LUKA 11
11
Jesu’n Pauchap Dan A Hil
(Mat 6.9-13; 7.7-11)
1Jesu chu mun khat in a pauchap ah, a zaw phat in, a nungzuite lak ah pakhat chun a kiang in, “Lalpa, Johan in a nungzuite a hil sek gual in pauchap dan ei hil in,” a hung tia.
2A kiang un, “La pauchap tak ua leh zia gual hin gen sek un:
‘Ka Pau, la min ja in um hen.
La gam hung tung hen.
3Nisi’n ka nêkkhop uh an ei pia’n.
4Ka chung ua thil hikhialte ka ngaidam sek gual un,
nang inle ka thil hikhialteu ei ngaidam in.
Chetna hun ah ei puilût kin’ ti in,” a tia.
Pauchap Gunchu Ding A Hilna
5Chuleh, a kiang un, “La lak ua kua a hem khat in gualpha pakhat nei hen la, jankhang in a kiang in vachia in: ‘Lawm, vaithum pathum ei thunglâksak in;
6ka gual dawi khat khualzin a hung tung hen, a ma-âng ah lui ding bangma ka nei puai’ hang ti leh;
7ama chun, In sung ah kipat in, ‘Ei subuai kin, tun kot a kikhâk ta’n; ka chate le ka kiang ah jalkhun ah a ipmu tau in, tho in ka hung pia thei ta puai’ ti’n a la dawnhu ta leh;
8ka hil la hiu, a gualpa ahi ziakin tho in vapia ziang lo maleh, a dot tun tun ziak ah chun tho in a dawi jat chu vapia tho tho in a,” a tia.
9Chutichun, ka hil la hiu, Don un, piak hi’n lau; hawl un, mu’n lau; kiu un, kot chu hon piak hi’n lau.
10A don tapo in a mu sek un; a hawl tapo in a mu sek ui; kotkhak kiu tapo chu hon piak hiding a hiu.
11Nanghaw lak ah a chapa’n sanga don taleh, kua a hem sanga pelo ah gûl pia ding?
12Aktui don ta leh ainuvet a pia diam leh?
13Nanghaw migilo in bawn la chateu thilpha piakna châng la het ua leh, la pau van ah um chun adonte chu Thagau Thiangtho pena lawm lawm in ah e! a tia.
Jesu leh Belzebul
(Mat 12.22-30; Mar 3.20-27)
14Tichun, thitha buak vop pautheilo pakhat a nawdok piak a; thitha chu a pawt daw phatin, pautheilo chu a hung paudok ta’; mipite chun lamdang a sa ma mau a.
15 #
Mat 9.34; 10.25 Himaleh, a lak ua mi khenkhat chun, “Thithate chung ah vaihawmpa, Belzebul ziak ah thithate chu nawdok thei ahi,” a tiu a.
16 #
Mat 12.38; 16.1; Mar 8.11 Ziaphatchun, midang lawi khat chun, ama patepna’n van ah kipat thilmak a hung phût un.
17Himaleh, ama chun a ngaituanau chu a la he, a kiang un, kua gam hilehle amau leh amau kilangkhen him him chu a kisumangthai sek ui; Insung khatle amau leh amau kilangkhen chule a pûk sek ui.
18Setan le ama leh ama kikhen ta leh, a gam bangti’n dingdok thei ding a hem? Belzebul ziak ah thithate nawdok ahi lei tingal un.
19Belzebul ziak ah thithate nawdok ka hi chun, la dawithiamteu in kua ziak ah nawdok a hiu em? Ziaziakchun, ziate chu la chung ua vaihawm dingte chu a hiu.
20Himaleh, Pathian khut ziak ah thithate nawdok ka hi chun, Pathian gam la kiang un a hung tung tai.
21Mihat chun galthuam bukim tawh a In ah a um sung sia chu a thuamphuate le bit tak in a um hi.
22Himaleh, ama sâng ah hatzaw a hung ah, a hung thâtzaw leh chu a kisuanpi gâlvan zosia a hung lâkpiak ah, gâllâk in a hawm jak piak sek hi.
23 #
Mar 9.40
Keima lam ah pang lo chu ei do ahi’n, ei lâk khawmpi lo chu ei thejak piak ahi.
Thitha buak Hung Kile’kit
(Mat 12.43-45)
24Thitha buak chu mi pakhat sung ah kipat in a pawtdok ah, kichawlna ding hawl in gamkeu in a vâk tawl tawl ah, himaleh, a mu zaw tâk lo phatin, “Ka hung pawtna In ma ma khan vachia kit mai ing ka” a ti’n;
25a hung kit leh, phiat thiansa leh siamtupsa’n a mu ta’n.
26A vachia ah, thitha dang, ama sâng ah gilozaw pasagi a hun pui ah, a lut tau ah; zia tak ah chun a hung chêng tau hi. Ziaphatchun, zia pa hindan chu a masa sâng ah khan nasa tak in a hung sezaw tai, a tia.
Mi Hampha Chu
27Zia thute a gen lai tak chun, Mipi lak ah chun numei pakhat a hung kiko a, “Nang hun vopnu sul leh, nawitui ah nang hun chawmnu chu a hampha na lawm lawm e!” a hun tia.
28Himaleh, ama chun, “Ahi, himaleh, Pathian thu he ah zuite chu mi hampha zaw a hiu,” a tia.
Jonah Tepte’na
(Mat 12.38-42)
29 #
Mat 16.4; Mar 8.12 Mipi a hung tam ma ma phat un, thu a hun gen pan ah, Tu’lai khang hi chu khang gilo tak a hiu; tepte’na a hawl un, himaleh, Jonah tepte’na tilo ngal tepte’na dang piak hita pua’n au.
30 #
Jon 3.4
Jonah kha Nineveh khua mite â ding ah tepte’na ahi gual khan, Mihing Chapa hile tu’lai khangthakte â ding ah tepte’na ahi.
31 #
1 Le 10.1-10; 2 Kh 9.1-12 Vaihawm ni tak leh simlam lengnu kha, tu’lai khangthakte hi tawh hung ding khawm intiu in, ama chun thiamlo hun chansak in a: Ama chu lei langkhat lam ah kipat in, Solomon pilna ngaitha ding mai mai in a hung ahi kha! En tiam un, Solomon sâng ah lopi zaw zia tak ah hin a um hi!
32 #
Jon 3.5
Nineveh khua mite kha le vaihawm ni tak leh tu’lai khangthakte hitawh hung ding khawm intiu in, thiamlo hun chansak in au. Amau haw chun Jonah thugen ziakin a gitlonateu a haisan tau a: En tiam un, Jonah sâng ah lopi zaw zia’ hin a um hi!
Taksa ah Vâk chu
(Mat 5.15; 6.22-23)
33 #
Mat 5.15; Mar 4.21; Luk 8.16 Kuama’n thaumei vak in law nuai in a koi ngai puau in, a tunna’n a tung zaw sek ui; mi a hung lutte’n a vâk chu a mu’na ding un.
34Taksa ah vâk chu mit ahi; ziaziakchun, mit hi a vâk hoi leh taksa pum chu a vâk ah; himaleh, mit hi a siat chun, taksa hi a pum in a thim ahi mai hi.
35Ziakziakchun, nangma ah vâk chu thim a hilona dingin chingthei un.
36La taksa chu a pum ah a vâk chun, nangma ah thimna um pua’n tin, thaumei pha tak ah kivâk gual chun, bangkim chu hung vâk suak ziang ding ahi, a tia.
Pharisaite leh Lekhazikte A Demna
(Mat 23.1-36; Mar 12.38-40)
37Zia thu a gen lai tak ah chun, Pharisai mi pakhat in a In ah an ne dingin a chial a; a vachia ah, a lut ah, an ne dingin a kichu’n.
38Khut sawp lo ah an ne ding ah a um chu, Pharisai pa chun a mu in mak a sa ma ma a.
39Lalpa chun a kiang in, Nanghaw Pharisaite hin, no leh kuangte hi a pawlam bep la sawp thiang un; himaleh, la sunggil lam uh chu du-âmna leh nunsiatna dim ahi.
40Nanghaw mingolte haw, a paw lam siampa chun a sunglam le a siam tho tho pua a hem?
41Himaleh, la nei leh lamteu chu migentheite kiang in pia zaw leu chin, nang uh â dingin bangkim a thiang ahi.
42 #
Thp 27.30
Ahi’n, nanghaw Pharisaite haw, la chung uh a gik hi! Pudinate, lokhate leh anche lohingte sawm ah khat la pesek ui; ahi’n, diktatna leh Pathian hepina chu la limsak puau hi, ziate chu ei vei la bawl ding uh; a dangte chule thul diak lo in.
43Nanghaw Pharisaite haw, la chung uh a gik hi! Sunagog ah chutna mun sâng sâng la ngainau a, kaithial ah chibai kibukte la nuam ui.
44La chung uh a gikna e! Thân tepte’na a umlo ziak ah mite’n thân a hi’lam helo ah, a chung ah mi a nop nop ua a chia seknau haw tawhbang chu la hiu hi, a tia.
45Ziaphatchun, danthiam mi pakhat in a hun dawnhu a, “Hotupa, la thugen chun keihaw lei selpho na e!” a hun tia.
46Ama chun, “Nanghaw dan thiamte haw la chung uh a gik hi! van-gik tak tak in la siam un, mi la puaksak sek ui, nanghaw’n la la khutmûk chau inle la sukha nuam puau hi.
47La chung uh a gik hi! La pu la pateu thâsa jawlneite thân haw chu nang un a suang la dawu a.
48A dik tak ah gen in, la pu la pateu thilbawl haw chu pha la sakpi ten uh ahi hilam! Amau in a la that ua, nang un a suang la dawu a!
49Ziaziak hin, Pathian pilna chun zia gual hin a la gen hi: ‘Jawlneite leh nungzuite hun sawl ing ka tin, a lak ua khenkhat chu that intiu in, khen khat chu genthei tak in bawl in au, a ti kha.
50Ziaziakchun, khawvel siamtil ah kipat jawlneite thisan kisua zosia kha, tu’lai khangthakte chung ah hin kiphût ding ahi.
51 #
Thl 4.8; 2 Kh 24.20,21 Abel thisan ah kipat, mâichâm leh mun thiangtho kikâl ah Zekhariah thisan kisua tiang in, tu’lai khangthakte chung ah hin kiphût ding a hi.
52Nanghaw dan thiamte haw, la chung uh a gik hi! hetna chabi chu la kol un, nangmau la la lut nuam puau a, midang a hung lut nuamte la la lutsak nuam diak puau in,” a tia.
53A chia daw phatin, lekhazikte leh Pharisaite chun nasa tak in a hun lang bawl tau a; ama nialna ding thu tam tak a hun ngaitua tau a,
54a paukhialna bang hem ah mat gua’n, a chânggu zing tau hi.
Àwon tá yàn lọ́wọ́lọ́wọ́ báyìí:
LUKA 11: VAIPBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.