YOHAN 2
2
Kana Ghaq nuex Miqlvmc Moalx
1Raungnuiyq nueyc yix maq Galile mungx Kana ghaq nuex miqlvmc moalx vshiz httax tueq. Yesu nyuiuz muinz kvyuq lomx tueq, 2Yesu nuiyc vpiq sangac hez muinz kvruex miqlvmc moalx kvyuq gvl tueq. 3Svpiq tix htumx kaz koq tueq, Yesu nyuiuz rueq, “Tsuingshiq svpiq tix htumx kaz,” ngoz tueq vpiq muex tvtay jungx tueq.
4Yesu rueq yalxjuik nyuiuz lex, “Yvmx shuimc juing lac kuex mnoz rueq ngaz muex jungc rac muq, ngvy vkhing max httuiuc dvyx doc,” ngoz tueq.
5Vnyuiuz rueq nvrc waz hez muex ngoc, “Vpiq rueq nuimshiq muex jungx shuex kvkhoc shuimx shuinz,” ngoz kuq tueq.
6Yuda miqsaz tvsawc nawc hoalc vhtungx httax yaq rulc rv-ngvlc, liter shashiz banz yaq lung gvmtuik tvruk tux taq tueq. 7Yesu rueq yauk shuimc jix hez muex, “Kvruex gvmtuik htenc kvyuq yuix mvrc laz htawc shuinz,” ngoz tueq nvrc waz hez muex jungx tueq. Tsuingshiq rueq mvrc lalaz khu htawc tueq, 8kvruex yimaq Yesu rueq, “Vtix raungluingx saz khuz vtueq moalx yauk shuimc jungx waz muex kuq waung kuinz,” ngoz tueq jungx koq tueq tsuinghez rueq muinz kuq wuez tueq. 9Yauk shuimc jungx waz rueq yuix wawc svpiq muex yaungx wvnc tueq kuex talx tueq. Nvrc waz hez rueq svpiq kuex yvmx wawc vlvp laz tuiuz yaq, yuq muinz moalx jungx jix waz rueq tuiuz muq; kvkhoc rvtueq moalx jungx jix waz rueq waz nyalx waz kuex gvl vtueq, 10“Uraq muinz svpiq vsumx kuex kungkhux tvnuingc lot vtueq, tsuingshiq rueq phoay laz nuingc lot yix jix svpiq vlawz kuex tvnuingc ruiux yaq, mnoz rueq svpiq vsumx kuex majuiuc nuex httuiuc laz taq toq ix?” ngoz tueq.
11Yesu rueq Galile mungx Kana ghaq maq vphaungc shauk shauk vwangc juing kuex tvkhic wvnc vtueq, kvyuq vpiq ngauz vngax kuex dung tueq nuiyc vpiq sangac bix muinz vpiq muex kvmluimx wvnc wuez tueq.
12Kvruex yimaq Yesu kuex vnyuiuz, vnox tamx nuiyc sangac hez rulc vdvmz Kapernaum ghaq nuex kaz wvnc vtueq kvyuq vlosaz httax shec tueq.#Mat 4:13
Yesu kuex Shomc Yuimx nuex Kaz
(Mat 21:12-13; Mak 11:15-17; Luk 19:45-46)
13Yuda miqsaz htenc Tvlvy Wvnc Moalx httuiuc wvnc koq tueq, Yesu kuex Yerusalem ghaq nuex kaz wvnc tueq.#Dw 12:1-27; Tvrac 1:16; Yoh 2:23 14Shomc Yuimx nuex manx, khelbuenx, hituiuc shaungc jix nuiyc kuimphox tvluiz laux layc jix htenc ngaungc yaq kuex vpiq rueq khiz tueq. 15Kvkhoc rvtueq vpiq rueq ruiuz pvnc maq svnthuingx kawz tvhungx vtueq, khelbuenx, manx nuiyc nyvmx saz lotlaz kuex Shomc Yuimx wawc yurc gay ruiux, kuimphox tvluiz laux layc jix hez kuimphox htenc kuex ruiuc gay ruiux, tsuingshiq humpanx htenc kuex kuip ruiuc gay tueq. 16Vpiq rueq hituiuc shaungc jix hez muex ngoc, “Vhtenc vruex lvmz gay shuinz! Iwaz yuimx vruex taungx vwawx shaungc yuimx muex nauk tvyaungc!” ngoz kuq tueq. 17Kvkaq vpiq sangac hez rueq Rumvrc luik nuex, “M-yuimx muex rvnphvnx vtuiux thuinz kuex ngvy thuinz mungx nuex wvr ikhoc luic yaq,” ngoz tueq vwuiyq taq kvjaz kuex rvwvl lvp tueq.#Tvts 69:9
18Yuda miqsaz vrangx vpangx vhttax jix hez rueq, “Mnoz rueq vtanc khvnc shuimc tvkoc vkhangx httax yaq lvmx kuex yvmx vwangc juing shuimx vtueq lac nuiyshiq muex tvkhic kuq phux?” ngoz tueq wiz tueq vpiq rueq tvralc tueq.
19Yesu rueq, “Vruex Shomc Yuimx kuex httak gay shuinz, raungnuiyq thuimx nuex dvyx ngaz rueq tvjvp guirx lot shaungx,” ngoz tueq tvralc tueq.#Mat 26:61; 27:40; Mak 14:58; 15:29
20Yuda miqsaz htenc rueq, “Shomc Yuimx vruex raungwawc 46 vguirx rvtueq, mnoz rueq raungnuiyq thuimx nuex doc haz guirx lot shuiux?” ngoz tueq wiz tueq.
21Yuq muinz Yesu rueq shomc yuimx ngoz tueq kuex vpiq shauk pumz ngoc rvtueq. 22Kvkhoc rvtueq vpiq sangac bix rueq vpiq vthueyc wawc yuing kvtenc wvnc tueq yix maq jix, vpiq rueq kvkhoc jungx wvnc tueq kvjaz kuex rvwvl tvmaung wvnc wuez yek vtueq, Rumvrc luik kvmac muinz Yesu rueq vjungx kvjaz kvmac muinz kvmx wvnc tueq.
Miqsaz lvmz Yesu rueq Tuiuz yaq
23Tvlvy Wvnc Moalx baunglaung Yerusalem ghaq nuex vpiq rueq tvkhic wvnc tueq vwangc juing yauk shuimc htenc kuex miq paunghvlc rueq khiz vtueq vpiq muex kvmluimx wvnc wuez tueq. 24Yuq muinz Yesu rueq miq lotlaz thuinz kuex tuiuz yaq ningkhvnc nuex tsuingshiq muex kvmx muq. 25Vpiq rueq tsuingshiq thuinz vmungx nuex tvmaung yaq kuex tuiuz yaq ningkhvnc nuex, vpiq muex miqsaz lvmz kuex uraq muinz jungc kuy rac muq.
Àwon tá yàn lọ́wọ́lọ́wọ́ báyìí:
YOHAN 2: HNOT01
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Hawa Naga Bible © Bible Society of Myanmar, 2014.