Joon 4
4
Jesus wùn wiíy woó Samaria
1Wír veé mbìv *Farasii nèn yù sá ji Jesus sí kooy aŋgaà və́ ŋgoo, wáy e ndzəv, aá kuʼ shaa a vé Joon. 2A bó yòʼ fə̀m‑eè wáy Jesus wíri é ndzəv, kù‑uù wáy wón və́ lìm cáʼcáʼ. 3Jesus yú ji leŋ woo shooyi dù ne, e mèé a fo wír vìyi, wù nèn lò fo wír veé Judàá mbìv wòŋ foo fèy, a kfən e mbìv Galeli. 4A wù kù‑uù yíi shaà dzə́ə fó mbìv wòŋ yee *Samaria.
5Wù lòo dù, e mèé e mvə̀mlaʼ yeé Samaria yìmòʼ, aá yoŋ ji Sikar, a yì dzə̀ é ghaa sum wo Jakov woo tàr à ràm yeé Isray‑iì foon e wan və woo Joosev. 6Jesus wáa meé fo, a sì e ntìntìn shùy, a ndzə́v ye Jakov‑iì tuŋené dzə̀ fó, wù nèn dzə̀ʼə̀m e ghaŋ wo, bìʼ fo wù‑uù ghanen ne, e dòr.
7Wiíy woó Samaria foo fèy wùmòʼ nèn wìy ji wun tú mendzə́v, Jesus lón jii, «Ku fò mo mendzə́v, é m nó.» 8A wù kì dzə́ fo bèy, a wón və́ lìme dú ne ji á yún a vifá ve yi fo mvə̀mlaʼ. 9Wiíy və̀y dzə́r e Jesus jii, «À dzə́ wír woó Juda, a m dzə̀ kém woó *Samaria, aà kfə̀n lón mendzə́v fo mò móo le?» A wù suuy bèy, bìʼ fo wír veé Judàa kù‑uù nyáŋsi veé Samaria nyáŋsín. 10Jesus bìnèr jii, «Aà bèn kì fómo wo Nyùy taʼ, e fo wò, e kfə̀n kìíy mo wìr wo wù lón mendzə́v fo wò və̀n dzəə̀n, bo kì yíi lon wò fo ŋgaàŋ, é wù fó wò mendzə́v me mè léŋ ghán sidzə̀m.» 11Wiíy woo shooy nèn lò kfə́, a dzər jii, «Taàtá, à yíi lì mendzə́v me mè léŋ mee shooy fo feé, a bó à yòʼ kér kifá kée ser sho, a bií kfə̀n shoò é ŋàŋ? 12À shaà tàr wor Jakov wo wù‑uù tuŋen rən yee ndzə́v, e lèm e vèr a? Bó wun woo tàr wor yòʼ‑oò ló a no ndzə́v rən, kfə́ə rə́ wùn à nyám sév sí kfə́n a no sa à?» 13Jesus bìnèr jii, «Kilòŋ kí kù dzəə́ wìy a yum wír wo wù nó mèn mee mendzə́v. 14Yii bèy, a bó kilòŋ kí yòʼ dzəə́ wìy yum wír wo wù nó mendzə́v a dzə̀ me foon mo. Mee shooy mè wíy a dzə e ŋgaàŋ wùn ji ntoò ndzə̀v ye yì fəə́ ghán sidzə̀m, fó wun dzəʼə̀m yee là may.» 15Wiíy və̀y nèn yòŋ jii, «Taàtá, ku fò mo mendzə́v mee shooy, é la kilòŋ kí yòʼ dzəə wìy a yum mo, é m wáa wìy fèn ji m tú mendzə́v.»
16Jesus suúy shó jii, «Dù ri, e jàŋ lum wò, é vèn wun wiy.» 17Wù bìnèr jii, «Bó m yòʼ kér lúm.» Jesus suúy shó jii, «Mo à suuyin bey, à suuy a dzə̀ kinyo ke ru kí. 18Wò‑oò sí kér alúm atàn, a wo vèn wun dzə́ lèn yòʼ fə̀m dzə̀ lum wò. À suuy rú féyì.» 19Wiíy və̀y yú kee shooy, e yòŋ jii, «Taàtá, m kìíy ne lèn ji à dzə̀ *ŋgaà ntum Nyùy. 20Atàr vérí‑iì rə́si bunrì Nyùy a dzə̀ é gwan fèn, yiì ka, bo ven vee wír veé Judàa wáa suúy kén ji kirə́ʼ ke dzə̀ á wàa bùnrì Nyùy sho ki kù mày Jerusalem?» 21Jesus yòŋ jii, «Yaà, yuúrí kinyo ke m suuy ki. Ghán sí sí gheenè se bó á yòʼ dzəə́ wìy a nyàʼ fo dzə̀ á wáa bùnrì Nyùy, kìn dzə̀ é gwan fèn, kìn dzə̀ é Jerusalem. 22Vèn bunrì kén Nyùy lèn, a bó á yòʼ kiiy kinyo ke á yii. A ver vee wír veé Judàa bunrì kér, aá kì, bìʼ fo Nyùy shoʼon ver, á wáa dìn mo wù wíy lùŋèr wíri. 23Yii bèy, ghán se wíri wíy a bùnrì Nyùy e dzəə yee réŋ virə́ʼ vidzə̀m si sí wiyì, a sí sì é kiwo. Aáwune wíy a yu a dzə̀ fo Kiyoy ke Nyùy ki, e bó a bùnrì Nyùy e dzəə yee rú. Á mo Nyùy koŋ ji wíri wáa bùnrì wun. 24Nyùy dzə̀ Kiyoy, a wír ve á bunrì wune kér fó a yu a dzə̀ fo Kiyoy ke Nyùy ki, e bó a bùnrì wun e dzəə yee rú.» 25Wiíy və̀y lò, e sùúy jii, «M kù yòʼ kì ji *Mfə̀ə́r wo Nyùy‑iì kàʼàn, wo á yoŋ ji Kristu wíy wìy, é wù naari ver vinyo vidzə̀m.» 26Jesus nèn sùúy sho jii, «Dzə̀ mo woo shó və̀n, mo wo m súŋnin e wò.»
27Wón lìm Jesuse ku nèn a kfən e bàm, e yèn, a Jesus súŋnin wùn wiíy woó Samaria, a ker gháʼ. Yii bèy, la wìr yòʼ dzə̀r ji wiíy sà taʼ kaá, kìn kinyo ke ki yiìn, bo Jesus wáa suŋnín wùn wun. 28Wiíy və̀y yiì lò, e màʼtì mbǐʼ mendzə̀v fó, e kfə̀n é mvə̀mlaʼ, a bi wíri jii, 29«Vèn ku wìy, e yèn wír wo wù toʼtin vinyo ve mò‑oò rə́si yii vidzə̀m. A tàm bo dzə̀ Mfə̀ə́r wo Nyùy‑iì kàʼàn.» 30Wíri nèn a lòkìr, a wìy ji á yén á Jesus.
31A wón və́ lìme kì sìíy ne, a boòrì jii, «Ŋgaà Yèʼey, ku yì kifá ki.» 32Wù sháʼnín jii, «M kér vifá ve yi, a bó vèn yòʼ kì mo ví dzəə̀n.» 33Á nèn a ghaynín ji wìr sà kì sìíy, e wìy e vifá ve yi vi, wù yí a? 34Jesus suúy jii, «Vém vee vifá ve yi vi dzə̀ ji m yii kinyo ke wìr wo wù tumen mo, e màysì lim ye wù foon e mò e dzə̀m. 35Vèn suuy kén ji ŋwee kù dzəə́ bér e kweè, é bo á wáa kav vifá fo kwaʼ, yii bèy, a m suuy kém jii, vèn leéy kijuŋ, e yèn á mo kwáʼa kiʼì. Vifá vi bìy ne bíyín. 36Wìr wo wù yíi a kav kér vilaʼày, a wù sí káv vifá, báʼti, wáy a dzə̀ é dzə̀ʼə̀m yee là may, a ŋgaà lìm wùn ŋgaà kav yíi tatí, a sheʼrí adzə̀m. 37Kí nen ghèén mo ŋgàn yìmòʼ yii suuy jii, ‹Ké ŋgaà lìm ki dzə̀ wáy, ké ŋgaà kav, káv.› 38M nén a tum ven lèn ji vèn káv ri vifá ve bó vèn yòʼ‑oò lo lìm. Yì‑iì lìm wír ve səné, a vèn sí káv lèn, yú vijuŋ fo áwuné lìm.»
39Mo wiíy və̀y fìʼtìn é mvə̀mlaʼ mo Jesus toʼtin vinyo ve wù‑uù rə́si yii vidzə̀m, wír veé Samaria foo fèyi nèn wày shilív e Jesus wùn anín. 40Áwune wìy, e yèn wun, a lon ji wù ku dzə̀ʼtì a wùn áwune shishàr. Wù biímé, e shìíy fo vishiíy vibaà. 41Wíri yuúrí kinyo ke wù fiʼtì fo wùn shuù, e nèn kfə̀n a biimé aneénín, e shaà vé mbìyi, 42a suúy e wiíy və̀y jii, «Vèr wày shilív e Jesus wùn lèn a dzə̀ bìʼ fo vèr yuun ne kinyo kfə́ e vituʼùr vér ví, bó yòʼ dzə̀ə́ bìʼ kinyo ke à kì fèrìn e vèr cáʼcáʼ. Vèr kìíy ne lèn kijuŋ ji wìr və̀n dzə̀ wo wù wíy lùŋèr kitú ke nsay kidzə̀m.»
Wìr wày shilív e Jesus wùn, wù fér wán və
43Vishiíy vee vibaà viy vi shaà, Jesus nèn tòsín, e dù e mbìv wòŋ yee Galeli. 44A wù‑uù yiì ne sùúy ji bó á yòʼ yii ghvə́m a *ŋgaà ntum Nyùy aáwuné wòŋ. 45Yii bèy, wù meé é Galeli e ghan sin, á keérí wun kijuŋ, bìʼ fo vé‑eè duùn fó kiŋkàʼ e Jerusalem, e yèn vinyo ve wù yiìn fó vidzə̀m.
46Wù kfən ghàn, e dù, e mèé e ntèʼ yee Kaana fo wù‑uù bìnèrìn mendzə́v é melùʼ e Galeli foo fèy. Wáa dzə e ghan see shooy, a wìr wo kuʼùn wùmòʼ dzə̀ é ntèʼ yee Kapeenahum, a wan və woo lumèn joy e ŋàŋ. 47Wù yú ji Jesus lò ne fo wír veé Judàá mbìv wòŋ, e wìy e Galeli, e nèn dù, e yèn wun, a lon ji wù ku wìy, e fèr a wán və, wù waà sí kpú. 48Jesus suúy shó jii, «Vèn dzə̀ ben, a bó yòʼ dzə̀ vèn wày shilív e mǒ wùn, a bó á yén ji m yiì kinyo ke kí wáa dìn vitaáví vé Nyùy.» 49Wìr wo kuʼùn və̀y kú a lon kfə́ lonén jii, «Taàtá, ku wìy cér fo wan wom kpú.» 50Wù nèn sùúy sho jii, «Kú a dù rì. Wan wò yíi lùŋ.» Wù ku nèn biìmé mo Jesus suuyin, a kfən fo laʼ. 51Wù lòo kfən, wùn à wónlè vəə́ tárnín, á suúy shó jii, wan və lùŋ a ne. 52Wù ku nèn dzə̀r a dzə̀ ghán se shwéri kì koon wán. Á bìnèr jii, kinjàʼ ki‑ii maʼti wán é yooné, a sì á moo shúy e mòʼón. 53Wù nèn kìíy ji dzə̀ á ghán se Jesus‑ee suuyin ji wàn yíi lùŋ. Wù nèn wày shilív e Jesus wùn, wír vee wùn laʼ adzə̀me wáy sá. 54Mo Jesus yiìn kin kee kinyo, ke kí wáa dìn vitaáví vé Nyùy, wáa dzə ve ví meen vibaà ve wù ku lò fo wír veé Judàá mbìv wòŋ, e wìy, e yiì e Galeli.
Àwon tá yàn lọ́wọ́lọ́wọ́ báyìí:
Joon 4: LNB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022 CABTAL