Marcu 15
15
Apito Pilatu, Zezusi te te isadawa pibuzé wasu'u
Mateu 27.1-2,11-26; Luca 23.1-5,13-25; Zuwã 18.28–19.16
1-2Tawamhã awẽm na mararé, ma duré si'rã'õtõ, sasedoti ipire norĩ hã, duré zudeu norĩ ma roti'wa norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Zezusihi ãma te te sima roti za'ra da, ma si'rã'õtõ, dama roti'wa ipire norĩ me. Taha pari, ma oto siwi pawasisi Zezusi hã, Pilatuhu u te te siwi saprõni da. Tawamhã itẽme te te siwi ãwisi wamhã, Pilatu te Zezusi sadanha, ãne:
— E a hã, zudeu norĩ nhib'apito.
Tawamhã Zezusi te asa tãma tinha, ãne:
— Tahata ma te tô tane hã isarina ĩ'ãma iwaihu.
3Tawamhã sasedoti ipire norĩ hã te Zezusihi ãma iwasédé hã sa'ra za'ra taré, marĩ iwasétére na 'Re ihâimana u'âsi mono ma, da'ãma romhuri'wa norĩ ipire za'ra hã. 4Tahawa, Pilatu te Zezusi 'mahâ, ãne:
— Marĩ ahâ na ma tô ai'ãma sa'ra za'ra ni. E asadawa na tãma ãma wa'rãmi za'ra õ di za.
5Tane nherẽ, tizadawa na te te wa'rãmi õ di, Zezusi hã. Tahawa, ma tô Pilatu hã ãma titob'uzu, tizadawa na te te ãma iwa'rãmi õ zém na.
6-7Wahub sidâpâsi, ma tô apito Pilatu hã misi si te te 're da'azani, dazazéb 're, 're idasimasa mono norĩ hã 're dawairébé mono da, misi si. 'Re ihâimana u'âsi mono, tinhimihâzé te te dama iba'azém na dasa da te dasiwi 're i'manharĩ za'ra mono zém na, ma tô te te 're da'azani, da te tiwi 're iwaptẽrẽ za'ra mono zéb uwaibaba. Aibâ hã dazazéb 're, te dame 're sa, Barabasi na isisi hã. Romanu norĩ da, dasi'wapé watobro wamhã, te te da'mapãrĩ za'ra wa, ma tô séme ni, dazazéb 're. 8Tawamhã ma duré bâtâ na Pilatuhu u tasi'rã'õtõ ni, da te tiwi rowaptẽrẽ za'ra da, te te 're i'manharĩ wẽ mono zéb zarina, misi te te dama 'mairob'ru da, dazazém hawi da'maiwatobro da, apâ da'maimorĩ da. 9-10Tawamhã Pilatu te da'a'mahâ, ãne:
— Zudeu norĩ, e asib'apito za'ra wa'aba ma, wa za rob'ru, apâ morĩ da.
Sasedoti ipire norĩ hã Zezusi te te sõ'ru za'ra wa, ma tô itẽme siwi ãwisi, Pilatuhu u. Ãne na ma tô Pilatu hã ãma da'awaihu'u. 11Pilatu hã Zezusi hã apâ morĩ da, te te nasi ãma da'ab'mahârâ nherẽ, te sasedoti ipire norĩ hã nasi dawada'uri za'ra, Barabasihi si da te waptẽrẽ za'ra da, tiwi, Zezusihi upana te te wazere da. 12Tawamhã Pilatu te duré da'ab'mahârâ na sahu, ãne:
— E marĩ, wa za bété aima ãma pisutu za'ra wa'wa, asib'apito na asiwi 're isisi za'ra wa'aba mono ãma hã, te aima ãma i'uwaimrami za'ra wa'aba zéb da hã.
13— Wedepo'o nhonhi'rãmi na da te dasiwi sasõmri, dâ'â da. — Ãne te nasi sa'ẽtẽ asa ãma 'mahârâ za'ra ni, Pilatu hã.
14— E marĩ te te 're ab'manharĩ wasété mono bâ. — Ãne te ãma da'ab'mahâ, duré Pilatu hã.
Tane nherẽ, dahârâ 'rãihâ na te nasi ãma 'mahârâ za'ra ni, Pilatu hã:
— Wedepo'o nhonhi'rãmi na, da te dasiwi sasõmri, dâ'â da.
15Tawamhã Pilatu hã dama rowẽ za'ra da, ma tô da'wapéi'wa norĩ ma 'ru za'ra, Barabasihi ma si te te tãma rob'ru za'ra da, dazazém hawi watobro da, apâ 're morĩ da sõ'awi. Taha pari, te Zezusi tãma 'ru za'ra, da'wapéi'wa norĩ ma, powawẽ hâi waré na te te siwi 're pré'é mono da, taha pari, te te duré siwi sasõmri da, wedepo'o nhonhi'rãmi na dâ'â da oto.
Da'wapéi'wa norĩ hã Zezusihi ãma ito za'ra zé wasu'u
Mateu 27.27-31; Zuwã 19.1-3
16Tawamhã da'wapéi'wa norĩ hã ma tô Zezusi hã siwi ãwisi, Pilatuhu nhorõwa u, 'ri 're wa'wa nho'õmo u. Tamemhã te oto sitẽme sisô tihârâ za'ra, uburé sitẽme si'rã'õtõ da. 17Tawamhã dasi'ubuzém na ma tô Zezusi hã siwi ãma hâiba ubu, ihâ pré na. 'Wabzéré panhipti na ma duré siwi sõpre. 18Tawamhã sisarina si te duré nasi timreme na sawi za'ra, taré:
— Zudeu norĩ nhib'apito, rowẽ na aihâimana.
19Tawamhã i'rãi wi, ma tô nasi siwi ahâ, wedehu waré na. Te duré nasi siwi upto, tizadaipro na. Te duré nasi hi'rãtitõ tãma asimro, Zezusihi papara, ãma wata za'ra da newa. 20Tawamhã nasi ãma wa'ẽ za'ra parimhã, tisi'ubuzém na te te siwi ãma ihâiba ubu hã ma tô apâ tiwi wazere za'ra. I'uza na ma oto apâ siwi uza. Taha pari, te oto rob u siwi saprõ, wedepo'o nhonhi'rãmi na te te siwi sasõmri da, 'ri nho'õmo nhiti.
Zezusi hã wedepo'o nhonhi'rãmi na da te dasiwi isasõmrizé wasu'u
Mateu 27.32-56; Luca 23.26-49; Zuwã 19.17-30
21Tawamhã bâdâdi na te te siwi saprõni ré, ma tô aibâ hã siwi sõpẽtẽ, Sima na isisi hã, tirom hawi we imorĩ hã, 'ri ahâ u. Isa'ru nhisi hã, Sireni na. Sima hã Alesãdri norĩ mama, Rufuhu me. Tawamhã da'wapéi'wa norĩ hã, Simahã ma, ma tô 'ru za'ra, wedepo'o nhonhi'rãmi hã te te tãma âri da, Zezusihi ma. 22Tawamhã Gogota na romnhisi u, ma tô siwi saprõ, Zezusi hã. Gogota na romnhisi hã, da'rãihi te wasu'u. 23Tawamhã da'wapéi'wa norĩ hã te aré tãma sõmri za'ra, uwa 'rãi wa'u isé hã te te hâ'rẽne da, miha na wedepa wa'u nhisi na, iwazari ré hã. Tane nherẽ, te te hâ'rẽne õ di, Zezusi hã. 24Taha pari, ma tô oto wedepo'o nhonhi'rãmi na siwi sasõ. Te te siwi sasõmri pari, ma tô ẽtẽ zapotore i'ui'éré ré hã nasi sima sãmra da'wapéi'wa norĩ hã, pibui pese na Zezusihi uza hã te te siwi waibu da. 25Zezusi te te siwi isasõmrizém na hã, bâdâ ma tô oto tinho're za'a. 26Zezusihi 'rãi uwaibaba wedepo'o na rob'ui'éré hã ma siwi tété, da te dasiwi iwẽ'õ za'ra zém na, da te dasiwi ãma waihu'u za'ra da. Ãne ãma irob'ui'éré hã: Ã hã, zudeu norĩ nhib'apito.
27Zezusihi siré, ma tô duré aibâ norĩ hã sasõmri zahuré ni, danhibrob zô dapãrĩ'wa norĩ hã. Zezusihi ãma te aiwa'aba zahuré isimire niwĩmhã, duré isimi'e niwĩmhã. 28Ãne ãma iromhâimanazé hã ma tô rob'ui'éré zarina, sina uwaimra, Zezusi hã. Ãne duréihã ãma irob'ui'éré hã: “Iwasété norĩ zu, te za taré dasiwi wẽ'õ ni.” Ãne ãma irob'ui'éré hã, ibaihâ na hã.
29-30Tawamhã iwa'wai baba, da te nasi ro'rahâri za'ra sidâpâsi, te nasi ãma tawa'ẽ za'ra ni, Zezusihi ãma. Nasi ãma da'rã siwanarĩ za'ra sina, te nasi ãma wasété za'ra ni:
— Oro a hã asima roti za, 'ri hã sãmra da, 'Re ihâimana u'âsi mono nhorõwa hã, si'ubdatõ bâdâ hã ai'ãma si'utõrĩ õ ré, duré apâ 'ri da hã. Ma'ãpé, asisõ'reptu na. Wedepo'o nhonhi'rãmi hawi we si'ra na, atâ'â tõ da.
31Duré sasedoti ipire norĩ hã te nasi ãma wa'ẽ sina, ãne sima nharĩ za'ra ãma, rowahutu'wa norĩ me:
— Oro te te 're da'anho'reptui mono za, 'râwi sisõ'reptui õ di bété. 32Ma'ãpé, ãne ré, wedepo'o nhonhi'rãmi hawi we te te si'ra wanho'a, Danho'reptui'wa Izaraéu nhihudu norĩ nhib'apito hã wa te wasina ãma 're i'umnhasi za'ra mono zéb da hã.
Tawamhã isiré isa'o zahuré zama, te nasi tãma nharĩ wasété zahuré, Zezusihi ma.
33Tawamhã ma tô ti'abzuma. Abzuma wamhã, ma tô tirobra, daro mono bâ. Bâdâ siprazéb u, te oto robra si nomro. 34Tawamhã si'ubdatõ bâtâ ãma, te Zezusi hã Timama hã sina 'mahâ, hârâ 'rãihâ na ãne:
— Eloi, Eloi, lema sabactani.
Ihârâzém na, ãma isaprĩzé hã, ãne:
— Ĩnhib'apito, Ĩnhib'apito, e marĩ da, ma tô oto ĩsiwaprosi ĩrẽ ĩhâiba pisutu.
35Tawamhã ni'wam norĩ i'rata isimasam norĩ hã Zezusihi hârâ te te wapari za'ra wamhã, ma tô sima rowasu'u za'ra, ãne:
— Õhõta wapari aba. Eliasihi zô te hâ, te te we pawaptob da.
36Tawamhã ni'wa hã si'aba'ré na ma tô piza're upsõzém ne hã 'mai'â, uwa 'rãi wa'u isé na te te tãma ãma di'i da, Zezusihi ma, iwa'âbâ suru na. Tawamhã wedewaré 'rãsutu na ma tô ãma sapu'u, Zezusihi ma, te te wẽ da, te te upsõmri da. Taha pari, te ãne dama tinha:
— A'â pé wanhimipari za'ra wa'aba, Eliasi we sô morĩ õ'umnhasite, wedepo'o nhonhi'rãmi hawi, te te si'ra da.
37Tawamhã Zezusi hã hârâ 'rãihâ na te hâ, irẽme ma. Taha pari, ma tô oto pẽ'ẽ hai'utõ.
38Zezusi hã dâ'â wi, zazahâ ihâpa hã 'ri 're wa'wa nhitobzé hã ma uihâ na hâihaipo'o aiwa, hâimo hawi pi'reba, 'Re ihâimana u'âsi mono nhorõwa ãma hã. 39Zezusi hã hâiwi sa'o ré, da'wapéi'wa norĩ wada'uri'wa hã isõ're te za, ipapara, romanu hã. Tawamhã Zezusi hã irẽme ma hârâ 'rãihâ na hârâ wamhã, te te wapari wamhã, ma ãma rowaihu'u:
— Nare õ hã, 'Re ihâimana u'âsi mono 'ra.
40Pi'õ norĩ zama, romhâ hawi te Zezusi hã 'madâ'â za'ra. Nima norĩ nhisi hã ãne: Maria Madaréna, duré Salomé, duré Maria, Zuzé norĩ na hã Tiaguhu me. Tiagu hã ihâiba té. 41Zezusi hã Galiléa ãma 're morĩ ré hã, pi'õ norĩ hã isiré te 're nomro. Ma tô duré marĩ na te te siwi 're pawapto. Ta norĩ siré, te duré pi'õ norĩ hã ahâ na Zeruzalẽ u ai'aba'ré, Zezusihi siré. Ta norĩ zama te romhâ hawi siwi 'madâ'â za'ra.
Zezusi hã da te isẽrẽzé wasu'u
Mateu 27.57-61; Luca 23.50-56; Zuwã 19.38-42
42-43Sabadu u bâdâ 're ine mono u, te zudeu norĩ hã te te sima 're ropese za'ra, sabadu na hã te te 're romhuri za'ra mono õ na dâ'âsina. Tawamhã sabadu u oto hâiwahâ wa, romhuri 'rãsutuzéb ãma te Zuzé hã Pilatuhu u mo. Arimatéa ãma te aré 're hâimana, Zuzé hã. Zudeu norĩ ma roti'wa ipire, ta hã. Tahawa, te nasi si'rã'õtõ, siré dama roti'wa ipire za'ra norĩ me. Zuzé hã, 'Re ihâimana u'âsi mono da'ãma 're isib'a'uwẽ mono zéb zô, te 're simipari u'âsi. Tawamhã romhuri zahârizéb u, romhuture wa, ma tô sada aptete Zuzé hã, Pilatuhu u morĩ da, Zezusihi hâiba hã te te tiwi waptẽrẽ da, ab're siromo 're, te te sẽrẽ da. 44Tawamhã Zuzé, Zezusi hã idâ'â na te te tãma rowasu'u wamhã, Pilatu hã ma tô ãma rosa'rata, dâ'â su'u wa. Tawamhã Pilatu hã da'wapéi'wa norĩ wada'uri'wa zô te hâ, idâ'âzém na te te ãma sadanharĩ da, tô sena zô. 45Tawamhã tô sena Zezusi hã idâ'â na te te tãma rowasu'u parimhã, Zuzéhé ma, te oto Pilatu hã tãma ti'ru, Zezusihi hâiba hã ab're siromo 're, te te sẽrẽ da. 46Tawamhã Zuzé hã zazahâ, ma sada uipra, ihâirã hã. Taha pari, Zezusihi hâiba hã ma tô oto si'ra, wedepo'o nhonhi'rãmi hawi. Tawamhã zazahâ ihâirã na ma ubu. Te te ubu pari, ma tô ab're 're tisẽ. Sa'a zahâpâ ẽtẽ wa, ab're siromo 're. Taha pari, te ẽtẽ tõmo wawẽ hã te te pizari, ab're te te ãma iré sitob da hã. 47Ãne Zezusihi hâiba te te sẽrẽ ré, ma tô pi'õ norĩ hã ãma 'madâ'â zahuré, Maria Madaréna hã Mariaha me. Ta hã Zuzéhé na. Tawamhã ma tô sabu zahuré, nimame Zuzé te te isẽrẽzé hã.
Àwon tá yàn lọ́wọ́lọ́wọ́ báyìí:
Marcu 15: xavBP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011, Wycliffe Bible Translators, Inc.All rights reserved.