मत्ती 3
3
बप्तिस्मा तेर्केन यूहन्नागी सुङ ख्येप्टा क्याहप्क्यो
(मर्क १:१-८; लूक ३:१-१८; यूह १:१९-२८)
1ओहजे काहङला बप्तिस्मा तेर्केन यूहन्नागी यहूदीया लुहङबागी रिह काम्बुया़ला काहल्दी मिहया़ला दि ल़ेहमु म़ेदी सुङ ख्येप्टा क्याहप्च्ये छ़ूसीन, 2“सेमगी स्या़बा पेहती तिहक्पा पाङदोङ च्यिबेमाना किन्ज्योगी जाम्बुलीङला क्याहल्बु जेकेन्गी ती़हजी लेप्च्ये पेह सिहन्दी येह” म़ेदी सुङ ख्येप्टा क्याहप्सीन।#मत्ती ४:१७; मर्क १:१५ 3ता़ह यशैया लुहङतेम्बागीॱआङ ओ़ह यूहन्नागी तेहन्दाला तोहङलेराङ दि ल़ेहमु म़ेदी सुङ नाङदी येहकें–
“ङ्यिहन्दोङ, रिह-काम्बुला मेहन्दा च्यी़गी क़े छ्यिम्बुज्यी तेन्दी दि ल़ेहमु माउ दु,
चो़वो छ्येवा फेप नाङगेन्गी फेप्लाहम ठाबे पेह,
ओहले मिहरोगी फेप्लाहमया़ थेका जे़दोङ।” #यशै ४०:३
4यूहन्नागी ङाबुङती#३:४ ङाबुङ : माक्योदी नेपालीला “ऊँट” यिहम्बा। २ राज १:८ पाहलकी था़क्योगी काप्च्या केहन्गो येहकें, क्येपाला को़बाकी कारा च्यिङगो येहकें। तोगी छापला पे़बे दाङ तिप-प्राहङ साहउ येहकें। 5यरूशलेम क्याहसा, यहूदीया लुहङबागी युहल थाम्ज्यीराङ ओहले यर्दन चाङबुगी साहर-सुहरती दे-खामकी मिह थाम्ज्यी यूहन्नासाला ओहङसीन, 6ओहले राहङ-राहङगी तिहक्पा स्या़बा डुप्केनया़ला यूहन्नागी यर्दन चाङबुला बप्तिस्मा तेर्सीन।
7यिहॱनाङ फरिसी दाङ सदुकी#३:७ “फरिसीया़” दाङ “सदुकीया़” माक्योदी ना ङ्यी़गी छ्य़े-ठिम ताङगेन यहूदी मिह-माहङ यिहम्बा। दि मिहया़गी तेहन्दाला ङोह स्य़ेज्येला केच्या साम्बाया़की कार्छ्याला ज़ी़-नाङदोङ। मत्ती १२:३४; २३:३३ छो़बागी मिह माहङबुराङ बप्तिस्मा लेहन्ज्येला यूहन्नासाला ओहङग्यो थोङदी यूहन्नागी खुङया़ला मासीन, “ए प्रुहलगी छार्क्यीनया़, किन्ज्योगी ताङ नाङगेन्गी ठिमलेगी थार ख़ूएँ म़ेदी ख्याया़ला सुगी लोप्पा? 8ख्याया़ राहङ-राहङगी सेमगी स्या़बा पेहती तिहक्पा पाङदी राहङगी सेम किन्ज्यो ङो़ले लो़हक्यो यिहन्सीमानानी ख्याया़ ओ़हला ते़बेगी डोलु-तेहलु पेहतोङ। 9ङ्यिहनी अब्राहामगी छार्क्यीन यिहन म़ेदी राहङ नाहङदुङ माहमा। च्यिबेमाना ङाह ख्याया़ला माएँ, किन्ज्योगी दि तोहया़लेगीॱआङ अब्राहामकी छार्क्यीन ज़ो थुप्कें। #यूह ८:३३ 10ताहन्दाॱराङ तारी तोहङबो रिङला क्याहप सिहन्दी येह। ओ़ह सोङबे सेदो मे़हयाहगेन्गी तोहङबो का़ह येहकेन्दी तुप्ती मेहला क्युर्च्ये येह। #मत्ती ७:१९
11तेहम्बाराङ, ख्याया़ राहङ-राहङगी सेमगी स्या़बा पेहती ता़ह तिहक्पा पाङज्येला ठाबे काहल्ग्यो यिहन म़ेदी तेन्ज्येला ङाह ख्याया़ला छ्युगी बप्तिस्मा तेर्को येह, यिहॱनाङ ङाह म़ेदी तिङले फेप नाङगेन्दीगी ख्याया़ला नाम्पार-ताहक्पा थु दाङ मेहगी बप्तिस्मा नाङज्ये येह। मिहरोनी ङाह म़ेदी ज्यिबुराङ ओङ छ्यिम्बु येहबा। ङाहनी मिहरोगी स्याहप्चेन थो़ज्येलाॱआङ सी़हज्ये म़ेह। 12डु टाप्च्येला मिहरोगी छ्या़ला लोमा नोम-सिहन्दी येह। डु टाप्ती डुदी चाहङला ज़्या़ नाङज्ये येह, पोलादी नाहमॱआङ मिहस्यीएँगी मेहला सा नाङज्ये येह” म़ेदी यूहन्नागी फरिसी दाङ सदुकी छो़बागी मिहया़ला सुङ नाङसीन।
येशूगी बप्तिस्मा नोम्ग्यो
(मर्क १:९-११; लूक ३:२१-२२; यूह १:३२-३४)
13ओहजे काहङला येशू गालील साने़लेगी यर्दन चाङबुला यूहन्नासाला बप्तिस्मा नोम्ज्येला फेप नाङसीन। 14यिहॱनाङ यूहन्नागी दि ल़ेहमु म़ेदी येशूला का़ज्ये छोल्सीन, “ङाहगीनी मिहम्बा, राहङगी गा ङाहला बप्तिस्मा नाङ कोहज्ये स़ेह। यिहॱनाङ ता़ह राहङ गा ङाहसाला फेप नाङसीन!” म़ेदी मासीन। 15यिहॱनाङ येशूगी खोला सुङ नाङसीन, “ताहन्दागी ती़हजीला दि रोहवाॱराङ डोज्यु, किन्ज्योगी थुला ठुङग्यो ल़ेहमुराङ तेहन्दा डुप च्य़ूज्येला ओहराङगी नाहरे दि ल़ेहमुराङ पेह कोहकें।” ओहले येशूगी दि स्याहल ङ्यिहन्दी यूहन्नागी येशूला बप्तिस्मा तेर्सीन।
16बप्तिस्मा नोम छार फान्ज्यो येशू छ्युलेगी थेन फेप्सीन। ओ़हजेलाराङ स्यिहङगाम खा फ़ेसीन, ओहले येशूगी किन्ज्योगी थु दुङगुकुर ल़ेहमुराङ जेती राहङ थो़ला फेप नाङग्यो ज़ी़ नाङसीन। 17ओ़हजेलाराङ स्यिहङगामले, “दि ङाहगी च्याहम्बु पेहक्योगी स़ेबु यिहन, खो ङ्याम्बु ङाह ज्यिबुराङ सेम काहसो येह” म़ेदी माएँ सुङ-क़े च्यी़ थ़ेसीन। #उत २२:२; भज २:७; यशै ४२:१; मत्ती १२:१८; १७:५; मर्क १:११; लूक ९:३५
Àwon tá yàn lọ́wọ́lọ́wọ́ báyìí:
मत्ती 3: HYLM
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2023 (Active), Wycliffe Bible Translators, Inc. All rights reserved.