Romanɛ 6
6
Zã Nɛ̀ Ɛkpã Nɛ Kristo Mɛ
1Kɛlɛ bɔbaɖɔ otsiɛ? Bɔbaavɛ ɛlɛ abha zɛbhɛtɛ ebui kpaa ko, tɛ kɛkɔ ɔsɛ ɔlɔ tibhui bhuibuɔ zikpè tɔɖɔ koɔ dza? 2Kɛma ɛlɛ mɛ ana! Gɛ butitsí kɔ kibui kpaa, kiɖeso pɛ bɔbazã kɛlɛ tɛbhɛbhɛtɛ abha vɛnɔ otugbà? 3Pɔɔ, notinyi ɔsɛ bɔlɔ pete gɛ bakpɛ ulĩ akɔ nɛ Kristo Yesu yɛinye mɛɛ, yɛutsíɛ mɛ tsyɛ bakpɛ ulĩɛ akɔ ɔlɔ dza? 4Kliso bavɔbɔ ɔlɔ nii ɔgana bulĩ kpɛkpɛ mɛ ɔvɛnɔ butsí mɛ, sɛ tɛ kɛzã ɔmɔ asɛ kifeke gɛ befeke Kristo edenɔ bekpuɔ mɛ ɔgana Yɛakaa ishu dadalɛ mɛɛ, sɛ tɛ bɔlɔ tsyɛ zã nɛ ɛkpã vɔvɔ.
5Onupɛ bɔbhɛtɛ tenikpo nii ana nɛ yɛutsíɛ mɛɛ, kidzo ɛlɛ nabha ɛbeɛ, bɔbabhɛtɛ tenikpo nii nɛ yɛtɛlɔlɔ odenɔ bekpuɔ mɛ tsyɛ. 6Ɔmɔsɛ bunyi sɛ bakpala bɔlɔ ɛkpã kukuɔ nɛ̀ Kristo tɛ kɛkɔ ɔsɛ bɔshɛnɛ ahɔɛ nɛ ishupiɛ gɛ dɛmɛ ebui kpa bhɛbhɛtɛ shu lu, sɛ tɛ bɔtadzi banɔ dzidzi ɔkɔ ebui kpa- 7ɔmɔsɛ anɔ nyia anɔ gɛ etsíɛ, bebui eyinɔ nɛ ebui kpa ahɔɛ mɛ.
8Kliso onupɛ butsí nɛ̀ Kristoɔ, bɔyɛkɛŋã sɛ bɔbazã nɛ̀ ɛkpã tsyɛ nii. 9Ɔmɔsɛ bunyi sɛ gɛ bakɔ Kristo alɔ edenɔ bekpu mɛɛ, ezeke etsí, kɛlɛ butsí tɛka nu apalete nɛ yɛabha. 10Butsíɛ gɛ etsíɛ, ebui kpa yɛetsí bɔlɛ akɔ, nɛ kibe nyiɛ be ulũ, pɔ ɛkpã gɛ edzinɔɔ, alɛ ɛlɛ akɔ Owusoso Akaa.
11Kidzo ɛlɛ nabha lũɔ nɔlɔkɔ wɔnɔshu ɔmɔ asɛ banɔ tsitsí ɔkɔ ebui kpa, pɔ nonu anɔ gɛ ɔlɛ nɛ ɛkpã ɔkɔ Owusoso Akaa nɛ Kristo Yesu mɛ. 12Kliso nɔtɛkɔ ɔsɛ ibui kpa aŋã ukusi nɛ wɔnɔ abha tɛ nɔzɛ ɔbhɛtɛ ɔtɔɖɔ kibui kpa tɛpɛpɛ ulũ. 13Nɔtɛ shɛnɛ ahɔɛ nɛ wɔnɔ ishupiɛ shu ɔkɔ nanà ɔkɔ kibui kpa, asɛ kɛxɔ̃ɛwadɔ̃ ɔkɔ kɛtakpu mɛ gagalĩ ebui bhɛbhɛtɛ, pɔ nɔshɛnɛ ahɔɛ nɛ wɔnɔshu ɔkɔ Owusoso Akaa ɔmɔ asɛ banɔ gɛ bebu edenɔ butsí mɛ ɔmana ɛkpã mɛ ana, tɛ nɔshɛnɛ ahɔɛ nɛ wɔnɔ ishupiɛ shu ɔkɔ nyia ɔkɔ ɔkɔɛ, asɛ bɔxɔ̃ɛwɔadɔ̃ ɔkɔ kibui gbangbã tɛbhɛbhɛtɛ. 14Tɛkɔ ɔsɛ kibui kpa dzi wɔapalete, ɔmɔsɛ ɔma ɔsha niesi, pɔ tibhui bhuibu esi wɔlɛ.
Banɔ Dzidzi Bunu Ɔkɔ Kibui Gbangbã Bhɛbhɛtɛ
15Kiɖuwoe lu otsiɛ mɔ? Bɔbaa bhɛtɛ ibui kpa ɔmɔsɛ bɔma ɔsha niesi, pɔ tibhui bhuibu esi bɔlɛ soɔ dza? Kɛma ɛlɛ mɛ ana! 16Notinyi ɔsɛ nɔlɔkɔ batɔ̃ lulũ ɔkɔ anɔ teli asɛ banɔ dzidzi anaa, nonu banɔ dzidzi ɔkɔ anunɔ gɛ nolũ atɔ̃ ɔkɔɔ, nonu banɔ dzidzi ɔkɔ kibui kpa gɛ gbanà anɔ ɔvɛnɔ butsí mɛ, alo ɔkɔ batɔ̃ lulũ gɛ gbanà anɔ ɔkpɛ kibui gbangbã bhɛbhɛtɛ mɛɛ dza? 17Pɔ nohu Owusoso Akaa yɛahɔɛ ɔsɛ, wɔnɔ gɛ nodzi banɔ dzidzi ɔkɔ ebui kpa flogo nɔɔ, nɔbɔlɔkɔ wɔnɔ etúɔ nyɔ̃ɔ nɛ̀ batɔ̃ lulũ ɔyɛkɛ bɔdɔ̃ kakasɛ ɛlɛ, gɛ balɔkɔ akpɛ ahɔɛ akɔ wɔnɔ. 18Bebu ɔnɔ eyinɔ nɛ ebui kpa bhɛbhɛtɛ mɛ, kɛlɛ otsi alɛ nodzi banɔ dzidzi ɔkɔ kibui gbangbã tɛbhɛbhɛtɛ.
19Ɛɖɔ kɛlɛ nɛ anɔdzyrame yɛekpeɖekpeɖe ulũ, ɔmɔsɛ nobotsò nɛ wɔnɔ tɛzazã mɛ. Asɛ kɛlɔkɔ gɛ nɔzɔlɔkɔ ɔnɔ ishuɔ ɛkɔ toli ɔkɔ asɛ banɔ dzidzi ɔkɔ atsɔ̃ ebui bhɛbhɛtɛ, nɛ̀ ɛtakpu mɛ gagalĩ ebui tɛ lekpè atɔɖɔɔ, kliso otsi alɛ nɔlɔkɔ ishu ɔkɔ asɛ banɔ dzidzi ɔkɔ kibui gbangbã gɛ gbanà anɔ ɔvɛnɔ tɛdadalɛ mɛ. 20Gɛ nodzì banɔ dzidzi ɔkɔ kibui kpa bhɛbhɛtɛɛ, bebu wɔnɔ eyinɔ nɛ kibui gbangbã bhɛbhɛtɛ gɛ ɛgbana anunɔ esi. 21Kiɖe nɔmɔ odenɔ kibe ɛlɛ ebui bhɛbhɛtɛ gɛ lenu awuĩ ebui ɔkɔ ɔnɔ otsiɛ nɔ mɛɛ dza? Ebui alɛ agbana anɔ avɛnɔ butsí mɛ. 22Otsi alɛ gɛ bebu ɔnɔ eyinɔ nɛ ebui kpa mɛ, pɛ nodzi Owusoso Akaa yɛanɔ dzidziɛ, kɛgɛ nɔbɔ mɔ odenɔ kɛlɛ mɛɛ, kɛba gbana ɔnɔ ɔvɛnɔ tɛdadalɛ mɛ, kɛlɛ kɛgɛ badekoeyì nɛ kɛlɛ mɛ badzi ɛkpã tihɔɔ. 23Ɔmɔsɛ kɛbhɛ gɛ babuia ɔkɔ ebui kpa bhɛbhɛtɛ, kɛli nu butsí, pɔ Owusoso Akaa yɛdɔ̃ kɔkɔ kɛli nu ɛkpã tihɔɔ nɛ Kristo Yesu bɔlɔ Apaleteɛ mɛ.
Àwon tá yàn lọ́wọ́lọ́wọ́ báyìí:
Romanɛ 6: nyb
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© (Active), Ghana Institute of Linguistics, Literacy and Bible Translation. All rights reserved.