Matyo 28
28
Ndzaŋə Ándó Yeso a nə Ńjúmnə nə́ Nəwû
(Mag 16.1-10; Luk 24.1-12; Jɔn 20.1-10)
1Ndzaŋə ándó páʼ Alěláʼə́sê á nə ńdaŋ nə mbî ə́ fógə mɛ́ məsânə a nə ḿbə́ nə́ Sɔnde lə́, Mɛɛlə Magdalɛn pó yitsə̌ Mɛɛlə wə́ ə́ ghɛnə̂ á mə́ náŋ nə́ nəse. 2Ndəsê kə pyádnə ńchiʼnə̂ ńté ńgə́ Ntseŋndɛ̂ Mmaʼmbîə a pěʼ ńdǒ nəpó ńtsóolə, ńkabkə̂ ngɔʼ zə̂ ḿbáŋkə á ntso nəse ńtíʼ ńnáanə yə́ ndu wə́. 3Əshî əyí ə́ nə̈ ŋwaŋkə̂ ándó nkyaʼ nəfaŋ, ətsəʼ əpí ə̈ ə́fógə ándó alə́mə. 4Ngaŋə́pyáabə əliʼ pó pɔ́g lɛ tə ḿbénkə, ńtíʼ ńchîə ándó əkwû pəənə.
5Ntseŋndɛ̂ yi wə́ a sóŋ nə́ pəngyě pə́ ńgə́, “Kɔ nə pɔ́gə, maŋ jî ńgə́ pɨ náŋə lə́ Yeso páʼ pə́ nə ńkwumtə̂ nə́. 6A kě aliʼə́ nə́ chî pô, a júmnə nəwû tsɔʼə ndzaŋə a nə sóŋ nə́ lə̂. Yǐ nə́ ńdzə́ənə aliʼ páʼ a nə ńnoŋnə̂ ə́wə́. 7Tíʼ nə́ ńgə́glə ńgɛn ə́sóŋə á mbô ngaŋə́zoŋə́ndzəm əjí ńgə́ á júmnə nəwûə, ńchîə á mbi pɨ ńtə́ ńgɛnə̂ Galiliə; nə́ yǐ zə́ənə yi ə́wə́! kwúmtə nə́ anu zɨ maŋ fiʼtə̂ nə́ áwɨ́ lə́.”
8Pəngyě pə́ pó tíʼ ńdǒo á ndəsê nə́ aghə́glə, ńtə́ ḿbɔ́gə ḿbə́ ńdwɛ́nkə nə́ akɔŋtə ńtíʼ ńkə ńgɛnə̂ á mə́ fiʼtə̂ nə́ ngaŋə́zoŋə́ndzəm əjíə.
9Yeso a ghabkə̂ ńtégə ághɔ́b ə́sóŋ ńgə́, “Mäŋ chaʼtə̂ áwə́ənə́.” Pó tíʼ ńgyǐ ńtégə yí ńgwam məko mí ńgóʼkə yə́. 10Yeso a tíʼ ə́sóŋə á mbô pó ńgə́, “Kɔ nə pɔ́gə, ghɛn nə́ sóŋ á mbô pɔ́pə́mɛ́ mə ńgə́ pó ghɛnə̂ Galili, pó yǐ zə́ənə mə ə́wə́.”
Apəələ Atséebə Pɨ pó nə̈ Náŋ nə́ Nəse nə́ Yeso
11Ndzaŋə ándó pəngyě pə́ pó nə́ ńtə́ nə́ ńgɛnə̂ lə́, pətsə́ ngaŋə́pyáabə aliʼ pó nə ńtə́ nə́ ńnáŋə nəse lə́ pó ghɛnə̂ aláʼ ə́fiʼtə̂ anuə atsəm páʼ a laŋ nə́ á mbô pətə́kɔʼ pə́ ngaŋə́pêsê. 12Pətə́kɔʼ pə́ ngaŋə́pêsê pópə mətû mə́ aláʼ pó jwánə ńtíʼ ńkwaŋə̂ anu pó yǐ nə́ ghɛlə̂; əfɛ̂ chigə tə́kɔʼ nkéebə á mbô ngaŋə́pyáabə əliʼ zə̂ 13ə́sóŋ nə́ pó ńgə́, “Nə yǐ nə́ sóŋ ńgə́ ngaŋə́zoŋə́ndzəm əjí ə́ nə ńgyǐəə á nətúʼ páʼ pəg nə ńtə́ nə́ ńdê ńdzəələ̂ akwûə ajíə. 14Mbɔʼ nkɨ ghɛn ə́ kwúnə nətôglə nətû nə́ aláʼ, ḿbə́ pəg jîə anu pəg yǐ nə́ ghɛd nə́ yí tə a kě anu yətsə́ nə pɨ ghɛd pô.”
15Ngaŋə́pyáabə əliʼ zə̂ pó tíʼ ńkwá nkáb yi wɨ́ ə́faʼ ndzaŋ pə sóŋ nə́ ńgə́ pó faʼə̂. Tə ńkoʼ ə́sɛ̂n, Pəjusə pə̈ sóŋə lə́ tsɔʼə ə́lə́ələ́.
Yeso a Jáʼə Mbi Ngaŋə́zoŋə́ndzəm Əjíə
(Mag 16.14-18; Luk 24.36-49; Jɔn 20.19-23; Məf 1.6-8)
16Ngaŋə́zoŋə́ndzəm əjí zə̂ ntsɔb mɔʼə́ ə́ tíʼ ńgɛnə̂ á Galiliə, á nkwəənə páʼ Yeso a pěʼ nə́ nəələ̂ ághɔ́b ńgə́ pó ghɛn ə́wɨ́ lə́. 17Ndzaŋ pó nə ńjɨ́ nə́ yí lə́ ńgóʼkə yə́, lə́ atûə pɨ pətsə́ á pə́ ḿbɛ́lə ńkoʼlə̂. 18Yeso tíʼ ńgyǐəə á mbô pó ə́sóŋ ńgə́, “Tǎ mə á fɛ̂ mətɨ mətsəmə á mbô maŋə á nəpó pó ndu mbîə. 19Tíʼ nə́ ńgɛnə̂ á mbô ŋwu ntsəmə, á mə́mə atúmə atsəm ńgɛd pó tíʼ ḿbə́ ngaŋə́zoŋə́ndzəmə mə̈, əfɛ̂ nkǐ nə́ pó nə́ əlɛ́n Tǎ, nə́ yǐ Móonə, ḿbɨ́ ḿbə́ nə́ yə Ajwiə̈. 20Ńkə́ ndzéʼkə ághɔ́b ńgə́ pó zóʼnə anuə atsəm páʼ maŋ sóŋ nə́ á mbô pəənə́. Maŋ yï chîə lə́ tsɔʼə pɛn əghâ ətsəm tə koʼə̂ á ndwegtə mbîə.”
Àwon tá yàn lọ́wọ́lọ́wọ́ báyìí:
Matyo 28: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀