Romanɛ 11
11
Owusoso Akaa Yɛashagabui Ɖiɖi Ɔkɔ Ɛmadi Israel
1Kɛlɛ ibisi sɛ, Owusoso Akaa ashɛnɛ ahɔɛ nɛ yɛmadiɛ shu dza? Kɛma kɛlɛ mɛ ana! Israelaeyi mɛinu, kɛlɛ Abraham yɛeshui mɛinu gɛ ide Benyamin yɛigbogboɔ mɛ. 2Owusoso Akaa agɛ shɛnɛ ahɔɛ nɛ yɛmadi Israel shu, banunɔ gɛenyi akpɛ otugbà kukukuɔ. Pɛnɔsɛ notinyi kɛgɛ yɛibuiɛ ɖɔ nɛ Eliya shu-nɛ kibisi gɛ ebisi denɔ Owusoso Akaa ɔkɔ nɛ̀ Israel ɛtakpuɔ shu dza? Aɖɔ asɛ, 3“Apalete, beyí wɔebuiɖɔluanɛ kɛlɛ bàyɛɛ bɔdɔ̃ pɔpɔɛ osubha afalanɔ. Mɛ tenikpo ko mɛgɔ̃, kɛlɛ̀ baapɛ asɛ tɛ̀ beyì mɛ.” 4Kɛlɛ̀ kɛlɛ́ Owusoso Akaa ebuiliulũ akɔɛ? Etseɖe yɛasɛ, “Ɛbalɛ̀ banɔ ihotu tigegene gɛ balɛ xɔnɔ begidzu ekluisi esi akɔmɛ Obudi Baalìɛ ɛkɔ mɛishu.” 5Kliso nɛ kibe ɛlɛ tsyɛɛ, banɔ teli bagɔ̃ gɛ bebu balɛ elú ɔgana balɛ tibhui bhuibu mɛ. 6Kliso onupɛ ɔgana tibhui bhuibu mɛɛ, kɛlɛ́ɛ, kɛtɛ kanu ɔsɛ kide balɛ axɔ̃ɛ wɔawɔa mɛ̀. Onupɛ balɛ axɔ̃ɛ wɔawɔa mɛ kide pɔɔ, kɛlɛ kɛtɛ kanu tibhui bhuibu.
7Kiɖuwoe otsiɛ? Kɛgɛ kɛmadi Israel azapɛ nɛ awuhũ dzãdzaa, bagɛ mɔ̃ kɛlɛ, banɔ teli gɛ Owusoso Akaa ebu elúɔ xɔnɔ bamɔ ɛlɛ. Akɔ banɔ gɔgɔ̃ɛ nɔ xɔnɔ bagagalĩ batɔ̃, 8asɛ kɛfɔ̀nɔ gɛ bafɔnɔ kibuiɛ elu asɛ,
“Owusoso Akaa akɔ bepu awuhũ nɛ ɔfɔfuĩa mɛ,
sɛ tɛ batɛlà amɔ̃ bɔdɔ̃
batɔ̃ alɛ balɛ ahɔɛ pɔ sɛ tɛ batɛ elũ kibui,
ɔmana obo kiwui lɛ nabha.”
9Kɛlɛ David aɖɔ asɛ,
“Balɛ bɔdɔ̃ ŋaŋã ɔkpɔlɔ̃ obotsyina odzì bɔnyɔ̃ nɛ̀ kɛgbã,
tɛ kidzì kɛdɔ̃ kpakpata nɛ̀ batɔ̃ pɔpɔ̃ ɔkɔ balɛ.
10Otumũ ɔbɔdã balɛ awuhũ nabha sɛ tɛ̀ batɛ̀là amɔ
tɛ balɛ budeshiɛ dzyini ku tihɔɔ.
Busi Gɛ Bebhui Atɔɖɔ Busi Abha
11Ezebisì asɛ, Israel akpata bɔdɔ̃ adɔ oboè pɛ azalà alɔ odenɔ nɛ ɛkɛlɛ dza? Ao, kɛma kɛlɛ mɛ ana! Nɛ Yudanɛ ebui kpa bhɛbhɛtɛ soɔ, tibubu tsyina vɛ bagɛ betinu Yudanɛ ɔkɔ sɛ tɛ kidzi awuhũdzadzã ibui ɔkɔ Israelanɛ. 12Onupɛ Israelanɛ ebui kpa bhɛbhɛtɛ etsyina edzì tiyuyulà gelee ɔkɔ kanɔ nɔ mɛ, kɛlɛ balɛ kide vɛvɛ nɛ Owusoso Akaa shu tsyina dzì tiyuyulà ɔkɔ bagɛ betinu Yudanɛɛ, kɛlɛ tiyuyulà ɖuwoe kɛbadzì onupɛ Israelanɛ pete etsyina edzì Owusoso Akaa ayɛɛ dza?
13Ɛɖɔ kaɖɔ ɔkɔ wɔnɔ bagɛ notinu Yudanɛ. Mɛ asɛ anɔkpɛkpɛ ɔkɔ wɔnɔ bagɛ notinu Yudanɛ ana, ɛwɔa mɛaxɔ̃ɛ 14nɛ awɔ̃lulu sɛ ɛbalà nyɛmɛ mɛ kɛmadiɛ ginu Yudanɛ sɛ tɛ mɛlɔkɔ awuhũ dzadzã tɛ mɛibu balɛ anɔ teli. 15Onupɛ tɛshɛshɛnɛ ahɔɛ nɛ balɛishu mɛ pɛ babhɛtɛ tenikpo nɛ̀ kanɔ nɔ̀, kɛlɛ bedzini balɛ ayɛkɛ edenɔ butsí mɛ amana ɛkpã mɛ. 16Onupɛ nikpèe nɔ gɛ bebhoso edzyini abakɔ Akaa pɛ yɛishu dalɛɛ, kɛlɛɛ nikpèe nɔ̀ gɛ bebuɔ pete tsyɛ shu dalɛ. Kidzo ɛlɛ nabha onupɛ busiɛ ɔlɛ iguɔ shu dalɛɛ, kɛlɛ bɔshɛ nɔ shu tsyɛ dalɛ alɛ.
17Onupɛ bebhui bɔshɛ nɔ tuli pɛ balɔkɔ wɔnɔ bagɛ notinu Yudanɛ, pɛ nɔlɛ asɛ kifutù mɛ besi ana, pɛ bebhui wɔnɔ bɔshɛ nɔ atɔɖɔ besidzudzu nulũɔ, kɛlɛ wɔnɔ tsyɛ nɔmɔ̃ bɔŋaŋã gɛide besidzudzuɔ balɛ iguɔ mɛ̀. 18Nɔtɛ ofeke ishu ɔsɛ nɔpɛ ɔdɛ bɔshɛ nɔ abha gɛ notsiɖiɛ. Nɔbhɛtɛ anaa, nɔbaka ɔsɛ anɛ wɔnɔ nyana igu ovunɔ, pɔ iguɔ ɛlɛ nyana wɔnɔ ovunɔ. 19Ogilu awɔ̃ɔ, ɔbɔɖɔ ɔsɛ, “Bebhui busiushɛ nɔ atsɛ sɛ tɛ balɔkɔ mɛ atɔɖɔ bɔlɛulũ.” 20Kɛlɛ kɛlɛ́ mɛ. Pɔ bebhui bɔshɛ nɔ atsɛ ɔmɔsɛ bagɛ yɛkɛ aŋã, wɔ xɔnɔ wɔ tɛyɛyɛkɛŋã so pɛ bayɛkɛ wɔedzu. Tɛofeke ishu, kɔ kifu pɔ zã wɔ mɛ. 21Onupɛ Owusoso Akaa egiɖi Yudanɛ gɛ balɛ asɛ besidzudzu bɔshɛ ana ashagabuiɛ, etibeɖi wɔnɔ tsyɛ ashagabui.
22Kliso nɔbaka Owusoso Akaa yɛyamɛ gbangbã bhɛbhɛtɛ nɛ̀ yɛahɔɛ gagalĩ nɛ wɔnɔ abha shu. Agagalĩ ahɔɛ nɛ bagɛ betsodzi nɛ yɛedeɛ shu, kɛlɛ wɔnɔ xɔnɔ aabhɛtɛ ɛyamɛ gbangbã akɔ wɔnɔ onupɛ nogitsodzi nɛ yɛedeɛ. Onu gɛna naa, abashɛnɛ ahɔɛ nɛ wɔnɔ tsyɛ shu atɛ elu. 23Kɛlɛ onupɛ Israeleyiɛ etsodzi ayɛkɛ aŋãa, bebè dzini balɛ edzu nɛ balɛ ɔzãkɔ, ɔmɔsɛ ohumi ɔlɛ Owusoso Akaa yɛahɔɛ gɛ abalà edzini balɛ edzu nɛ balɛ ɔzãkɔ. 24Wɔnɔ bagɛ notinu Yudanɛ, gɛ nɔlɛ asɛ kifutu mɛ busiushɛ gɛ bebhui edzu atɔɖɔ besidzudzu ushɛ abha ana, gɛ balɛ enu Israel ɛmadiɛ. Kliso kitinu kibui gagalĩ ɔkɔ Owusoso Akaa asɛ tɛ edzini besidzudzu alɛ nɔshɛ bhui bhuiɛ edzu atɔɖɔ besidzudzu alɛ ke abha.
Owusoso Akaa Eɖi Anɔ Ka nyia Ka Ashagabui
25Ɛpɛ sɛ tɛ mɛkɔ noti kibui nɛ kibui kpukpũ ɛlɛ shu, tɛ notɛ ofeke ishu ɔsɛ nonyi ibui popopo. Kibuiɛ kɛlɛinu ɔsɛ, nɛ Israelanɛ teli atɔ̃ gagalĩ ibeɛ, kinu tɛtɔtɔɖɔ ɔsɛ onupɛ bamɔ̃ bagɛ betinu Yudanɛ tɛkaklàa gɛ aapɛ nɔɔ anaa, babàba Owusoso Akaa ɔkɔ. 26Klisoɔ, babà yɛkɛ akɔ Israel pete, ɔmɔ asɛ kɛfɔ̀nɔ gɛ bafɔnɔ kibuiɛ elu asɛ,
“Anunɔ gɛebebu banunɔ ebede Zion,
ebebu kɛtakpu makpɛ makpɛ ɔkɔ Owusoso Akaa eyinɔ nɛ Yakob yɛɔpã mɛ.
27Kɛlɛ mɛolugbũ nyanyã nɛ alɛ onu ɔsɛ,
gɛ ɛlɔkɔ balɛ ebui kpa bhɛbhɛtɛ tsye alɛ.”
28Nɛ Kibui Gbangbã nulũɔ, Israelanɛ benu banɔ gɛ bagɛ dɛmɛ nɔ nɛ̀ Owusoso Akaa. Pɔ nɛ balɛ ashuĩ alɛ ɛtakpu soɔ, Owusoso Akaa adɛmɛ balɛ ibui pɛ ebu alɛ, 29ɔmɔsɛ Owusoso Akaa yɛbɔdɔ̃ kɔkɔ anɔ nɛ̀ yɛ banɔ tikukuluɔ titsyina ɖa. 30Ɔmɔ asɛ nɛ kuku kibeɛ gɛ wɔnɔ bagɛ notinu Yudanɛ nodzi batɔ̃ malũ maluanɔ ɔkɔ Owusoso Akaa, pɔ otsiɛ nɔ eɖi wɔnɔ ashagabui nɛ Yudanɛ atɔ̃ malũmalũɔ so. 31Balɛ tsyɛ bedzi batɔ̃ malũ malũanɔ otsiɛ, sɛ tɛ Owusoso Akaa eɖi alɛ ashagabui nɛ ashagabuiɛ gɛeɖi wɔnɔ nɛ takpu. 32Ɔmɔsɛ Owusoso Akaa abhɛtɛ banunɔ pete asɛ tɛ bagagalĩ batɔ sɛ tɛ alà eɖi alɛ ashagabui.
Kpɛ Owusoso Akaa Nɛinyè Nɛitití
33Owusoso Akaa yɛehoeyiudɔ̃ mɔmɔ̃ɔ kpè mɔ lo! Kɛlɛ yɛubutiɛ nɛ̀ ebuesi lulũɔ mɛ edzu mɔɔ dza!
Kiɖuwoe gɛlɛ anɔ teli ahɔɛ akɔɛ onupɛ aɖɔaɖɔ pɛ ebhui ibui mɛ?
Kɛlɛ afana gɛ abalà elũ yɛɔgã mɛ niesi?
34Afana gɛelũ Apaleteɛ yɛekpeɖekpeɖe mɛ niesi?
Pɛnɔsɛ afana gɛenu anunɔ geuhu buluhũ akɔɛ?
35Afana gɛ atɛkɔ Owusoso Akaa kɛdɔ̃ tili eɖi,
sɛ tɛ yɛtsyɛ edzini kɛlɛ kɛbhɛ abuia akpɛ kɛliulũ akɔ anunɔ?
36Owusoso Akaa yɛabhɛtɛ kɛka nyia ka, kɛlɛ yɛahɔɛ mɛ lalɛ, kɛlɛ yɛahɔɛ mɛ lagã.
Kɛtakpu esi kpɛkpɛ inu yɛyɛ́ tihɔɔ! Amen.
Àwon tá yàn lọ́wọ́lọ́wọ́ báyìí:
Romanɛ 11: nyb
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© (Active), Ghana Institute of Linguistics, Literacy and Bible Translation. All rights reserved.