LUKA 3
3
Baptispa Johan leh A Nasep
(Mat 3.1-12; Mar 1.1-8; Joh 1.19-28)
1Lengpa Tiberias vaihawm, kum sawm leh nga tin kum in, Pontia Pilat chu Judea gam awp in a hung pang ah, Herod chu Galili gam ah vaihawm in a pang ah, a suapipa Philip chu Ituria leh Trakoniti gam ah vaihawm in a pang ah, Lusania chu Abilin gam ah vaihawm in a pang in;
2Anna leh Kaiapha chu thiampu lianpen ah a pan lai ua chun, Zekhariah chapa Johan gamthip ah um kiang ah, Pathian in thu a hun gen a.
3Ama chun, gitlona ngaidamna ding ah gitlo haisanna baptisma thu chu, Jordan lui kîmvêl ah chun a gen vêl vêl a.
4 #
Isa 40.3-5
Jawlnei Isai lekhabu chun zia gual hin a la kizik a:
“Gamthip ah mi kiko aw chun:
Lalpa lampi a la siamtup unla,
a lampite chu hi’zang un.
5A guam kuaknate chu vuk dim hi’ntin,
a tângte leh a mualte chu sukniam hi’ntin;
chuleh, a kawinate chu sukzan hi’ntin,
a photnate chule suknâm hiding ahi.
6Ziaphat chuleh, mi zosia’n,
Pathian hukdamna hun mu ta’n au”.
7 #
Mat 12.34; 23.33 Johan in baptisma chang ding ah hung mipite kiang ah chun, “Aw, nanghaw gûl suante haw! Lungnatna hung tung ding chu jamsan dingin kua’n a hun hil em?
8 #
Joh 8.33
Gitlo haisanna tawh kigûn in ga hun sua phot tau in. La lunggil un, ‘Abraham chu ei suanpa ahi’ ti’n kisuang ziang kiu in; ka hil la hiu, Pathian in zia suangchangte hile Abraham chate a suaksak thei hi.
9 #
Mat 7.19
Tu’kipat hin thingbul tin ah heicha kikoi zo ei tai; thingga pha’ galo taphot chu a phûk un, mei ah a pai lut sek ui,” a tia.
10Ziaphatchun, mipite chun a kiang in, “A leh, bang ka bawl ta diam uh?” a hun tiu a.
11Ama chun a kiang un, “Kuale puanâk pani nei chun a neilote hawm unla, nêk ding nei chunle zia gual ma chun hiu in,” a tia.
12 #
Luk 7.29
Chuleh, sedawlte baptisma chang ding ah hungte chunle, “Hotupa, kei un bang ka bawl diam uh?” a hung tiu a.
13Ama chun a kiang un, “La lâk ding ua kigen jat bep chu lau inla, a khêl a vâl la kiu in,” a tia.
14Sepaite’n le a hun dong un, “Aleh, kei unla, bang ka bawl diam uh?” a hung tiu a. Ama chun, “Dik lo tak ah mi suklau a hem, liausak a hem in mi paisa lâkpiak kiu in, la law jat un lungawi un,” a tia.
15Mipite chun Johan chu, Messiah kiti chu ho a hiziang ta dia aw! ti ah ngaituanau buai tak ah a um lai tak un,
16Johan in a kiang un, “Kei hin vang tui in ka baptis sek hi; ahi’n, keima sâng ah lopi zaw hung ding ahi, a kengtawdap khau tham tâk le ka hi puai; ama chun Thagau Thiangtho leh mei in hun baptis ding ahi.
17A khut in phajâp a chawi ah; a phual ah a si jap thiang intin, bupang ah sungkhawm in ah; a si’te chu vang mei mit theilo ah chun hâltum in a,” a tia.
18Chun, tîlkhona thu tam tak in mipite kiang in chanchinpha a gen a.
19 #
Mat 14.3,4; Mar 6.17,18 Himaleh, gam awppa Herod khan, a suapipa Philip ji Herodias a la kichenpi thu ah khan, Johan in Herod chu awimaw in a la vau a;
20a thil hi’khialna belap dingin Johan chu suangkul in a khum nalai sêt hi.
Jesu Baptisma Channa
(Mat 3.13-17; Mar 1.9-11)
21Mipi zosia’n baptisma a chan zaw phat un, Jesu le baptisma a hung chang ah, a pauchap leh van a hung kihong a,
22 #
Thl 22.2; Sam 2.7; Isa 42.1; Mat 3.17; Mar 1.11; Luk 9.35 Thagau Thiangtho chu vakhu gual in a chung in a hung chû. Van ah kipat aw hung pawt chun, “Nangma, ka Chapa dawi tak la hi, la chung ah ka kipak ma ma hi,” a hun tia.
Jesu Pianna Phunggui
(Mat 1.1-17)
23Jesu’n na a hun sep pat lai ah chun, ama chu kum sawmthum vêl mi a hita’n; mi ngai in ama chu Joseph chapa ahi’n, ama chu Heli chapa ahi’n;
24ama chu Matthat chapa ahi’n, ama chu Levi chapa ahi’n, ama chu Melkhi chapa ahi’n, ama chu Jannai chapa ahi’n, ama chu Joseph chapa ahi’n;
25ama chu Mattathias chapa ahi’n, ama chu Amos chapa ahi’n, ama chu Nahum chapa ahi’n, ama chu Esli chapa ahi’n, ama chu Naggai chapa ahi’n;
26ama chu Maath chapa ahi’n, ama chu Mattathias chapa ahi’n, ama chu Semein chapa ahi’n, ama chu Joseph chapa ahi’n, ama chu Joda chapa ahi’n;
27ama chu Joanan chapa ahi’n, ama chu Rhesa chapa ahi’n, ama chu Zerubbabel chapa ahi’n, ama chu Shealtiel chapa ahi’n, ama chu Neri chapa ahi’n;
28ama chu Melkhi chapa ahi’n, ama chu Addi chapa ahi’n; ama chu Kosam chapa ahi’n, ama chu Elmadam chapa ahi’n, ama chu Er chapa ahi’n,
29ama chu Joshua chapa ahi’n, ama chu Eliezer chapa ahi’n, ama chu Jorim chapa ahi’n, ama chu Matthat chapa ahi’n, ama chu Levi chapa ahi’n,
30ama chu Simeon chapa ahi’n, ama chu Judah chapa ahi’n, ama chu Joseph chapa ahi’n, ama chu Jonam chapa ahi’n, ama chu Eliakim chapa ahi’n,
31ama chu Melea chapa ahi’n, ama chu Menna chapa ahi’n, ama chu Mattatha chapa ahi’n, ama chu Nathan chapa ahi’n, ama chu David chapa ahi’n,
32ama chu Jesse chapa ahi’n, ama chu Obed chapa ahi’n, ama chu Boaz chapa ahi’n, ama chu Sala chapa ahi’n, ama chu Nahshon chapa ahi’n,
33ama chu Aminadab chapa ahi’n, ama chu Admin chapa ahi’n ama chu Arni chapa ahi’n, ama chu Hezron chapa ahi’n, ama chu Perez chapa ahi’n, ama chu Judah chapa ahi’n,
34ama chu Jakob chapa ahi’n, ama chu Isak chapa ahi’n, ama chu Abraham chapa ahi’n, ama chu Terah chapa ahi’n, ama chu Nahor chapa ahi’n,
35ama chu Serug chapa ahi’n, ama chu Reu chapa ahi’n, ama chu Peleg chapa ahi’n, ama chu Eber chapa ahi’n, ama chu Shelah chapa a hin,
36ama chu Kaina’n chapa ahi’n, ama chu Arphaksad chapa ahi’n, ama chu Shem chapa ahi’n, ama chu Noah chapa ahi’n, ama chu Lamek chapa ahi’n,
37ama chu Methuselah chapa ahi’n, ama chu Enok chapa ahi’n, ama chu Jared chapa ahi’n, ama chu Mahalalel chapa ahi’n, ama chu Kaina’n chapa ahi’n,
38ama chu Enos chapa ahi’n, ama chu Seth chapa ahi’n, ama chu Adam chapa ahi’n, ama chu Pathian chapa ahi.
Àwon tá yàn lọ́wọ́lọ́wọ́ báyìí:
LUKA 3: VAIPBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.