MATTHAI 10
10
Sawmlenihte sawlkhiahna
1Huleh ama’n a nungjui sawmlenihte a kouh zohin, a kawmvah dawiniinte nohdoh theihna leh damlouhna chinteng leh natna chinteng suhdam theihna thuneihna a pia hi. 2Sawlleh sawmlenihte min chu hite ahi: A masapen in, Simon, Peter kichipa leh a unau Andru; Zebedi tapa Jakob leh a unau John: 3Philip leh Bartholomai; Thoma leh siahdongtu Matthai; Alphai tapa Jakob leh Lebbai, a mintah Thaddai; 4Kananmi Simon leh a mansahtu Juda Iskariot bang. 5Hi sawmlenihte chu Jesu’n a sawldoh a, amahuh chu thu a pia a, Jentelte lampi ah chiah sih unla, Samarite khopi sungah zong luut hial sih un; 6Ahihvangin, Israel innkuan belaam mangte kawmah chiah zaw un. 7Huleh na chiah kawmun, Vaan lalgam a naita hi, chi’n soi jel un. 8Damloute sudam unla, phaahte susiangthou unla, misite kaithou unla, dawite nohdoh un; a thawn in na mu va, a thawn in pia un. 9Na dangka-ip sungvah, sana, dangka, huleh sumeng bangmah guang sih un, 10Na zinna va diingin sakhau aha, puannaah nih aha, kengtophah aha, chiang aha keng sih un; ajiahchu natongtu chu a neeh mutaah ahi. 11Huleh na chiahna va, khopi sung hi’n, khoneu sung hileh na luutna phot vah, na tunna diing taah uh mi kandoh unla, na chiahkhiah masiah uh hutahah um zing un. 12Huleh inn sung khat a na luut chiang uleh, chibai buuh un. 13Huleh hu inn sung in a taah leh, na hamuanna u’chu a tungah um heh; hizongleh a taah louh uleh na hamuanna u’chu na kawmvah hung kiihkiit heh. 14Huleh koipouh nanguh hung kipaahpih lou a, na thute uh ngaikhe lou chu, hu inn aha, hu khua aha apat na pawt chiangun na keeng va leivui thingkhia un. 15Chihtahzetin ka hung hilh ahi, Vaihawm ni chiangin, hu khopi thuaah diing sangin Sodom leh Gommorrah thuaah diing chu adan a um zaw diing hi. 16Ngai un, ngeite laha belaam um bangin ka hung sawl ahi; hujiahin guul bangin pil unla, vakhu banga poikhoih louin um un. 17Hizongleh mite lahah kiveeng un; ajiahchu amahun vaihawmte ahung mansah diing va, a kikhopna inn bang vah ahung vosah diing uh; 18Huleh keimah jiahin gamoptute leh kumpite ma ah, amah uh leh Jentelte heetsahna diingin ahung pui diing uhi. 19Hizongleh ahung matsah chiangun, bangchia bang soi diing ka hiai, chi’n lungkham sih un; na soi diing uh a huntaha hung kihilh diing na hi ngal va. 20A soitu chu nanguh na hi sih diing va, na Pa uh Hagau in nanguh ah a soi zaw diing ahih jiahin. 21Huleh unau in unau, pa’n a ta thah diingin a mansah diing; huleh tate’n zong a nu leh pate uh a dou diing va, a thatsah diing uhi. 22Huleh ka min jiahin mi zousiah huat na hi diing uhi; hizongleh a tawp donga thuaah mualsuaah chu hutdam in a um diing uh. 23Hizongleh hi khopi a ahung sawi chiangun, kho dang ah tailuut un; chihtahzetin ka hung hilh ahi, mihing Tapa hung ma in Israel khua zousiah na tuan suaah sih diing uhi. 24Nungjui chu houtu tungah a um ngei sih a, suaah zong a pu tungah a um ngei sih hi. 25Nungjui chu a houtu banga ahung um a, suaah chu a pu banga ahung um a hun ahi. Amahun inn neitupa bawn Beelzebul a chih uleh, a innkuante chu bang chituhin ahiai a chih taah diing uh? 26Hujiahin amah uh haw lau sih un; ajiahchu lang lou diing a kiphual bangmah a um sih a; heet louh diing a iim zong bangmah a um sih hi. 27Mial a nanguh ka hung hilh chu vaah ah soi unla: huleh na bil kawmva na jah uh chu inn tungah taangkoupih un. 28Huleh tahsa that thei a, hagau that thei lou haw chu lau sih un; hizongleh hagau leh tahsa a nih a gawtmun a sumang theitu amah chu lau zaw un. 29Kawlgit nih paisa khat in a kizuah veu hilou maw? ahihvangin a lahva khat zong na Pa uh heet louhin tual ah a ke sih diing hi. 30Na lutungva samzangte nasan simveh ahi. 31Hujiahin lau sih un, kawlgit tampi sangin na luul zaw uh ahi. 32Hujiahin koipouh mite ma a hung gum chu, ke'n zong vaan a ka Pa ma ah amah ka gum diing hi. 33Hizongleh koipouh mite ma a hung kiheetmohbawl chu, kei zong vaan a ka Pa ma-ah ka kiheetmohbawl diing hi. 34Leitung a lemna leengsah diing a hung pai hung sa sih un; lemna leengsah diing a hung ka hi sih a, temsaau leengsah diing a hung ka hi zaw hi. 35Ajiahchu tapa’n a pa, tanu’n a nu, huleh mou in a innpinu dousah diing a hung ka hi. 36Huleh mi a melma chu amah innkuante ngei ahi diing hi. 37Koipouh a pa aha, a nu aha keimah sanga lungsiat zaw chu ka mi hitaah ahi sih: huleh a tapa aha, a tanu aha keimah sanga lungsiat zaw chu ka mi hitaah ahi sih. 38Huleh koipouh a kros pua a, hung jui lou chu, ka mi hitaah ahi sih hi. 39Koipouh a hinna mu in a taan diing a; huleh koipouh keimah jiaha a hinna taan in a mu diing hi. 40Koipouh nanguh hung kipaahpih chu kei hung kipaahpih a hi a, huleh koipouh keimah hung kipaahpih chu kei hung sawlpa kipaahpih ahi. 41Koipouh zawlnei chu zawlnei ahih jiaha kipaahpih in zawlnei kipaahman a mu diing; huleh midihtat chu midihtat ahih jiaha kipaahpih in midihtat kipaahman a mu diing. 42Huleh koipouh hi mi neutahte laha khat nungjui ahih jiaha tuisih nou khat chauh pia in zong, chihtahzetin ka hung hilh ahi, a kipaahman muh diing chu a taan hial sih diing hi, a chi hi.
Àwon tá yàn lọ́wọ́lọ́wọ́ báyìí:
MATTHAI 10: SIMTBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.