JOHAN 14
14
Jesu chu Pa Kiang Zotna Lampi ahi
1La lungthim uh lungkham ki’hen, Pathian la ging ui, keima le ei ging tau in.
2Ka Pa In ah umna tam tak a um hi. Chuti hiloleh, nang uh â ding ah mun siam in ka chia hi, ti ding ka hem?
3Chuleh, nang uh â ding ah mun ka siam leh, hung kit ing ka tin, ka kiang ah um dingin hung pui ding ka hi, ka umna nang uh le la umtheina ding un.
4Ka chiana ding leh a lampile la henau hi, a tia.
5Thoma chun a kiang in, “Lalpa, khoi ah chia ding la hi ka hepuau ah, bangti’n a lampi hethei ding ka hiu em?” a tia.
6Jesu’n a kiang in, “Keima hi lampi leh thutak leh hinna ka hi. Keima ah chia lo chu kuama Pa kiang a tung ngai puau hi.
7Keima ei he hileuchin, ka Pa le he ta ding la hiu a; tu’kipat hin ama chu la he tau ah, mu le la mu tau ahi,” a tia.
8Philip chun a kiang in, “Lalpa Pa chu kei uh le ei musak lechin lungawi ing kau,” a tia.
9Jesu’n a kiang in, Philip, zia chanpi hi la kiang in ka um ta’n, ei he diak nai lo la hi maw? Kuale kei ei mu chu Pa mu ahi; Pa chu kei uh ei musak in, bangtidan ah la ti a hem?
10Keima Pa ah ka um hi ti leh, Pa chu keima ah a um hi, ti hi hechian nai lo la hem? La kiang ua thu ka gente hi keima phuak kawm ka gen a hipua’n, keima ah Pa um chun, zia na chu a hun sêm zaw ahi.
11Keima Pa ah um ka hi’dan leh, Pa keima ah um a hi’dan hi hun taksang un; ahiloleh le, a nasepte ziak bêk ah hin ei taksang tau in la.
12Titakzet in ka hil la hiu, kuale keima ei ging chun, ka nasepte hi ama’nle hun sêm in a, keima Pa kiang ah ka chia ding ziakin, ziate sâng ah nasa zaw hile hun sêm ding ahi.
13Keima min ah thil la dot tapo uh chu hi’piak ing ka; Pa chu Chapa ziak ah chawihoi ah a umtheina dingin.
14Nang un ka min ah la dot taphot uh chu, bang hiziang taleh, zia chu hi’piak ing ka.
Thagau Thiangtho Piak Tiamna
15Nang un lei hepiu leh ka thupiakte jawm in lau.
16Chuleh, keima’n Pa kiang in don ing ka tin, ama chun Thamuanpa dang, bangtik lai ah le la kiang ua um zing ding chu hun sawl piak ding ahi.
17Zia chu Thagau thutak ah um, khawvel in a mu lo leh a het lo ziak ah a la chan theilo kha ahi. Himaleh, ama chu la kiang ua um zing leh, nangmau ah chêngden ahiziak in la henau hi.
18Nauchaga gual in hun nusia pua’ng ka; la kiang ua hung kit ding ka hi.
19Hun chomkhat zaw leh khawvel in ei mu ta pua’n tin; himaleh nang un chu ei mu ding la hiu; keima ka hin zing ziakin, nang uh le hing zing ding la hiu.
20Ziaphat chuleh, nang un keima Pa ah ka um leh, nangmau ah kei um ka hi’dante hi hun hechian ta’n lau.
21Kuale ka thupiakte nei ah jawm chu, keima ei hepi ahi’n; kuale, keima ei hepi chu, ka Pa’n le hepi ding ahi, keima’nle ama chu hepi ing ka tin, a kiang ah kimusak ding ka hi, a tia.
22Juda (Iskariot lozawk) chun a kiang in, Lalpa, kei uh kiang ah la kimusak ah, khawvel kiang ah la kimusak lo ding chu bangtidan a hem? a tia.
23Jesu’n a dawnhu ah, min keima ei hepiu chun ka thu jawm intiu in; zia tak chuleh ka Pa’n amau chu hepi in a; chuleh, a kiang un hung ing ka tiu in, amau ah chun hung chêng ding ka hiu.
24Kuale, keima ei hepi lo chun, ka thugente le a zui nuam diak puau hi; ka thugen la hiatteu hi kei â ahi puai, Pa ei sawlpa â ahi zawi.
25La kiang ua ka um sung ngei hin zia thute hi ka hun gen la hiu hi.
26Ahi’n, Genpiakpa, Thagau Thiangtho ngei chu ka min in, Pa’n hun sawl intin, ama chun thil bangkim hun hil intin, la kiang ua ka thugen zosia hi hun hetdawsak kit ding ahi.
27Thamuanna ka nutsia piak la hiu; keima thamuanna ngei chu ka hun piak la hiu; khawvel in a hun piak gual in ka hun pia puai. La lungthim uh lungkham ki’hen la, lau le lau diak ki’hen.
28La kiang ua, chia mang ing ka tin, hung kit ding ka hi, ka ti kha la he tau hi. Keima lei hepiu leh, pa kiang ah chia ding ka hi, ka ti ziak ah hin kipak ma ma ding la hiu; ka pa chu keima sâng ah lopi zaw ahi ziak in.
29Tu’hin a hun tun masang in ka hil masak la hiu; a hun hung tun tak leh la taksan ziang theina ding un.
30Tu’khêl vang la kiang un thu tampi gen ta pua’ng ka; zia khawvel vaihawmpa hi a hung tâk ziak in; ahi’n la, ama chun keima chung in thu neina a nei puai.
31Himaleh, keima’n Pa chu ka hepi hi ti, khawvel in a hettheina ding un, Pa ei thupiakte gual gual in thil bangkim chu ka bawl zaw ding ahi. Kipan un, zia kipat hin pawtdok tai tiu, a tia.
Àwon tá yàn lọ́wọ́lọ́wọ́ báyìí:
JOHAN 14: VAIPBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.