Yohanis 1
1
Lɔga Bhɔdhinɛnɛa :Lɔkku ke Hiri
1Dha bere sabbɔ huna ba ko tumu ngani kètegenydoayo, hirre kèe Lɔgɔ ihe. Na nɔng ɛl ko Tumu kari na a Tumu rɛ. 2Na yɔk dha ɛllanɛ kari kingi chɔɔ huna ba ko tumu ngani kètegenydoayo. 3Na kala bere Tumu ghendonɛa aha kumulɔng, dha bere ghendono Lɔkke. Na chɔɔ ahite dhɔnɛ dha bere Lɔkke ngani ketegenyoo, ninggɛ dhul. 4Na Lɔgɔ a ɛnaa basseyny dhɔnɛnɛ. Na basseya nɛnɛ a hɔldina zugony. 5Na ngahɔldindonu teriny mugur na mugur bhee guchchanɛ#1.5 Tuga Giriki hologun kona se “...nɔng mugur bhɛa mɔgɛa hɔldin ninggɛ dhul” oo “...nɔng mugur ko hɔldin imaginɛyɔ.” hɔldin ninggɛ dhul.
6Na dha bere lɔ hirre ekkono :Tumu kèe Yohanis. 7Na kun ke hira senno kɔɔbhɛsɛ zugo kumulɔng lɔga ngahɔldindonu dha bɔɔ orrono :nɛa kawariyɔye na ko yɔk kɛyɛbhɛtɔ. 8Nɔng Yohanis sabbaa nɛnɛ rɛ dha bere hɔldin ngayo. Nɔng dha bere kun na kɔɔbhɛsɛ zugo lɔga ngahɔldindonu bere orrono kawariyɔye sɔng. 9Nɔng hɔldina ku dhere bhelegɛsɛna zugo ganggua basseyny dha bere anna bo kunno na senno kassa zuga bhakkɛa ba kumulɔng.
10Na chɔɔ Lɔgɔ hunde a nganda dha bere ɛl ko Tumu na ghendonɛ ba kari na kun na assana zugo bayte, yɔk zugo bere imaggɛa kumulɔng. 11Nɔng bere kunno na assana zuga gɛnyɛ bere bhɛllana, na yɔk ngani kalambaayo. 12Na yɔk ga bere lammanɛa na yɛbhbhɛa nɔng,#1.12 Tuga Giriki se, “Na yɔk ga bere lammanɛa na yɛbhbhɛa sara gɛnyɛ,...” annaa aynɛa bhɛa anɛa erroa Tumu. 13Na yɔk a erroa bhɛllana :Tumu damiya bere sennanɛa :nɛa. Erroa hudhukkonɛa :zugu damiya ɛsɛdhdhanɛa na hinnonɛa :yɔkku ngayo.
14Na Lɔgɔ annaa bere bhɔttɛa ke hiri#1.14 Tuga Giriki se, “...ayuk...” na ɛlɛhɛnɛsɛn hiri ke ngaya hiri lɔmɛ ayuk ko gigaye. na kàbhakta ko agge kari. Na agge bere kàrta dirama eriya Tumu dhɔnɛna bere kunno bhɛa nɛnɛ na ɛdhdhɛttanniy agge goore na madhdhagiy bhɛa lɔga Tumu anɛa dhere.
15Nɔng ngahirra a hira bere orro :Yohanisi kawariyɔ na koo yogɛsɛna zugo goore na senɛsɛna, “Ngahirra anna bere koyokkogungu na kesennagungu, ‘Hirre ale kɔbhbhananyde anna jorrononyi anye ke ngaya anɛ hira bere ihono kingiye.’” 16Nɔng hinisa nɛnɛ a bu. Na ngaya hini anɛ buye, chɔɔ bɔɔ ɛdhdhɛttaniyɔ agge kumulɔng na tɔrrɛiyɔ kali kali. 17Nɔng Damiya Tumu annaa bere kàjjɛa Muse na koo ajjiy agge. Na yɔk lɔga Tumu ku dhere ko bhɛa ɛdhdhɛttannɛiy :nɛa annaa dhɔlagiyɔ :Yesus Kirisosi. 18Chɔɔ hirre dhɔnɛ bere or Tumu, ninggɛ dhul. Na nɔng eriya nɛnɛ dhɔnɛna#1.18 Tuga Giriki se, “...eriya nɛnɛ dhɔnɛna ku Tumu rɛ...” ibhinɛna ko nɔng hinisi annaa bere dhugunogiyɔ agge hunde Tumu a hirre ku ɛnɛngge na kàtakta.
Lɔga Yokkonɛa :Yohanisa Churro Zugo Bhɛa Nɔng Kirisos Ngaanɛayo
19Mɛa te lɔga bere kɔbhbhana :Yohanisa Churro Zugo. Dha bere gulsachina Ayhudhi ɛlla Yerusalemɔ ekkɛ gɔldangɛa doraa Tumu ko zuga gettoa Lewiy gena na kighini Yohanis hunde a hiri inongge. 20Na hunaa ghinnɛaye, nɔng rɛ ngani ngaɛmɛsso na yagɛsɛ na sɛɛsɛ, “Anye Kirisos#1.20 Kirisos a bhɛa kènɛa, “Hira Bɛrrana :Tumu ku Komoruya Ibbayseo Zugo.” ngakaniyo.”
21Na yɔk ghini sɛgɛn na seyɛsɛ, “Na inye ani hir inong? Ani Eliyas dha?”
Na nɔng yagɛsɛ na sɛɛsɛ, “Ngakaniyo.”
Na ghini sɛgɛn na seyɛsɛ, “Na ani hira yogɛsɛni zugo lɔga dhugunono :Tumu bere kènno ale kuni ka?”
Na nɔng sɛɛsɛ, “Ngakaniyo!”
22Na kalda wurtɔ ghini na seyɛsɛ, “Na wa ga inye ani hir inong? Ga dhugunogiy rɛa nunu na kòyoktɛsɛo zugaa wa ekkoniyɛa! Ga yogogiy hunde ani hirre mesi ɔngge?”
23Na nɔng yagɛsɛ damiya lɔga bere yokkono :hira bere yogɛsɛna zugo lɔga dhugunono :Tumu kèe Isayas sennɛa, “Anye kani hira kihi korugiye na koyogɛsɛni zugo lɔgɔ goore na kesenɛsɛni, ‘Kɔhɔ ganggua Kumoruyny na kɛtɛ dib!’”
24-25Na yɔk zugaa kèkkono kɔbhbhɛa damiya Bhɛrɛsi gen ghini na seyɛsɛ, “Na inye hunde Kirisos oo Eliyas oo hira yogɛsɛni zugo lɔga dhugunono :Tumu ngaaniyoye, zugo churi kɛ ɔng?” 26-27Na nɔng yagɛsɛ na sɛɛsɛ, “Anye kuchuri zugo ma sɔng. Na nɔng hir kona ale kɔbhbhananydɔ. Chɔɔ mɛa toye nɔng ɛllo ko igge kari na imaggoyɔ. Nɔng bhɛa nɛnɛ anye kani na chinynyo ghasura. Na nɔng anna chɔɔ chahaa gɛnyɛ ngakubhurushaniyo.” 28Yɔk ngagiya a lɔga bere Yohanisi ghinɛa :zugu Bitaniyagiye, ɔra iho kidhoa bere churɛa zugo kèe Yordanos tandɔ.
Mɛdɛra Tumu
29Na bhorre Yohanis aru Yesus hunde kun bhɛà nɛnɛye, na seu, “Ga gɔnyigiyɛ! Mɛdɛra Tumu#1.29 Tuga Giriki ngaya se, “Mɛdɛra Tumuye” a bhɛa kèsenɛa “Mɛdɛrɛ Hoynɛ.” senno kotonyo ridhinga zuga bhakkɛa ba kumulɔng, a nganda. 30Nɔng a hira bare kennagungu, ‘Hirre ale kɔbhbhananyde anna jorrononyi anye ke ngaya anɛ hira bere ihono kingiye.’ 31Nɔng chɔɔ bere anye kimagiyɔ. Na nɔng bhee bere kugunɛ na kuchurɛ zugo maye, a ngaya kèe zuga Isirayeli kataktɛ nɔngge.”
32-33Na koo Yohanis kɔbhɛsɛ zugo lɔgɔ na sɛɛsɛ, “Hira bere ekkononyi na senno kùchur zugo ma, bere sennaganyi, ‘Ale ori Kuloya Tumu hunde kun tumɔ na kɔsɛn hir konaye. Na ngahirronu aynde ale chur zugo Kuloya Tumu Bararaye.’ Na mɛa anye wa karra Kuloya Tumu hunde kun tumɔ na dhibbana huna yikkayny na liginɛ ngahirraye. Chɔɔ huna sabbɔ ngalɔkta ngani kòyoktogonyoo, nɔng ngahirra bere kimagi hang. 34Na mɛa nɔng hunde dhaa a Eriya Tumuye wa karra tok na kɔɔbhagungngɔ dib.”
Lɔga Zuga Bere Kɔbhbhɛa Yesus Sabbune
35Na bhorre Yohanis tɛldi ko zuga kɔbhbhɛa nɔng gee ku ramman bhɛa bare yogɛsɛna zugo lɔgɔ. 36Na nɔng Yohanis aru Yesus hunde dho ngonuye, na seu, “Ga gɔnyigiyɛ! Ngahirra a Mɛdɛra Tumu.”
37Na yɔk hunaa shikkɛa ngalɔktaye, kendɛ ko Yohanis na kɔbhɔ Yesus. 38Na nɔng Yesus budhɛ na aru yɔk hunde kɔbhbhɛye, na ghinu na sɛɛsɛ, “Lameo ɔng?”
Na yɔk seyɛsɛ, “Rabbaye, bhagi ore?” (“Rabbay” a bhɛa kènɛa “Hira madhdhiy.”)
39Na nɔng sɛɛsɛ, “Ga hoya na argitɔ!”
Na ago na koo argi bhɛa bhakka :nɛa na sani ngonu kari. Nɔng ngakoleonu bere anna kolea ku raya.#1.39 Tuga Giriki se, “...satinya a tɔmmɔn.”
40Na bhɛa ngazuktonu ku ramman bere shikkɛ lɔga yokkono :Yohanisi na kɔbhbhɛ Yesuse, kona bere anna Indiriyas. Nɔng a gochonga Simona kèe Betiros. 41Na Indiriyas ogo na assa gɔynɛ Simon shaw ke tiri na sɛɛsɛ, “Agge wa karto Hira Bɛrrana :Tumu ku Mɛsi!” (“Hira Bɛrrana :Tumu ku Mɛsi” a bhɛa kènɛa “Kirisos.”) 42Na koo dhiganu Simon chɔɔ bhɛa ihɛa :Yesusi. Na Yesus gɔnyu Simon na sɛɛsɛ, “Inye ani eriya Yona kènninyi Simon. Na ngakalda wurtɔ sara gunyu keli Keba.” (Tuga Giriki “Keba” a bhɛa kènɛa “Betiros.”)#1.42 “Keba” ko “Betiros” kari a bhɛa kènɛa “tawar.”
43Na bhorre Yesus tɛhɛnu wochin na kok baa Gelila. Na koo itinynyandɛ ko Bhilibhos na sɛɛsɛ, “Ga kɔbhaanydɔ.” 44Yɔk Bhilibhos ko Indiriyas ko Betiros dha bere a zuga chillanɛa Betesaydhagiye. 45Na Bhilibhos koo itinynyandɛ ko Natinayel, na sɛɛsɛ, “Wa karto hira toynɛna bere lɔga gɛnyɛ kɔdhdhɛsɛna :Muse Damiya Tumu na dheliyɛa :zuga bere yogɛsɛnɛa zugo lɔga dhugunono :Tumu na kɔdhdhɛsɛnɛa dadabinya. Nɔng a eriya Yosebi kèe Yesus bere chillana Naziretɔ.”
46Na Natinayel seu, “Anda lɔkte challi Naziretɔ honydɔ?”
Na Bhilibhos yagɛsɛ na sɛɛsɛ, “Ga, wo na artɔ!”
47Na hunaa Natinayel ngani kɔa gɔra Yesusiye, Yesus aru nɔng na seu, “Ngahirra a hira Isirayeli ku dhere butomo ngamɛzzeoyo.”
48Na Natinayel ghinu na sɛɛsɛ, “Gaany ɛnɛng?”
Na nɔng yagɛsɛ na sɛɛsɛ, “Wa korrinyi chamochiyɔ sugumɔ hunaa chɔɔ ko Bhilibhos ngani itinynyandɛayo.”
49Na sɛɛsɛ :Natinayeli, “Hira Madhdhiy#1.49 Tuga Giriki se, “Rabbay.” “Rabbay” tuga Hibiru a bhɛa kèsenɛa “Hira Madhdhiy.”, inye ani eriya Tumu. Na chɔɔ ani Komoruya zuga Isirayeli.”
50Na sɛɛsɛ :Yesusi, “Nɔng inye mɛa bhee yɛbhbhɛanyde, a ngaya kesennagɛiny wa korrinyi chamochiyɔ sugumɔye. Na yɔk lɔga jorronɛa ngagiya ale ngani oriyɔ. 51A challi, ga shigitɔ! Ale orro tumu hunde onɛ na zuga ekko :Tumu ɔshɔrisinɛ Hiri Hoynɛgiye na gena hɛ tumɔ, gena bhonsanɛ baye.”
Àwon tá yàn lọ́wọ́lọ́wọ́ báyìí:
Yohanis 1: SUQ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2023 Suri Translation Project which is a project of the Ethiopian Evangelical Church Mekane Yesus