METHIU 4
4
Jisu ta Seitan in Amdoi
(Mak 1:12–13; Luk 4:1–13)
1 #
Mak 1:12–13; Luk 4:1–13; Hib 2:18; 4:15 Cheva Jisu ta Li in rapril kaara Seitan in amdoinatu aphurhpei. 2Jisu in suun sopli leh khulouh sopli saak in ahel, mahchuche aknua amah in traamsa. 3Amdoi in amahkuunga thlenga ason, “Nganginta Ringpu vaa Asa kupa chele, mah lungita tol aveinatu jathang malanro.” 4Chuta Jisu in amsang, “Mah i injih a am, mii in tol apaalla ringnohtu, chuta Ringpu vaa anarnata anthruh trongkhanna ringtuei.”
5 #
Met 27:53; Mad 21:10 Chunnata Seitan in amahta phurh a akseeng khuuboomma asehpipei, che mathruunna thlaam ankaangrem abungchunga ambokche, 6amahkuunga ason, “Nanginta Ringpu vaa Asa kupa chele, maannata injaamro; alamva mah i injih a am, ‘Amah ringroita nangturel madonna amthlahnatu jathang amlatu, che anmah ankut roudoh a nangta nakdomtuei, chuleva nang nikehkha lunga inrotnohtu.’ ”
7Jisu in akuunga ason, “Veikhatla mah i injih a am, ‘Nangvaa Ringpu Akpu ta madoinohro.’ ” 8Veikhatla, Seitan in amahta khalmo inkaang muul inkhat a aphurhpei, cheva tukleiram kurung huunna leh anmah paarthra anaamteta akuunga ammuhpei. 9Che amahkuunga ason, “Nanginta keita intolhtlep a kamthruun cheleva, mah naamte i nangkuunga kamlankir uche.” 10#Mak 8:33Mahchunna Jisu in akuunga ason, “Seitan sehrosa! alamva mah i injih a amsa,
“ ‘Nangvaa Ringpu Akputa mathruunro
“ ‘che amahruta rou tlohro.’ ”
11 #
Met 26:53; Luk 22:43 Cheva seitan in amahta amahpei, che anve, ringroi in thlenga amahta rou antlohpei.
Jisu in Kalili ah Thloutloh Amthron
(Mak 1:14–15; Luk 4:14–15)
12 #
Met 14:3; Mak 1:14; 6:17; Luk 3:19,20; 4:14; Jon 1:43 Pekva John ta ansuurpei ta Jisu in atheihlai amah in Kalili a sehsa. 13#Jon 2:12; Mak 1:21; Luk 4:23Amah in Najareth amthlahche Kaparnaum a seh a tuiiboom akom Jebulun leh Naphtali ramma amsa. 14Chunna ringraan Isaiah in asonkha atlungna veisa, mah chuvah:
15“Jebulun vaa ram, Naphtali vaa ram, tuiiboom akomma, Jordon vanna Kalili na Jental, 16inthim kaara ak am mii in akthloirem akvaarkha anmuhpei, che akthivaa aniim ak am mii turella akvaarkha suuksa.”
17 #
Met 3:2; 10:7; Mak 1:15 Mahlai chunnata Jisu in nga tloh a sonna trongraan amthronpei. “Nanril thlengve, alamva ringram kurung huunnakha innaisa.”
Jisu in Ngaman mii Manlita aong
(Mak 1:16–20; Luk 5:1–11)
18 #
Mak 1:16–20; Luk 5:1–11; Jon 1:35–42 Amah in Kalili tuiiboom akomma asehlai, Simon, Pitar ta an ong, che amah anao Andriu, unao innih tuiiboomma toro denna am amuh ei, alamva anmahva ngaman miiei. 19Che amah in ankuunga asonei, “Keijuihve, che keiin nannihta mii akman kamvei uchou.” 20Kak hang achunna anmah torota anmahche Jisu ta anjuihpei. 21Mah chunnata amah in asehlai, aktlei unao innih, Jebedi asa kupa Jems leh anao John mulisuunga anpa Jebedi soh inruuia anmah torota phoh a am amuh ei, che Jisu in anmahta aongei. 22Kak hang achunna anmah in muli leh anpata mah a Jisu ta anjuihpei.
Jisu in amtheih ei, araanei, mahche amthrat ei
(Luk 6:17–19)
23 #
Mak 1:39; Luk 4:15,44; Met 9:35; Mak 1:39; 3:7–8; Luk 6:17 Jisu in Kalili ram apumte seh a anmah Sinakok rella matheih a natna satna naamte mathrat a ringram kurung huunnavaa Akthra trongta sehseh a araan. 24Chunna Jisu akming Siria ram apumtea inthangsa, che natna rii alam jikcha ah akna aklah aknang, khousaar asuur, surpitum mahche apangnem akthi mii eita amthrat ei. 25Che Kalili ram, Dekapolis ram, Jerusalem ram, mahche Judea ram leh Jordon avaraalna mii khalmo tamin Jisu aknuta anjuih.
Àwon tá yàn lọ́wọ́lọ́wọ́ báyìí:
METHIU 4: TARAOBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.