MARKA 16
16
Jesu Thawkitna
(Mat 28.1-8; Luk 24.1-12; Joh 20.1-10)
1Sabbath ni a hung bei phatin, Mari Makdalin leh Jakob nu leh Salome tawh, thân lam in a vachiau ah, ama a nu’ ding un gimtui a chawu a.
2Hapta khat ni masa pen ah, jingkal matak, ni sua jul in thân lam in a chiau a:
3“Thân kotkhak ah kipat suang chu kua’n ei likdaw piak ta dia aw!” a kiti lai un,
4a et ua leh suang chu likdaw sa’n a la um tai; suang chu a lianten ngal a.
5Thân sung ah chun a lut ua leh, tangval pakhat puan chual vâm tak ah kivan, a changlam pang ah kichu chu a muu a; a lau ma mau a.
6Ama chun, a kiang un, “Lau kiun: Nazareth Jesu a khetden uh kha hawl hiding la hiu a; ama chu a thokit tai, zia hin a um ta puai; a kisialna mun hile en ma tiam un;
7 #
Mat 26.32; Mar 14.28 ahi’n la, chiau inla, a nungzuite leh Peter vahil unla, La malam un Galili lam ah a chia hi, la kiang ua a gen tâk gual khan zia tak chun vamu’n lau, ti vahil un,” a tia.
8Tichun, maksa talua kithing in, kin tak in a chia tau a, thân ah kipat chun a hung tai ua; a lau ziak un kuama kiang in bangma a gen puau hi. A kiang ua thu a piak zosia chu Peter kiang ah umte kiang in a hilsawn tau a. Zia nung ah chun, zia kumtuang hukdamna thu thiangtho leh, mangthai thei talo ding chu, sualam ah kipat tumlam tiang ah puangjak dingin, Jesu’n amau chu a sawldok tai#Zia châng 9 tiang ah kipat a tawp lam chan hi Ms khen khat in a la ta puau hi
Mari Makdalin Kiang ah Jesu Kilâkna
(Mat 28.9-10; Joh 20.11-18)
9Tichun, Jesu chu hapta khat ni masa pen jingkal ah a thawkit nung chun, Mari Makdalin, a sung ah thitha sagi a nawdaw piak nu kiang in a hung kilâk masa pen a.
10Ama chu Jesu umpi sekte kiang in a vachia ah, mithi ngâi ah a la kâ lai ua chun a vahil tai.
11Ama chu a hing kit ta’n, amanu chunle a mu tai, ti a het nung unle a taksang thei puau hi.
Jesu A Nungzui Panite Kiang ah A Kilâkna
(Luk 24.13-35)
12Zia nung ah chun a nungzuite pani, khualzin lampi a chia lai un, ama chu mêl chuam pu’n a vakilâk a.
13Amau le a hung kit ua, a lawiteu a hung hil ua leh, amau thu chule a la taksang kit puau hi.
Jesu’n A Nungzuite A Sawlna
(Mat 28.16-20; Luk 24.36-49; Joh 20.19-23; Nas 1.6-8)
14Chun, zia nung ah chun sawm leh khatte kiang ah a an nêk lai un a kilâk ah, a thawkit nung mute thu gen nasan le a taksan lo ziak un. A ginlânau leh lung tâkna ziak un a vau a.
15 #
Nas 1.8
Tichun, a kiang un, “Khawvel zosia’n chiau inla, thilsiam zosia kiang in chanchinpha vagen un.
16Kuale a ging ah baptisma chang chu hukdam in um intin; himaleh, a ginglote chun thiamlo chang in au.
17Chun, a gingte chu zia tepte’na hin zui pek in a: Ka min in thithate nawdok intiu in, pauthakte’n hung pau in au.
18Gûlte khut in la’n tin uh, thina gu bang gual dawn maleu bangma ti pua’n au; damlote chung ah khut nga’n tin uh, hung dam jel in au,” a tia.
Jesu Van ah A Kalna
(Luk 24.50-53; Nas 1.9-11)
19 #
Nas 1.9-11
Lalpa chun, zia thute chu a gen zaw phatin, van lam ah pui to in a um ta’n, Pathian changlam ah a hang chu tai.
20Tichun, amau chu a kuandok un, mun tin in thu a gen ua, Lalpa‘n amau ah na a sêm pek ah, a thugenteu chu teptênate’n zui in, a sudet pek hi.
Àwon tá yàn lọ́wọ́lọ́wọ́ báyìí:
MARKA 16: VAIPBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.