Yohanna 4
4
Jesu kadpwoo kihh m'ee mat Samariya
1Daah Jesu klihng rooh Farisiiy mwopp man rooh riy phi kad mhi-dumdang niy, yakhal riy kaah sh'in baptisma mwopp mett rooh Yohanna Gu-Baptisma kihh kad, 2kooh bhalang phirooh baah gyet a Jesu kihh sh'in baptisma mwopp mou, a zheppkamm khinyi gyet mwopp kihh sh'in. 3A nyi seh bhi yakhal yet yill Yahudiya, bhi baa'dum dyi yill Galili.
4Bii mihhseh dheeh nyi a ching tihh mett arr gaar'yill Samariya. 5M'ang mwaan matt harr ji wull m'ee tughuzyill w'u shumm nyi a Saikar, kuss kihh m'ee bhokk w'u gyet Yakub pihh em niy Yusufu. 6Tukhun'am khi Yakub gyet nhighin pee mhizeh ni. Kaarooh mwaan nokhol nyi, bhi taah tong pwoo tukhun'am ni. Pee gyet baa wull kaa puus kihnaar se.
7Kaarooh m'ee mat Samariya ji p'ee yak a'm, bhi Jesu satt nyi le, “Ih lapp reb pakk a'm ni ih shwaa bwaatt?” 8(Zheppkamm khi Jesu ni mwopp wak dheeh tughuzyill ni p'ee seett biisoh.)
9Mat Samariya ni lapp Jesu le, “Gha a Gu-Yahuda, wu'an a mat Samariya; diy shitt a rangg bhi ghi nang am'shwaa pwoo na ayeh?” (Mat ni satt kihhsheh pee'rooh baah dhaa-soh kihh kang Zhepp Yahuda mwopp kihh Mhi-Samariya mou.) 10Jesu pring nyi le, “Kaddyinn yi man zhukhum khi Naan, kihh gwooh phi nang a'm pwoo yi se, bhi dyinn yi p'ee dhang phi nyi, bhi dyinn nyi p'ee pihh a'm mhi seen yi.”
11Bhi mat ni pring Jesu le, “Daah, baah gha kihh bii'del-am mou, dhangg tukhun'am ni zhurruk a kaa wu'dyikk; gha p'ee kad a'm mhi seen mhizeh a nihyeh? 12Wu'gha ghi mett Puup mu Yakub w'u gyet pihh tukhun'am ni munn, yakhal wu'nyi sh'i kaah niy kihhsheh kihh zhepp niy mwopp, kihh long keeniy mwopp zag gyet kihh shwaa pakk a'm ni aa'h?”
13Jesu lapp nyi satt le, “Koohweeh w'u mihh shwaa a'm mhize, bhi a'm kudyi p'ee waa t'u nyi dyi. 14Dhangg koohweeh w'u mihh shwaa a'm w'u a'n p'ee pihh nyi gwoh ni, bhi baah a'm p'ee cham t'u nyi dyi mou harr ngaa-ngaa. P'ee a'm w'u a'n p'ee pihh nyi gwoh ni p'ee kwed a tukhun'am dhighin nyi, w'u kihh bwet a a'm mhi seen w'u harr ngaa-ngaa.”
15Mat ni satt Jesu le, “Daah ghi pihh pakk a'm mhizeh ni a'n tapp a'm dyi kihh t'u a'n, harr l'e tihh ih kihh ji bihze chitt p'ee yak a'm mou.”
16Jesu satt nyi le, “Dum yi ji kihh mis yi.”
17Bhi mat ni satt nyi le, “Baah a'n kihh mis mou.”
Jesu pring nyi le, “Yi satt a dihhreh, rooh yi satt yi le yi kihh mis mou seh. 18P'ee yi cham sh'in daass paad, dhangg gwooh yi kihh nyi mwasseh se maah a mis yi mou. Pwoo keeyi w'u yi satt seh a zhwakk.”
19Bhi mat ni satt nyi le “Daah, a kihh naah kaa gha a m'ee gu-wanggshiiy se 'y. 20Ghi naah, mhishak mu Mhi-Samariya gyet mwopp kihh soyill Naan a kihdab bwumm mhize, dhangg wu'wunn Zhepp Yahuda wu kihh le wai nyi a ching tihh gurum mwopp soyill Naan a Urshalima.”
21Jesu satt nyi le, “Yi pihhzeenn bii w'u a'n p'ee satt nyi yi se; pee kihh ji w'u baah seeh wu soyill Daah Naan a kihdab bwumm mhize, kooh Urshalima mou. 22Wunn Mhi-Samariya wu kihh soyill a bii w'u baah wu man mou; wu'munn Zhepp Yahuda mu kihh soyill a gwooh mu man. Bh'am ji a sarr Zhepp Yahuda. 23Weett kihhsheh pee kihh ji, kai harr baa ji wu-wull mwasseh maah, w'u mhi-soyill shi'zeenn mwopp p'ee soyill Naan a dhighin Riin kihh zeenn zag. Pee Naan kihh lyap a mhi-soyill wu'kihhsheh ni mwopp p'ee soyill riy. 24Naan a Riin, pee'mhinyi bhi a ching tihh mhi-soyill Naan mwopp soyill nyi a dhighin Riin kihh zeenn zag.”
25Mat ni satt nyi le, “Ih man ih le Almasihu, w'u mwopp kihh peet Kristi, kihh ji. Mihh ji wull bhi nyi p'ee yakshiiy bii mwopp weett munn.”
26Bhi Jesu satt nyi le, “An w'u phi kadpwoo kihh yi mwasseh se a a'n a Kristi ni.”
Zheppkamm khi Jesu mwopp ba ja
27Mwoorr pee mhizeh ni, bhi zheppkamm khi Jesu mwopp jawull. Aa'phi mwopp pwetd pee'rooh mwopp kad nyi kaah kadpwoo kihh mat ni. Dhangg baah m'ee mwopp nang phi nyi le, “Ghi kihh t'ang a mihyeh?” kooh “Gha phi kadpwoo kihh nyi a p'ee mihyeh?” mou. 28A nyi seh bhi mat ni yet pyeel a'm keera dheeh dhen pwoo tukhun'am ni, bhi dhel dum tughuzyill ni, bhi satt gurum mwopp le, 29“Wu ji wu naah m'ee gwooh satt koohmeeh w'u ih cham sh'in mwopp a'n. Dyi kwed a nyi a Kristi shi bwaatt?” 30Bhi gurum mwopp pwat dhighin tughuzyill ni mwopp duam pee w'u Jesu diy.
31Mwoorr pee mhizeh ni, bhi zheppkamm khi Jesu ni mwopp nang nyi kihh soh, mwopp le, “Gwoohyon, gha so soh 'y.”
32Bhi lapp mwopp satt le, “Ai a'n kihh biisoh p'ee s'o w'u baah wu man mou.”
33Zheppkamm khinyi ni mwopp y'aa shekhel nyi phi shag le, “Kooh a menguh baa ji kihh m'ee biisoh nyi so bwaatt?”
34Jesu satt mwopp le, “Bii'soh keena a gam p'an khi gwooh lop a'n, kihh kyes dhakk khinyi zag. 35Dhok wu kihh satt w'u le, tarr dheeh feerr bhi mwopp y'aa dyiip dhebhenn e'h? T'o, a'n ih kihh satt wunn, wu eep yit wu, wu naah bhokk ni mwopp diy; baa mwopp nwang mwoorr kihpee dy'iip mwasseh. 36Gu dyiip dhebhenn p'ee lapp kwatdhakk keeniy; nyi kaah dyiip dhebhenn lhidhel dhighin seen w'u harr ngaa-ngaa. A kihhsheh bhi gu kopp dhebhenn kihh gu dyiip dhebhenn mwopp p'ee sh'in rettyit kihshag. 37Pee'mhinyi bhi ny'am w'u mwopp kihh nyam le, ‘Komchiiy kopp, komtak dyiip,’ a zeenn. 38Ih lop wunn dyiip dhebhenn w'u baah gyet a wunn wu sh'in dhakk w'u shi-shwal ni mou; a m'ee gurum wu'dyikk gyet mwopp sh'in; wu'wunn dheeh phi dyiip a lebhed wun mhi dhakk khimwopp.”
Mhi-Samariya dhess pihhzeenn Jesu.
39Mhi-Samariya dhess w'u dhighin tughuzyill mhizeh ni mwopp pihhzeenn Jesu p'ee pwoo w'u dyinn mat mihhseh satt seh le, “Satt kapp bii w'u ih cham sh'in mwopp a'n.” 40A nyi seh, bhi kaarooh Mhi-Samariya ni mwopp ja kihpee Jesu diy, bhi mwopp dhang phi nyi tihh tong diy yill khimwopp, bhi Jesu shwat t'eer vel kihh mwopp. 41Bhi gurum dhess mwopp pihhzeenn nyi p'ee pwoo w'u kihh satt mwopp. 42Pee'mhinyi bhi mwopp satt mat ni le, “Mwasseh baah mu pihhzeenn a p'ee bii w'u deh yi satt munn seh kyekk mou; wu'munn sh'i kaah muh mu klihng yakhal mu man, baah m'ee satt kihhshe, mu le a nyi a Gu'bham khi yill ni.”
Jesu bar L'aa kihh m'ee gu'bhaar wu'yon
(Mat 8:5-13; Luk 7:1-10)
43Kihbwoon t'eer vel w'u Jesu shwat Saikar, yill Samariya seh, bhi yakhal nhighin dum Galili. 44(Jesu cham satt le baah mwopp kihh pihhdhess Gu-wanggshiiy kih yill miin'niy mou.) 45Bhi kaarooh ji wull Galili, bhi Mhi-Galili ni mwopp lapp nyi, p'ee deh mwopp naah v'ur bii'aapwoo w'u deh mwan sh'in tihngg Urshalima sh'i Kwughur Mettkaah seh, p'ee deh wu'mwopp nhighin zag.
46Yakhal dyi bhi Jesu dhel dum kwangyill Kaana w'u nhighin yill Galili. Kaana ni a pee w'u gyet Jesu shikhir kihh am'dhongg put am'anab diy. Bhi m'ee gu'bhaar wu'yon nhighin, w'u em khinyi a gok bhakk Kafarnahum . 47Kaarooh gwoh ni klihng rooh Jesu tong yill Yahudiya b'aa ji yill Galili, bhi dhel dum kad nyi, bhi dhang phi nyi tihh sam dum bar em niy w'u kihh dhen a kihh arr muutt.
48Jesu satt nyi le, “Mihh dheng'pee wu khi naah a bii'kattshiiy kihh bii'aapwoo, bhi wunn p'ee dh'om pihhzeenn mou.”
49Gu'bhaar ni satt nyi le, “Daah, ghi g'ung ghi yakhal munn mu sam mu dum laah-laah tapp'baa em na diy m'uut.”
50Jesu pring nyi satt le, “Mwan gha, em gha ni baa kakhamm.”
Gwoh ni pihhzeenn bii w'u Jesu satt riy, bhi l'ang kih arr w'aa. 51Kaarooh gwoh ni kudyi kih arr, bhi kromm khinyi mwopp ja kang nyi, mwopp satt nyi le, “Gwoohyon, em gha shi kakhamm e'h.” 52Kaarooh gwoh ni nang phi kromm ni mwopp kooh kyed l'aa ni shee kakhamm a kaa gonggpee w'u k'ong se o'h, bhi mwopp satt nyi le, “Shikwong ni shee yet nyi a kaa gonggpee w'u kihmeh mhi puus se.”
53Bhi puup khi l'aa ni naah kad nyi a chiitt kihh pee w'u den Jesu satt diy riy le, “Em gha ni baa kakhamm,” seh. Pee'mhinyi bhi gwoh ni, kihhsheh kihh luh keeniy weett mwopp pihhzeenn Jesu. 54Mihhse a bii'aapwoo wu'vel w'u gyet Jesu sh'in bwoonrooh yet yill Yahudiya b'aa ji dyi yill Galili.
Àwon tá yàn lọ́wọ́lọ́wọ́ báyìí:
Yohanna 4: Chakfem
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2022 Luke Initiative for Scripture Translation