ILOOWALI 21
21
Tei Isihaka pilotutu mai
1 Eeya lobalakati oli Sara, debo odelo u madilanti-Lio. 2To wakutu u matilantu mai lo Allahu Taa̒ala, tou̒ tei Abraham mapanggola, ilombodaa̒lo mola ti Sara tulusi lopotutu mai walao̒ talolai̒ ngota. 3Tei Abraham longunte walao̒ boito Isihaka; 4wau tou̒ tei Isihaka maa o umulu walu hui mola, tei Abraham loluuna mola olio, tutuuu̒de wolo palenta lo Allahu Taa̒ala. 5Tei Abraham o umulu ngohetuto lotaunu tou̒ tei Isihaka pilotutu mai. 6Uali Sara, “Allahu Taa̒ala malohutu mai olaatia yiloi̒ii̒ kalana meengahe. Timii̒du taa umoo̒ dungoheo̒ sua̒li botie mamoi̒ii̒ meengahe pee̒-pee̒enta wolaatia.” 7Lapatao̒ diluhengio mao̒, “Tatoonu engontielio loo̒ loi̒ya todile laatia deu̒ watia mamo potutu mai walao̒? Bo watia malo potutu mai olo eleponu dile lowatia mapanggola daa̒.”
8Walao̒ boito he oduhenga mola udaa̒, wau tou̒ dulahee tio mapilo huheli hemolutu, tei Abraham malohutu potihunggu ulame daa̒.
Ti Hagar wolei Ismai̒lu pilopo lahilio
9Tou̒ dulahee tuwau, tei Ismai̒lu, walae̒e Abraham woli Hagar taabua lo Masiri boito, donggo hemoitohe wolei Isihaka walai̒ Sara. 10Ti Sara loo̒onto mao̒ sua̒li boito tulusi malo loi̒ya odelei Abraham, “Polahiyalo mao̒ wato taabua boito pee̒-pee̒enta wolo walai̒o. Diila mowali walao̒ taabua boito mololimo tayadu monto okokayaamu u mawalisio lei Isihaka walao̒ watia.” 11Tei Abraham sama-samaata diila sanangi wolo patuju boito, kalana tei Isimai̒ilu yito walai̒o olo. 12Bo Allahu malo tahuda odelei Abraham, “Yio̒ diila mao̒ polawalo tomimbihu watomu ti Hagar wau walai̒o boito. Dudui̒ilo mao̒ u otohilaa li Sara, kalana motimbulude to olei Isihakaalo yio̒ mamoo̒tapu mai wali u dilanti-U̒ boito. 13Odito olo towalai̒ Hagar mawohiya-U̒ mai walao̒ wau wombu dadaata alihu timongolio mowali bangusa tuwau. Sababu tio walau̒mu olo.”
14Loloombulio mola didimodupo, tei Abraham longohi mao̒ odeli Hagar ua̒alo wau bututu lowalito tuwau tua-tuanga taluhu u potomeu̒ to dalalo. Tio lopohuloo̒ walao̒ boito to bingungo li Hagar, wau lei̒ nao̒ taabua boito. Tulusi malo monggato ti Hagar wau lonao̒ ode utoonulalo mao̒ tohuta datahu wau luasi udelita lo Bersyeba. 15Tou̒ taluhu potomeu̒lio lopulito, ti Hagar malo pohuloo̒ walai̒o to walungo lo diu̒to, 16lapatao̒ lotihuloa̒ otanu ngohetuto meeteri lonto tambati boito. Ualio mao̒ todelomo hilao, “Wau̒ diila moo̒ tahangi moo̒onto mao̒ walau̒uu̒ mate.” Tulusi hilu-moyongoolo mola tio.
17Allahu Taa̒ala loo̒ dungohe suala lei Ismai̒lu, wau lonto hulungo malai̒kati lo Allahu Taa̒ala lotahuda mai odeli Hagar, tahudaa-Lio, “Wolo u hemoo̒suusa olemu, Hagar? Diila mao̒ oohe. Allahu Taa̒ala maloo̒ dungohe suala lo walau̒mu. 18Ponao̒lo ode walau̒mu, pudua̒ wau poduo̒ota mao̒ tio. Wau̒ mamopowali mai waliimu bangusa udaa̒ tuwau.” 19Lapatao̒ Allahu Taa̒ala malohutu oli Hagar loo̒onto wolo mopatato, tilinggula iloontongalio ali tuwau. Yi lonao̒lo tio tulusi loluangao̒ bututu lowalito boito wolo taluhu, lapatao̒ pileelulio walai̒o.
20Allahu Taa̒ala pee̒-pee̒enta wolei Ismai̒lu. Walao̒ boito he oduhenga mola udaa̒lio; tio helo titatapu tohuta datahu wau luasi udelita lo Paran, wau lowali tamoolato mongalupa. 21Tiilolio loponika mao̒ olio wolo taabua ngota lo Masiri.
Daantia towolota lei Abraham wolei Abimelekh
22Tou̒ boito ti Olongia Abimelekh wolei Pikhol, eyanggu lo suludadulio, lonao̒ mai odelei Abraham wau loloi̒ya, “Allahu Taa̒ala helo tulungi olemu todelomo totoonulalo u pilohutumu. 23Sababu uito potadiaalo teewe totalu lo Allahu Taa̒ala, deu̒ yio̒ diila tamohutu udiila juujulu to olau̒, meaalo ode mongo walau̒uu̒ meaalo ode waliiu̒ mai. Debo odelo wau̒ maa ilopiohe lohilao to olemu, pohutua mao̒ odito olo to olau̒ wau ode lipu ubilu-biluloa̒ olemu botie.”
24Ualei Abraham, “Wau̒ motadia mai.”
25Bo lapatao̒ tei Abraham lolee̒e to olei Abimelekh pasali lo ali tuwau u mailambatio lomongo wato li olongia boito. 26Tei Abimelekh loloi̒ya mao̒, “Diila otaawau̒ tatoonu tamalohutu uito. Diipo pee̒enta mao̒ yio̒ helo loi̒ya mai olau̒, wau uti-utieelo bohulo wau̒ loo̒ dungohe pasali losua̒li boito.” 27Lapatao̒ tei Abraham malongohi mao̒ ngojumula himba wau sapi odelei Abimelekh, wau taduulota boito helohutu daantia. 28Tei Abraham lopo walaheo̒ pitu walao̒ himba lonto himbala lo himbalio, 29wau tei Abimelekh lohintu mao̒ to olio, “Yilongola pilohutumu sua̒li boito?”
30Tei Abraham lolametao̒, “Tolimowalo mao̒ walao̒ himba mohelu pitu botie odelo tuotio li Tuani motolongaku deu̒ wau̒-wau̒lo tamalo ngau̒de ali botie.” 31Odi-odieelo mola tambati boito ilunteelio Bersyeba, sababu teteetolo taduulota boito helo hulita tadia.
32Lapatao̒ timongolio helohutu mao̒ daantia to Bersyeba, tei Abimelekh wolei Pikhol malo hualinga ode lipu taulo Pilistin. 33Lapatao̒ tei Abraham lopomulo mai ayu tamariska ngobungo to Bersyeba wau tumulalo mai tou̒ boito tambati boito pilomakelio u hepo lubowalo to Eeya, Allahu Taa̒ala tao̒ hiheo-hiheolo mao̒. 34Lapatao̒ uito tei Abraham lotibiluloa̒ lohiheo ngopee̒ tolipu lotau Pilistin.
Àwon tá yàn lọ́wọ́lọ́wọ́ báyìí:
ILOOWALI 21: LAIGOR
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀