JOHON 2
2
Kana Along Jorme-Pachihap Alam
1Nithom-arni, Galil alongri Kana arongpe along isi jorme-pachihap kido, aro Jisu anang ai pe lalong kido. 2Labang jorme-pachihap longyok Jisu aro anang adun helyokta kataram. 3Konam athe alang ordetno, Jisu anang ai pe anangyok pulo, “Anali athe alang ingjongot.” 4Aro Jisu anangyok pulo, “Arloso pe, nang nepen pot katiki nange do? Ne por wangwe lang.” 5Anang ai pe amurkiya helyok pulo, “Anang pot nali than, tikinot.” 6Minonke Jihudi hel kapangthir abi-pun ateng, ingkol lale thom-kep agalon lang kangjang, labadi arlong amathi thorok kido. 7Jisu analiyok pulo, “Mathi hel lang pen pangpen.” Aro angphun adeng pangpeno. 8Anang analiyok pulo, “Minon bekso en, aro cho-jun urkiya po adungyok ponnot.” Lasi anali bangpo pono. 9Konam cho-jun urkiyapo langpo chowetno, athe alang chiplang detno, aro daklong parasi chiplango than un-eh yongo. [manta lang kisok murkiya hel, labang than uno], cho-jun urkiya po osopo yok taramo, 10aro anangyok pulo, “Arleng abangten akime athe alangpo si ango piman, aro arleng hel kijun tang aphel kilamhol athe alang piman. Manta minon hokta nang akime athe alang bido lang.” 11Galili Kana rongpe long, Jisu labang katiki, kichengcheng asin dolo, aro anang jortang paklango; aro anang adun hel anangyok krolo. 12Labang aphel anang, anang aipe aro anang muso hel aro anang adun hel pen Kaparnaum yok damo; aro lalong anali bekso arniyok dolo.
Jisu Arnam Ahem Kidam
(Mot. 21:12-17; Mrk. 11:15-19; Luk. 19:45-48)
13La-amun Jihudi hel Kijoktang-kamai adungo, aro Jisu Jerusalem yok damo. 14Arnam ahem long arleng hel chorong, bherabik, wothum, aro anali kijor apor nohok kachihole abang yok thekngo. 15Anang arik pen sabuk ingholsi, bherabik pen chorong hel ahuwit Arnam ahem para ujhar detno. Anang nohok kachihole abang yokta tanga atheng helta harlek detno, anang inghol kartul helyokta harlek detno. 16Anang wothum kijor abangyok anang pulo, “Mehel abihini hel en ponot, ne Apa ahem kijor-kihrep ahem inghol lek!” 17La-amun “Nang hemyok neng kirung labangsi neyok me badi ingleknge,” pusi kiwi alam adun hel neng chipurkilo. 18Jihudi hel laparake anangyok pulo, “Nang lamehel asal tikisi pondo, bangpo haliyok pot aphan asin paklang pon do?” 19Jisu analiyok pulo, “Nali Arnam ahempo pangho detnot, ne ni-thom arni labang keme.” 20Jihudi hel laparake pulo, “Labang Arnam ahempo kep philine nengkan thorok kemsi patang do, nang ni-thom arni kem un-eh ma?” 21Manta anang abithang abangpo alamsi kithan. 22Anang konam kithi hel asitem para anangyok pabur phakngo, anang labang alam kithan pusi, adun hel bangpo neng purkisi, lo-kangthir long, aro Jisu kithan alamthe krolo.
Munusi Asoi hel Jisu Kithekdet
23Jisu Jerusalem long Kijoktang-kamai kido amun, Jerusalem long kido, ako-ong arleng Jisu amenyok krolo piyok pu tene anali anang katiki asinhel thek hlongo. 24Manta Jisu abithang ke analiyok krolkre yongo, piyok pu tene anang ahuwit arleng yok kithek det, 25aro anali lam anangyok ihut bakta hakhi kipi nange kangwe; piyok pu tene anang bithang anali thin long pot do, kithek det.
Àwon tá yàn lọ́wọ́lọ́wọ́ báyìí:
JOHON 2: AMRI-BSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.