Yohana 20
20
Sàà tɛdńná
(Mata 28.1-8; Markus 16.1-8; Luka 24.1-12)
1Kozoli bə kə̀ limtə́ súd, bə́ŋ̀ nwúun nyɛd sé, Mariyama nɛ́d Magdala bìlú bə̀ lìì yaà sàà ba. Yaà bé' pà' bə̀ zá' bəŋ aa sàà waàl bərə yàá. 2Kàanyée gə́, Mariyama nùù dá bɔ̀b Simon Piyɛr ra, kə̀ nɛ́d sánán aa Yéésù í' rə tá, bít bàà bə̀: «Pà' bə̀ vúŋ Báátììkpɛ̀ŋì sààrú, bít bə́ gàb zɔ̀ŋ aa pà' bə̀ ààù bərə sé.»
3Kàanyée gə́, Piyɛr kə̀ nɛ́d sánán də tá, bə̀ ɛ̀m sàà ba. 4Boò iirə kóólé, bə̀ ɛ̀m kə̀ nɔgá. Zá nɛ́d sánán də, nùù kàn sə̀n Piyɛr kə̀ nɔgá, bít éèn dáá wə́ə́ sə̀n sàà ba. 5Əb tə̀ŋ ɛ̀g núù sààrú gə́, bé' val gɔ̀' bəd ləə sìní, zá pìì sàà rú wərə̀ sé. 6Bít Simon Piyɛr dáá wə́ə́ gə́, pìì sààrú, bé' val gɔ̀' bəd ləə sìní. 7Bít gɔ̀saa bə̀ tab kə̀ Yéésù yílə rə, ləə kə̀ gɔ̀' kam bəraa kíin sé; zá kaàd dá ləə zɔ̀ŋ nə́ŋ̀ gɔ̀ŋ ba. 8Kàanyée gə́, nɛ́d sánán aa éèn nùù wə́ə́ də̀gə̀ də̀gə̀ sàà bərə, yaà pìì sààrú kɔ̀. Bé' gə́, kə̀' yàá. 9Kə̀ aakíin də, kìì bə̀ gàb bə́ŋ̀ nwɔŋ wàà aa Núúboòd Gìdń bàà gə́, Yéésù dákíìn díìm valə́ rə sé. 10Bít bòórú gə́, nɛ́b sáànmbə̀ bəraa boò iirə yée, kid bə̀ bíd kíìn Urusalima bìlú, zɔ̀ŋ aa bə̀ kùmà bəroó.
Yéésù yaà ì' yíl oò Mariyama Magdala bə̀ númú
(Mata 28.9-10; Markus 16.9-11)
11Zá Mariyama yaà dìì sàà waàl ba, tə́ kíìn kpəənàá. Zɔ̀ŋ aa tə́ kpəə̀n kàangə́, əb tə̀ŋ ɛ̀g núù sàà rú. 12Mariyama bé' malaika bəd iira, bə̀ pál gɔ̀' biíd bərá, bə̀ kùm zɔ̀ŋ aa bə̀ lə́ə́ Yéésù bərə ba. Nə́ŋ̀ kùm zɔ̀ŋ aa yílə bərə ba, nə́ŋ̀ ɔ̀d kɔ̀ dun dùú. 13Malaika bəd bə̀ dɛ̀rə̀: «Wàà kéèná, ń tə́ níì kpəə̀n gú?»
Kè' í' bə̀: «Bə̀ pà' Báá mə́ Tììkpɛ̀ŋ si' yàá, mə́ gàb zɔ̀ŋ aa dá bə̀ zígə̀ bərə sé.»
14Zɔ̀ŋ aa gám bɛ́' nwɔŋ aa kàangə́, lìb bí' núù bòórú gə́, bé' Yéésù dìì wərà. Zá gabm̀bə̀ aarə Yéésù rə, gàb sé. 15Yéésù dɛ̀rə̀: «Wàà kéèná, ń tə́ níì kpəə̀n gú? Ń sàà nɛ́ɛ̀réè gú?»
Mariyama sèl gə́, bàà nyà'aa nɛ́d lɛ' bìá. Kàanyée gə́, bààù: «Gbàároá, ḿ pà' tə́ sə̀n si' oòrə gə́, m̀ bàà mə́ zɔ̀ŋ aa ń zíg bərə kúnú, bít mááráàn kíìn pa'nàá.»
16Yéésù dɛ̀rə̀: «Mariyama!»
Mariyama lìb bí' núù oò naú, bàà kə̀ Ibraniŋko nwɔŋú: «Rabbouni!» (Taà kùmsə̀n baànmbə̀ Nɛ̀ná.)
17Yéésù bààù: «Kò' ǹ dí' mə́ sí, kàandə, bə́ŋ̀ mə́ na' Báá mə́ səǹ lɛgə́ paà sé. Zá ɛ̀m dáàn bàà ɔ̀dkudvɛɛ̀l mə́ í'sɛ̀lbə̀ bəd: ‹Mə́ tə́ bídǹ Báá mə́ səǹ lɛgə́ poú, bít Báá íí kɔ̀. Mə́ tə́ bídǹ Vɛnɛ́b sunú, bít Vɛnɛ́b íí kɔ̀.› »
18Kàanyée gə́, Mariyama Magdala bìlú bə̀ dáá bàà nɛ́b sáànmbə̀ bəd: «Mə́ bé'à Báátììkpɛ̀ŋ yàá!»
Bít dáá ùd bə̀ nwɔŋ aa Yéésù bààù roó.
Yéésù yaà ì' yíl oò nɛ́b sáànmbə̀ oò bəd númú
(Mata 28.16-20; Markus 16.14-18; Luka 24.36-49)
19Kozoli bə nyàm bídńná, nɛ́b sáànmbə̀ bəd bə̀ wál wúuú, bə̀ ke' waàl kə̀ kɔ̀msə̀wàá; kàandə, bə̀ nùù Yahudu bəd nɛ́b yíl bə̀ bərá. Yéésù vúg yaà dìì boò tə́ŋú, bàà bə̀: «Tɛbə̀ oò kùm kə̀ aí tá!»
20Bít zɔ̀ŋ aa gám bɛ́' nwɔŋ aa kàangə́, ì' bə̀ nɛɛ̀n oò bərá, bít kə̀ tàŋtéé aa sàb bə̀ tù' roó. Nɛ́b sáànmbə̀ oò bəd bə̀ nyìì kə̀ làmkèá, zɔ̀ŋ aa bə̀ bé' Báátììkpɛ̀ŋ gə́ roó. 21Bít Yéésù bàà bə̀ sɔ̀ŋ: «Tɛbə̀ oò kùm kə̀ aí tá! Kìínmbə̀ nɛɛ̀n aa Báá mə́ tùm máà rə kíin, máá kɔ̀ máá ii tuùm kàani.»
22Gám bɛ́' nwɔŋ aa kàangə́, pɛ̀b bə̀ nwul yílú, bít bàà bə̀: «Ìì kè' Nwul Gìdńná! 23Lòò íí dàà nɛ́ŋə̀ nə́ŋ̀ invaksə́ oò bərì gə́, Vɛnɛ́b kɔ̀ lòò dáù kíin daanàá. Lòò íí dàà nɛ́ŋə̀ nə́ŋ̀ invaksə́ oò bəd síngə́, Vɛnɛ́b kɔ̀ lòò dààù gá.»
Yéésù yaà ì' yíl oò Tomas númú
24Sɛŋ də, nɛ́ŋə̀ nə́ŋ̀ Yéésù nɛ́b sáànmbə̀ bəraa kób zè iirə rə tə́ŋú, Tomas (aa bə̀ dɛ̀rə̀ wàà bàrə̀b doó), kùm kə̀ boò tə́ wərə̀ sé, sɛŋ aa Yéésù tóò yaànà roó. 25Nɛ́b sáànmbə̀ kambəd bə̀ bààù: «Bə́ bé' Báátììkpɛ̀ŋ yàá!»
Zá Tomas kè' í' bə̀: «Mə́ zíg nɛɛ̀n wàà yíl mə́ núgə́l lèm aa oò nɛɛ̀n bərə sé, bít mə́ zíg nɛɛ̀n wàà yíl mə́ tàŋtéé aa sàb bə̀ tù'à rə bə síngə́, mə́ kè' gá.»
26Sɛŋ taà nə́ŋsínə̀ gə́, nɛ́b sáànmbə̀ bəd bə̀ wál sɔ̀ŋ, wúuú. Tomas wál kə̀ boò tá. Bə̀ ke' wúlwaàl lú kə̀ kɔ̀msə̀wàá. Yéésù vúg yaà dìì boò tə́ŋú, bàà bə̀: «Tɛbə̀ oò kùm kə̀ aí tá!»
27Bít Yéésù bàà Tomas: «Ǹ àà nɛɛ̀n wàà yíl ń də zɔ̀ŋə, bít ǹ ɛ̀g nɛɛ̀n mə́ bərá, ǹ àà nɛɛ̀n yaàn páá zɔ̀ŋə máá tàŋtéé rú. Ǹ dàà pìrə̀ zibm̀bìá, bít ǹ bàg mə́ kúnú!»
28Tomas kè' í'ù: «Ḿ Báátììkpɛ̀ŋ mə́ra, bít ḿ Vɛnɛ́b mə́ra!»
29Yéésù bààù: «Bə́ŋyée ḿ bé' mə́ yée gə́, ń bàg mə́ taàì? Vɛnɛ́b zíg nɛɛ̀n tə́ nɛ́b aa bə̀ bé' mə́ sé, zá bə̀ tə́ mə́ bagǹ də yílú!»
Kə̀ níìbə̀ Yohana bád taà núúboòraa gú?
30Yéésù mà' inkɔrə kambəd zùúm, nɛ́b sáànmbə̀ oò bəd númú. Inkɔrə bəd də, bádmíìn núúboòraa yée rú sé. 31Zá nwɔŋ bəraa bádmíìn núúboòraa rú yée, bádmíìn, bɔ̀b ìì bàg kúnú, Yéésù kùmsə̀n Krístù, Vɛnɛ́b Wàá. Kàandə, íí bàgə̀wì gə́, íí dá gɔ̀ŋsə́ bɔbm̀ oò nə́gə́lú.
Àwon tá yàn lọ́wọ́lọ́wọ́ báyìí:
Yohana 20: SLNT98
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament en Samba Leko © Alliance Biblique du Cameroun, 1998.