Gbantumsə̀ bəd Tùsá 4
4
Kò' bə̀ àà Piyɛr kə̀ Yohana tá, wálke nɛ́b gbàád Yahudu bəd bə̀ númú
1Zɔ̀ŋ aa Piyɛr kə̀ Yohana tá, bə̀ tə́ nɛ́b bəd nwɔŋ baàn yée gə́, nɛ́b láŋsə́ bə̀ ma'ǹ bərá, nɛ́b láŋsə́ wúl bə̀ nwáàn bəd gààrá, kə̀ Saduki bəd tá, bə̀ yaà boò sunú. 2Tɛ́m dìg bə̀ sɔ̀ɔ̀n, nɛɛ̀n aa Piyɛr kə̀ Yohana tá, bə̀ sán nɛ́b bəd in bə̀ bàà gə́, Yéésù zá'ì valú, bít nɛ́b aa val kòd bə̀ rə kɔ̀ bə̀ dákíìn díím də bòórú. 3Bə̀ kò' bə̀ kúnú, bít bə̀ páál bə̀ wúltígə́l bə̀ rú, nwún yaà nyɛd zé. Bə̀ mà' kàandə, sɛŋ də, nyàm mà' yàá. 4Sɛŋ də bərə, nɛ́b aa kìì Vɛnɛ́b nwɔŋ aarə, zùúm boò tə́ŋú, bə̀ kè' yàá. Ká'sɛ́l boò rə, mà'ì nɛ́b bəd laa núnà zɔ̀ŋ laa iira zè kób.
5Nwúndù rə, Yahudu bəd gààd bərá, dam bərá, bít kə̀ nɛ̀n indaŋ̀mbə̀ bəd tá, yaà bə̀ wál Urusalima bìlú. 6Annas, láŋsə́ gààd gbà'á, Kaifa ra, Yohana ra, Alekzandre ra, bít kə̀ nɛ́b aa tə́ láŋsə́ gààd bəd kun də tə́ kóólé, bə̀ kùm wərà. 7Yaà bə̀ dí' Piyɛr kə̀ Yohana tá boò númú, bít bə̀ dɛ̀d bə̀: «Kə̀ níì kpɛŋsɛ́l, sínkɔ̀ kə̀ nɛ́ɛ̀réè nə́gə́l, íí gáŋ taà nɛ́ŋ váàndo aa dun gú?»
8Nɛ́ɛ̀m Piyɛr nyìì kə̀ Nwul Gìdń yée gə́, bàà bə̀: «Yahudu bəd gààd bərá, kə̀ dam bərá, 9zá dɛ̀d íí fág bə́ nyà'aa yóo, sɔ̀ɔ̀nkè aa bə́ mà' nɛ́d dun val aa gág yée bòórú, bít íí bàà báà bàà bənə́ nɛɛ̀n aa nɛ́ŋ váàndo aa si' gág dú roó. 10Ogə́ ìì gàb kúnú, íí kóólé, bít nɛ́b Israila bə̀ bəd kóólé boò gàb kúnú, nɛ́ŋ váàndo aa dìì aí númú kə̀ si' gaŋsə́ yérə, kpɛŋsɛ́l lə vúgà Yéésù Krístù Nazaratu bə̀ nə́gə́lú. Yéésù Nazaratu bə̀ rə, màn aa kò' bág íí lò'ùwà téélɛŋké ba, Vɛnɛ́b díímə̀ valú, bít piiùwà gɔ̀ŋsə́ roó. 11Yéésù kùmsə̀n màn aa Núúboòd Gìdń gám nwɔŋ oò yílú, bàà:
‹Bəŋ aa íí nɛ́b wúl bə̀ wəə̀n bəd làà íí lɛ́' rə, yaà bíl bəŋ yíl bə̀ yàá.›
12Yéésù oò nə́ŋ̀ní tə́ŋtə́ŋ, dá sə̀n báàn nɛ́b bəd súùnmbìá. Nə́gə́l oò bə̀ ní, kùmsə̀n kpɛŋsɛ́l aa piià zɔ̀ŋə yɛ́b ba, dá báàn nɛ́b bəd súùnmbə̀ roó. Bít báá n súúke bɔbm̀ kə̀ oòra.»
13Nɛ́b gbàád Yahudu bəd bə̀ gàb yàá, Piyɛr kə̀ Yohana tá, bə̀ kə̀ ingabké naà sé; bít bə̀ ɛ̀g bə̀ kə̀ nɛ́b tɛdń bəd kíin. Zɔ̀ŋ aa bə̀ bé' bə̀, bə̀ tə́ nwɔŋ gáàm kə̀ váàndo yée gə́, kò' bə̀ yíl yàá. Bít sèl bə̀ gàb yàá, Piyɛr kə̀ Yohana tá, bə̀ kùmà kə̀ Yéésù tá. 14Zá ìì bé' nɛ́ŋ váàndo aa dun gág də kɔ̀, dìì kə̀ boò tə́ yée gə́, bə̀ bɔ̀b nwɔŋ vaksə́ nə́ŋ̀má gáàmbə̀ boò yílə́ sé. 15Kàanyée gə́, bə̀ bàà bə̀ boò vúg kíìn Dam bəd Wálke Gbà'á rú, bít wál ìì nyá' nwɔŋ boò bòdba, 16ìì bàà: «Báan níì ma'ǹ kə̀ nɛ́b vɔ̀ɔ̀m bəraa gú? Bə̀ mà' inwulubə̀ yàá. Nɛ́b aa kùm zɔ̀ŋə Urusalima bìlə́ rə gə́ kóólé, bə̀ bé' in aa taà rəì nyɛdkè, bít obə́n kɔ̀ bə́n báàn sɔ̀ɔ̀nmbə̀ gá. 17Zá bɔbm̀ ma'ǹmbə̀ nwɔŋ aa oò sa' gbàákù nɛ́b zùúm tə́ŋə́ sí gə́, báà tɔ̀gǹ bə̀ kúnú, bɔ̀b boò gám nwɔŋ kə̀ Yéésù nə́gə́l sɔ̀ŋ sí.»
18Bə̀ dɛ̀rà Piyɛr kə̀ Yohana tá, bít bə̀ dàŋ bə̀ boò gám nwɔŋ nə́ŋ̀má Yéésù nə́gə́lə́ sí, bít boò sán nɛ́b bəd in nə́ŋ̀má kə̀ Yéésù nə́gə́l sí kɔ̀. 19Zá Piyɛr kə̀ Yohana tá, kè' bə̀ í' bə̀: «Tə́ bée sɔ̀ɔ̀ní zɛŋ̀mbə̀ nwɔŋ aí bìá, bít məə̀nmbə̀ Vɛnɛ́b nwɔŋì? Sèl ìì gàb kə̀ yíl aí bə̀ ní. 20Zá obə́ gə́, dàà bə́ bán in aa núù bə́ bé'à, bít túŋ bə́ kììà rə nɛ́b bəd baànmbə̀ gá.»
21Bə̀ tɔ̀g bə̀ sɔ̀ŋ, bít bə̀ lɛ́l bə̀ boò ɛ̀m kúnú; kàandə, bə̀ bɔ̀b kpaŋ̀ nə́ŋ̀má fág bə̀ dá bə̀ ko'ǹ kə̀ kùrú sé. Kə̀ aakíin də, nɛ́b bəd kóólé, bə̀ mɔ̀' Vɛnɛ́b in aa taà rə bòórú. 22Nɛ́ŋ váàndo aa dun gág kə̀ inkɔrə rə, zèd oò kàn laa iirə yàá.
Nɛ́b bagké bəd nyɛmsɛ́lá
23Zɔ̀ŋ aa ìì lɛ́' Piyɛr kə̀ Yohana tə́ gə́, ìì ɛ̀m ɔ̀b boò bəd sunú, bít dá ìì ùd bə̀ nwɔŋ bəraa láŋsə́ gààd bəd, kə̀ dam bəd tá, bə̀ bàà bà roó. 24Zɔ̀ŋ aa ìì kìì bəd nwɔŋ aa gə́, wál ìì nyɛ̀m Vɛnɛ́b kə̀ pə̀gə̀lib nwɔŋ nə́ŋ̀ní, ìì bàà' Báátììkpɛ̀ŋá, ń séé sə̀n lɛgá, kə̀ yɛ́bá, nwuu gbà'á, kə̀ in bəraa rú wərə̀ rə tə́ kóólé. 25Bít kə̀ Nwul Gìdńná, ḿ bàà kə̀ doo bə́ Dauda nɛ́d tù' bə̀ ma'ǹ ń gúsá:
« ‹Kə̀ níìbə̀ nɛ́b aa bàg Vɛnɛ́b síndə ìì tó' taà nwɔŋ kə̀ nɔ̀m gú? Bít kə̀ níìbə̀
nɛ́b bəd bə̀ tə́ taà nwɔŋ vaksə́ bəd wúùn gú?
26Gààd gbàád yɛ́b bə̀ bəd yaà bə̀ wál tə́ nə́ŋ̀ní kə̀ gààd kambəd tá, b
nə́gə̀d tə́ kə̀ Báátììkpɛ̀ŋá, bít kə̀ Nɛ́ŋə̀ oò aa tɔ̀bə̀ gààd kílə́m yílə́ roó.›
27 Hirudus da, Pontu Pilatu ra, nɛ́b aa bə̀ bàg Vɛnɛ́b síndoó, kə̀ nɛ́b Israila bə̀ bəd tá, bə̀ wál zɔ̀ŋə Urusalima bìlə́ vɛ́nà. Bə̀ zá' nə́gə̀d kə̀ nɛ́d tù' bə̀ ma'ǹ gìdń ń Yéésù, Nɛ́ŋə̀ aa ń tɔ̀bə̀ gààd kílə́m yílə́ roó. 28Aarə mà' bə̀ zə́' in aa ń Vɛnɛ́b kə̀ kpɛŋsɛ́l ámbə̀, bít kə̀ ingabké ám bìá, ḿ bàà dá ma'míìn doó. 29Bít bə́ŋyée gə́, Báátììkpɛ̀ŋá, ǹ ɛ̀g nɛɛ̀n aa bə̀ tə́ bə́ nɛ́b tù' bə̀ ma'ǹ ḿ bəd búúd i'ǹ dú roó. M̀ pii bə́ nɛ́b tù' bə̀ ma'ǹ ḿ bəd váàndoá, bɔ̀b báà bàà kə̀ nwɔŋ ám bìá. 30M̀ mà' nɛ́b bəd boò bé' kpɛŋsɛ́l ám bìá, ǹ gáŋ nɛ́b bəd marú, ǹ mà' inkɔrə bəd kə̀ in də́dǹ bə̀ tó'ǹ bəd tá, Yéésù nə́gə́lú, oòra kùmsə̀n nɛ́d tù' bə̀ ma'ǹ gìdń ń da.»
31Zɔ̀ŋ aa nyɛ̀m bə̀ bɛ́' Vɛnɛ́b gə́, zɔ̀ŋ aa bə̀ wál bərə, wáá kúnú. Boò kóólé, ìì nyìì bəd kə̀ Nwul Gìdńná, bít ìì bàà Vɛnɛ́b nwɔŋ kə̀ váàndoá.
Nɛ́b bagké bəd pɛ̀l bə̀ tə́ gbaŋə̀ boò bəd gabàá
32Nɛ́b bagké bəd kə̀ gə̀b boò ra, bə̀ kùm tɛ́m nə́ŋ̀ní, bít kə̀ inselké nə́ŋ̀ní. Kóó nɛ́ŋə̀ nə́ŋ̀má bàà: «Aa yée gbaŋə̀ máá bìá, máá nə́ŋ̀ní tə́ŋtə́ŋ» sé. Zá bə̀ wál in bəraa bə̀ kə̀ naà rə kóólé nə́ŋ̀ní. 33Kə̀ kpɛŋsɛ́l gbà'á, Yéésù gbantumsə̀ bərì dìì taà nɛ́b bəd sedako ma'ǹmbə̀ gə́, Báátììkpɛ̀ŋ Yéésù zá'ì valə́ vɛ́nà. Bít boò kóólé, Vɛnɛ́b zíg bə̀ nɛɛ̀n tɛbə̀ì yílə́ gbàákù. 34Nɛ́ŋə̀ nə́ŋ̀má in kpánə̀ gá. Kàandə, màn aa kə̀ lɛ' naú, sínkɔ̀ kə̀ wúl naà rə, gə́l lɛ́b kúnú. 35Basaa ìì bɔ̀b də, ɛ̀m yaàì pii Yéésù gbantumsə̀ bəd naú, bít boò ra ìì pii sə̀n kóó nɛ́ɛ̀réè, in aa kpánə̀ roó.
36Nɛ́ŋ váàndo nə́ŋ̀ nə́gə́l oò Yusufu, Levi kun nə́ŋ̀á, bə̀ lɛ̀bə̀ Kiprus yɛ́b ba. Yéésù Gbantumsə̀ bərì dɛ̀rə̀ Barnabas, taà kùmsə̀n baànmbə̀: («Nɛ́ŋə̀ aa pii sáá nɛ́b bəd váàndo roó.») 37Yusufu kə̀ lɛ' naú, gə́l lɛ́b lɛ' rə kúnú, bít pà' àà ba' rə, yaà pii Yéésù gbantumsə̀ bəd naú.
Àwon tá yàn lọ́wọ́lọ́wọ́ báyìí:
Gbantumsə̀ bəd Tùsá 4: SLNT98
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament en Samba Leko © Alliance Biblique du Cameroun, 1998.