Juan 3
3
Ipiyaꞌyag ni Jesus it ki Nicodemo i matuud nga pamayaꞌ nga magkapakay it Ampuꞌang Diyus
1May esang pagbayaꞌen it mga Judio, ngaran ya si Nicodemo. Uyut kanyat mga pagtaꞌwageng Pariseo. 2Kaꞌsang delem nanungbalay kanya duꞌut ki Jesus. Maat ya, “Manigtulduꞌ, magkaꞌrutan namen nga esa ka nga Manigtulduꞌ nga ipiyatindeg it Ampuꞌang Diyus, sabap egay magkabwat it mga kalililuꞌang bagay nga subuk imu nga pamagbuwaten, in daꞌga pagtabangen kanyat Ampuꞌang Diyus.”
3Katubag si Jesus, nga maat ya, “Itu talagay kamatuudan nga isugid kut imu. Egay makaꞌuyut duꞌun it kaꞌadiꞌan it Ampuꞌang Diyus, in daꞌga iyan lamang nga ipiyanganak it sumaꞌup.”
4Iningkut ni Nicodemo, “Magꞌuꞌunu ipanganak it sumaꞌup i esang taw nga gurang na? Unu, makasled paꞌ it sumaꞌup duꞌun it panganganakan it inaꞌ ya bawnga ipanganak siꞌ?”
5Timnubag si Jesus, “Kamatuudan tuy iꞌaat ku ngaytut imu. Egay makaꞌuyut duꞌun it kaꞌadiꞌan it Ampuꞌang Diyus in daꞌga kanya lamang nga ipiyanganak it danum baw Espiritu Santo.#3:5 Siguru, ireg sugiden kaytu, taw nga ega lamang nagpabawtis nga nagsinguliꞌ it kasalaꞌan ya, in daꞌga biyaꞌgu nat Espiritu Santo i mga adat ya. 6Sabap iyan ipiyanganak it taw, taw naga yan nga uripen pat kasalaꞌan. Temed iyan ipiyanganak it sumaꞌup, ka ipiyanganak nat Espiritu Santo, ribri na kat magpanguripen ngayti. 7Aypaꞌ ayaw kat kaliluꞌ it pagꞌaaten ku ngaytut imu nga kaꞌilangan ipanganak kamut sumaꞌup. 8Dedemdemen muytu. Magꞌeyep i deres maski ari ireg ya. Magkagnegan tay agusꞌus baw magkaltegan tay kuliꞌget it mga bagay nga pagpesagen ya, bilang katandaꞌ it sebeg ya. Temed ega magkaltegan tay deres ngaytu. Ega magkaꞌrutan ta in magpaꞌunu baw in ari paggaringan ya. Ta, atkayan naga in may ipanganak it Espiritu Santo. Ka buwat it Espiritu Santo, subung nagat buwat it deres. Ega magkabegbegan tami baw ega magkaltegan ta. Magkaltegan ta lamang i mga adat nga nabaꞌgu ya duꞌut taw nga ipiyanganak it sumaꞌup.”
9Iningkut siꞌ ni Nicodemo, maat ya, “Tabing galang it imu, magꞌuꞌunu mabwat i atkayan?”
10Timnubag si Jesus, “Unuka ega magkasepsepan muy itung mga bagay it matanug kang manigtulduꞌ situt bangsa ngaytu nga Israel? 11Kamatuudan i ipagꞌaat kut imu. Itu ngaytung ipagpamatuud namen it imyu, talagang magkaꞌrutan baw naltegan namen. Temed ta, daꞌga pagpamayaꞌnen mi i pamatuud namen ngaytu. 12It daꞌga pagpamayaꞌnen mi i mga isiyugid ku ngaytung mga bagay nga magkatantuwan mi situt sinirungat langit, magꞌuꞌunu mi pamayaꞌnen in may isugid kut imyu sabap it in maꞌunu i duꞌut langit baw mga pagbuwaten duꞌun? 13Egay magkaꞌrut in magꞌuꞌunu i duꞌut langit sabap egay nakaꞌbut duꞌun nga pakaꞌrut. Temed aku nga Taga Langit nga Ipiyanganak it Taw i magkaꞌrut ka, duꞌun i giyaringan ku. 14Baw in magꞌuꞌunu ipiyadibwat ni Moises i binwat ya nga subuk dukul duꞌut rugar nga kapupuyangtan,#3:14 Mga Bilang kapitulu 21. Kat iting timpu, in siyu-siyuy makagat it mga dukul nga ipiyataban it Ampuꞌang Diyus nga bilang panriga yat kasalaꞌan nira, iyan i tambar, timingaraꞌ duꞌun it binwat ngayti ni Moises, ka iyan i inaat it Ampuꞌang Diyus. nga idiyuꞌun yat ipiyatindeg ya nga kayu, magꞌaꞌatkayan naga yan i buwaten it aken nga Taga Langit nga Ipiyanganak it Taw. Iransang nira aku duꞌut krus bawnga ipadibwat nira naga subuk dukul ngayting binwat. 15Temed ituy kaꞌirgan it Ampuꞌang Diyus isaꞌun in siyuy mamayaꞌ it aken, nga aku na lamang i pagsarigan ya, siguradung mabgayan na kanyat kaꞌgenan nga egay kaskedan.”
16Ka talagang pagrarasan nga banar it Ampuꞌang Diyus i muꞌsang taw situt sinirungat langit. Aypaꞌ ibinggay yay Anak ya nga paeꞌesa-esa, isaꞌun in siyuy mamayaꞌ baw sumarig it kanya, ega kaꞌaduꞌun it kakuriꞌan, in daꞌga mabgayan kanyat kaꞌgenan nga egay kaskedan. 17Sabap ega yay piyapaꞌasituwan it Ampuꞌang Diyus it Anak ya, betanganan it ukuman nga panriga i katataawan, in daꞌga isaꞌun maribri ya i katataawan ngaytu.
18Talagang ega na betanganan it ukuman nga panriga i kumpur mamayaꞌ baw sumarig it kanya. Temed iyan ega magpamayaꞌ, inukumanan sirang lagi nga mabgayan it panriga, sabap ega pagpamayaꞌnen niray paeꞌesa-esa ngaytung Anak it Ampuꞌang Diyus. 19Ukumanan sira it atkaytu sabap kanya nga paꞌaateng tidaw, naꞌasitu nat banwa, temed yagay paglabiyen it katataawan, kadleman, ega kaꞌyagan ngaytu, sabap it sigi gang buwat nirat karaꞌe-raꞌetan. 20Iyan magbuwat ngaytut karaꞌe-raꞌetan, talagang ega ireg yay tidaw ngaytu. Ega ireg yang patpad ka maꞌyagan i buwat ya nga maraꞌe-raꞌet. 21Temed iyan nga magpangaꞌgenan na kat kataldengan, ega nay pagꞌaliꞌan ya it patpad it tidaw ngaytu, isaꞌun matanyag i buwat ya nga magsunud it kaꞌirgan it Ampuꞌang Diyus.
Pamatuud ni Juan ngayting uꞌna-uꞌnang namawtis duꞌut mga alagad ya pasar it ki Jesus
22May pirang aldaw i nagtaꞌlib, naꞌaduꞌun si Jesus baw mga alagad ya ngayti it rugar it Judea. Kimnaꞌla-kaꞌlay sira duꞌun ka mamagpamawtis. 23Si Juan ngayti, duꞌun i pagpamawtisan yat Enon nga adeꞌdeng duꞌun it Salim sabap madanumun i duꞌun. Magpaꞌaduꞌut kanya i katataawan ka magpabawtis, 24sabap iting timpu, ega paꞌ pinirisu si Juan.
25Kaꞌsa nagpakidaꞌeg i mga alagad ni Juan it esang Judio pasar it kaꞌugaliꞌan nira nga paglimpiyuꞌ.#3:25 Siguru nagpakidaꞌeg i mga alagad ngayti ni Juan sabap magꞌinggit sira, ka tanud nira magayen pang panlimpiyuꞌ i pagbawtis ni Juan, magayen pat ki Jesus. 26Egay beken, naꞌaduꞌun sirat ki Juan, ka maat nirat kanya, “Manigtulduꞌ, tabiꞌ it imu. Iyan baꞌ, taw ngayan nga iba mu ngayan duꞌun it dipag it Jordan, nga may ipagpamatuud mu pasar it kanya, kayti ngaytu magpamawtis na gasiꞌ. Magpuꞌsa-puꞌsa nay taw it magꞌaduꞌut kanya.”
27Katubag si Juan, maat ya, “Yay matuud, ega mabwat it esang taw nga subuk atkaytu ngaytu in daꞌga pabetang-betang it Ampuꞌang Diyus it kanya. 28Kamu na kayti i magkapamatuud it iyan nga isiyugid ku, nga maat ku basaꞌan, ega aku i Cristo. Tiyaꞌeg aku lamang nga tigauꞌna ya. 29Ka subuk pasar it pagꞌasawa, iyan babay nga pagꞌasawaen na, kat lalaki lamang nga magpangasawa. Baw iyan lalaki nga magpasimpan it pagsadu ngaytu, nga iba-iba it magpangasawa, masagya kanyang banar pagkagneg yat ampang it iba-iba ya ngaytu nga papagsaduun na sira. Kayti aku, atkayan naga. Masagyang-masagya aku na, sabap it miyabut na si Jesus nga subuk pagsimpanan ku. 30Kaꞌilangan nga magmabantug kanya ngaytu, temed aku, magtimawaꞌ lamang.”
31Iyan taga denaꞌ, simpri kat denaꞌ lamang yan, baw mga pagsugiden ya, purus mga bagay nga magkatantuwan ta situt denaꞌ. Temed iyan garing duꞌut langit, iyan i mabantug pat muꞌsa. 32Lamang ipagpamatuud ya nay mga naltegan baw nagnegan ya, subuk egay magpamayaꞌ it ipagpamatuud ya ngaytu. 33Temed iyan namayaꞌ nat ipagpamatuud ya ngaytu, iyan i magpamatuud gasiꞌ nga Ampuꞌang Diyus, purus kamatuudan i kanyang pagꞌampangen. 34Sabap iyan nga tiyaꞌeg it Ampuꞌang Diyus, simpri egay beken nga ipagsugid ya in daꞌga iyan ipagpasugid nagat Ampuꞌang Diyus, sabap may Espiritu Santo na duꞌut kanya nga egay kaskedan it tabang ya. 35Pagmaꞌalen nga banar it Amaꞌ i Anak. Baw ipiyaꞌalima ya it kanya i muꞌsa nga mga bagay. 36Iyan magpamayaꞌ baw magsarig nat Anak ngaytut Ampuꞌang Diyus, may kaꞌgenan ya na nga egay kaskedan. Temed iyan nga ega magpamayaꞌ it Anak ngaytu, ega makanya i itung kaꞌgenan. Siguradung ega kaꞌbut duꞌut kagayenan nga duꞌun it langit. Magtetdek paꞌ duꞌun it kanya i iseg it Ampuꞌang Diyus.
Àwon tá yàn lọ́wọ́lọ́wọ́ báyìí:
Juan 3: TBWONT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 1992, Wycliffe Bible Translators, Inc. All rights reserved.