Mataji 21
21
1-11: Mal. 11, 1-10; Luk. 19, 29-38; Joh. 12, 12-19.
1Neke baho vavye vahegelye ukwingila mu-Jelusaleme, pe vafike mu-Betefwage, valungamye kukidunda ikimono, neke baho Jesu avatumage avańigendwa vakwe vavili
2neke atigilage: muhelelage pakâja ija kuvutalo jila. Musidzihâva pakujivona imbûnda vajâvîke, jili na ji ndzăna; je mukajâvŭlage mukandētele.
3Neke ngana muvwene munu ikuvalondza kinu, apo mukatigilage, umutwa agulwime, apo alangufya avatavulile. 20, 18.
4Neke idzi, pe dzavone-kaga, dzavonekelaga ukuta dzivilatukage, dze avilile umuvidzi, je itigila:
5„Mumulongele use-Sijono mutigilage: lolage umutwa vako ikwadza ukwako, umulele, angalye pambûnda, pandzăna ja mbûnda ińakutegula.“
6Neke baho avańigendwa vakwe neke vahelelage neke vakagendelage lu lulagi lwa Jesu.
7Neke baho vajiletage imbûnda na ji ndzăna jakwe neke vagyalage pakyâńa pambûnda imyênda gyanavo. Neke baho umwene neke ikalage pagyo.
8Neke baho avangi avanu ililugu neke valage muṅasi imyênda gyanavo neke avangi vapańulage amahamba ga mabiki neke valage muṅasi.
9Neke baho avanu amapuga navalongwe navakumbele neke valumbage vatigilage: hosijana, umuswamuve va Davidi, alumbwage, je ikwadzila mwitavwa lya mutwa, hosijana kukyâńa.
10Neke baho avye ikwingilamu-Jelusaleme, neke ikaja jonda jilalambukage nêke vavudzage nukuvudza vatigilage: je nani uju?
11Neke ayene, ve ali navo, neke vatigilage: je muvidzi Jesu uva mu-Nasalete, umu-Galilaja.
12-23: Mat. 11, 11-24; Luk. 19, 45-48.
12Neke baho Jesu neke ingilage mutembele ja Nguluvi neke avadagage avaletaga ifya kugula navagulaga mutembele neke afigwisage nifitagala fya vańakukovoṅasa imâli neke atagasage nifikalilo fyanavo, avagulaga ingundya. Joh. 2, 14-16.
13Neke alongage nulwa kuta: lolilwe ulwa kuta: „ińumba jangu jilatambulwa ńumba ja kulapangilila,“ kangi uńeńe mujidzusidze manga ja vagonadâsi.
14Neke pe ali mutembele, neke vahegēlelage avabofu navakitagenda. Neke umwene avananyage vonda.
15Neke baho avene avatekedzi avavina navakagulihâte, pe vafivwene ifidzumo, fye avonesaga, pe vavwene navâna, avatigilaga mutembele: hosijana, ve muswamuve va Davidi, neke baho vakalalilage
16neke vatigilage: vwipulika, lwe vilonga ava? Neke umwene Jesu atigilage: ena ndikulupulika; uńene musiluvwene pahâte, ulwitigila: vwivujapye ga malumbo mumulomo gwa fyali nugwa fye fikoṅa.
17Neke baho avalekage mumo neke umwene ahumage na mukâja jijo neke akagonage mu-Betanija.
18Neke pamilavo, pe ipilukila mu-Jelusaleme, neke baho avonage adagine indzala.
19Neke baho aguvonage umudzombe pikasi, neke ahelelage kuko neke baho avonage gudzila-fipeke, gulembulidze ga mahamba gene. Neke baho atigilage: lino usilavwil’ uveleke ponu, mbêpali hela. Neke baho umudzombe gumage nakalingi. Luk. 13, 6.
20Neke pe vaguvwene avańigendwa, neke vadzumage vatigilage: umudzombe guhâvile ndali pakuma?
21Neke lino baho Jesu apilusage atigilage: ndakyene unene ndikuvavula nditigila: ngana ndakyene muli nalo ulufuvo, ngana musikwiganisa, apo musi-vonesa gu mwitu ugu ugwa mudzombe gwene na juńeńe, hamu, apo na ki kidunda iki mulakilonga mulakitigila: vwikukupule kuno, ukitage muńandza jila, apo mulavona kikwikukupula kikwitaga muńandza. 17, 20.
22Neke na kye mwińilika, ngana mwińilikila mululapangilo neke muhandze nukufuvwa, apo fyonda, fye muńilike, mulanukila fyonda.
23-27: Mal. 11, 27-33; Luk. 20, 1-8.
23Neke baho, pe adzifike mutembele, pe agenda mukuvavulanidza avanu inôngwa, neke baho vahegēlelage ukwakwe navatekedzi avavina navandzagila aveneka va vakina-Jisilahele neke vatigilage: dze vwilima idzi, vwilimila vutavulilwe vulikwi? Ani j’ akupelye uvutavulilwe uvu? Joh. 2, 18.
24Neke umwene Jesu atigilage pakupilusa: mupulikage najune ndikuvavudza ilidzwi limwi hela, ngana ndivwene mumbulile, apo najune ndikuvavula uvutavulilwe, kwe vuhumile, vwe ndilimila.
25Uludzabiko, lwe adzabikaga Johana, lwahumile kwi? vona lwahumile kukyâńa, ene vuli lwahumile kuvanu, uńeńe ndavuli lwen’ ulu? Neke baho avene neke valonganage va vene vatigilage:
26ngana twitigila lwahumile kukyâńa, apo umwene alatigila: ka kyavakānidze kiki ukumufuvwa? Neke kangi ngana twitigila: lwahumile kuyanu hela, ulu kangi twikogopa kuvanu, pakuva avanu vonda vatigilaga Johana je muvidzi. 14, 6.
27Neke baho vakapilusage kwa Jesu neke vakatigilage: hamu, tusilukagwe, kwe luhumile. Neke baho atigilage: apo humbi najune sindikuvavula uvutavulilwe vwangu, kwe vuhumile, vwe ndilkpila.
28Neke baho atigilage: uńeńe ndavuli? Ali pwali ujungi umunu umuńa-vâna vavili. Neke baho alongage kwa muvele atigilage: ve mwâna vangu, uhelelage neṅuli mukulima umugunda gwangu ugwa vutoṅoni gula.
29Neke umwene atigilage: ena, mutw’ ave! Neke pambele apelage ukuvûka.
30Neke baho udadye neke ahelelage kwa mukwangudzi neke akalongage lulo. Neke uju atigilage: ndilema! Neke pambele inumbula jivavage neke avūkage. 7, 21.
31Neke atigilage: ongo lino, ve vavili vala, agendye alikwi pa lwe akelye udadavo? Neke vatigilage: ju mukwangudzi. Neke baho Jesu atigilage: ndakyene ndikuvavūla unene nditigila: navahakipembe navańa-havala uńeńe valavatalila muvutwa vwa Nguluvi. Luk. 18, 14.
32Pakuva pala, pe adzile Johana, pe avadalikilaga ińasi ja vugolofu, uńeńe musamufuvwaga. Neke avene avahakipembe nava-ńa-havala, avo vamufuvilwe. Neke uńeńe, na pe mukuvavona ukufuvwa, inumbula dzeńo nambi nukupela sidzapelaga, ukuta najufwe tungafuvwaga. Luk. 7, 29.
33-46: Mal. 12, 1-12; Luk. 20, 9-19.
33Mupulikage ndivavūlage nulungi uluhwananidzo; neke atigilage: āli pwali umunu ujungi umuńa-kâja neke ogike umugunda gwa vutoṅoni neke agusitilage nuluhegele neke adzengage na ji ńumba ja kubudzila neke nińumba inali ja kumingila neke avīkage navanu avańa-kulimīlila neke umwene ahelelage kwidzumbe. 25, 14.
34Neke pamwâka, gwe vwituńunila uvutoṅoni, neke baho avatumage avavanda vakwe avańa-kupemba imeke dzakwe kuva-ńa-kulimīlila umugunda gwakwe gwa vutoṅoni.
35Neke baho avalima-mugunda gwa vutoṅoni neke vavibatage avavanda vakwe neke ujungi vamu-fyogage, ujungi vamuvŭ-lagage neke ujungi vamu-bodzolage namaganga.
36Kangi umwene neke avwilage pakuvatuma avavanda avangi, avalutye uvolofu nakuvala. Neke avene nakuvavo vagitage ndeni.
37Neke ulwa mbele neke amutumage ju muswamuve, pakuva atigilaga: umuswamuvangu ujo valamogopa, pe vamuvwene.
38Neke avene avalima-mugunda gwa vutoṅoni, pe vamuvwene ukuva je muswamuve, neke baho vipwefyage vatigilage: je muńa-mapwela jujo, lino afwidzage, amapwela gakwe givelage gisu jufwe. 27, 18.
39Neke baho vamwibatage neke vamuhumyage mumugunda gwa vutoṅoni neke vamuvŭlagage.
40Neke lino ngana ponu ikwadza ju muńa-mugunda gwakwe, apo alagita navo ndavuli avalima-mugunda vala?
41Neke avene vatigilage: avanu avavîfu vala alavavipila pakuvavŭlaga neke mumugunda gwakwe alavahomedza avangi avańa-kulimĭlila umugunda gwa vutoṅoni, avitavula imeke, pa pe dzituńunye baho.
42Neke umwene Jesu atigilage: uńeńe musina muluvona ponu pahâte ulwitigila: „Lye liganga iligunilwe kuvadzenga-ńumba, lye lyene kangi lihambwise ligangalya pakipungu? Aligite evo ju mutwa, atigye livedzage lya kudzuma unefwe, pe tukulilola.“ Apos. 4, 11; Lom. 9, 33; 1. Pet. 2, 6-8.
43Kye ndilesile nigilage: uvutwa vwa Nguluvi vulańagwa ukweńu, valadapa avanu avangi hela, aviveleka idza vutwa vwa Nguluvi.
44Neke ngana je igwila piganga ili, ujo ikwiba-dzula. Neke kangi je likumugwila lilyo, apo ujo lilamutikińula.
45Neke baho avatekedzi avavina nava-Fwalisaja, pe vapulike imańagidzo dzakwe idzi, neke navo valufikage ulukuta akutuse-Lenga jufwe.
46Neke baho vagane vamwibate, neke kangi vogogage ililugu lya vanu ilyalundine baho, pakuva avanu vatigilaga, je muvidzi ju mwene.
Àwon tá yàn lọ́wọ́lọ́wọ́ báyìí:
Mataji 21: II
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
New Testament in Bena © Bible Society of Tanzania, 1958.