Gbantumsə̀ bəd Tùsá 2
2
Yaaké Nwul Gìdń bìá
1Zɔ̀ŋ aa nyàm aa bə̀ dá wálke Pentekosta bə̀ ma'ǹ bərə yaà wə́ə́ gə́, nɛ́b bagké bəd wál ìì kùm ɔ̀dba, zɔ̀ŋ nə́ŋ̀ní ba, boò kóólé. 2Kə̀ nwɔŋ aa nuù yée kíinní, dìímsə̀ nə́ŋ̀ dùm vúgà lɛgú, kìínmbə̀ nwul kpɛŋké nə́ŋ̀ pɛ̀b sə̀n kíin. Nwul lə, yaà nyìì wúl aa ìì kùm dú rə rú. 3Kàanyée gə́, bə̀ bé' in bəd kìínmbə̀ laa mɛ́l kíin, yaà bə̀ vúgə́l boò sunú. Bə̀ pɛɛ̀l gɔ̀ŋ gɔ̀ŋ, yaà bə̀ kùm nɛ́b aa wərə̀ rə yílə́ nə́ŋ̀ nə́ŋ̀. 4Boò kóólé, bə̀ nyìì bəd kə̀ Nwul Gìdńná. Bít bə̀ pìì mɛ́l nwɔŋ luùm gɔ̀ŋ bəd gáàmbìá, kə̀ nɛɛ̀n aa Nwul Gìdń pii bə̀ kpɛŋsɛ́l gáàmbə̀ rə kíin.
5Urusalima bìlə́ rə, Yahudu bəd kùmsə̀n wərà, bə̀ ləə Vɛnɛ́b sɔ̀ɔ̀n, bə̀ vúgə́là yɛ́b gɔ̀ŋ gɔ̀ŋ bəd ba. 6Zɔ̀ŋ aa nɛ́b bəd kìì nwɔŋ aa yéení, nɛ́b zùúm bəd nùù yaà bə̀ wál sə̀n wərà. Boò kóólé, tɛ́m boò gíb yàá; kàandə, kóó nɛ́ɛ̀réè, kìì nɛ́b bagké bəd tə́ nwɔŋ gáàm kə̀ oò nwɔŋú. 7In aarə kò' bə̀ yíl gbàákù, bít bə̀ bàà: «Nɛ́b bəraa tə́ nwɔŋ gáàm yée, boò kóólé bə̀ nɛ́b Galili yɛ́b bə bə̀ géè? 8Zá, ééleè bə́n kiìn bə̀ tə́ taà nwɔŋ bə́n yɛ́b bə bə̀ bəd gáàm gú? 9Nɛ́b kambəd tə́ zɔ̀ŋə obə́n tə́ŋú, kun gɔ̀ŋ bərá. Bə̀ vúgə́là Parta yɛ́b ba, Media yɛ́b ba, Elam yɛ́b ba, Mesopotamiya yɛ́b ba, Yahudiya yɛ́b ba, Kapadosiya yɛ́b ba, Pontus yɛ́b ba, Aziya yɛ́b ba, 10Frigiya yɛ́b ba, Pamfiliya yɛ́b ba, Misra yɛ́b ba, bít kə̀ Sirena, bìl aa pe' kə̀ Libiya yɛ́b tə́ rə ba. Nɛ́b kam vúgə́là Roma bìlú. 11Nɛ́b kam bə́n tə́ŋú, bə̀ Yahudu bərá, nɛ́b ɔ̀d kambəd kɔ̀ nɛ́b aa bə̀ kè' Yahudu bəd Vɛnɛ́b pɔ̀bm̀bə̀ roó. Nɛ́b kambəd vúgə́là Kereta yɛ́b ba, bít kə̀ Arabiya yɛ́b ba. Zá bə́n kiìn bə̀ tə́ nwɔŋ gáàm kə̀ mɛ́l nwɔŋ bə́n bərú, in gbàád bəraa Vɛnɛ́b mà' rə yílú!» 12Sɛŋ aa bə̀ kìì nwɔŋ aarə, boò kóólé in aarə kò' bə̀ yíl yàá, bít bə̀ gàb nɛɛ̀n aa bə̀ dá seèl lə́ rə sé. Bə̀ dɛ̀d ɔ̀dnə́ŋ̀ bəd boò bòdba: «Aarə í' tə́ baànmbə̀ leè gú?»
13Zá nɛ́b kambəd dìì bə̀ lòò nɛ́b bagké bəd kúnú, bə̀ bàà: «Nɛ́b aa yée, bə̀ wìrì kə̀ badnná!»
Piyɛr ùd nɛ́b bəd Vɛnɛ́b nwɔŋá
14Kàanyée gə́, Piyɛr zá' dìì lɛgú, kə̀ Yéésù gbantumsə̀ bəraa kób zè nə́ŋ̀ də tá. Piyɛr kpàm nwɔŋ lɛgú, bàà nɛ́b bəd kə̀ aakíin: «Íí Yahudu bərá, bít kə̀ nɛ́b kam bəraa íí ləə Urusalima bìlə́ yóo, ìì gàb in aa kúnú, bít ìì zɛ̀ŋ túŋ nwɔŋ aa má ii baàn yée ba. 15Ə́ùwə́, nɛ́b aa yée bə̀ wìd badn kìínmbə̀ íí sèl yérə kíin sé. Kàandə, bə́ŋ̀ tə́ ba'wà dàànə́ŋ̀ní kə̀ limtə́ bìá. 16Zá aarə kàan sé; vɛ́nà bə̀ gə́, aa yée kùmsə̀n nwɔŋ aa Vɛnɛ́b gbantumsə̀ Joel bàà dàà roó' Vɛnɛ́b bàà:
17‹Sɛŋ bəraa yaà dá dugǹ kə̀ bòd də, má Nwul Gìdń
mə́ náŋ̀à nɛ́b bəd yílə́ kóólé. Yɛb kɛ́ɛ̀m íí bəd, kə̀ yɛb vɔ̀ɔ̀m íí
bəd tá, bə̀ dá Vɛnɛ́b gbantumsə̀ bəd bílàá.
Bít Vɛnɛ́b dá yɛb vɔ̀ɔ̀m də̀b íí bəd núù keràá,
nɛ́b dooro íí bəd kɔ̀ bə̀ dá lədǹ bəd buunàá.
18Èè, nyàm bəraa rə bə gə́, má Nwul Gìdń mə́ náŋ̀à kɔ̀'vɔ̀ɔ̀m
mə́ bəd yílú, kə̀ kɔ̀'kɛ́ɛ̀m mə́ bəd yílú; bə̀ dá nwɔŋ aa vúgà máá naà rə baanàá.
19Má in də́dǹ bə̀ tó'ǹ bəd ma'ǹ lɛgə́ poú, bít má inwulubə̀ bəd ma'ǹ zɔ̀ŋə yɛ́b
ba. Nyɛ̀lə́má, laá kə̀ laayi diíŋ bəə̀nkè tá, bə̀ dákíìn vúgə́làá.
20Báátììkpɛ̀ŋ nyàm káŋke gbà'á aarə dáà yaànnà gə́, nyàm dá
tígə́l bílàá, bít sòò kɔ̀ dá weèn kə̀ nyɛ̀lə́m kíin.
21Sɛŋ aarə bərə, kóó nɛ́ɛ̀réè, kpə̀ə̀ dɛ̀d Báátììkpɛ̀ŋ nə́gə́lì gə́,
dákíìn súúnàá.›
22«Nɛ́b Israila bə̀ bərá, ìì kìì nwɔŋ aa mə́ tə́ ii baàn doó' Yéésù nɛ́d Nazaratu bə̀ kùmsə̀n Nɛ́ŋ Váàndo aa Vɛnɛ́b ì'à kpɛŋsɛ́l oò oò yílə́ roó. Kàandə, kə̀ oòra, Vɛnɛ́b mà' taà inwulubə̀ bərá, in də́dǹ bə̀ tó'ǹ bərá, bít kə̀ inkɔrə bəd tá, aí tə́ŋú, kə̀ nɛɛ̀n aa íí gàb dú rə kíin. 23Vɛnɛ́b piià Yéésù aí nɛɛ̀n tɛ́mú, zá aí gə́, ìì lò'ù kúnú, kə̀ ko'ǹ piìnmbə̀ oò bə̀ nɛ́b vaksə́ bəd nɛɛ̀n tɛ́mú, boò bágə̀ téélɛŋké ba. 24Zá Vɛnɛ́b díímə̀wà yàá, Vɛnɛ́b gàb yàá, in aarə dákíìn ma'mínàá. Vɛnɛ́b sèl zíg in aarə nyàamdoorú kpɔ̀ɔ̀m. Bìnlɛ́'ùwì nwuukè val bə̀ nɛɛ̀n tɛ́mú. Kàandə, val bánə̀ ko'ǹ dí'ǹmbə̀ kpɛŋsɛ́l oò rú sé. 25Aa yée kùmsə̀n nwɔŋ aa Dauda gám oò yílə́ roó:
‹Mə́ bé' Báátììkpɛ̀ŋ máá númú sɛŋ gə́ kóólé, tə́ máá nɛɛ̀n váànú,
bɔ̀b máà nìŋ kə̀ də́dǹ sí.
26Kə̀ taàbìá, tɛ́m mə́ kìì taà làmkèá, bít mɛ́l mə́ nàà taà náb kə̀ tɛ́m làmkèá.
Kóó kə̀ ɔ̀gsɛ́l máá sisú bə̀ aa tə́ kóólé, kùm má nyi'ǹ kə̀ tɛ́m zígǹmbə̀ Vɛnɛ́b ba.
27Kə̀ aakíin də, lɛ́' ń dàà mə́ zɔ̀ŋ aa val bəd ləə bərə gá,
bít ń dàà Nɛ́ŋə̀ Gìdń ń si' nwɔ̀n sààrú gá.
28Ń ì' mə́ kpaŋ̀ aa dá mə́ aàn gɔ̀ŋsə́ rú rə yàá.
Ń dá mə́ nyíìn kə̀ tɛ́m làmkè gbàákù, ń kùm kə̀ máá tə́ yéroó.›
29«Ɔ̀dkudvɛɛ̀l mə́ í'sɛ̀lbə̀ Yahudu bərá, máà bàà ii nwɔŋ aa doo bə́n Dauda yílə́ yée kíìn nyɛdkè' Val kò'ù yàá, bít bə̀ lə̀ə̀ù yàá, sàà oò kɔ̀ bə́ŋyée túrú zɔ̀ŋə obə́n kàrú. 30Zá Dauda rə, Vɛnɛ́b gbantumsàá. Oò gə́, gàb yàá, Vɛnɛ́b bàà dàà bəǹnà nwɔŋ aa yéeì kə̀ in nwɔɔ̀mbìá. Vɛnɛ́b bààù gə́, bəǹ dá kun oò nə́ŋ̀ gààd lə́'ǹ kìínmbə̀ oò kɔ̀ bəǹ lə́'ù gààd də kíin. 31Dauda gbád gàb in aa Vɛnɛ́b í' ma'ǹmbə̀ rə yàá; kə̀ taàbìá, gám taà díímke valə́ bə̀ nwɔŋ Krístù yílú:
‹Vɛnɛ́b lɛ́' dààù zɔ̀ŋ aa val bəd ləə bərə sé, bít si' oò kɔ̀ nwɔɔ̀n sé.›
32Yéésù aarə, Vɛnɛ́b díímə̀ùwì valú, bít bə́ kùmsə̀n sedako oò bərá, kə̀ yíl obə́ bìá. 33Vɛnɛ́b mà' bí' Yéésùì lɛgú, kúmə̀wì oò nɛɛ̀n váànú. Báá oò Vɛnɛ́b piiùwà Nwul Gìdńnì kìínmbə̀ nɛɛ̀n aa bàà dàà nyàamdoorú rə kíin. Yéésù zà' Nwul Gìdń aarəì obə́ yílú, kìínmbə̀ íí bé', bít íí kìì bə́ŋyée rə kíin. 34Kàandə, Dauda kə̀ yíl oò bə̀ máá, na' lɛgə́ paà sé, zá bàà:
‹Báátììkpɛ̀ŋ Vɛnɛ́b bàà Báá mə́ Tììkpɛ̀ŋ; yaà ǹ kùm zɔ̀ŋə máá nɛɛ̀n váànú,
35máà bí' ɔ̀dmáàn ń bəd kìínmbə̀ zɔ̀ŋ dun bə̀ ná'ǹ ń kíin zé.›
36«Nɛ́b Israila bə̀ bəd kóólé, boò gàb kíìn vɛ́nà, Yéésù aa íí bágà téélɛŋké bərə, oòra Vɛnɛ́b mà' bí' taà Báátììkpɛ̀ŋá, bít Krístù!»
37Zɔ̀ŋ aa bə̀ kìì nwɔŋ bəraa kàangə́, boò kóólé tɛ́m nyágə́l bə̀ì gbàákù. Bə̀ dɛ̀d Piyɛr kə̀ Yéésù gbantumsə̀ kambəd tá, bə̀ bàà: «Ɔ̀dkudvɛɛ̀l mə́ Yahudu bərá, báan níì ma'ǹ gú?»
38Piyɛr kè' í' bàà: «Kóó nɛ́ɛ̀réè aí tə́ŋú, oò sɔ̀g kúnú, bít oò kè' boò piiù baptisma, Yéésù Krístù nə́gə́lú, bɔ̀b invaksə́ oò bəd boò daamíìn kúnú, bít oò bɔ̀b Nwul Gìdń Vɛnɛ́b naú. 39Kə̀ aakíin də, Vɛnɛ́b bàà dàà nwɔŋ aarə aíra, kə̀ yɛb íí bəd tá, kə̀ nɛ́b aa kùm zɔ̀ŋ bùúd bərə tá, bít kə̀ nɛ́b aa Báátììkpɛ̀ŋ Vɛnɛ́b bə́n dá bà dɛdǹ oò səǹ də tə́ kóólé.»
40Piyɛr ùd bə̀ nwɔŋ ɔ̀d kambəd zùúm sɔ̀ŋ, tɔ̀g bə̀ kúnú, pii bə̀ váàndoá, bít bàà bə̀: «Nùù ìì súú kíìn nɛ́b vaksə́ bəraa bə́ŋyée tə́ŋú!» 41Nɛ́b bəraa bə̀ kè' nwɔŋ oò rə, bít bə̀ pii bə̀ baptisma yàá. Nyàm aarə bərə, nɛ́b aa bə̀ bíl nɛ́b bagké bəd də, bə̀ mà'ì boò laa núnà zɔ̀ŋ laa nə́ŋ̀ zè kób. 42Nɛ́b bagké bəd bə̀ nɔ̀ŋ nwɔŋ bəraa Yéésù gbantumsə̀ bəd tə́ bə̀ sáàn də zɛŋ̀mbìá; pɛ̀l bə̀ gàb in bəraa bə̀ kə̀ naà rə boò bòdba, wál bə̀ líí gbèd ɔ̀dba, bít wál bə̀ nyɛ̀m Vɛnɛ́b ɔ̀dba.
Kumsɛ́l nɛ́b bagké bəd tə́ŋú
43Báátììkpɛ̀ŋ mà' inwulubə̀ bəd kə̀ in də́dǹ bə̀ tó'ǹ bəd tá. Mà' in bəraa rə, kə̀ gbantumsə̀ oò bəd nɛɛ̀ná. In bəraa rə, kò' nɛ́b bəd kóólé yílì gbàákù. 44Nɛ́b bagké bəd kóólé, ìì saŋ̀ ɔ̀dbə kə̀ tɛ́m nə́ŋ̀ní, bít pɛ̀l ìì gàb in bəraa ìì kə̀ naà rə boò bòdba. 45Bə̀ gə́l gbaŋə̀ boò bərá, bít pɛ̀l bə̀ gàb ba' rə boò bòdba. Kóó nɛ́ɛ̀réè, bə̀ piiù in aa kpánə̀ roó. 46Nyàm gə́ kóólé, bə̀ wál láŋsə́ wúuú. Wál bə̀ líí in ligə̀ kə̀ ligàá, bít bə̀ líí inlíìnmbə̀ kə̀ lóórá, bít kə̀ tɛ́m ɔ̀gkeá. 47Bə̀ káŋ Vɛnɛ́bá, bít nɛ́b bəd kóólé ɛ̀g bə̀ kə̀ pɛ̀sá. Bít Báátììkpɛ̀ŋ Vɛnɛ́b kɔ̀ nyàm gə́ kóólé, dɛ̀d zəg nɛ́b aa súú rə boò tə́ŋú.
Àwon tá yàn lọ́wọ́lọ́wọ́ báyìí:
Gbantumsə̀ bəd Tùsá 2: SLNT98
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament en Samba Leko © Alliance Biblique du Cameroun, 1998.