MATEO 13
13
Ñaatö’tänei dö’seeno
1Yää anooto awä Jesuuquidiito cöneeja’cai maa tacanno. Chu’jä jawä cönaatajiimai yaawä. 2Jooje soto cöne’jummaicho yaawä yöiña. Yääje yeijäcä töwö cönä’täi cudiiyada aca, töwaatajiimadööje mma. Ñanno jooja’como soto mmaane cönä’ja’to tuna jawä. 3Yaawä töwö anejjejaiñene’jödöödä cönoowanooma’to yö’seeno joi ecammjä’ancädä. Töwö cönä’döaacä:
—Ñaatö’tänei cönnatö’taacä. 4Chäwwä ñaatö’tädaawä dhantai dhadöödö cönä’mei ääma taawä. Tadiiñaamo cöneejoto yaawä; dhadöödö cöneena’jätöicho. 5Dhantai dhadöödö cönä’mei toojajaato de’wä, nono ’jemjönöiche de’wä. Jadheedä cöna’tai, sö’je’da nono weijäcä. 6Yaawääne’, shii weja’ca’jäcä cöiñatui; tömiiche’da yeijäcä cuiñu’tai. 7Dhantai ’chene dhadöödö cönä’mei wesooca ’jano de’wä. Ya’ta’jäcä yää wesooca cöna’tai chea; cöneetatannä’cai yaawä. 8Anejja dhadöödö aashichaato nono de’wä cönä’mei. Yää jaiñoone cöneejössatai. Dhantai ijaatoodea soto cönä’jaacä tooni dhadöödö wa’taajä ejeedödö; dhantai ’chene aaduwaawä soto, dhantai mmaane tooni sotooto de’wä amoojadä. 9Eta’sato neta’ñojo; quee cönä’döaacä Jesuuquidiito.
Yö’seenoje ecammajäätö’jödö Jesuuquidiito wwä
10Yääje mma yaawä Jesuuquidiito nowaanomaadö cöneejoto chäwwadäädä; cöneecamma’joicho:
—¿Ane’que’nei ñanno soto tönoowanooma määneneeto yö’seeno que? quee cönä’döa’to.
11Töwö cöneccujä’a’to:
—Änwanno äwwäiñe u’ajä na Wanaadi töcaajichaanaije weiñä jäcä owoowanoomato’como, yää owaanojöönö’jödö. Chäwwäiñe mmaane etaatojo ’je’da na. 12Ñäädä töweiyato wwä jooje’cä nä’tua’de; jooje chäwwä na’de yaawä. Ñäädä a’cato mmaane nätänwajiiñaja’de yää she’caasa töwwä naadö que. 13Yääje yeijäcä chäwwäiñe töwa’deuwe wäänene yö’seeno que, ene’mataame aneenejöönö wa’cä yeichomjäcä, etaajä’taame aneetajöönö wa’cä yeichomjäcä mmaja. 14Mädääje yeichöcoomo que Isaía necammajäätö’jödö chäänönge nä’döa, ñäädä Wanaadi wa’deuwödö ecammanei. Edääje immennä’jödö naadö:
Änwanno äwwäiñe etaajä’taame aneeta’da maato’de;
äwwäiñe ene’mataame mmaja, äntö’tammecö’da maato’dede.
15Canno soto töwäätuujacoone’da naato,
töjaanaque’daiñe mmaja;
tänu’dueiñe mmaja naato dea,
tänuuducoomo que aneene’da töweichöcoomo wetä,
töjaanadööcomo que aneeta’da töweichöcoomo wetä mmaja,
chö’tajäätö’noto yaawä,
äntö’tammecö’noto yaawä,
töweichöcoomo änsa’dumincha’notoode, tadoncadööcomo wetä yaawä öwwä; quee Isaía nimennä’jödö wä’dödö na.
16“Änwanno mmaane ta’cwaiñe eijai maato, adheenuduucomo que töneene aweijäcäiñe, ajaanadööcomo que töneeta aweijäcäiñe mmaja. 17Chäänönge yääje wä’döa äwwäiñe, jooje Wanaadi wa’deuwödö ecammannamo, jooje soto aashicha’como mmaja, ene’se cönä’ja’to mädä töneene määnetäänedö; aneene’daane cöneiya’to. Eta’se cönä’ja’to dea mädä töneeta määnetäänedö; aneeta’daane cöneiya’to.
Ñaatö’tänei dö’senno jäcä ecammajäätö’jödö
18“Etaatäcä eduuwa ñaatö’tänei dö’seeno jäcä ecammajäätödö. 19Anejja wwä Wanaadi töcaajichaanaije tödöödö jäcä ecammajäätödö towaanäcä’de eta’jäcä, odo’sha ne’a yaawä. Yää Wanaadi a’deddu etaajä chö’tajäätödö acanno nichö’taque’ja yaawä. Ñäädä cu’tädö yää ääma taawa dhadöödö cönä’meichö. 20Yää dhadöödö toojajaato de’wä cönä’meichö mmaane, ñanno ta’cwaiñe Wanaadi a’deddu etannamo cu’tädö yää. 21Tömiiche’daane tönwanno, a’dhe töweiyaamo mma. Wanaadi a’deddu jäcäinchädä yeetunu eneea’jäcä, wätä’maminchajoonä jeiñe mma, yaawä dea mma ne’nomjaato. 22Yää dhadöödö wesooca ’jano de’wä cönä’meichö ’quene, Wanaadi a’deddu etannamo cu’tädö yää, ñanno edä nono de’wono ijummannamo, mösooma ijummadö ca’como wätäncu’tojoodöcoomo. Tameedä yää Wanaadi a’deddu na’dua, aashicha ejaamö’da yeichö wetä. 23Yää dhadöödö aashichaato nono de’wä cönä’meichö mmaane, towaanäcäiñe Wanaadi a’deddu etannamo cu’tädö yää. Ñanno jäcäiñe Wanaadi a’deddu aashicha nejanga yaawä. Dhantai ñaato yää ijaatoodea soto chääjedöödö cönä’ja’dö nönge; dhantai ’chene aaduwaawä soto chääjedöödö cönä’ja’dö nönge; dhantai ’chene tooni sotooto de’wä amoojadä chääjedöödö cönä’ja’dö nönge; quee cönä’döaacä Jesuuquidiito tönoowanoomadö wwäiñe.
Äiña chuu ’je yei’jödö dö’seeno
24Yaawä Jesuuquidiito cöna’deuwöi chea chäwwäiñe yö’seeno ai; cönä’döaacä:
—Edääje na Wanaadi cajiichaanaje yeichö: Dhadöödö aashichaato dhanwa cönnatö’täi tönaudä’jödö awä. 25Yaawä soto wöncödaawäiñe chu’dedö cöneejä. Chuu mmädä cönnatö’täi äiña do’taca; cöntämä yaawä. 26Äiña wa’ta’jäcä, yeejössata’jäcä, chuu mmaja cöna’tai chea yo’taca. 27Shootoi cöntonto yaawä tädhaajotoncomo döiña; cönä’döa’to chäwwä: “ ¿Aashichaato dhadöödö ännatö’tä’da ca meiyaqueene anaudä’jödö awä? ¿Aaquene chuu ’je nai chea?” quee cönä’döa’to. 28Chäädhajootoncomo cönä’döaacä yaawä: “Tu’dedö niñaatö’tädö mädä;” quee. Yaawä shootoi cönä’döa’to chäwwä: “Ñaa niñaata’ñojo.” 29Töwö cönä’döaacä: “Ng’jn, äiña jadä mma männato’no. 30Mädääje naatö’näjö’ñojo a’nädä, aiyodö cu’nädö aca yä’dödö wa’cä. Yaawä yää chuu wiñaaja’de sootoi wwäiñe. Chäwwäiñe i’jummajoodö’jo wiyau’cwaja’de yaawä. Äiña mmaane wishomaja’de ömmai chaca, taawa de’wä;” quee cönä’döaacä chäädhäjootoncomo; quee cönä’döaacä Jesuuquidiito.
Wishu adöödö dö’seeno
31Edääje Jesuuquidiito cöna’deuwöi chea chäwwäiñe yö’seeno ai:
—Wanaadi cajiichaanaje yeichö na wishu adöödö töweiye naichöje, audaajä aca ñaatö’taajä. 32Dhadöödö she’caasa yeichaame adai’jääne ya’taajä, anejja natö e’jodhe’cä, tajääque mmaja. Tadiiñaamo töwe’e yaawä dhajäädö jäcä ejaata’tä; quee cönä’döaacä Jesuuquidiito.
Äwanshi ummannä’cajootojo dö’seeno
33Edääje mmaja Jesuuquidiito cöna’deuwöi chea chäwwäiñe yö’seeno ai:
—Wanaadi cajiichaanaje yeichö na äwanshi ummannä’cajootojo töweiye naichöje. Yää ummannä’cajootoojo wodi tödööjai ñaadö naane’ aaduwaawä taasa äiña ajooajä aca, tameedä yummamöödö wetä; quee cönä’döaacä Jesuuquidiito.
Yö’seeno que töneecammajä’e Jesuuquidiito wei’jödö
34Tameedä yää Jesuuquidiito töneecammajä’e cönä’jaacä soto wwäiñe yö’seeno que. Yö’seeno que’da chäwwäiñe a’deuwö’da töweiye cönä’jaacä. 35Yääje cönä’jaacä chäänönge yä’dödö wetä Wanaadi a’deddu ecammanei nimennä’jödö naadö:
Yö’seeno ai ya’deuwa’de.
Wecammajä’a’de yää tacaade’da cönä’ja’dö Wanaadi wwä edä nono amoode’nä’jödö jonnoto’jödöödä; quee imennaajä wä’dödö.
Äiña chuu ’je yei’jödö dö’seeno jäcä ecammajäätö’jödö
36Yääje mma yaawä Jesuuquidiito soto cönenno’jaicho. Cönoomomöi yaawä maa taca. Yaawä ñoowanoomadö cöneejoto chäwwadäädä; cönä’döa’to chäwwä:
—¿Aaqueneeto jaiñoone yää audaajä dö’seeno mecammajä’annö nä’jaanä? Ecammajä’cä ñaa wwä; quee cönä’döa’to.
37Töwö Jesuuquidiito cönä’döaacä:
—Ñäädä aashichaato dhadöödö ñaatö’tänei Soto nnedö cu’tädö ñäädä. 38Yää audaajä edä nonoodö cu’tädö. Yää aashichaato dhadöödö ñanno Wanaadi töcaajichaanaije tödönnamo cu’tädö. Chuu mmaane ñanno odo’sha sotoi cu’tädö. 39Ñäädä chu’dedö, conemjönö ñaatö’tänei’jödö, odo’sha cu’tädö ñäädä. Yää aiyodö cu’nädö anooto wataamedö cu’tädö. Ñanno äiña aiyonnamo ñanno Wanaadi amoodedö cu’tädö. 40Yääje mmaja na’de anooto wataamedaawä, yää woi cönnaichodööje dea, cöiñau’cwaichodööje mmaja. 41Soto nnedö lamoodedö nanontaato’de tameedä soto sadiijannä’cannamo i’jummaiñe tösootoi antawonnoiñe, tameedä ñanno conemjönö tödönnamo mmaja. 42Wa’to nwaca nöja’aato’de. Iiña tönwanno naamoaato’de; cone’da naato’de jooje. 43Yaawä ñanno aashicha’como naato’de tawaane, shii wa’cä, Tumöötoncomo jataacäi. Eta’sato neta’ñojo.
Aashichaato etoone’tä’jödö dö’seeno
44“Wanaadi töcaajichaanaije tödöödö na dhanwa wwä audaajä awä täjeeto etoone’taajä edantädö nönge. Yää täjeeto ta’due mma na’dua yaawä. Ta’cwaiñe töweijäcä tameedä töwwono nu’jä’a yaawä jödaata eichojooje, yää audaajä ejeematoojoje. Yää nejeema yaawä töneedantä’jödö jäcäinchädä.
Mayuudu täjeeto ejeemanei’jödö dö’seeno
45“Wanaadi töcaajichaanaije tödöödö na dea mösooma ejeemanei töweiye naichöje. Töwö mayuudu nimenca aashichaato ejeemadö wetä. Töwö jata waadäi näämannä’a mayuudu aashicha’como ejeemancädä. 46Mayuudu tajääde’daamo nedanta yaawä, täjeeto jaiñoone. Tameedä töwwono nu’jä’a yaawä jödaata eichojooje, yää mayuudu ejeematoojoje.
Na’cwacancomo i’yädö dö’seeno
47“Wanaadi cajiichaanaje yeichö na dea na’cwacancomo i’yätoojo töweiye naichöje. Ñanno i’yännamo i’yätoojo nemaato na’cwaca; änneene’jödöödä na’cwacancomo najäiyaato yaawä. 48I’yätoojo chu’canga’jäcä ñanno i’yännamo nannu’caato yaawä macäi. Nimencaato yaawä, shuucu töwaatajiimadööcomo’jo. Tänääaamo dea nödööaato manaade aca. Conemjöncomo mmaane nöja’aato. 49Mädääje dea na’de anooto wataamedaawä. Wanaadi amoodedö neja’caato’de yaawä. Soto conemjöncomo nimencaato’de yaawä aashicha’como antawonnoiñe. 50Wa’to nwaca nöja’aato’de yaawä ñanno conemjöncomo. Iiña tönwanno naamoaato’de; cone’da naato’de jooje; quee cönä’döaacä Jesuuquidiito tönoowanoomadö wwäiñe.
Mösooma jenaado’jä, eduuwaato mmaja
51Yääje mma yaawä Jesuuquidiito cöneecamma’joicho:
—¿Odhoowanääcäiñe näätaanä tameedä mädä? quee cönä’döaacä.
Tönwanno cönä’döa’to:
—Ee, ñaa wwä nääta; quee.
52Töwö cönä’döaacä chäwwäiñe:
—Tameedä owaanomaanei, Wanaadi töcaajichaanaije weiñä jäcä owaanomaajä, dhanwa töjaatuwai töna’duca töweiye naichöje na. Ñäädä dhanwa tönnacoomo wwäiñe nu’jä’a yaawä mösooma, eduuwaato mmaja, jenaado’jä mmaja; quee cönä’döaacä Jesuuquidiito tönoowanoomadö wwäiñe.
Naasade ña Jesuuquidiito wei’jödö
53Yää yö’seeno ai töwa’deuwödö töwä’ca’jäcä Jesuuquidiito cönääma’täi yäätonno. 54Töjaatacäi töwä’döa’jäcä töwö soto cönoowanooma’to judhío we’jummato’como taca. Tönwanno cönääcatoncaicho; cönä’döa’to:
—Äsha mä’dä cönoowanoomai, mädä wa’cä töseedujä’ne töweichö wetä? ¿Äsha mädä wa’cä töjäädudu cöneejodöi täneemö tödöötojo? 55¿Ñäädäjöönö ca määdhä, jatuuwa tödööjä’nei nne’jödööjönö? ¿Yeenö jönca Madía, dhacontomo Jacoowo, José mmaja, Simón mmaja, Juudha mmaja? 56¿Tameedä jönca naicho cöjaadäiñe ijaadui’chomo? ¿Änääcö mädä wa’cä shejjedö cuntui? quee cönä’döa’to.
57Tönwanno cone’da cönä’ja’to chääjäcä. Yaawä Jesuuquidiito cönä’döaacä chäwwäiñe:
—Aneiñaja Wanaadi wa’deuwödö ecammanei aashicha tönnöe naicho. Ijaatawoncomo mmaane tönquiiñeme’que, yä’jimmä’tädö mmaja; quee cönä’döaacä.
58Yäätä jooje täneemö ännö’da cönä’jaacä, täcamjö’da yeijäcäiñe.
Àwon tá yàn lọ́wọ́lọ́wọ́ báyìí:
MATEO 13: MCH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2014 Reservados todos los derechos