LUKA 15
15
Belam Mang Tekhinthu
(Mat 18.12-14)
1 #
Luk 5.29,30 A thugen ngaitha dingin sedawlte leh migilote a hung khawm ua.
2Pharisaite leh lekhazikte chun, “Zia pa hin migilote a lop in, a lak un an a ne sek hi,” ti’n a phun sau sau tau a.
3Ama chun zia tekhinthu hi a gen a:
4La lak un mi pakhat hin belam za khat nei hen la, a lak un pakhat chu mansua taleh, sawmkua leh kuate chu gamthip ah nusia in, a mang pen chu a mudaw masia vahawl lo ding kua a hem?
5A mudaw tak leh, a liangko in hun pua’n tin, kipak ma ma in,
6a In a hung tun tak leh, a Invêngte leh a gualte ko khawm in, a kiang un, ei hung kipakpiu in, ka belam matsua kha ka mu kit tai ti ding a hi.
7Ka hil la hiu, zia gual ma chun, mipha sawmkua leh kua lungheina nei diaklote chung sâng in, migilo pakhat lungheina chung in van ah mi kipak zaw’n au.
Dangka Mang Tekhinthu
8Numei kua a hem khat in dangka thik sawm nei hen la, a lak ah pakhat mansua taleh, thaumei vak in, munphiat in, a mu kit masia gunchu tak ah hawl lo ding kua a hem um?
9Ahi’n, a hun mudaw tak leh, a Invêngte leh a gualte ko khawm in, ei hung kipakpiu in, ka dangka thik matsua kha ka mu kit tai ti ding a hi.
10Ka hil la hiu, zia gual ma chun, Pathian vansawlchâkte ma ah chun migilo pakhat lungheina ziakin kipakna a um sek ahi, a tia.
Chapa Taimang Tekhinthu
11Chuleh, Jesu’n zia gual hin a gen kit a: Kua a hem khat in chapa pani a nei in,
12a neuzawpa chun a pa kiang in, “He pa, ka gochan ding sia chu ei pia’n,” a tia. Tichun, a nei zosia chu a hawm piak tai.
13Chomkhat zaw in, a chapa neuzaw chun a chan ding zosia lakhawm in, khual gamla tak in a chia ta’n; kinoptel tak in a um ah, a nei zosia chu a sumang zo tai.
14A sum a mat zaw phatin, zia gam ah chun kial huaisia tak a tung ta’n; nêk ding a hung tasam tai.
15Tichun, zia gam ah mi pakhat kiang ah chun kilaw dingin a vakipia ta’n; zia pa chun vok an pia ding in a lou lam in a sawl a.
16Kuama’n nêk ding bangma a piak lo ziak un, vokchate thil hawng nêk haw chule a ducha tai.
17A hung kihetdaw phatin, “Ka pa kiang ah suak sumlawte’n nêksên lo a nei tam siat uh tawh, kei la zia hin gilkial ah thi ding ka hi ta’n!
18Kipan ing ka tin, ka pa kiang in, He pa, van ah mi chung leh nangma mit mu in thil ka hi’khial tai.
19La chapa tâkle ka hita puai; la kiang ah suak sumlawte lak ah pakhat gual hin ei siam mai ta’n, vati ta’ng ka,” a tia.
20Tichun, a kipan ah, a pa kiang lam a zuan tai. Ahi’n, gamla tak ah kipat in a pa’n a hun mu ta’n, a hepi ma ma ah, a del ah, a ngawng kawi in a chawp ngawi ngawi tai.
21Chun, a chapa chun a kiang in, “He pa, van ah mi chung leh nangma mit mu in thil ka hi’khial tai, la chapa tâkle ka hita puai,” a tia.
22Ahi’n, a pa chun a suakte kiang ah, kin tak in, “Puan phapen kha hun la’n silsak un; chuleh, khutsebi busak unla, kengtawdap le hun busak un.
23Chuleh, bawngno thau pen kha hun kai un la that un, kipak tak in nei tiu.
24Zia ka chapa hi a thisa hung hing kit, a mangsa kimu kit ahi,” a tia. Tichun, nunnop a hun bawl pan tau a.
25Zia pet ah chun, a chapa upa zaw chu lou ah kuan ahi’n; In kiang a hung tun phatin, La sak git leh lâm thawm a hun he ta’n.
26Tichun, suak pakhat a ko ah, bang bawl a hitau em? ti’n a dong a.
27Ama chun a kiang in, la nau a hung tung in, dam tak ah a hung tun ziakin la pa’n bawngno thau tak khat a that ah ahi, a tia.
28Ama chu a lungna ta’n, a lut nuam ta puai; a pa a hung pawt ah, a hung thêm a.
29Ahiziakin, ama chun a pa kiang in, ngaitia, kum zia chanpi hi la suak gual in na ka sêm ta’n, la thupiakte le ka botsia kha puai; himaleh, ka gualte tawh nunnop ka bawlna dingin kelno khatle lei penai puai.
30Himaleh, zia la chapa, nawchizuakte kiang ah la sum nezopa hi a hung phatin, ama â dingin bawngno thaupen la tha piak in, a tia.
31A pa chun a kiang in, ka chapa, ka kiang ah um zing la hi hilam, ka nei zosia hi nang â ahi.
32Zia la nau hi a thisa hing kit ahi’n, a mangsa kimu kit ahi; ziaziakchun, kipak in limna I bawl ding him uh ahi a tia, ti’n a gen tai.
Àwon tá yàn lọ́wọ́lọ́wọ́ báyìí:
LUKA 15: VAIPBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.