MATEO 25
25
Amoojado’como ajei’choto’ja’como wei’jocoomo
1“Edääje na Wanaadi töcaajichaanaije weiñä. Ajei’choto’ja’como cönä’ja’to amoojadä. Tönwanno cöntonto jötaanä ene tödhaawadööcomo dha’me. Yäätä töjöötaamö cönwomo’ca’to. 2Ijaatoodea cönä’ja’to aneene’jutu’jöncomo, ijaatoodea ’quene tösejjequeiñe. 3Ñanno aneene’jutu’jöncomo tödhaawadööcomo mma ñaadädööcomo cönä’jaacä, queedusén mmaane anaadä’da cöneiya’to, yaatameea’jäcä tadö’täämö. 4Ñanno tösejjeca’como mmaane iiñejöödöcoomo cönä’jaacä tödhaawadööcomo, queedusén mmaja, chääwötö’cä aca. 5Numa töjöötaamö eejö’da yeijäcä cönquinchajäätöicho ñanno ajei’choto’ja’como; cönnö’jätöicho yaawä. 6Yo’tawääne yaawa cä’tönnä cönäätaacä: “Töjöötaamö nä’döi. Ma’da’cä adheeja’catääcä, ma’dejjatäiye;” quee cönäätaacä. 7Yaawä tameedä ñanno ajei’choto’ja’como cönä’jäicho. Tödhaawadööcomo cönconeeca’to yaawä. 8Yääje mma yaawä ñanno aneene’jutu’jöncomo cönä’döa’to ñanno tösejjeca’como wwäiñe: “Queedusén änne’täcä; ñaa dhawaadö nunque’jä’a.” 9Yaawä tösejjeca’como cöneccujä’a’to; cönä’döa’to: “Ng’jn, u’jai’cha ñaa na. Äwwäiñe u’a’jäcä ñaa wwä mäntä dea mma ñaa dhawaadö unque’jä’jai ña, änwanno adhaawadööcomo mmaja. Täjeemaane aneejemaatantäcä töwäätätöijaamo döiñaiñe;” quee cönä’döa’to ñanno tösejjeca’como. 10Tödhaawadööcomo ejeemataame ñanno aneene’jutu’jöncomo wwäiñe töjöötaamö cönä’döi yaawä. Ñanno chäänönga’como’jödö cönoomomöicho yaawä chääjadä jötaatojo taca. Mönaatata cönaata’dui yaawä. 11Yää ’jeje cöneejoto yaawä ñanno ijimmä. Tönwanno cönä’döa’to: “Cajiichaana, mönaatata a’ducaacä, ñaa omoomöiye;” quee. 12Ñäädä töjöötaamö cöneccujä’a’to; cönä’döaacä: “Chäänönge yääje wä’döa äwwäiñe, yoowanääcä’da maato;” quee cönä’döaacä ñäädä töjöötaamö ñanno ajei’choto’ja’como aneene’jutu’jöncomo wwäiñe; quee cönä’döaacä Jesuuquidiito.
13Edääje mmaja Jesuuquidiito cönä’döa’dea yaawä:
—Yääje yeijäcä äädai’chätääcä, odhoowanääcäiñe’da yeijäcä Soto nnedö we’tojo anooto cu’nädö.
Jödaata edaí’chojo’jödö dö’senno
14“Edääje mmaja na dea Wanaadi töcaajichaanaije weiñä. Dhanwa cönä’jaacä aneiñaja töötäämö. Töötääje tösootoi cöna’dejjaicho, töjöödatai utuudu wetä chääwaadäiñe, chäwwäiñe edai’chojoodöje. 15Awa’deeto wwä cuntui ijaatoodea miide jödaata. Yeichacoono wwä cuntui aacä miide jödaata. Anejja wwä cuntui tooni miide jödaata, chääwaadäiñe towaanojo’ne yeichöcoomo woije dea. Aneiñaja cöntämä yaawä. 16Yaawä ñäädä ijaatoodea miide jödaata eiñei’jödö töwäätätöijadö que cöncana’cai ijaatoodea miide jödaata mmaja. 17Mädääje dea ñäädä aacä miide jödaata eiñei’jödö; aacä miide jödaata mmaja cöncana’cai chea. 18Ñäädä tooni miide jödaata eiñei’jödö mmaane tädhaajä jödaatai cöneetone’täi nono töncadö aca.
19“Numa yä’döa’jäcä chäädhajootoncomo cöneejä dea yaawä. Töwö cöneecamma’joicho töjöödatai jäcä. 20Ñäädä ijaatoodea miide jödaata eiñei’jödö cöneejä chäwwadäädä, töncana’ca’jödö dha’me, ijaatoodea miide jödaata mmaja; cönä’döaacä. “Cajiichaana, öwwä mu’ne ijaatoodea miide jödaata. Edä na yää öncana’ca’jödö, ijaatoodea miide jödaata mmaja;” quee cönä’döaacä. 21Chäädhajä cönä’döaacä yaawä: “Chäänönge na, amäädä yaanonö aashichaato, chäänöngato mmaja. Aashicha mödööne ataadawaajui she’coto’cä. Eduuwa ataadawaajui wecamma adai’joto jaiñoone. Ta’cwaiñe eijai ma eduuwa öwö jaadä;” quee cönä’döaacä chäädhajä. 22Yää ’jeje ñäädä aacä miide jödaata eiñei’jödö cöneejä dea yaawä; cönä’döaacä: “Cajiichaana öwwä mu’ne aacä miide jödaata. Edä na yää öncana’ca’jödö, aacä miide jödaata mmaja;” quee cönä’döaacä. 23Chäädhajä cönä’döaacä yaawä: “Chäänönge na, amäädä yaanonö aashichaato, chaanöngato mmaja. Aashicha mödööne ataadawaajui she’coto’cä. Eduuwa ataadawaajui wecamma’de adai’joto jaiñoone. Ta’cwaiñe eijai ma eduuwa öwö jaadä;” quee cönä’döaacä chäädhajä. 24Ñäädä tooni miide jödaata eiñei’jödö cöneejä dea yaawä; tädhaajä wwä cönä’döaacä: “Cajiichaana, yoowanääcä cönä’jaacä tönoiñatooje aweichö. Anaatödööjönö tömjä’e amäädä, ännödööjönö töneiye mmaja. 25Yääje yeijäcä monnontaaquene; ajöödatai wetoone’täne yaawä nono aca. Edä na yää ajöödatai;” quee cönä’döaacä. 26Yaawä chäädhajä cönä’döaacä chäwwä: “Sootoi conemjönö amäädä, töquiiñato mmaja. Odhoowanääcä cönä’jaacä tönoiñe weichö, naatödööjönö tömjä’e weichö mmaja, önnödööjönö töneiye weichö mmaja. 27Yääje yeijäcä jöödatai u’jai awei’jödö na tönwacaamaamöje jödaata u’nnamo wwäiñe. Adöiña wä’döa’jäcä jöödatai eichö weiya yaawä, töwwäiñe jöödatai tödö’jödö eje’jödö jadä;” quee cönä’döaacä ñäädä chäädhajä tösootoi wwä. 28Edääje cönä’döa’dea ñanno yäätoncomo wwäiñe: “Enwajiiñatääcä määdhä tooni miide jödaata chäwwä naadö que. Mä’dä wwä u’täcä, amoojadä miide jödaata chäwwä naadö wwä. 29Ñäädä töweiyato wwä jooje’cä nä’tua’de; jooje töweiye na’de chäwwä yaawä. Ñäädä a’cato mmaane nätänwajiiñaja’de yää she’caasa töwwä naadö que. 30Mä’dä dhanwa conemjönö ija’canö’jotääcä jödo’na, tööjano’taca. Iiña naamoa’de; jooje cone’da töwö na’de;” quee cönä’döaacä chäädhajä.
Wätämmencajootoojo anootoi’chädö
31“Cajiichaanaje töweichö wetä Soto nnedö we’a’jäcä, tamoodedö aashicha’como töjaadä, yaawä töwö nataajima’de tumuudei ye’wä, tawaanato töjääcä. 32Yaawä tameedäädä soto ne’jummaato’de; töwö Cajiichaana nimencaato’de yaawä, oweeja edai’chännamo oweeja tömmencaiñe töweiye naichöje, chiiwo jadäiñe yeichöcoomo jonno. 33Töwö oweejacoomo nödööaato’de tönnäcä, ämu’demjönö dö’se, chiiwocoomo mmaane ämu’dato dö’se. 34Yaawä Cajiichaana nä’döa’de ämu’demjönö dö’sencomo wwä: “Ä’täcä änwanno, Jaaja nijummadö, ijaatawä meichäiye, yää edä nono wamoodeta’jödö jonnoto’jödöödä äwwoncomooje choonecaajä naadö. 35Öwö ämiije weichawä änwanno cäwanshinchätääne. Emjätö’se weichawä mmaja woocödö mu’täne dea öwwä. Tömmaiche’da weichawä änwanno wääwa’totoojo mecammatääne yaawä. 36Töwonque’da wéichawä änwanno woomö mu’täne. Cädäije weichawä, jedeesoje weichawä mmaja, änwanno yeenetä mä’ja’quene;” quee nä’döa’de Cajiichaana. 37Yääje mma yaawä ñanno aashicha’como neccujä’aato’de: “Cajiichaana, ¿ächännauwä ca ämiije aweichö ñaa adheewashinchäne? ¿Ächännauwä emjätö’se aweichö ñaa owo’jane? 38¿Ächännauwä ca äwääwa’totoojo ñaa cöneecammai ämmai ’je’da yeichawä? ¿Ächännauwä ca owoomö ñaa cuntui töwonque’da aweichawä? 39¿Ächännauwä ca adheenetä ñaa cönä’jaacä cädäije aweichö, jedeesoje aweichö mmaja?” quee nä’döaato’de chäwwä ñanno aashicha’como. 40Yaawä Cajiichaana chäwwäiñe nä’döa’de: “Chäänönge yääje wä’döa äwwäiñe, tameedä sootoi jäcä mödöötäneedö, mäccö mmädä yeichaame töwö, öwwonooje dea yää mödöötäne;” quee nä’döa’de.
41“Yaawä töwö Cajiichaana nä’döa’de ämu’dato dö’sencomo wwä: “Ojoncomo jonno änwanno töwännanö’aamö; wa’to töwaatamemjönö aca ojoncomo, yää odo’shancomo weicho’comooje choonecaajä naadö. 42Ämiije weichawä änwanno yeewashinchä’da mä’ja’quene. Emjätö’se weichawä mmaja änwanno woocödö äntu’da mä’ja’quennea. 43Tömmaiche’da weichawä mmaja änwanno wääwa’totoojo aneecamma’da mä’ja’quene. Töwonque’da weichawä woomö äntu’da mä’ja’quennea. Cädäije weichawä, jedeesoje weichawä mmaja, yeenejäätö’da mä’ja’quene;” quee nä’döa’de Cajiichaana ñanno ämu’dato dö’sencomo wwä. 44Yaawä tönwanno neccujä’aato’de: “Cajiichaana, ¿ächännauwä ca ä’wa’tä’da ñaa cönä’jaacä ämiije aweichawä, emjäto’se aweichawä mmaja, tömmaiche’da aweichawä mmaja, töwonque’da aweichawä mmaja, cädäije aweichö mmaja, jedeesoje aweichö mmaja?” quee nä’döaato’de Cajiichaana wwä. 45Töwö Cajiichaana chäwwäiñe nä’döa’de yaawä: “Chäänönge yääje wä’döa äwwäiñe, tameedä canno sootoi jäcäiñe ännö’da mä’ja’quennö, mäccö mmädä yeichaame töwö, öwwonooje mmaja yää ännö’da mä’ja’quennea;” quee nä’döa’de. 46Ñanno conemjöncomo nötaato’de yaawä töwäntunaanö’to’como töwaatamemjönö aca. Chäänönga’como mmaane nötaato’de aashicha töweicho’como aca daja; quee cönä’döaacä Jesuuquidiito.
Àwon tá yàn lọ́wọ́lọ́wọ́ báyìí:
MATEO 25: MCH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2014 Reservados todos los derechos