VPHAUNGC VYAUNGC 2
2
1Tishox rueq mungkawx lotlaz kuex kvkhoc tvdung sung lot tueq. 2Tishox rueq raungx mvshix raungnuiyq vpiq rueq shuimc juing htenc lotlaz tvlot vtueq, yauk shuimc kuex httvr tueq.#Heb 4:4,10 3Kvkhoc raungx mvshix raungnuiyq tvdungc sungc yauk shuimc tvlot httvr tueq ningkhvnc nuex, Tishox rueq kvruex raungnuiyq kuex ruimruimx kuq ruiux, htep raungnuiyq muex tvyaungc tueq.#Dw 20:11 4Ekvkhoc maq mungkawx kuex tvdung sung tueq.
Eden Sunc
Yehowa #2:4 Yehowa: ngoz yaq kuex Hebre maq Yawe ngoz yaq, kvruex kuex Englik maq Yehowa ngoz tueq layc shec tueq. Today’s English Version nuex kuex Taungjix ngoz tueq layc shec tueq. Tishox rueq mungkawx kuex tvdung sung tueq nuex, 5ghaqkhux htauk nuex raungx tvyunc muq shauk doc ningkhvnc nuex, vjungx kemz muq, vkoz muinz koz muq shauk, ghaq htoay jix muinz vguez shauk; 6yuq muinz ghaq mungx wawc yuix dungc ningkhvnc nuex ghaq kuex tvbuirc tueq.
7Kvruex yimaq Yehowa Tishox rueq ghaq wawc miq shvmx kuex tvhungx ruiux, miq khuiz puc nuex tvraungx thuiuzthuic kuex muy koq tueq miq kuex thuiuzthuic tvraungx miq muex yaungx kaz tueq.#1Kor 15:45
8Kvruex yimaq Yehowa Tishox rueq shaldungc kox wawc Eden hong nuex sunc kuex tvhungx vtueq, tvdung sung taq tueq miqwaz kuex sunc kvyuq tvhttax tueq. 9Vpiq rueq sunc kvyuq vsvp waq vjungx phvnx ruip saz kuex tvkemz vtueq, phuiuz vsvy muex vhvlx phvnx vthuey phvnx ruip saz kuex tvkemz tueq. Sunc vmungx baung nuex thuiuzthuic tvraungx kuq yaq jungx httax yaq, vhvlx nuiyc vbac kuex tv-phvlc tuiuz thenc juing jungx muinz httax yaq.#Tvkh 2:7; 22:2,14
10Yuix ruilx vshiz kuex Eden hong maq dung kaz vtueq sunc kvyuq yuix kuq tueq; sunc kvruex lvy laq vtueq yuix ruilx bvlic muex rv-phvlc kaz wvnc tueq. 11Vphaungc ruilx shiz kuex Pishon ruilx rvtueq, Hawila mungx kuex tvroz vtueq kaz wvnc tueq. 12(Kvruex hong kvyuq kuimshawx dung yaq, vhtawz vhttax vhomc vtumc phvnx nuiyc lungsex muinz dung yaq.) 13Ruilx nueyc ngoc yaungc kuex Gihon ruilx rvtueq, Kush#2:13 Kush: Vruex mungx kuex Mesopotamia rvmuq ngoz ruiux Ethiopi mungx kuex tvtsuingc vtueq vjungx rvtueq. mungx kuex tvroz vtueq kaz wvnc tueq. 14Ruilx thuimx ngoc yaungc kuex Tigri ruilx rvtueq, Asiria mungx shaldungc kox maq kaz wvnc tueq. Ruilx bvlic ngoc yaungc kuex Euphrat ruilx rvtueq.
15Kvruex yimaq Yehowa Tishox rueq Eden sunc kuex shuimc kay tvkoc nuiyc lawc mawc tvkoc miqwaz kuex kvruex sunc kvyuq tvhttax tueq. 16Yehowa Tishox rueq jungx kuq tueq, “Kvruex sunc nuex kemz yaq pulx thuey htenc kuex mnoz rueq phuiuz svy mvy yaq, 17yuq muinz vhvlx nuiyc vbac tv-phvlc tuiuz thenc juing pulx jungx httax yaq. Kvruex jungx wawc vthuey kuex mnoz rueq phuiuz svy mvy muq; mkhoc shoc maq phauk saq gay ruiux kuex kvruex raungnuiyq mnoz vthueyc juing rvtueq,” ngoz tueq jungx tueq.
18Kvruex yimaq Yehowa Tishox rueq, “Miqwaz kuex piq washiz lauklauk dvyx httaz tvkoc aungx muq. Piq muex romc lawc kuy tvkoc hunghtaungx yaq kungjix ngaz rueq tvdung sung kuq shaungx,” ngoz tueq jungx tueq. 19Kvkhoc rvtueq Yehowa Tishox rueq ghaq wawc ghaq raungluingx kuex lvmz vtueq ngvmx saz nuiyc wushawx htenc kuex tvdung sung ruiux, phvnshiz maq phvnshiz muex vmuingc muingc kuy tvkoc miqwaz kox kvyuq lvmz laq tueq; kvkhoc rvtueq ngvmx saz lotlaz rueq miqmac muingc kuex lvp wvnc wuez tueq. 20Miqwaz rueq ngvmx saz nuiyc wushawx htenc lotlaz muex vmuingc muingc kuq tueq. Yuq muinz kvhtenc kvwawc miq muex romc lawc kuy tvkoc hunghtaungx yaq kungjix kuex dung muq, httax muq.
21Kvruex yimaq Yehowa Tishox rueq miqwaz kvruex maungkuiyq tvtsoalx vtueq, kvtsoalx baunglaung vsamx rawz vshiz lvmz ruiux, vngvmx kuex tvtuingc puingc yek tueq. 22Vpiq rueq samx rawz kvmaq miq yalxjuik kuex tvdung sung vtueq, miqwaz kox nuex shvlx wvnc tueq. 23Miqwaz rueq,
“Vruex kuex ngvy samx rawz maq ngvy samx rawz,
ngvy ngvmx maq ngvy ngvmx rvtueq.
Piq kuex miqwaz wawc lvmz vtueq tvdungc ningkhvnc nuex,
‘Miq yalxjuik’ ngoz tueq muingc juing,” ngoz tueq.
24Ekvkhoc rvtueq miqwaz kuex miqmac nyuiuz vwaz gay shec ruiux, vtaungx nyuiuz rulc httaz kay ningkhvnc nuex tsuingnueyc kuex vshiz muex dvyx shex yaungx kaz tueq.#Mat 19:5; Mak 10:7,8; 1Kor 6:16; Eph 5:31
25Tsuingnueyc kuex khoguez khvyguez dvyx httax tueq, yuq muinz yvlc svy ngoz tueq vguez.
Àwon tá yàn lọ́wọ́lọ́wọ́ báyìí:
VPHAUNGC VYAUNGC 2: HNOT01
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Hawa Naga Bible © Bible Society of Myanmar, 2014.