Mataio 12
12
10 PAKANA MA 2.
1U ra pupukai kuma Iesu i wan akit u ra kum pinapam na padi u ra bug tabu; ma diat a nuna tara na wawera diat molo, ma diat kitakilapapa a kurakura padi, ma diat ani. 2Ma diat a kum te Faresaio ba diat boboi, diat piri tana, Boboi, a num tara na wawera diat pet a lig ba di watabui u ra bug tabu. 3I piri ta diat, Pa muat luki utbai duk a lig kuma David i a petai ba i molo, ma diat kai ba diat weuru ma i; 4kuma i ruk u ra ruma a nun Nara, ma i anpa a mandrai‐na‐tamtama, ia ba di watabui korom i, korom diat kai diat weuru ma i, a diat ku a kum tenapinapet? 5Pa muat luki kai u ra wewapua lena, A kum tenapinapet u ra ruma‐na‐wetu diat pet a mampa a bug tabu ma pa diat rara uni. 6Iau kai iau piri ta muat lena, Rā i tana kumin i gala u ra ruma‐na‐wetu. 7Ba muat a nunuratai mun a pipilai ra pirapira kumi, iau nemi ku a maramari ma pate a wekul, pa muat a takunai diat pa diat rara. 8Kuma na Tura‐muana a Tadaru i ra bug tabu ia.
9Ma i wan taka iai ma i ruk u ra nudiat ruma‐na‐lotu; 10ma boboi, i ki uni rā muana ba i mat a limana. Ma diat tiri Iesu lena, I ka duk ba di wakadelpa te u ra bug tabu, ba pate? kuma diat ligna takuna i. 11Ma i tiri diat uni lena, O oi na muana ta pa muat, ba rā ma ku a nuna sipi, ma i pukatau u ra babag u ra bug tabu, pa in wan duk, in pami ma in lo‐atotoi na te taka iai? 12Ma lelawai duk a muana, i ka akit u ra sipi, ni? Ia kuma i ka uni ba di pet a lig awakak u ra bug tabu. 13Ma i piri ta ra muana, Un kado a limam. Ma i kadoi; ma i lalaun balet le ra limana balet.
14Ma diat a kum te Faresaio diat pari u na taman, ma diat pigit a na maden. 15Ma ba Iesu i nunurai i wan taka iai: ma mogoro na tara diat patap un i: ma i wakadelpa diat rap: 16ma i pirabat diat lena, koniku diat pirapuana i: 17ba in wewaot uni a pirapira Isaia a parofita i wapuamukatau uni lena, 18Boboi, a nug wetula, ia ba iau tikan‐walipa i; a nug nat na wakaek, a niog i kaia akit un i: ag pakita a niog un i, ma in wapua a nakokon ba i takado korom diat a Tara‐igen. 19Pa in pirapuli, ma pa in wewatai u na te; ma pa in te in walogoro a igana u ra kum akapi. 20A wuwuru ba i talupa pa in pet‐boro‐matuai, ma pa in pukdokoua a malu na lama ba i mi kubai, un ta bug na wanua in tuluai uni a nakokon ba in uianatau. 21A kum Tara‐igen kai, kura diat a nurutau u ra iana.
22Ma di benpa te korom i ba a tebaran i og i, i pula ma i mutmut kai: ma Iesu i wakadelpa i, kuma ia ba i mutmutpa, i pirapira, ma i bobo ma ut.
23Ma diat a kum tara‐na‐kaiya diat kakaian rap uni, ma diat piri lena, Ia bi na Tun David ni? 24Ma diat a kum te Faresaio ba diat walogoroi diat piri lena, A muana bi, ba ia ku, pa i lurua diat a kum tebaran; i lurua diat u ra dekdek a nun Beelisibul ku a tadaru a nu ra kum tebaran.
25Ia kai i nunura a nuknukidiat, ma i piri ta diat, A matanitu ba i turu werantau ia ku, kura ku din wabapuai; a taman kai, ba a ruma, ba i ki werantau ia ku, pa in tana takum: 26Ba Satan i lurua Satan, i tana werantau ia ku, ma in tana takum lelawai a nuna matanitu? 27Ba iau lurua diat a kum tebaran u ra dekdek a nun Beelisibul, lelawai a kum tepamuat? diat kai diat lurua diat u ra dekdek a nun oi? Kuma diat ba diat a nakokon muat.
28Iau kai ba iau lurua diat a kum tebaran u ra dekdek ko ra Nion Nara, i wan pat uni korom muat a matanitu a nun Nara. 29Te in ruk lelawai u ra ruma a nu ra uiana ma i rakanpa a nuna utna ba pa i do‐a‐kototai mun a uiana? ma na muru in rakanpai marakam a nuna utna. 30Ia ba pa mira paluug ma i, diara paluug ma te igen; ma ia ba pa mira kon ugai ma i, i ogoguai. 31Ia kuma iau piri ta muat uni lena, Din una larapai a petakakai rap a nu ra tara, ma ra nudiat pira‐ululi kai un Nara; a pira‐ululi u ra Niono‐Tabu ku pa din una larapai. 32Ia ba i pirapira pikoina u na Tu‐ra‐muana, din una larapai a nuna pirapira‐pikoina; ma ia kai ba i pirapira pikoina u ra Niono Tabu pa din una larapai a nuna pirapira‐pikoina, u ra pupukai kumi, ma un te bulug ba kura in muru pat. 33Muat pam a diwai ba in wakak, ma in wakak bulug a uaina; ba pa i lenkuma, muat pam a diwai ba in pikoina ma in pikoina bulug a uaina: kuma di nunura a diwai ko ra uaina. 34A kum bulumuru na ui muat, muat pikoina ku, ma muat a piri lelawai a kum kokoina lig? kuma a wadi i piri ku u ra lig a baladi i teg mai. 35A koina muana i uarere a koina lig ko ra nuna ka na kokoina utna: akaina muana kai i uarere akaina lig ko ra nuna ka na akakaina utna. 36Iau piri ta muat, a kum pirapira bia ku rap a kum tara diat piri, kura din tiri diat uni u ra bug na nakokon. 37Kuma, kura din pam kado ui u ra num pirapira, ma kura din mag ui kai u ra num pirapira.
38Ra magan ko diat a kum tenatimtimu ma ra kum te Faresaio diat piri tana, Tenawawera, miat ligna bobo ta wakinilag kon ui. 39I piri ta diat lena, A tauntara pikoina, ma raugana makiradiat, diat auare kup ta wakinilag, ma pa din tari ta wakinilag korom diat, a wakinilag ku in Iona a parofita: 40lenkuma Iona i tana tul a bug na keke ma tul a bug na marum u ra bala ra in a ien pi; len kai kuma na Tu‐ra‐muana in tana tul a bug na keke, ma tul a bug na marum u ra bala ra pia. 41A tara Nineve kura diat a tana ugai u ra bug na nakokon ma ra tauntara kumi, ma diat a pet‐a‐puanapa a numuat petakakai: kuma diat nukpuku diat u ra wawera a nun Iona; ma boboi, rā i tana kumin i gala un Iona. 42A ranandi kai ko ra matan a taubara kura in turu u ra bug na nakokon, ma in pet‐a‐puanapa a petakakai a nu ra tauntara kumi; kuma ia ut i wan urin tak u ra kali ra vuravura ba in walogoro a manana a nun Solomon; ma boboi, Rā i tana kumin i gala un Solomon.
43A tebaran ba i pari ko ra muana, i wan bolo u ra kum bual i makeke akit, kuma i auare kup ta manmanatug, ma pa i auarepai. 44Ma i piri lena, Ag wan talili u ra nug ruma, ia ba iau wan koni; ma ba i wan pat, i boboi lena i kapkapana, di arupai, ma di maratai kai. 45Ma i wan, ma i benpa ta limadi ma ruadi a tebaran bulug diat pikoina akit un i, ma diat ruk rap ma diat ki takum iai: ma pikoina kinalik na muka a muana kuma, in pikoina akit na muru. Kura ut in lenkuma kai a tauntara pikoina kumi.
46Ma ba i piri kubai ta diat a tara‐na‐kaiya, boboi, nana ma ra kum tetenaliklik diat turu na taman, kuma diat ligna pirapira korom i. 47Ma te i wapua i lena, Boboi, nam ma ra kum tetemliklik diat turu na taman, ma diat ligna pirapira korom ui. 48Ma i piri tan ia ba i wapua i uni lena, O oi nakug? O oi diat kai a kum tetegliklik? 49Ma i kado a limana korom diat a nuna tara na wawera, ma i piri lena, Boboi nag, ma diat kai a kum tetegliklik! 50Kuma ia ba i taram u ra wetula a nun Tamag i ki u ra maua, a teglik a muana, ma ra teglik a tebuan ia, ma nag kai.
Àwon tá yàn lọ́wọ́lọ́wọ́ báyìí:
Mataio 12: RAI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Published by the British and Foreign Bible Society in 1896.