MATEO 10
10
Jesus la stꞌuj lajchaytul jpuk-kꞌopetik
1Te Jesuse la yikꞌ tal te lajchaytul jnopojeltik yuꞌune. La yakꞌtalanbe yichꞌ yaꞌtelik ta slokꞌesel pukujetik sok ta slekutesel spisil tutikuk nax chamelil sok te tutik kꞌux ta aꞌiyele. 2Jaꞌ sbiilik te lajchaytul jpuk-kꞌopetike: Te machꞌa naile jaꞌ te Simon te jPedro a kꞌot sbiile, sok te yijtsꞌine te jꞌAndres sbiile, sok te Jacobo sok te yijtsꞌin te Juan sbiile te xnichꞌnab Zebedeoe, 3sok Felipe, sok jBartolome, sok jTomas, sok jMateo te jkꞌan-tojemale, sok Jacobo te xnichꞌan Alfeoe, sok jLebeo te jTadeo a kꞌot sbiile, 4sok te Simone te ay ta skuenta te jkananistaetike, sok te Judas Iscariote te ta patil la yakꞌ entregal te Jesuse.
Jesus la stikon ta yalel skꞌop Dios te jnopojeletik yuꞌune.
5Te Jesuse la stikon bael te lajchaytulike sok la spas bael ta mantal:
—Ma me baanik te ba ay te ma israeluke, sok ma me ochanik te ba jtejklumetik yuꞌun te samariaetike. 6Teꞌ me xbaex a te ba ay te jꞌisraeletike porke jich kꞌoemik te tutꞌil karneraetik te chꞌayemike. 7Baanik, alaik bael: “Nopol ya xlijkix ta mantal te jTatik Diose”, xchaex me. 8Sok ya me alekutesik te machꞌatik ayik ta chamele, sok ya me akusesik te machꞌa chamene. Sok ya me achꞌaybe xchamel te jkꞌaꞌel-chameletike, sok ya me alokꞌesik te pukujetike. Te jaꞌexe majtan me la ataik te apoderike. Ma me xꞌakꞌan atojolik a, majtan me xꞌawakꞌik jil euk.
9“Ma me xꞌawichꞌ atakꞌinik, ni oro, ni plata, ni kobre. 10Sok ma me xꞌawichꞌ amoralik, ni ajel-kꞌuꞌ-pakꞌik, ni ajel-wawik, ni anabateꞌik. Te machꞌatik ya xꞌaꞌtejike jich me ya sta sweꞌelik a.
11“Kꞌalal ya xkꞌoex te ba jtejklum sok ta kolonyaetik, leaik te machꞌa lek yoꞌtane. Teꞌ xꞌainex a te ba snae jaꞌ to teme lokꞌex baele. 12Kꞌalal xꞌochex ta snae, patbeya me yoꞌtan te yajwal nae. 13Teme lek a yaꞌiy te yajwal nae, ben bujtsꞌan kꞌinal ya xkꞌot yuꞌun. Yan teme ma lek a yaꞌiye, ya me sujt tal ta akuentaik te bujtsꞌan kꞌinal te ya awalbeyike. 14Teme maꞌ skꞌan a snajkanexe, sok teme maꞌ skꞌan a yaꞌiybeyex sluwar te akꞌopike, lokꞌanik tel te ba snae, o lokꞌanik bael te ba jtejklume. Tijtina jilel te stanil awokike. 15Jamal ya kalbeyex te tut ora ya sta yorail yuꞌun Dios te ya yilbe yaꞌtelik spisil te genteetike, te kastigo ya yichꞌ te jtejklum me to mas tulan ke te ya yichꞌ te jtejklum Sodoma sok Gomorrae.
Ay wokol sok ilbajinel
16“Ilawilik ya jtikonex bael jich tutꞌil karnera ta yolil te genteetike te pajal sok jweꞌawal teꞌtikil tsꞌiꞌetik ta atojolike. Pꞌijanik me jich tutꞌil pꞌij te chane. Sok manso me xꞌawakꞌ abaik ta stojol te genteetike jich tutꞌil manso te palomae. 17Ila me abaik yuꞌun te genteetike, yuꞌun ya me yakꞌex ta skꞌab te juꞌeletike, sok ya me awichꞌik majel ta sinagogaetik, 18sok ya me yikꞌelex bael ta stojol juꞌeletik sok ta sit gobierno ta skaj te achꞌuunejikone. Jich me testigo ya xkꞌoex kuꞌun te stojolik sok ta stojol te machꞌa ma snaꞌbeyik sba te Diose. 19Pero te kꞌalal ya stekꞌanelex ta skuenta te juꞌeletike, ma me yajtaluk awoꞌtanik te tutꞌil ya skꞌan ya ajakꞌbeyik te skꞌopike sok te tut ya skꞌan xkꞌo awalike. Jich te tut ora ya xkꞌopojexe, Dios me ya yaꞌbeyex xꞌawalik te tut ya awalike. 20Jich te tut ya awale ma jaꞌukat akꞌop, jaꞌ ya xkꞌopoj ta awoꞌtanik te Espíritu yuꞌun te jTatike.
21“Ay me machꞌa ya xꞌakꞌot ta milel yuꞌun te machꞌa jun smeꞌ-stat soke. Sok ay me ya yakꞌ ta milel yal-xnichꞌan te tatile. Sok ay me alnichꞌanetik ya xlijk skontranin te smeꞌ-state sok ya me yakꞌik ta milel ekꞌa. 22Ya me spꞌajex spꞌejel te genteetike yuꞌun te achꞌuunejikone. Te machꞌa ya xkujch yuꞌun kꞌalal ta slajibal kꞌaale, ya me xkol. 23Te tut ora ya xlijk yilbajinex te jtejklume, ananik bael ta yan jtejklum. Jamal ya kalbeyex, ma to ba ya xjoypꞌe ta ilel awuꞌunik a te mukꞌul jtejklumetik ta Israel te ya xtal te Nichꞌanile.
24“Ni jtuluk eskuelero te mukꞌ xan ay yuꞌun te yaj-maestroe. Sok ni jtuluk aj-aꞌtelil te mukꞌ xan yuꞌun te yajwale. 25Jich te eskueleroe teyuk me ya yaꞌiy a teme pajal ya xkꞌot sok te yaj-maestroe. Sok te aj-aꞌtelile teyuk me ya yaꞌiy a teme pajal ya xkꞌot sok te yajwale. Teme “Beelzebu” xchi jkꞌoplal te joꞌon te Ajwalilon awuꞌunike, jich me ya yalbeyex akꞌoplalik euk te jaꞌexe.
Machꞌa a te ya skꞌan ya jxiꞌtike
26“Jaꞌ yuꞌun maꞌ me xiꞌanik yuꞌun te genteetike. Jich maꞌyuk tut nakꞌal te ma xchiknaje, sok maꞌyuk tut mukul te ma xꞌakꞌot ta naꞌel sluwarile. 27Te tut ya kalbeyex awaꞌiyik ta ijkꞌal kꞌinale jaꞌ me ya awalik ta sakil kꞌinal. Sok te tut ya kalbeyex ta mukule, jaꞌ me ya awalik ta jamal, jich kꞌoem te tutꞌil tekꞌelex ta tulan kꞌop ta jol na. 28Ma me xiꞌanik yuꞌun te machꞌa ya skꞌan smilbeyex te atiꞌbalulike, pero ma xjuꞌ yuꞌunik te ya smilbeyex stukel te achꞌulelike. Jaꞌ me xꞌaxiꞌik te machꞌa ya xjuꞌ yuꞌun te ya yakꞌex ta lajel sok te atiꞌbalulike sok achꞌulel te ba kꞌakꞌ te max tupꞌ sbajtel kꞌinale.
29“¿Ma wan junuk peso stojol ta chonel ta merkado te chaꞌkojt chꞌin mutetike? Pero ni jkojtuk ma xjuꞌ ya xcham teme ma jichuk skꞌan yoꞌtan te jTatike. 30Sok te jaꞌexe asta te stsotsil ajolike yajtaye ta juju-lijk.
31“Jaꞌ yuꞌun ma me xiꞌanik. Te jaꞌexe mas tulan akꞌoplalik ta yoꞌtan Dios te tutꞌil ay skꞌoplal bayal ta jkojt te chꞌin mutetike.
Aꞌ me kaltik ta jamal te tutꞌil yuꞌunotik te Jesucristoe
32“Spisil te machꞌa ya yal ta jamal ta stojol genteetik te joꞌon Yajwalone, jichon euk jamal me ya kal ta stojol te jTat te ay ta chꞌulchane te tutꞌil ay ta jkuentae. 33Yan te machꞌa ma jamaluk ya yalon ta stojol te genteetike, jichon euk te joꞌone ma jamaluk ya kal ta stojol jTat te ay ta chꞌulchan.
Ya xjatꞌ sbaik te genteetike yuꞌun te Jesuse
34“Ma me xꞌakuyik te tal kakꞌ bujtsꞌanejuk kꞌinal ta balmilal. Ma jaꞌuk talemon yuꞌun. Tal kakꞌ lijkuk kꞌop. 35Te winike ya skontrain te state, te antse ya skontrain te smeꞌe, te alibale ya skontrain te smeꞌ-yalibe. 36Yuꞌun jaꞌ skontra ya xkꞌot te machꞌatik ay yuꞌun ta snae.
37“Te machꞌa ben kꞌux ta yoꞌtan te smeꞌ-state teme ma jichuk kꞌuxon ta yoꞌtane ma snujpꞌuk te kuꞌun ya xkꞌote. Sok te machꞌa ben kꞌux ta yoꞌtan te yuntikile teme ma jichuk kꞌuxukon ta yoꞌtane, ma snujpꞌuk te kuꞌun ya xkꞌote. 38Sok te machꞌa ma skꞌan ya skuch skrus kꞌoem te ya stsꞌakliyone, ma spas te kuꞌun ya xkꞌote. 39Te machꞌa ya xkꞌuxutay sba sok te xkuxlejale, ya me xchꞌay sok te xkuxlejale. Yan te machꞌa ya xchꞌay xkꞌuxlejal teme joꞌon ta kaje, ya me xkuxuyin stukel.
Skoplal te jmajtantik te ya yaꞌbelotike
40“Te machꞌa ya yikꞌex ta snae, joꞌon a yikꞌonix ta sna euk. Sok te machꞌa ya yikꞌon ta snae, jaꞌ la yikꞌix ta sna euk te machꞌa stikonejon tale. 41Te machꞌa ya yikꞌ ta sna jtul jꞌalwanej skaj te jaꞌ jꞌalwanej yuꞌun te Diose, pajal me smajtan ya yichꞌ sok te jꞌalwaneje. Sok te machꞌa ya yikꞌ ta sna te machꞌa lek ta winikile, pajal me smajtan ya yichꞌ sok te machꞌa lek ta winikile. 42Sok te machꞌa ya yaꞌbey junuk tasa sikil jaꞌ te machꞌatik chꞌin yakꞌoj sbaik skaj te jnopojel kuꞌune, jamal ya kalbeyex, ay me smajtan ya yichꞌ —xchi te Jesuse.
Àwon tá yàn lọ́wọ́lọ́wọ́ báyìí:
MATEO 10: AMANNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nuevo Testamento Tzeltal de Amatenango © Sociedad Bíblica de México, 2006.