Jɔnə Nəchwaakənə́ nə́ aŋwaʼlə zəənə́
Nəchwaakənə́ nə́ aŋwaʼlə zəənə́
Nkɨ yi Əshîʼnə Ndzoŋ Ndzaŋ Jɔnə a kə Ŋwaʼlə̂ nə́ wɨ́d, wɨ́d nəələ̂ Yeso ándó atséebə Əsê páʼ zə́ələ́ mɛdnə̂ nə́, páʼ “a nə ńtíʼ nə́ ḿbə́ ŋwu mbî ńkə́ ńchîə á mə́m pɛnə̂.” Ndzaŋə aŋwaʼlə zɨ́d zɨ nə́ nkɔ̌ʼmbɨ yí sóŋ nə́ ńgə́, pə́ nə ŋ́ŋwaʼlə̂ aŋwaʼlə zɨ́d zɨ lə́ ńjî ńgə́ pɨ pə́ fóŋ nə́ ázɨ́d pó jî ńgə́ Yeso lə́ Nkwá páʼ Əsê a nə́ ńdaʼnə̂, ḿbə́ Mɔ́ Əsê, ńjî ńgə́ ńdaŋə̂ á mə́m mbimə́ əzɔb pɨ yǐ túg nchîmbîə (20.31). Ndzaŋə ándó mənu mə́ chî nə́ á mə́mə aŋwaʼlə zɨ mə́ nə nɨd nə́ Atséebə Əsê páʼ á ḿmɛdnə̂ ngǎ mɔʼə́ lə́, ntsɛɛmbiə aliʼə́ á mə́mə aŋwaʼlə zɨ́d zɨ á nɨd ntê əkɨʼnəmə́nu páʼ pɨ̈d nɨd nə́ ńgə́ Yeso lə́ Nkwá páʼ Əsê a nə ńdaʼnə̂ nə́, ḿbə́ Mɔ́ Əsê. Ndzaŋə ándó zəənə́ á nə ńdaŋ nə́ lə́, ətsáb páʼ pɨ́d tyáatə nə́ əkɨʼnəmə́nu Yeso a nə ńgɛd nə́ ə́ tíʼ ńdzoŋə̂. Aliʼə́ aŋwaʼlə zəənə́ ä fiʼtə̂ lə́ ndzaŋ páʼ pɨ pətsə́ pó nə́ néŋ nə́ ntɨ́ nə́ Yeso ńtíʼ ḿbə́ ngaŋə́zoŋə́ndzəm əjíə, pətsə́ pó kǐə anu páʼ a nə sóŋ nə́ ńdaŋ ə́lɨ́d ńkə́ ńkǐə á mə́ néŋ nə́ ntɨ́ nə́ yə́. Əkəmtə ntsɔb teelə́ ńkoʼ nə́ əkəmtə ntsoobə asaambɛ̂ pɨd ə́ fiʼtə̂ áwɛ̂n ndzaŋ Yeso a nə ńjî nə́ məjî mə́ akɔŋnə pópə ngaŋə́zoŋə́ndzəm əjí á nətúʼ páʼ pə́ yǐ nə́ waamə̂ yə́. Ndwigtə əkəmtə aŋwaʼlə zɨ á fiʼtə̂ anu ńté ndzaŋ pə́ nə ńgwam nə́ Yeso ńkə́ ńtsɔ́ʼtə əsáʼ yə́, ndzaŋ pə́ nə́ ńkwumtə̂ nə́ yə́ a kə́ ńjúmnə nəwûə, ndzaŋə a nə ńjáʼ nə́ á mbi ngaŋə́zoŋə́ndzəm əjí əghâ a nə ńjúmnə nə́ nəwûə.
Jɔnə a pyádnə ə́fiʼtə̂ anu ńté məfɛ̂nə mə́ nchîntɨ ńdaŋə̂ á ndzəm Klisto, məfɛ̂nə páʼ mə́ chwáakə nə́ əghâ nə́ ńdzoŋ ḿbə́ nə məfɛ̂nə mə́ yǐ nə́ yǐəə á mbô pɨ pó néŋ nə́ ntɨ́ ńgə́ Yeso lə́ ndúmə, ḿbə́ ndə̌ŋdəŋə́ ńkə́ ḿbə́ nchîmbî.
Ndzaŋ pə́ Ghabtə̂ nə́ Aŋwaʼlə Zəənə́
Nəchwaakənə́ (1.1-18);
Jɔn əfɛ̂nkǐ pópə ngaŋə́zoŋə́ndzəm Yeso yi ntsɛɛmbiə (1.19-51);
Afaʼə Yeso á əshîsaŋə (2.1–12.50);
Ndwigtə əlěmbî Yeso a mə́m Jɛlusalɛm pó əláʼ ə́ páatə nə́ (13.1–19.42);
Mmaʼmbîə a nə ńjúmnə nəwû ńkə́ nɨd mbɨ əjǐə á mbô pəənə (20.1-31);
Ndwigtə: Yeso a kə́ ḿbɨ nɨd mbɨ əjǐə á Galiliə (21.1-25).
Àwon tá yàn lọ́wọ́lọ́wọ́ báyìí:
Jɔnə Nəchwaakənə́ nə́ aŋwaʼlə zəənə́: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀