Romanɛ 10
10
1Mɛelɛ alɛ mɔ, mɛitú mɛibui tɛpɛpɛ nɛ mɛ Owusoso Akaa tikukulu nɛ Israelanɛ ɛtakpu kɛlinu sɛ tɛ bebu alɛ. 2Ɛbalà ɖɔ nɛ balɛishu ɔsɛ benu banɔ nɔnɔ́ gɛ bàkpɛ emi nɛ ɛtakpu esi kpɛkpɛ mɛ ɔkɔ Owusoso Akaa, pɔ bunyi ko betinyi ɛtakpu esi kpɛkpɛ nɛidzo. 3Gɛ betinyi tɛzazã gbangbã gɛide Owusoso Akaa ɔkɔ soɔ, babhɛtɛ balɛ ahɔɛ tɛtɔtɔɖɔ ebui, gɛitinu itakpu esi kpɛkpɛ ɔkɔ Owusoso Akaa tɛzazã gbangbã. 4Kristo yɛtɛbaba ɔkɔ ɔsɛ ohumi obele nɛ ɔsha ahɔɛ, sɛ tɛ anɔ ka nyia ka gɛ ayɛkɛ aŋãa, tɛ amɔ tɛzazã gbangbã.
5Mose ebu tɛzazã gbangbã gɛ lɛ ɔsha nulũ asɛ, “Anunɔ gɛ akpɛ emi pɛ abhɛtɛ nɛ ɔsha nulũɔ abamɔ ɛkpã edenɔ kɛlɛ mɛ.” 6Pɔ tɛzazã gbangbã ɔgana tɛyɛyɛkɛŋã mɛɛ, aɖɔ asɛ, “Tɛɔɖɔ nɛ wɔitúɔ mɛ ɔsɛ, ‘Afana gɛ ebewu avɛ ititíɛ?’ ” (gɛ kɛlɛ esi nu ɔsɛ, tɛ badɛ gbana Kristo amana) 7“pɛnɔsɛ, ‘Afana gɛ ebezhi avɛ ozĩ dzudzuɔ mɛ̀?’ ” (gɛ kɛlɛ esi nu ɔsɛ, tɛ badɛ gbana Kristoɔ odenɔ bekpuɔ mɛ amana). 8Pɔ kiɖuwoe koŋ kibuiɛ ɖɔ? Kɛɖɔ ɔsɛ, “Kibuiɛ lɛ wɔbha, kɛlɛ wɔolugbũɔ mɛ, nɛ̀ wɔɛtúɔ mɛ,” kɛlɛinu tɛyɛyɛkɛŋã ibuiɛ gɛ baɖɔɔ. 9Kɛlɛinu ɔsɛ, tɛɔdalɛ kɛlɛ mɛ nɛ wɔolũgbuɔ ɔsɛ, “Yesu enu Apalete,” kɛlɛ ɔyɛkɛ ɔŋã nɛ wɔɛtúɔ mɛ ɔsɛ, Owusoso Akaa efeke edenɔ bekpuɔ mɛɛ, bebè bu wɔ. 10Ɔmɔsɛ wɔɛtúɔ wɔlɔkɔ ɔyɛkɛ ɔŋã nɔ, pɛ bamɔ ɔsɛ onu anɔ gbangbã, kɛlɛ olugbũ wɔlɔkɔ ɔdalɛ ebui mɛ nɔ pɛ bayɛkɛ wɔ elu nɛ ɛkpã. 11Owusoso Akaa nɛibuiɛ ɖɔ ɔsɛ, “Anɔ ka nyia ka gɛ ayɛkɛ yɛabha aŋãa, kiwuĩ tɛbabà yɛabha oɖi ɖa.” 12Ɔmɔsɛ Yudanɛ nɛ̀ bagɛ betinu Yudanɛ pete nɔ, tenikpo balɛ. Apalete tenikpo alɛ yɛenu Apaleteɛ akɔ balɛ petee, kɛlɛ yɛeyula tutu esi akɔ anɔ nyia anɔ gɛ akpɛ ɛtakpu esi akɔɛ, 13ɔmɔsɛ, “Anɔ nyia anɔ gɛ ekulu Apaleteɛ nɛinyeɛ, aba mɛ ɛkpã.”
14So, kɛlɛ́ anɔ abalà ekulu kinye nɔnɔ́ abha gɛ agɛyɛkɛ aŋãa dza? Kɛlɛ́ babàlà yɛkɛ anunɔ gɛ bekelũ yɛɔdɔ̃ eɖiɛ abha aŋãa dza? Kɛlɛ kɛlɛ́ babalà elũ Owusoso Akaa ibuiɛ onupɛ anɔ nanà atɛ aɖɔ kɛlɛ etseɖe alɛɛ dza? 15Kɛlɛ́ babalà ibuiɛ aɖɔ onupɛ bagɛ kpɛ ananà nɔɔ dza? Asɛ kɛfɔ̀nɔ gɛ bafɔnɔ elu asɛ, “Bagɛ bamana Owusoso Akaa ibui gbangbãa, bagbã ɔtsɛɖɛ gbangbã!”
16Pɔ anɛ Israelanɛ petee balɛ ayɛkɛ ibui gbangbã nabha aŋã, ɔmɔsɛ Yesaya afɔnɔ elu asɛ, “Apalete, afana gɛ ayɛkɛ kibuiɛ gɛ bɔɖɔɔ tseɖe alɛ nabha aŋã?” 17Klisoɔ, odenɔ kibuiɛ tilulũ mɛ tɛyɛyɛkɛŋã koeyi, kɛlɛ kibui ɛlɛ bulũ odenɔ Kristo yɛibuiɛ mɛ. 18Pɔ ibisi sɛ. Begilũ dza? Baa nɔ belũ alɛ,
“Balɛ kibuiɛ ozĩ kpɛkpɛ oyi gɛ lɔtsyɔa esiakpa nabha petee,
balɛ ebuiɛ avɛ kanɔ nɔ̀ ɔtɔ̃ kɔ.”
19Iwlui ka bisi sɛ. Kliso Israel egilũ ebuiɛ alɛ mɛɛ dza? Putɔ nɔɔ, Mose aɖɔ asɛ,
“Ɛbakɔ nɔdzã kiwuhũ ɔkɔ bagɛ etinu kɛmadiɛ,
Ɛbakɔ nɔkpɛ̀ ɔmɔpɔɛ nɛ̀ kɛmadiɛ gɛitilũ ebui esiɛ.”
20Yesaya akpɛ ité aɖɔ asɛ,
“Bagɛ bagɛzapɛ mɛɛ, balɛ abamɔ mɛ,
kɛlɛ bagɛ begibisì mɛtɔɔ, balɛ mɛibu mɛishu kasɛ.”
21Israelanɛ pɔɔ, aɖɔ nɛ balɛishu asɛ,
“Nɛ kiwuìɛ mɛ pete nɔ, ɛdalɛ mɛahɔɛ mɛ ilu
ɔkɔ bagɛ beti elũ atɔ̃ɔ, nɛ̀ bagɛ balɔ kitití nɛ mɛishuɔ.”
Àwon tá yàn lọ́wọ́lọ́wọ́ báyìí:
Romanɛ 10: nyb
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© (Active), Ghana Institute of Linguistics, Literacy and Bible Translation. All rights reserved.