Kèʼlo 3
3
Mo wír mbìyi tavin kitú fo Nyùy
1Á bèy, fo mvə̀m vifa ve Nyùy Tàr, wun woo Nyùy‑iì bomen, yò nèn fìír, e shaà vifá vidzə̀m. Yì lò, e dzə̀r e wiíy jii, «Nyùy kù yòʼ‑oò lo shàʼnín rú ji lá vèn yòʼ kfə̀r kicí kímóʼ kí fó kiboo fen a?»
2Wiíy bìnèr sho jii, «A dzə̀ vèr kfə̀r vicí veé kiboo fen vidzə̀m. 3Yii bèy, Nyùy‑iì lo sùúy ji lá vèr yòʼ kfə̀r á kicí ke kí tíy e ntìntìn kiboò. Vèr wáa yen saa fóo kùm. A vèr mùm, bo vèr kpùkír a ne.»
4Yò nèn sùúy e wiíy jii, «Bó vèn yòʼ yíi kpu gheéy. 5Nyùy‑iì yoŋ bèy, bìʼ fo wù‑uù kiìn ji a vèn kfə̀r, é vifií vén ví mvəʼəm, é vèn wáa dzə moo wun woo Nyùy, a kiíy jeéyjeéy fó kinyò ke juŋ ki wùn à ke bi kí.»
6Wiíy leéy kicí kiy, e yèn, a kí bóŋ féyì fó kfər, e kfə̀n yèn, a kí kiʼ kijuujùŋ, a kòŋ feyì fóo kfər, a ker vifií. Wù nèn kòy, e kfə̀r, e kfə̀n fò lúm və, wù kfə́r sá. 7Kù mo áwune kfərin bey, vifií vév ví nen mvə̀ʼkìr, áwune yén ji á dzə̀ á kinshóʼ, e nèn kèŋ vav se kici ké *fig, e baàné, e fèr atéʼ vév shó.
8Lòo meé e kimbòrndzə, lùmèn və̀y wùn wiíy yú nsən se Nyùy Tàr#3.8: Nyùy Tàr: Lám Hibrùu kér fèn jii: Nyùy Tàr, wun woo Nyùy, kfə̀n kér sa bèy e virə̀ʼ vee 3.9, 13, 14, 21, 22, 23., a sí giv e mvə̀m kiboò, e nèn nyèŋ, e nə̀ə́, e lìr fo Nyùy Tǎr si, e mvə̀m vicì veé kiboo fey. 9Yii bèy, Nyùy Tàr#3.9: Nyùy Tàr: Leéy: 3.8. yòŋ lumèn, e dzə̀r shó jii, «À bèé?»
10Wù bìnèr jii, «M kì yù, a nsən sé si giv e mvə̀m kiboò, m nén a fàn, e nyèŋ, e lìr, bìʼ fo m kì dzəə̀n kinshóʼ.»
11 Nyùy Tàr nèn dzə̀r jii, «À ghàn é le, bóo kiíy ji à dzə̀ kinshóʼ? À kfə̀r ne kicí ke mò‑oò shaʼnin ji lá à yòʼ kfə̀r kiy à?»
12Lùmèn bìnèr jii, «Kì fò wiíy wo wò‑oò foon ji vèr wun wáa dzə, é bo m kfə́r.»
13 Nyùy Tàr # 3.13: Nyùy Tàr: Leéy: 3.8. dzə́r e wiíy jii, «À yèe le, bóo lovtí bèn?»
Wù bìnèr jii, «Kì bòʼtí yó mo, é bo m kfə́r.»
Ŋgeʼ ye Nyùy màʼàn é bǎm jay wìr
14 Nyùy Tàr # 3.14: Nyùy Tàr: Leéy: 3.8. nèn sùúy e yò jii:
«Mo à kì boʼtin wiíy,
fo vifa ve ŋeʼèn ví, veé kwaʼ wùn à veé laʼ vi,
m shòv ne wò.
Kèʼ fo lán, à sí wìy a son sonén a dzə̀ e bvə́me,
é viyíkìr vé vi wáa dzə nsay nsay,
e dù, e meé mo à wíy kpu.
15M yíi màʼ vibàn e vèn wiíy nsàn,
e kfə̀n màʼ e rám yée, à yé wiíyi.
Wìr woo wun ram wíy bvə́ʼ kitú ké,
áà wìy tè wun fo nsən kiwuù.»#3.15: Wìr woo wun ram wíy bvə́ʼ kitú ké, áà wìy tè wun fo nsən kiwuù; Kìn jii: Wìr yén wò, é wù bvə́ʼ kitú ké. À yén wun, áà té fó nsən kiwuù.
16Fo ké wiíy ki, Nyùy suúy jii:
«M wíy dzə̀sì ŋgeʼ yè e ŋàáŋàŋén é ghan se à dzəə̀n e bvə́me,
e dzə̀sì nyár yé e ghan se à dzəə,
aà kù wíy a baŋrí a dzə̀ lum wò,
a kù wíy a ker wun sáʼ, áà wáa yu fo fo.»
17Fo lùmèn kiliŋ, wù suúy jii:
«Mo à yuun ji wiiy wò,
e kfə̀r kicí ke mò‑oò shaʼnin e wò ji lá à yòʼ wìy kfə̀r,
m shòv ne nsay bìʼ wò.
Dù meé mo à wíy kpu, à kù wíy a sòrkìr sòrkìn,
e bó a koóy kifá fo nsay, a yi.
18Vikwiíy vé njoŋ vi wùn à kivi wíy a fəə e nsay,
aà kù wíy a lùŋ a dzə̀ fó vifa ve à lìmèn é nsay.
19À wíy a lìm, a ndzə̀ʼnìn, e bó a koóy kifá ké a yi.
Kù bey, e meé e ghan se à wíy kpu.
Mo mò‑oò bomen wò e nsay,
aà dzə̀ nsay,
à kù wíy kfən e nsay.»
20Adam nèn lò, e shù yír wiiy və ji Efa#3.20: Efa: E Lǎm Hibru, yír rə́ne koó fo kisuŋnìn moo jí yee «luŋ.» Yír yee shooyi nén a dzə moo «Yeèlùŋ.», bìʼ fo wìr msòŋ e dzə̀m kù‑uù wíy ràm a dzə̀ fo wun. 21E ghan sin, Nyùy Tàr#3.21: Nyùy Tàr: Leéy: 3.8. nèn fèr ndzə̀y e jùv nyàm, e màʼ e Adam wùn wiiy və́ wùn.
Nyùy júm Adam wùn Efa fo kiboo keé Eden
22Á bèy, Nyùy Tàr#3.22: Nyùy Tàr: Leéy: 3.8. nèn lò sùŋnín jii, «Yén ri, wìr sì moo vèsən, kiiy jeéyjeéy fó kinyò ke juŋ ki wùn à ke bi kí. Lá á yòʼ màʼtì, é wù koy kicí ke kí fó dzəʼə̀m, e kfə̀r, e wìy shaàrì.» 23Nyùy Tàr#3.23: Nyùy Tàr: Leéy: 3.8. nèn jùm wun fo kiboo keé Eden ji wù du, a lìm nsay ye vé‑eè liìn, e bòm wun sho. 24Wù jùm, e lèm vifá veé yuv ve ghaʼtín ví#3.24: vifá veé yuv ve ghaʼtín ví: Leéy mbìv Ji se Naarìn sí. é mbìv kiboò yee fo shùy yii tó ji lá wìr yòʼ shaà, e dù fo kicí ke kí fó dzəʼə̀m ki dzəə̀n. Wù kfən lèm nyùy ye yì‑iì bavkìr moo kiliímé ke və̀y, binkìr mbìv sidzə̀m, ji yì wáa kìŋsìn sa.
Àwon tá yàn lọ́wọ́lọ́wọ́ báyìí:
Kèʼlo 3: LNB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022 CABTAL