te tinhotõ pese za'ra, sõpré waihu'u ãna. Tawamhã utu za'ra da, Zezusi te te 'mahârâ za'ra wamhã, asa te te tãma iwaihu'u za'ra da hã, mare di.
41Tawamhã isiti te duré timorĩ za'ra. Taha pari, ma duré apâ sina siri. Si'ubdatõ tinem na, ma tô oto ãma sahu. Tawamhã sõtõ za'ra ré, ma tô duré apâ siza za'ra. Tahawa, te ãne 'mahârâ za'ra:
— E niha bâ te zahadu asõtõ za'ra wa'wa bété. Te duré zahadu aiwa'utu siroptub za'ra wa'wa. Tô'ã oto. Bâdâ ma tô oto iwa waptãrã. Ti'ai ãma Dasiré Ipodo, te za oto hâiba nhomri ni, aibâ iwasété norĩ ma. 42Oto aiwahutu za'ra wa'aba, wasi'aba'ré da. Õhõta te wei oto mo, dama ihâiba nhomri'wa da hã.
Zezusi hã da te oto dasiwi i'ârizém na rowasu'u
Mateu 26.47-56; Luca 22.47-53; Zuwã 18.3-12
43Zezusi hã te te tãma 'mahârâ za'ra ré, ma Zuda hã itẽme wi, Zezusihi siré aré 're imorĩ hã. Da'ahâ uptabi na ma tô isiré sô aihutu ni, sib'ézé 'wapa ré, uibroi ré zama. Sasedoti ipire norĩ zadawa para, duré rowahutu'wa norĩ zadawa para, duré zudeu norĩ ma, roti'wa norĩ zadawa para zama, ma tô sô aihutu ni. 44Taha wana, ma tô Zuda ãne dama ipire norĩ ma roti za'ra, te te ãma siwi iwaihu'uzéb da hã:
— Aibâ te itob'rata hârâ hã, te za asiwi i'âri 'wa. Tawamhã asiptete sina, te za asiwi isaprõni 'wa.
45Tawamhã Zuda hã Zezusihi u oto wisi wamhã, ãne te 'mahâ:
— Rowahutu'wa.
Tawamhã tob'rata hârâ na, ma tô sawi, Zezusi hã. 46Tawamhã ma tô oto dasiwi âri ni. 47Tawamhã Zezusihi siré isa hã, ma tô sib'ézé 'wapa hã waze. Te te wazere wi, ma romhuri'wa hã ãma po're nhizâ, sasedoti ipire uptabi ma romhuri'wa hã. 48Tawamhã Zezusi hã sô idasihutu norĩ ma, te tinha, ãne:
— E wa hã danhibrob zô dapãrĩ'wa pâ, ma bété we ĩzô aihutu 'wa, sib'ézé 'wapa ré, duré uibroi ré. 49Bâtâ sidâpâsi wa tô asõ'a za'ra wa'aba te 're da'apawapto, ĩnhimirowasu'u na, 'Re ihâimana u'âsi mono nhorõwa 'ri 'wawi, wa'ra 're. Zapre tameb ré, asiwi ĩ'âri aba õ di bété. Tane nherẽ, te za tô asiwi ĩ'âri 'wa, ĩ'ãma rob'ui'érézé hã te ĩsina uwaimrami hâ.
50Tawamhã isiré 're inomro mono norĩ hã aihĩni ma siwi tirẽ. Wara sina, ma dama ropé.
51Aibâ hã iprédupté hã, Zezusihi zarina imorĩ hã ma tô ni'wam norĩ hã siwi ti'â, i'ubuzém na. 52Tane nherẽ, ma tô tãma rẽme za'ra, ti'ubuzé hã. Tawamhã ai'uréiwi te oto dawi wara, iprédupté hã.
Dama roti'wa norĩ hã Zezusihi da, isi'rã'õtõzém na rowasu'u
Mateu 26.57-68; Luca 22.54-55,63-71; Zuwã 18.12-14,19-24
53Tawamhã Zezusi hã te oto dasiwi saprõni ni, sasedoti 'Re ihâimana u'âsi mono ma da'ãma romhuri'wa tisiré norĩ nhipai u ipire uptabi nhorõwa u. Tame iwana ma tô si'rã'õtõ, sasedoti ipire norĩ hã, duré zudeu norĩ ma roti'wa norĩ hã, duré rowahutu'wa norĩ hã.
54Zezusi hã da te dasiwi saprõni ré, te Pedru hã romhâ na te te pibu, sasedoti ipire uptabi nhorõwa u. Tawamhã 'ri 'wawi wa'ra 're, ma ãzé. Sébré wamhã, ma tô nhamra unhama dawa, hâi'ro da, romhuri'wa norĩ me.
55-56Tawamhã sasedoti ipire norĩ hã duré uburé zudeu norĩ ma roti'wa norĩ hã, te ni'wam norĩ zô tinhopré za'ra, Zezusi hã marĩ te te 're i'ab'manharĩ wasété mono zém na, sadawa nhipese na te te siwi ãma hiri da, tawapsi romanu norĩ hã te te siwi wĩrĩ da. Tawamhã da'ahâ na dazadawa nhipese na, Zezusihi ãma isimiroti wasété na da te ãma sa'ra za'ra nherẽ, ãma dasisaze za'ra õ di.
57Tawamhã ni'wam norĩ hã ma tiwahutu zahuré hâiwi, Zezusi hã sadawa nhipese newa, isadawa nhipe te te ãma hiri zahuré da, ãne:
58— Wa norĩ hã wa tô wasi'uihâ na isimirowasu'u hã wapari ni. 'Re ihâimana u'âsi mono nhorõwa hã te za, u, sãmra, ẽtẽ na da te dasiwi i'ri hã. Tawamhã te za, u, aimawi 'ri duré. Da te dasiwi i'ri da hã, mare di. Te te 'ri ré hã, bâdâ si'ubdatõ te za, u, ãma ne, te te ãma romhuri ré hã. Ãne taré dama siwasu'u ré, wa tô wapari ni, wasi'uihâ na.
59Tane nherẽ, 'Re ihâimana u'âsi mono ma da'ãma romhuri'wa norĩ hã te te siwi sadawa pibu zahuré wamhã, aiwab õ di, te te dama iwasu'u zahuré zé hã.
60Tawamhã 'Re ihâimana u'âsi mono ma da'ãma romhuri'wa ipire uptabi hã dawa'wa ma hâiwi za, Zezusi hã uihâ na te te sadanharĩ da, ãne:
— E asadawa na dama ãma wa'rãmi ãna, da te dasiwi i'aiwasu'u wasété na hã. E tô isarina ma tô aiwasédé hã ai'ãma hiri zahuré. E taré.
61Tane nherẽ, te Zezusi hã ari'iwi za, te te ãma wa'rãmi ãna timreme na hã. Tawamhã 'Re ihâimana u'âsi mono ma da'ãma romhuri'wa ipire uptabi hã te duré sadanharĩ na sahu, sasedoti ipire uptabi hã, ãne:
— E tô sena a hã, 'Re ihâimana u'âsi mono te te aipisudu, Danho'reptui'wa da. E tô sena 'Re ihâimana u'âsi mono 'ra, duré a hã.
62Tawamhã Zezusi hã asa te tãma siwasu'u oto:
— Ĩhe. Wa hã, Danho'reptui'wa. Wa hã tô duré 'Re ihâimana u'âsi mono 'ra. A norĩ wa'wa hã aihĩni te za i'madâ'â za'ra wa'wa, ti'ai ãma Dasiré Ipodo hã, 'Re ihâimana u'âsi mono nhimire niwĩ, 're isãmra mono na, iwaihu'u pese 'rata. Hâiwa'a na apâ we morĩ wamhã, te za ãne na i'madâ'â za'ra wa'wa za.
63Tawamhã te te sadawa 'rui wa, ma ti'uza hã hâiwazu, sasedoti ipire uptabi hã. Tawamhã ãne ma tô ãma da'mahâ:
— Tâibâ oto za. Aibâ aimawi norĩ zô, ai'maihârâ aba õ di za, Zezusi te te wama iwasu'u za'ra da hã, iwasété na. 64'Re ihâimana u'âsi mono newa, si'uihâ na ma tô tiwaihu'u pe hã sina tihi, wasine 're hâimana mono nherẽ. Si'uihâ na ma tô timreme wasété. Imreme ma tô iwapari za'ra wa'wa. E marĩ tawamhã, ma tô ãma ipisutu za'ra wa'wa.
Tawamhã aihĩni ma tô sima wẽ za'ra, da te dasiwi wĩrĩ da.
65Tawamhã te te siwi wẽ'õ wa, ma tô nasi ni'wam norĩ hã siwi ubu upto, tizadaipro na. Zazahâ na ma duré siwi ubu ubu. Taha pari, ma tô duré nasi siwi ahâ. Ãne ré, te nasi siwi 'mahâ:
— E 'wa hã ai'azâri'wa. Ma'ãpé, waihu'u.
'Re ihâimana u'âsi mono nhorõwa 'ri 'madâ'â'wa norĩ zama, ma tô siwi ti'â, te te nasi siwi ahâri da.
Pedru hã, Zezusi te te dawi i'udâzém na rowasu'u
Mateu 26.69-75; Luca 22.56-62; Zuwã 18.15-18,25-27
66Ãne ré, te zahadu Pedru hã dame nhamra, 'ri 'wawi wa'ra 're, pi'reba 'ri zahâpâ. Tawamhã tame sãmra ré, ma we pi'õ hã datẽme wi, sasedoti ipire uptabi ma romhuri'wa hã. 67Wisi wi, ma Pedru hã tisã, unhama ãma hâi'ro ré. Tawamhã te te 'madâ'â pese pari, te Pedruhu ma tinha, ãne:
— A zama te duré Zezusihi siré 're aimo, Nazaré ãma 're ihâimana mono siré.
68Tawamhã Pedru te asa, ãne tãma tinha:
— Tane na ĩwaihu'u nherẽ, õ hã ĩma sa'rese õ di.
Tawamhã 'ri nhi'riti u te oto mo, 'ridawa u morĩ da, dapusizéb u. Tawamhã si'a hã ma te oto hâ. 69Tawamhã ma tô romhuri'wa sipi'õ hã tisã Pedru hã, 'ri nhi'riti ãma. Tawamhã i'rata isimasam norĩ ma, te wasu'u za'ra, ãne:
— Ã hã Zezusi norĩ siré, 're imorĩ.
70Tawamhã Pedru te duré tiwi ai'udâ. Tawamhã ãma ronomro õ ré, te duré tãma nharĩ za'ra, i'rata isimasam norĩ hã:
— Tô sena, a hã Zezusi norĩ siré, te 're aimo. A hã tô, Galiléa ãma 're i'aihâimana mono.
71Tawamhã Pedru te asa tãma nharĩ za'ra, ãne:
— Mare di. Tane na ĩwaihu'u nherẽ, õ hã ĩma sa'rese õ di. Tô sena te aiwi udâ za'ra wa'aba di pâ, 'Re ihâimana u'âsi mono te te ĩ'azâri pé.
72Tawamhã si'a hã awa'awi ma tihârâ na sahu. Tawamhã Zezusi te te tãma iwaihu'uzém na, ma oto sina po're puru, Pedru hã. Ãne ma tô Zezusi hã aré tãma waihu'u siro: “Si'a hã tihârâ na te te sahu õ ré, te za si'ubdatõ dawi ĩ'udâ, ĩzadawa para õ nherẽ.”
Tawamhã Zezusihi mreme na sina po're pu'u wa, te oto aiwa'õ, Pedru hã.
Àwon tá yàn lọ́wọ́lọ́wọ́ báyìí:
Marcu 14: xavBP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011, Wycliffe Bible Translators, Inc.All rights reserved.