Maafiù 4
4
E wàaà wo Jisɛ̀ naŋ kɔ̀ dìì lɛ
(Mài 1.12, 13; Luù 4.1-13)
1Kpeiŋ wo Jìnàŋ wo Kanaà Dayà naŋ nyɛ̀nɛ̀ŋ wo Jisɛ̀ wo kà ke fòùngà e diì wòaà sùà wèè wo Sɛ̀tanàaŋ wouŋ wàà. 2Nààŋ wo Jisɛ̀ nao wa nɔ̀ŋ wèè e gɔɛɛ kpɛ̀ɛ̀ùŋ tìyèe yèè e duùm kpɛ̀ɛ̀ùŋ tìyèe wò yaà kùwìè ke tɔùŋ, e jìèɛ nauŋ wa nyɛ̀nɛ̀ŋ. 3Kpeiŋ wo Sɛ̀tanàaŋ, wo nyuùŋ wàauŋ nɔɔ̀ŋ naŋ hnè ko nɛ̀ɛ̀uŋ niìŋ yèè wò nauŋ woò wààŋ, “Sèè mààŋ muàŋ nàŋ yaà wo Jɔ̀àfèlàà Dayàa, kɛ̀ wòò le dùò lɛɛ̀ e kìlà e gbɔ̀u wèè muŋ gbìlà.”
4Kɛɛ wo Jisɛ̀ naŋ fàsàì wo Sɛ̀tanàaŋ wààŋ, “È yaà sìnga niŋ wɔŋ fɛ̀ì Dayàa sùà yèè wɔ̀ŋ naŋ woò wààŋ kɛ̀, ‘Anyùuŋ kpùuŋ ɓɔ̀ àŋ nɔ̀ŋ nɔŋ wɔ̀ŋ nyiiŋ gèeɔ̀ sùà wèè è nɛ̀ŋje tiŋ guùŋ, kɛɛ sɔɔ̀ aŋ tùlìà kè miè gbòa gbiŋ ke yèɛ naŋ fòlò wò Dayà nyààŋ lɛ ke jii.’ ”
5Wo Sɛ̀tanàaŋ naŋ kɔ̀ɔ̀ wo Jisɛ̀ ko Jùlusɛ̀làm, ko Jàwà Nɛɛmaìŋ gbeeì, yèè wò nauŋ jàà fauŋ ke Saaŋ Zòòlò Dayàa gbɔ̀mɔ̀ŋ dìmɛ̀i, 6yèè wò nauŋ woò wààŋ, “Sèè mààŋ muàŋ nàŋ yaà wo Jɔ̀àfèlàà Dayàa, kɛ̀ vàì muŋ dè ko dììnaŋ. Esaɓù kɛ̀ wɔŋ fɛ̀ì Dayàa nàŋ woò wààŋ,
‘Wo Dayà do nàŋ wòò aŋ màikàuŋ nyàŋ,
wèè aim kùwìà maŋ kùàŋ sùà nyiŋ màŋ,
wèè kɛ̀ ke golò mɔɛ̀ŋ pɛɛ go nàŋ nɛɛmùŋ maŋ dùò maŋ diɛŋ.’ ”
7Wo Jisɛ̀ nauŋ fasàì wààŋ, “Kɛɛ wɔŋ fɛ̀ì Dayàa naŋ ɓɛìŋ woò wààŋ, ‘Ɓɔ̀ mùŋ gbìàŋ wò Kana mɔɔ̀ŋ wò Dayà mɔɔ̀ŋ è wàa dìì.’ ”
8Kpeiŋ wo Sɛ̀tanàaŋ naŋ kɔ̀ɔ̀ wo Jisɛ̀ wɔŋ toò mùŋlaŋ bà dìmɛ̀ yèè wò nauŋ tɔ̀ɔ̀ e tɛ̀ɛ̀tɛ̀ɛ̀ e kànà ɗuunyaàŋ gbiŋ. 9Wo Sɛ̀tanàaŋ naŋ wòò wo Jisɛ̀ wààŋ, “Miŋ doum nàŋ kìɛ̀ŋ manɛ̀ŋ mɛɛ̀ŋ gbiŋ, sèè maŋ dè maŋ gɛ̀ɛ̀nùum màŋ dìì e kìlà maim zoolò.”
10Wo Jisɛ̀ nauŋ fasàì wààŋ, “Yewà kià, Sɛ̀tanàaŋ! È yaà sìnga niŋ wɔŋ fɛ̀ì Dayàa sùà kɛ̀, ‘Muŋ zoolò nɔŋ wo Kanaà wo Dayà mɔɔ̀ŋ yèè wuŋ guùŋ kpò.’ ”
11Kpeiŋ wo Sɛ̀tanàaŋ naŋ jòò wo Jisɛ̀ wo ka. Ko fɛɛ̀feìŋ aŋ màikà nyaŋ naŋ wa hnè yèè àŋ nauŋ kpuumò.
Wo Jisɛ̀ naŋ tɔ̀ɔ̀tù e tòmouŋ nɛ̀ ko Galaliì
(Mài 1.14, 15; Luù 4.14, 15)
12Nààŋ wo Jisɛ̀ naŋ wa kòmò kɛ̀ àŋ gbìàŋ wo Jɔ̀ɔŋ ko sààŋ nyìwì, wò naŋ wa yèwè koɓɛ̀ wii yèè wò naŋ kɔ̀ wɔŋ fùɔ̀ŋ Galaliìɔ sùà. 13Kɛɛ wo Jisɛ̀ gò wa jèè kò Naazɔ̀ɛ̀, wò naŋ wa kɔ̀ wèè wo jòò ko jawa gbeeì àŋ nyaaŋ Kepanàùm. E jawa lɛɛ̀ yaà wa wɔŋ juwoɔ̀ kɔɔ wɔŋ fùɔ̀ŋ Galaliìɔ, maŋ kpàlàùŋ kpàlàùŋ maŋ sùà ko Zɛɓulɔ̀ùŋ yaà ko Nataliì. 14Tɛɛ̀ naŋ wa kaaìŋ wèè e nyɛ̀nɛ̀ŋ e yèɛ wo Dayà naŋ wa woò lɛ e hɛɛnɛ̀ŋ, nààŋ wo wɛ̀ijìɔ Àzaayà naŋ wa woò lɛ wààŋ,
15“E dììɛ maŋ kpàlàùŋ kpàlàùŋ maŋ sùà ko Zɛɓulɔ̀ùŋ yaà ko Nataliì,
e tèèngà koɓɛ̀ ke dòmaàŋ kɔ̀à koɓɛ̀ wɔŋ juwoɔ̀ lɛ, yèè wɔŋ fàa bàa e Wùìyè Jɔɔɗììŋ lɛ nìngè,
koɓɛ̀ anyùùŋ nyaŋ e dìì wɔŋ fùɔ̀ŋ Galaliìɔ sùà, anyùùŋ nyaŋ fè àŋ Juùù nyaŋ!
16Jòòpɛɛ anyunùiŋ nyàŋ joà ke nyìwìɛ sùà,
àŋ do nàŋ yɛ̀mɛ̀ e gbolòùŋ gbee.
Anyùùŋ nyaŋ joà ke nyìwì e fàa dìì nyaŋ
e gbolòùŋ do nyiŋ nàŋ mɛ̀ɛ̀ŋ diɛŋ.”
17E yìwìà e teenga lii sùà wo Jisɛ̀ naŋ tɔ̀ɔ̀tù gbòà ke mìè Dayàa koɓɛ̀ anyùùŋ nyaŋ wààŋ, “Fèiŋ maŋ tùwo naanààiŋ màŋ jɛwɛ, esaɓù kɛ̀ e Kànà àìjɛnɛ̀ɛŋ è gbɛ̀ɛ̀!”
Wo Jisɛ̀ naŋ nyààŋ anyùùŋ sùngà tiinàŋ wèè aŋ dèuŋ manjɛ̀wɛ
(Mài 1.16-20; Luù 5.1-11)
18Nààŋ wo Jisɛ̀ yaà wa kààìŋ wɔŋ juwoɔ̀ kɔɔ wɔŋ fùɔ̀ŋ Galaliìɔ sùà, wò naŋ yɛ̀mɛ̀ aŋ wùìyà nyùùŋ tìyèe, àŋ yaà wa anyuùŋ sùnga. Aŋ wùìyà tìyèe bi nàŋ yaà wa wo Saimɔ̀ŋ Piilɛ̀ yaà wo wùìyauŋ nɔɔ̀ŋ Anɗù, àŋ yaà gbììnyɛ̀ŋ kpee wɔŋ juwoɔ̀ sùà àŋ kuwo aŋ kɛ̀ì. 19Wo Jisɛ̀ naŋ nyiŋ woò wààŋ, “Dè nìim maŋjɛ̀wɛ, mìŋ doiŋ nàŋ nyɛ̀nɛ̀ŋ naŋ hìàŋ anyùùŋ koɓɛ̀ Dayài.” 20Ko fɛɛ̀feìŋ àŋ naŋ jòò maŋ kpee nyiŋ màŋ aŋ dè Jisɛ̀ maŋjɛ̀wɛ.
21Nààŋ nyiŋ taai naŋ kɔ̀ e yìwìà koɓɛ̀ wii, wo Jisɛ̀ naŋ yɛ̀mɛ̀ aŋ wùìyà nyùùŋ tìyèe, aŋ jɔ̀àfèlàà Zɛɓɛdiì nyaŋ, wo Jìiiŋ yaà wo wùìyauŋ nɔɔ̀ŋ Jɔ̀ɔŋ. Nyiŋ yaà wo dèda nyiŋ Zɛɓɛdiì nàŋ yaà wa wɔŋ gɔɔ̀ sùà àŋ yaà bànèbànè sùà maŋ kpee nyiŋ màŋ. Wo Jisɛ̀ naŋ nyiŋ nyààŋ wààŋ aŋ jòà e tòmo nyiŋ nɛ̀ aŋ dèuŋ maŋjɛ̀wɛ. 22Ko fɛɛ̀feìŋ àŋ naŋ jòò wɔŋ gɔɔ̀ yaà wo dèda nyiŋ nɔɔ̀ŋ Zɛɓɛdiì, yèè àŋ naŋ dè wo Jisɛ̀ maŋjɛ̀wɛ.
Wo Jisɛ̀ naŋ kaà, wo gbòà maŋ mìè Dayà maŋ, yèè wò naŋ sùngò anyuùŋ zimgbe
(Luù 6.17-19)
23Wo Jisɛ̀ naŋ wa kìlìè wɔŋ fùɔ̀ŋ Galaliìɔ gbiŋ sùà, wò yaà kàa sùà anyùùŋ nyaŋ maŋ sààŋ zòòlò aŋ Juùù nyaŋ dìì, wò yaà wòò Ebò Siaàŋ e nyaàiŋ dè e Kànà Dayàa. Wò naŋ wa ɓɛìŋ sùngò anyùùŋ Galaliì nyaŋ kuwa wa maŋ sàaŋ gɛ̀wɛɛ̀ zimgbe nyàŋ. 24Kpeiŋ ebò Jisɛ̀ɛ naŋ ɓààyè maŋ tàta màŋ gbiŋ sùà wɔŋ fùɔ̀ŋ Siilìàa, yèè anyùùŋ naŋ hìɛ̀ŋ anyuùŋ kɛ̀ɛ̀nɛ̀ŋ maŋ sàaŋ gɛ̀wɛɛ̀ nyaŋ gbiŋ ko nɛ̀ɛ̀uŋ niìŋ wèè wo nyiŋ sùngà. Aŋ bà nyiŋ kuwa wa e sààŋ aŋ jinàŋ naanààŋ, aŋ bà nyiŋ kuwa e sààŋ gbògàngè, yèè aŋ bà nyiŋ naŋ wa kpɔɔkpɔ̀ɔ̀. Wo Jisɛ̀ naŋ wa sùngò aŋ gbiŋ. 25Ke gbòò anyuùŋ gbee nauŋ dè maŋjɛ̀wɛ e yìwìà wɔŋ fùɔ̀ŋ Galaliìɔ, e kpùlìà maŋ kpàlàùŋ kpàlàùŋ maŋ gbiŋ sùà Maŋ Jàwà Ɗì Zììyà maŋ sùà, e yìwìà ko jawa gbeeì Jùlusɛ̀làm, e yìwìà maŋ kpàlàùŋ kpàlàùŋ maŋ bà sùà wɔŋ fùɔ̀ŋ Jùdià, yèè e dììɛ wɔŋ fàa bàa e Wùìyè Jɔɔɗììŋ nɛ kɔɔ.
Àwon tá yàn lọ́wọ́lọ́wọ́ báyìí:
Maafiù 4: WFESD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Gola New Testament Translation and Literacy Project © Bible Society in Liberia, 2019.