Yohanna 5
5
Jesu bar m'ee Gu'shwal pwoo dungg'am
1Yemm dyi lee bhi Jesu k'aa dum Urshalima m'ee Kwughur pwooNaan khi Zhepp Yahuda mwopp. 2Nhighin Urshalima, kuss phi fokhol'pang w'u mwopp kihh peett Fokhol'pang Tihm, bhi m'ee dungg'am nhighin w'u shumm nyi sh'i Pwoo Yahudi a Betesda. Zheb bid mwopp paad kihh dyarrang nhighin pwoo dungg'am ni. 3Dhighin zheb bid ni mwopp, bhi v'ur mhi'shwal vughum, kihh khibhil, kihh kud mwopp kihh birr nhighin kih pee'saam. 4Mhi'shwal ni mwopp kihh tong tapp tungg khi a'm ni. P'ee mihh yakhal bhi m'ee gu'lop khi Naan kihh sam tungg a'm ni. Koohweeh w'u mihh shee taah dhighin a'm ni bwoonrooh gu'lop ni tungg a'm ni, bhi nyi p'ee kad kakhamm pwoo kooh a shw'al wu'rangg w'u kihh daam'pee nyi#5:4 Pakk r'an w'u gyetshak nwopp kihh t'ang wu'feerr ni mou.. 5Dhighin mhi'shwal w'u pwoo'am ni mwopp, bhi m'ee gurum gyet nhighin w'u sh'in byitt laar kunn kihh pwoghokunn a gok. 6Kaarooh Jesu naah kihh dhen kih pee'saam, yakhal man rooh phigyet diy bhi nyi a kihhsheh, bhi nang phi nyi le, “Ghi kihh t'ang kad kakhamm mihngg?”
7Gu'shwal ni lapp nyi le, “Daah, baah a'n kihh gwooh p'ee dhen a'n dhighin dungg'am ni kadmihh a'm nyi tungg. Mihh a'n kaah ny'ak tihh ih taah diy dhighin a'm ni, bhi m'ee gwooh wurrungg mett wu'an kihh fyau ji lapp-arr a'n, harr taah dhighin a'm ni ky'een a'n.”
8A nyi seh bhi Jesu satt nyi le, “Yakhal ghi dharr! M'ang pee'saam keegha ghi dhel gha.” 9Abet bhi gwoh ni kakhamm, bhi m'ang pee'saam keeniy dhel. Bii mihhseh gyet a p'ar Puus Nookdyi, 10pee'mhinyi bhi Zhepp Yahuda mwopp kihh satt gu'shwal w'u kad kakhamm ni le, “Shinn a Puus Nookdyi, baah nyi dihhreh kihh W'aar mhi Musa tihh ghi m'ang pee'saam keegha mou.”
11Gwoh ni pring mwopp le, “A gwooh bar a'n satt a'n le a'n m'ang pee'saam keena a'n mwan nah 'y.” 12Bhi mwopp nang phi nyi le, “A wuyeh a gwooh satt gha le gha m'ang pee'saam ni gha dhel seh?”
13Baah gu'shwal w'u kad kakhamm ni man kooh kyed gwooh dyinn bar riy seh a weeh oh, p'ee baa dyinn Jesu khi mwaall shin dhel naar dw'uu gurum w'u dyinn mwopp nhighin.
14L'ang dyi lee bhi Jesu kad gwoh ni kihfur LuhNaan, bhi satt nyi le, “Ghi naah, mwasseh baa gha kakhamm; ghi nook shigbis, tapp'baa mee'bii w'u mett mihhseh waa kad gha dyi.” 15Bhi gwoh ni dhel dum kad Zhepp Yahuda mwopp bhi satt mwopp le a Jesu a gwooh dyinn bar riy.
Seen dhighin L'aa khi Naan
16Pee'rooh gyet Jesu kihh sh'in bii mihhse mwopp a p'ar Puus Nookdyi, bhi Zhepp Yahuda mwopp kihh ving'yit nyi pwetd. 17Bhi Jesu satt mwopp le, “Daa a kaah dhakk harr shishinn se, a kihhsheh bhi wu'an zag kaah dhakk.” 18Bii w'u Jesu satt seh l'e tihh Zhepp Yahuda mwopp sihkhitt dhen-en ru a kaah t'u nyi fyaatd. P'ee mwopp kihh satt le baah Jesu ni kihh tep a w'aar Puus Nookdyi kyekk mou, harr kihh peet Naan a pukhun; mihhseh kihh kamm le dhen shin a chiitt kihh Naan seh.
19Jesu satt mwopp le, “A satt a zeenn wunn, baah a'n L'aa ni kihh mak sh'in mee'bii sh'i kaah mhisan mou, a kihh sh'in a bii w'u naah Daa kihh sh'in kyekk. P'ee koohmeeh w'u Daa kihh sh'in, bhi a'n L'aa ni ih kihh sh'in a nyi zag. 20P'ee Daa kihh wall a'n L'aa ni, yakhal kihh kamm koohmeeh w'u kihh sh'in a'n; yakhal nyi p'ee kamm n'an bii w'u mett mihhse dyi mwopp a'n, tihh aa'pwoo wu diy. 21P'ee chiitt kaa Daa kihh yakhal kihh mwooh mih-mwarrap pihh seen mwopp se, bhi a'n L'aa ni zag ih kihh pihh seen gwooh en an kihh dh'om. 22P'ee baah Daa kihh shwandyeell m'ee gurum mou, pihh shwandyeell a sarr nah L'aa ni; 23tihh koohweeh pihhdhess di a'n L'aa ni, mwoorr kaarooh mwopp kihh pihhdhess Daa seh zag. Gwooh baah pihhdhess a'n L'aa ni mou, bhi baah nyi p'ee pihhdhess Daa w'u lop a'n mou.
24“Ih satt a zeenn wunn, koohweeh w'u kihh klihng pwoo keena, yakhal kihh pihhzeenn gwooh lop a'n, bhi nyi kihh seen w'u harr ngaa-ngaa. Baah m'ee tepdyeell kaah gwooh kihhsheh ni mou, p'ee gwoh ni baa mett koghob mhi muutt taah k'aa koghob mhi seen. 25A satt a zeenn wunn, puus kihh ji, harr baa ji wu-wull mwasseh maah, w'u mwooh mih-mwarrap p'ee klihng dhekheh L'aa kihh Naan, bhi mwooh mwopp klihng dhekheh nyi ni p'ee kad seen. 26P'ee kaarooh Daa kihh seen dhighin shin se, bhi l'e tihh a'n L'aa ni kwed kihh seen dhighin san zag. 27Yakhal pihh pee a'n tihh ih shwandyeell diy, p'ee a a'n a L'aa khi Gurum.
28“Tapp bii mihhse diy aa'pwoo wu mou, p'ee puus kihh ji w'u kapp mwooh mih-mwarrap p'ee klihng dhekheh L'aa khi Naan, 29bhi mwopp p'ee yakhal. Mwooh gyet mwopp sh'in wu'rett p'ee yakhal a tihh mwopp tong diy kihh seen; mwooh gyet mwopp sh'in wu'bis p'ee yakhal a tihh mwopp tepdyeell diy mwopp. 30Baah ih kihh mak sh'in mee'bii sh'i kaah mhisan mou; ih kihh shwandyeell a kaa Naan kihh satt a'n se, a kihhsheh bhi shwandyeell keena a zeenn, p'ee baah ih kihh sh'in a bii w'u a'n ih kihh dh'om kyekk mou, a bii w'u gwooh lop a'n kihh dh'om zag.
Tupp'pwoo kaah Jesu
31“Mihh a a'n ih kihh tupp'pwoo kaah san, bhi tupp'pwoo keena ni kihh koghob mou. 32M'ee gurum dyi nhighin w'u a nyi kihh tupp'pwoo kaah nah, dhangg ih man ih le tupp'pwoo khinyi kaah nah a zeenn.
33“Deh wu shenn l'op Yohanna Gu-Baptisma bhi tupp'pwoo kaah zeenn wunn. 34Baah wai ih kihh dharr a kaah tupp'pwoo w'u gurum mwopp kihh sh'in kaah nah mou; ih satt mihhse wunn a tihh wu kad bh'am diy. 35Yohanna gyet a peebhangg w'u kihh bhanggpee. Harr gyet wu dhoghol dh'om klihng shangg peebhangg khinyi p'ee m'ee t'eer mwopp lee.
36“T'o, wu'an kihh tupp'pwoo w'u mett mhi Yohanna. P'ee v'ur dhakk w'u Daa pihh a'n p'ee khibhid, w'u a dhakk w'u a'n kaah sh'in mwopp se, a mwopp sh'i kaah ruh kihh tupp'pwoo kaah nah le a nyi lop a'n. 37Daa w'u lop a'n kihh tupp'pwoo kaah nah zag sh'i kaah niy. Baah wu khi cham klihng dhekheh nyi kooh wu naah shik nyi mou, 38yakhal baah pwoo khinyi dhighin phitukhup wu mou, p'ee baah wu pihhzeenn gwooh lop a'n ni mou. 39Wu kihh blihp Ran'Wubhangg mwopp nett-nett, p'ee wu kihh ryeeh seh wu le wunn p'ee kad seen w'u harr ngaa-ngaa a dhighin mwopp. Dhangg a Ran'Wubhangg ni mwopp tupp'pwoo kaah nah, 40weett kihhsheh bhi baah wu dh'om ji kihpee na tihh wu kad seen diy mou.
41“Baah ih kihh lapp a nhighilpee mhi zhepp gurum mwopp mou. 42Dhangg ih man wunn; ih man ih le baah wunn kihh wall w'u a mhi Naan dhighin phitukhup wu mou. 43Ih ji a dhighin shumm Daa, dhangg baah wu lapp a'n mou; dhangg menguh mihh ji a dhighin shumm mhi shin, bhi wunn p'ee lapp a nyi. 44Diy shitt a rangg bhi wu pihhzeenn kadmihh wu kihh lyap a saammpee mhi shag, baah a mhi Naan Wu'kihmeh mou ayeh?
45“Tapp wu kihh ryeeh seh wu le a a'n p'ee dum kihh waamatt wuh kihkyeen Daa mou. Gu dum kihh waamatt wuh nhighin, nyi a Musa w'u wu kihh khig shuk a sh'i nyi seh. 46Kaddyinn wu pihhzeenn Musa ni, ai bhi dyinn wunn p'ee pihhzeenn a'n, p'ee gyet Musa ni sh'in r'an kaah nah. 47Dhangg baah w'u pihhzeenn bii w'u gyet Musa ni ran mou, dheeh diy sh'in a rangg bhi w'u pihhzeenn pwoo keena ayeh?”
Àwon tá yàn lọ́wọ́lọ́wọ́ báyìí:
Yohanna 5: Chakfem
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2022 Luke Initiative for Scripture Translation