Yohanna 6
6
Jesu so kihh gurum jig paad
(Mat 14:13-21; Mar 6:30-44; Luk 9:0-17)
1Yemm dyi lee bhi Jesu shan taah k'aa yit am'kur Galili, (am'kur w'u mwopp kihh peet Am'kur Tiberias zag.) 2Dw'uu gurum dhess mwopp tuud langdang nyi, p'ee gyet mwopp naah v'ur bii'aapwoo w'u mwan sh'in kaah mhi'shwal mwopp. 3Bhi Jesu k'aa dum tong sh'i m'ee bwumm kihshag kihh zheppkamm keeniy mwopp. 4Puus Kwughur p'an kihh Mettkaah khi Zhepp Yahuda gyet wull kuss.
5Kaarooh Jesu eep yit niy naah kihpee v'ur dw'uu gurum mwopp kihh ja diy kihpee niy, bhi nang phi Filip le, “Munn p'ee kad biisoh a nihyeh mu seett tihh gurum mhize mwopp so ayeh?” 6Jesu satt kihhsheh a tihh kamm Filip diy, p'ee Jesu khi t'en man bii w'u riy p'ee sh'in nyi.
7Filip lapp nyi le, “Kooh a gutt mhi shaghal wittpuus tarr peemeh maah p'ee mak mee'bii gurum ni mwopp mou!”
8M'ee Laa'kamm khi Jesu ni w'u shumm nyi a Andrawus, em'nhikhin Siman Bitrus, satt Jesu ni le, 9“M'ee l'aa se kihh gihkhill gutt aas baaliy#6:9 Baaliy a m'ee dhebhenn w'u pann lappshag kihh alkama, dhangg baah wu'nyi krhim wull alkama mou. Nyi gyet a dhebhenn w'u mhipyaah mwopp kihh sh'in gutt muudruh dyishig. paad, kihh dyeen sherep vel, dhangg mwopp p'ee mak a mihyeh dw'uu gurum mhize ni mwopp?”
10Bhi Jesu satt zheppkamm keeniy ni mwopp le, “Wu l'e tihh gurum ni mwopp kwangg yill.” Gyet shit dhess nhighin pee w'u mwopp diy, bhi gurum ni mwopp kwangg yill. Daass w'u gyet dhighin dw'uu gurum ni mwopp wull kaa gurum jig paad (5000) se. 11Jesu kok gihkhill gutt ni sarr niy, bhi plangg Naan, bhi shap gutt ni gurum ni w'u mwopp kihh peetong seh, mwoorr kihh bii w'u koohweeh kihh dh'om. . Yakhal sh'in a kihhsheh kihh sherep ni zag.
12Kaarooh mwopp so abbhal bhi Jesu satt zheppkamm keeniy mwopp le, “Wu chakk kakhar bott gutt ni mwopp tapp mee'bii diy dheeh ky'em mou.” 13Bhi mwopp chakk harr mwopp gam shikkah kaghapaad baa'vel kihh v'ur bott gutt w'u mwan mak gurum dhighin gihkhill gutt w'u dyinn paad seh.
14Bwoonrooh gurum ni mwopp naah bii'aapwoo w'u Jesu sh'in seh, bhi mwopp kihh satt shag le, “A zeenn'zeenn a gwoh mhize ni a Gu-wanggshiiy w'u gyet mwopp le nyi p'ee ji dhighin yill shi.” 15Kaarooh Jesu man rooh gurum mwopp kihh t'ang ji y'aa riy kih bhall tihh mwopp bwakhat miskakhamm diy riy, bhi byaah dhel niy dyi mhishin dum kih m'ee dheng zhwakk.
Jesu mw'aan kihdab am'kur
(Mat 14:22-33; Mar 6:45-52)
16Kaarooh kan'sihkhin sh'in bhi zheppkamm khi Jesu ni mwopp sam dum pwoo am'kur. 17Mwopp dhel tong dhighin kong'am bhi mwopp y'aa tungg kong'am p'ee shan taah k'aa koghob Kafarnahum. Mwopp kaah tungg kong'am harr pee rab dhangg baah Jesu khi ji wull kihpee mwopp diy mou. 18Mwopp nhighin bhi am'kur ni y'aa tabbhal lhiwaa m'ee vivirr w'u y'aa viipp pee. 19Kaarooh mwopp tungg kong'am ni wull kaa kilomita paad kooh peemeh se bhi mwopp naah Jesu kihh mw'aan ji kihdab am'kur ni p'ee taah kihpee ru diy, bhi nhikhin'teghem shwat mwopp pwetd. 20Dhangg Jesu satt mwopp le, “A a'n; tapp lukhut t'u wunn mou.” 21Bhi mwopp lapp nyi sh'i rettyit lhidhel dhighin kong'am ni. Abet bhi kong'am ni wull yill w'u dyinn mwopp kihh dum diy seh.
22Kih dhi'dhaar ni bhi dw'uu gurum w'u den wu'mwopp t'eer yit'am wu'zeh, mwopp kakkder rooh den a kong'am kihmeh kyekk dheeh koghob w'u runn diy; yakhal baah den Jesu dhel dhighin kong'am w'u zheppkamm khinyi mwopp dhel diy mou, mwopp den dhel a mhishut. 23Kaarooh mwopp nhighin, bhi m'ee kong'am mwopp tong koghob Tiberias taah wull pwoo'kihng, kuss kihh pee w'u den gurum mwopp so gutt diy bwoonrooh Jesu pihh plangg kaah seh. 24Dhangg kaarooh dw'uu gurum ni mwopp kad Jesu nhighin mou, yakhal zheppkamm khinyi mwopp nhighin mou zag, bhi mwopp dhel dhighin kong'am mwopp, mwopp taah duam Kafarnahum p'ee lyap Jesu.
Jesu a gutt mhi seen
25Kaarooh gurum ni mwopp kad Jesu takhann yit am'kur wu'zeh bhi mwopp nang phi nyi le, “Gwoohyon, ghi taah se a phiranggyeh?”
26Jesu lapp mwopp le, “A satt a zeenn wunn, baah wunn phi lyap a'n a p'ee bii'aapwoo w'u den wu naah seh mou; a p'ee gutt w'u den wu so wu abbhal dyishig seh. 27Tapp wu kihh nyak a phishumm biisoh w'u kihh mak ky'em se mou; wu nyak a p'ee biisoh w'u kihh tong veng harr l'e tihh wu kad seen w'u harr ngaa-ngaa w'u a biisoh w'u an L'aa khi Gurum p'ee pihh nyi wunn. P'ee Daah Naan shud angg keeniy a kaah L'aa ni.”
28Bhi gurum ni mwopp nang phi nyi le, “A mihyeh a bii w'u munn p'ee kihh sh'in tihh mu sh'in dhakk w'u Naan kihh dh'om tihh mu sh'in ayeh?”
29Jesu lapp mwopp le, “A mihhse a dhakk kihh Naan: wu pihhzeenn gwooh Naan ni lop.”
30Bhi mwopp nang phi nyi le, “A m'ee bii'aapwoo wu'ranggyeh w'u gha p'ee sh'in nyi munn mu naah tihh mu pihhzeenn diy gha? A mihyeh a bii w'u gha p'ee sh'in nyi? 31Puup mu w'u gyetshak gyet mwopp so manna dhighin dh'em, kaa nyi a w'u rih-ran se le, ‘Musa gyet pihh biisoh w'u put kih dhengNaan mwopp, mwopp so.’#Put 16:4; Neh 9:15; KKN 78:24-25 ”
32Jesu satt mwopp le, “A satt a zeenn wunn, baah gyet a Musa pihh biisoh w'u put kih dhengg wunn mou; a Daa a g'u pihh gutt w'u a zeenn, gutt w'u tong kih dhengNaan sam diy wunn. 33P'ee gutt khi Naan a gwooh tong kih dhengNaan sam diy; a nyi kihh pihh seen yill ni.”
34Bhi mwopp satt nyi le, “Puup mu, ghi kihh pihh gutt mhize munn chitt.”
35Bhi Jesu satt mwopp le, “A a'n a gutt mhi seen, gwooh mihh ji kihpee na diy bhi baah kussum p'ee cham laah nyi mou; yakhal gwooh pihhzeenn a'n bhi baah a'm p'ee cham t'u nyi mou. 36Dhangg nyi a kaa den ih satt wunn seh, wu naah a'n, dhangg baah wu pihhzeenn a'n mou. 37Kwett mwooh Daa pihh mwopp a'n bhi mwopp p'ee ja kihpee na diy. Yakhal koohweeh w'u ji kihpee na diy bhi baah a'n p'ee cham shen nyi lhidhel mou, kooh lee. 38Baah ih tong kih dhengNaan ih sam diy p'ee sh'in a p'an mhi kaah nah mou; ih samm p'ee sh'in a p'an mhi gwooh lop a'n. 39A mihhse a p'an khi gwooh lop an: tapp ih yet kooh kihmeh dhighin gurum w'u pihh mwopp an la'kham mou; kop kihhsheh bhi a'n p'ee yakhal kihh mwopp p'ar puus kyess khi yill ni. 40P'ee p'an khi Daa a tihh koohweeh w'u naah a'n L'aa ni yakhal pihhzeenn a'n, bhi gwoh ni p'ee kad seen w'u harr ngaa-ngaa, yakhal a'n p'ee yakhal kihh nyi p'ar puus kyess khi yill ni.”
41Pee'mhinyi bhi Zhepp Yahuda mwopp y'aa rukhup-bhellepp kaah Jesu, pee'rooh satt le a riy a gutt w'u tong kih dhengNaan sam diy. 42Mwopp kihh satt le, “A gwoh mhize a Jesu em Yusufu w'u mu man puup khinyi kihhsheh kihh nhikhin khinyi mwopp mou aa'? Dhangg diy shitt a rangg bhi satt le riy tong a kih dhengNaan sam diy ayeh?”
43Jesu lapp mwopp le, “W'u nook w'u rukhup-bhellepp naar shag. 44Baah m'ee gurum kihh mak ji kihpee na diy kad baah a Daa w'u lop a'n del nyi lhi'ji mou, a kihhsheh bhi a'n p'ee yakhal kihh nyi p'ar puus kyess khi yill ni. 45Nyi a rih-ran dhighin r'an khi mhi-wanggshiiy mwopp le, ‘A Naan p'ee sh'in kamm mwopp weett.’#Ish 54:13 Koohweeh w'u klihng pwoo khi Daa, yakhal lapp kamm phi nyi, bhi nyi p'ee ji kihpee na diy. 46Baah m'ee gurum cham naah Daa ni mou, a a'n w'u ih tong kihpee nyi ih sam diy kyekk ih naah nyi. 47Ih satt a zeenn wunn, gwooh pihhzeenn a'n bhi nyi kihh seen w'u harr ngaa-ngaa. 48A a'n a gutt mhi seen. 49Puup wu w'u gyetshak gyet mwopp so manna dhighin dh'em, weett kihhsheh bhi gyet mwopp mwarrap. 50A a'n w'u wu kihh naah se a gutt w'u tong kih dhengNaan sam diy; gutt w'u gurum mihh so bhi baah nyi p'ee cham m'uut mou. 51A a'n a gutt wu'kihhseen w'u tong kih dhengNaan sam diy. Koohweeh w'u so gutt mhize ni, bhi nyi p'ee kad seen w'u harr ngaa-ngaa. Gutt w'u a'n p'ee pihh nyi tihh yill ni kad seen diy a lwaa shoopsan.”
52Bhi Zhepp Yahuda mwopp y'aa kakhan-bhellepp kihh shag le, “Diy shitt a rangg bhi gwoh mhize pihh lwaa shin munn mu so ayeh?”
53Jesu satt mwopp le, “A satt a zeenn wunn, mihh dheng'pee wu so a lwaa na L'aa khi Gurum, yakhal w'u shwaa teghem nah mou, bhi baah wunn kihh seen dhighin shuk mou. 54Koohweeh w'u mihh so lwaa na yakhal shwaa teghem na bhi nyi kihh seen w'u harr ngaa-ngaa, bhi a'n p'ee yakhal kihh nyi p'ar puus kyess khi yill ni. 55P'ee lwaa na a biisoh wu'dihhreh pwetd, yakhal teghem nah a am'shwaa wu'dihhreh pwetd. 56Koohweeh w'u mihh so lwaa na yakhal shwaa teghem nah bhi nyi p'ee tong dhighin a'n, yakhal wu'an dhighin nyi. 57Kaarooh Daa Wu'kihhseen lop a'n yakhal a'n kihh seen a dhighin nyi se, bhi gwooh kihh so a lwaa na p'ee kwed khi seen dhighin a'n zag. 58A mihhse a gutt w'u tong kih dhengNaan sam diy. Mhishak wu gyet mwopp so manna, weett kihhsheh gyet mwopp mwarrap. Gwooh mihh so a gutt mhize ni bhi nyi p'ee kwed kihh seen harr ngaa-ngaa.” 59Jesu gyet satt bii mihhse kaarooh nyi kamm dhighin Luh'kang Kafarnahum.
Dhess dhighin mhi-dumdang Jesu mwopp baa'bwoonn
60Kaarooh mhi-dumdang nyi mwopp klihng kamm w'u Jesu sh'in seh, bhi dhess dhighin mwopp satt le, “Mihhse a kamm w'u shi-shwal, a weeh p'ee mak lapp nyi?” 61Kaarooh Jesu man dhighin phitukhup niy le dhess dhighin mhi-dumdang niy mwopp phi rukhup-bhellepp kaah kamm w'u ri sh'in seh, bhi nang phi mwopp le, “Kamm ni dheeh wunn a bii sakshiiy kan e'h? 62Dheeh kad p'ar mihh wu naah L'aa khi Gurum baa'kaa dum kihpee wu gyet nyi diy ee? 63A Riin a g'u pihh seen, baah shoopshik kihh m'ee kyeenn mou. Pwoo mihhse w'u ih satt wunn se mwopp a Riin, yakhal mwopp a seen zag. 64Weett kihhsheh bhi baah pakk wuh pihhzeenn mou.” Jesu satt kihhsheh p'ee a sh'ee bhi shep man mwooh baah mwopp pihhzeenn mou, yakhal man gwooh p'ee p'ar seett kihh riy. 65Jesu waa satt dyi mwopp le, “A nyi a bii w'u le tihh dyinn ih satt wunn ih le baah m'ee gurum kihh mak ji kihpee na diy kad baah a Daa le tihh ji mou.”
66P'ee bii w'u Jesu satt seh, bhi dhess dhighin mhi-dumdang nyi mwopp b'aa bwoonn; baah mwopp kihh mw'aan dyi dang nyi mou. 67Bhi Jesu nang phi zheppkamm keeniy w'u kaghapaad baa'vel se le, “Wu'wunn wu kihh t'ang reen wuh zag mihngg?”
68Siman Bitrus lapp nyi le, “Gwoohyon, munn p'ee dum a kihpee wuyeh diy? A gha kyekk kihh pwoo mhi seen w'u harr ngaa-ngaa. 69Mu pihhzeenn yakhal mu man mu le a gha a Gwoohbhangg khi Naan.” 70Jesu satt mwopp le, “A a'n ih blihp wunn w'u kaghapaad baa'vel se mou aa'? Weett kihhsheh bhi kihmeh dhighin wunn a gag Shetan.” 71(Jesu satt pwoo mihhse a kaah Yahuda, Em Siman Iskaryoti. P'ee kooh bhalang phirooh gyet nyi a kihmeh dhighin mwooh kaghapaad baa'vel ni, weett kihhsheh bhi a nyi gyet p'ee seett kihh Jesu.)
Àwon tá yàn lọ́wọ́lọ́wọ́ báyìí:
Yohanna 6: Chakfem
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2022 Luke Initiative for Scripture Translation