མཛད༌པ། 4

པ་ཏྲུས་དང་ཡུ་ཧན་ན་ ཚོགས་འདུ་ཆི་ལུ་ག་གུབ་ཀ་ཀེ་བ༌ལ།

1བླ་མ་བ་དང་ མཆོད་ཁང་ཁུང་ཁཱན་བ་ ཉི་ས་དུ་ཀི་པ་བ་ ཤེག་པ་ཀབ་ཉི་ པ་ཏྲུས་དང་ཡུ་ཧན་ན་ སོ་ངོ་བ་ཀབ་ཉི་ གསུང་གྲོས་མཛད་པེ་གང་ཅ་གི་ཝ༌ལ། 2སྐུ་ཚབ་ཉིག་ཙིང་གི་ ཡི་ཤུ་གཤགས་པ་གེ་ གསོན་པོ་ཨ་ཉི་སྐུ་བཞེངས་པ་དག་ཉི་ཡེག་ཉི་ སོ་ངོ་ཤི་ཁཱན་བ་ཝུ་ལེ་ཨ་ཉི་ ཁུངས་ཀེ་བ་ཨ་དེན་གེ་ རོག་ཏེ་བ་ གནམ་མེད་ས་མེད་ རོ་ཙིག་པ༌ལ། 3ཉི་གི་ཚེ་གེ་ཤ་ མིང་མེར་བ་ཨ་དེན་གེ་ རོག་ཏེ་བ་ཀི་ རོག་ཉིག་ཙིང་ཙུང་ཐཱན་ ནམ་ནིང་བེད་པུ་སག་པུ་ བཙོན་ག་ཙུག་ཉི་ཐ་ཝ༌ལ། 4དག་པ་ཀབ་ཉི་ གསུང་ན་ཐ་ཁཱན་བ་ཀི་ དད་པ་ཨ་ཝ༌ལ། ཉི་དད་པ་ཨ་ཁཱན་བ་ཀ་ ཁ་གྱངས་སེང་ཉི་ ཕེ་ཝག་ཙ་ 5000 ཕང་ རི་ཝ༌ལ།

5ཉི་ནམ་ནིང་ད་བུ་ ཡ་ཧུ་དི་པ་ག་ འགོ་དཔོན་བ་དང་ སོ་ངོ་ཆི་ལུ་བ་ ཉི་བཀའ་ཁྲིམས་ག་སློབ་དཔོན་བ་ ཡ་རུ་ཤ་ལེམ་ག་ཛོ་མ༌ལ། 6བླ་མ་གོང་མ་ ཧཱན་ནཱས་དང་ཀའི་ཡ་ཕ་ ཡུ་ཧན་ན་དང་ ཨ་ལེག་ཇེན་དར་ ཉི་བླ་མ་གོང་མ་ག་ ཕའི་ག་སོ་ངོ་བ་ ཉ་ག་ཆོ་ཝ༌ལ། 7ཉི་རོག་ཏེ་བ་ཀི་ སྐུ་ཚབ་ཉིག་ཙིང་ རོག་ཏེ་བ་ཀ་གུབ་ཀ་ ཐིང་མེ་བིན་ཐཱན་ ཇི་མ་ལ་ ཧང་ག་དབང་ཚད་གི་ཨ་ཉི་ ཨུ་ཉུ་མ་ནེ་ལ་ ཨི་བི་ག་མིང་ག་ ན་ཆིང་གི་ ཨུ་ཐུ་ད་བུ་ཨ་ཝ་ཡ་དག༌ཉི།

8པ་ཏྲུས་ དམ་པའི་ཐུགས་ཉིད་གི་ཕུང་ཉི་ གསུངས་མ་ལ་ སོ་ངོ་ཆི་ལུ་བ་དང་ སོ་ངོ་བ་ཀ་འགོ་དཔོན་བ་ 9ཐི་ནོང་ དང་མེ་མར་ཁཱན་སོ་ངོ་ག་ ལེག་པུ་ཨ་ཁཱན་ཀོར་གེ་ཇིམ་ཉི་ རོག་ཧང་ཏེན་དྲག་པ་ཡ་དག་ཉི་ ཨ་ཧ་ཇིམ་ནེ་ལ་ 10ཨོ་ཐ་སོ་ངོ་ ཁམས་སངས་ཀིན་ཨ་ཉི་རང་དྲག་ཉི་ ན་ཧ་གུབ་ཀ་ཐིང་ཁཱན་ཁེ་པ་ ན་ཤི་ཁྲིམས་ཤིང་ག་ ཇཱན་ཉི་བཀྲོངས་ཁཱན་ ཉི་དཀོན་མཆོག་གི་ རོག་གཤགས་པ་གེ་ ལོག་ཉི་བཞེངས་གནང་ཁཱན་ ནཱས་རཱད་ག་ཡི་ཤུ་ཁིརིས་ག་མཚན་ག་ དབང་ཚད་གི་ཨ་ཉི་ དྲག་པ་གི་ལ་དག་ཉི་ ནའི་ཐམས་ཅན་གི་ སེ་ལེ་ཁེ༌ལེ། ཉི་ཨིས་རེལ་ག་ སོ་ངོ་ཐམས་ཅན་གི་བུ་ སེ་ལེ་ཁེ༌ལེ། 11ཡི་ཤུ་ཤོ་ ནའི་ཕའི་ཅོད་ཁཱན་བ་ཀི་ མ་ཚཱས་ཁཱན་ལུང་ཁེ་པ་ ཟུར་ལུང་ཐམས་ཅན་གེ་ ཁག་ཆི་ལུ་རི་ཝ་#4:11 མགུར་མ་ག་དཔེ་ཆ་ 118:22 དག་ཉི་ གསུང་རབ་གེ་ཤོ་ཁཱན་གི༌ལ། 12ཐར་པ་ཤོ་ རོག་ཐུར་གེ་ཨ་ཉི་ཤ་ཉོང༌པེ། ཉི་ཨ་ཧ་བ་ སྐྱབས་ཨ་ལེ་རེ་ཁཱན་མིང་ ཞིང་ཁམས་ག་ཕརའ་ཁ་ དཀོན་མཆོག་གི་ ཨི་བི་ག་རང་ གནང་མ་མཱན་ཅ་དག༌ཉི།

13པ་ཏྲུས་དང་ཡུ་ཧན་ན་ གནམ་མེད་ས་མེད་ ཡོང་ཐེད་པུ་ཆོ་ཝ་ཨ་དེན་གེ་ ཉི་རོག་ཉིག་ཙིང་ཤོ་ དཔེ་ཆ་མ་ལམ་ཁཱན་ སོ་ངོ་ཟེ་མུ་ཐུར་ཤ་ གི་ཝ་ལ་ཨ་ཉི་ སེ་ལ་ཀབ་ཉི་ ཚོགས་འདུ་ཆི་ལུ་ནང་ཀ་ཆོ་ཁཱན་ ཚོགས་པ་བ་ ཧ་ཆཱད་པ༌ལ། ཉི་རོག་ཉིག་ཙིང་ཤོ་ ཡི་ཤུ་ཀབ་ཉི་ བཞུགས་པ་གི་ལ་ཨ་ཉི་ རོག་ཏེ་བ་ཀི་སེ་ཝ༌ལ། 14དག་པ་ཀབ་ཉི་ དང་མེ་མར་ཁཱན་ སོ་ངོ་ཁེ་པ་དྲག་ཉི་ པ་ཏྲུས་དང་ ཡུ་ཧན་ན་ཀབ་ཉི་ཏབ་ཐུར་ ཐིང་ཉི་ཆོ་ཝ་ག་ ཐོང་མ་ཨ་དེན་གེ་ རོག་ཏེ་བ་ཀི་ རོག་ཉིག་ཙིང་ག་ མ་ལེག་པ་ཧང་རང་ཡེག་པེ་ མར་བ༌ལ། 15རོག་ཏེ་བ་ཀི་ རོག་ཉིག་ཙིང་ག་ ཚོགས་འདུ་ཆི་ལུ་ག་ ཕའི་ནང་ཀེ་ཤོན་དི་དག་ཉི་ བཀའ་གནང་ཐཱན་ རོག་ཏེ་བ་ནང་དོ་ ཏུན་ཆ་ཨ་ཝ༌ལ།

16ཨོ་ཐ་སོ་ངོ་ཉིག་ཙིང་ཀབ་ཉི་ ཧང་ཨ་ལེ་ཡ། རོག་ཉིག་ཙིང་གི་ཨ་ཁཱན་ རྫུ་འཕྲུལ་ཆི་ལུ་ཀོར་གེ་ ཡ་རུ་ཤ་ལེམ་ག་ཆོ་ཁཱན་ སོ་ངོ་ཐམས་ཅན་གི་ སེ་ཝ་ཨ་དེན་གེ་ ཨ་ཤི་མང་གི་ཨ་ཉི་ ཡེག་པེ་མར༌བ། 17དག་པ་ཀབ་ཉི་ ཨོ་ཐ་ཚང་ཁེ་པ་ སོ་ངོ་བ་ཀ་པོང་ཀ་ ཨོ་ཐ་གེ་ལག་ཉི་ དར་བེ་མ་བི་ལེ་དེན་གེ་ ཨ་ཤི་ རོག་ཉིག་ཙིང་ག་ཏཱན་ ཡི་ཤུ་ག་མཚན་ག་ ཨི་བི་ཀབ་ཉི་རང་ ཆཱས་ཨ་ལེ་མ་ཆོག་པ་ན་དག་ཉི་ ཡེག་པེ་ཁེ༌ལེ། 18ཉི་རོག་ཏེ་བ་ཀི་ རོག་ཉིག་ཙིང་རཱན་ཐཱན་ ཡི་ཤུ་ག་མཚན་ག་ ཨི་བི་ཀབ་ཉི་རང་ ཆཱས་མ་ཨའི། ཉི་ཨི་བི་ག་རང་ ཡེ་ལེ་ག་བུ་ མ་ཆོག་པ་ན་དག་ཉི་ ཡེག་པ༌ལ།

19དག་པ་ཀབ་ཉི་ པ་ཏྲུས་དང་ཡུ་ཧན་ན་གི་ ལན་གནང་ཉི་ དཀོན་མཆོག་ག་སྤྱན་ག་ ནའི་ནའི་ཏེན་གི་ སེམས་མིན་གོད༌ཅོ། ན་ཧ་ཆ་གནས་ཐ་ལེ་ག་ དེན་མེ་སྨོ་ དཀོན་མཆོག་ག་ ཆ་གནས་ཐ་ལེ་ག་ དེན་མེ་ཡ། 20ཧང་ཡ་དག་ནེ་ལ་ ཨའི་ཏེན་ག་ མིང་གི་ཐོང་ཁཱན་དང་ ཨའི་ཏེན་ག་ ན་གི་ཐ་ཁཱན་ག་ཀོར་གེ་ བཱརའ་ག་མ་ཡེག་པཱན་ ཆོ་ལེ་མར་བ་དག་ཉི་ གསུངས་མ༌ལ།

21ཉི་ཚོགས་པ་ཆི་ལུ་བ་ཀི་ གོ་མ་གེ་བུ་ ན་སྒྲིང་སྒྲིང་ཨ་ཉི་ གསུངས་ཐཱན་ རོག་ཉིག་ཙིང་ ཐར་ཀུན་ཏི་ཝ༌ལ། ཧང་ཡ་དག་ནེ་ལ་ ཨོ་ཉ་ཇུང་ཁཱན་ག་གོད་ཉི་ སོ་ངོ་ཐམས་ཅན་གི་ དཀོན་མཆོག་ག་ བསྟོད་པ་ཕུལ་བ་ཨ་དེན་གེ་ རོག་ཏེ་བ་ཀི་ རོག་ཉིག་ཙིང་ག་ ཁྲིམས་ཀེ་བེ་ག་ལམ་ ཏི་ངེ་རང་མ་ཐོང་མ༌ལ། 22ཨོ་ཐ་རྫུ་འཕྲུལ་ག་ཐུང་ཀེ་ཨ་ཉི་ དྲག་ཁཱན་སོ་ངོ་ཁེ་པ་ ཉིང་ 40 ཆཱན་མ་ཆོ་ཝ༌ལ༎

དད་པ་ཨ་ཁཱན་བ༌ཀི་ སྨོན་ལམ་ཏ་པ༌ལ།

23ཉི་པ་ཏྲུས་དང་ཡུ་ཧན་ན་ ཐར་བ་ཐུར་ག་རང་ བཱརའ་དད་པ་ཨ་ཁཱན་བ་ཆོ་ས་ག་དིན་ཐཱན་ བླ་མ་ཆི་ལུ་བ་དང་ སོ་ངོ་ཆི་ལུ་བ་ཀི་ རོག་ཉིག་ཙིང་ག་ གསུངས་ཁཱན་བ་ཀ་ཀོར་གེ་ གསུངས་མ༌ལ། 24དད་པ་ཨ་ཁཱན་བ་ཀི་ ཨོ་ཉ་ཀོར་གེ་ ན་ཐ་དེན་གེ་ རོག་ཏེ་བ་ ཐམས་ཅན་རང་ ཏབ་ཐུར་ཛོམ་ཐཱན་ དཀོན་མཆོག་ག་ སྨོན་ལམ་ཞུ་ཝ་ལ་ ཞིང་ཁམས་དང་འཛམ་གླིང་ ཉི་རྒྱམ་མཚོ་དང་ ཨོ་ཉ་ནང་ཀ་ཆོ་ཁཱན་ ཐམས་ཅན་རང་ བཀོད་ཁཱན་གཙོ་བོ་ 25དམ་པའི་ཐུགས་ཉིད་གི་ ཨ་ཧ་ཕ་མ་དང་ ནཱན་ག་གཡོག་པ་ ད་ཝུད་ག་ཐུང་ཀེ་ཨ་ཉི་ ནཱན་གི་གསུངས་མ་ཅ་

ཡ་ཧུ་དི་པ་མང་གི་ཁཱན་བ་ ཧང་ཨ་ཉི་ དཀོན་མཆོག་ཀབ་ཉི་ རོ་ཙིག་ཅ་ཡ། ཉི་སོ་ངོ་བ་ཀི་ ཁུངས་ཧང་རང་མ་ཝ་ ཧང་ཨ་ཉི་ འཆར་གཞི་ཙམ་ཅ་ཡ། 26གཙོ་བོ་དང་ རོ་ཀ་ཁིརིས་ག་དགྲ་ཨ་ཉི་ འཛམ་གླིང་ག་དཔོན་ག་བ་ ཐིང་མ༌ཅ། ཉི་དབང་ཁཱན་བ་ ཏབ་ཐུར་ཛོ་མ་ཅ་#4:26 མགུར་མ་ག་དཔེ་ཆ་ 2:1, 2 དག༌ཉི།

27ཉི་ཐེ་རི་བ་རི་རང་ ནཱན་ག་དམ་པའི་གཡོག་པ་ ནཱན་གི་ ཁིརིས་ཨ་ཉི་སི་ཉི་ཀེ་ཁཱན་ ཡི་ཤུ་ག་དགྲ་ཨ་ཉི་ དཔོན་ཧེ་རོད་དང་ དཔོན་སློབ་ པཱན་ཏི་ཡཱས་པི་ལ་ཏཱས་ ཉི་ཡ་ཧུ་དི་པ་མང་གི་ཁཱན་བ་དང་ ཨིས་རེལ་ག་སོ་ངོ་བ་ ཨོ་ཐ་ཁྲོམ་ཆེན་ག་ཛོ༌མ། 28ནཱན་ག་ཤུགས་སྟོབས་དང་ ཐུགས་བཞེད་གི་ཨ་ཉི་ གོ་མ་གེ་རང་ ཙམ་ཉི་ཐ་ཁཱན་ཁེ་པ་ ཐམས་ཅན་རང་ ཨ་ལེ་ག་དེན་གེ་ རོག་ཏེ་བ་ ཛོ་མ་ཆོ༌ཝ། 29ཉི་ཨོམ་ གཙོ་བོ་ རོག་ཏེ་བ་ཀི་ ཡོང་ཨ་ཁཱན་ག་ གཟིགས་གནང༌ཤོ། ཉི་ན་ག་གཡོག་པ་བ་ཀི་ ན་ག་གསུང་ཁེ་པ་ ཡོང་མ་ཁེ་ཝ་ཨ་ཉི་ བཤད་པེ་ག་གནང༌ཤོ། 30དྲག་ཉི་གནང་མེ་དེན་གེ་ ན་ག་ཕྱག་རིང་ཉི་གནང༌ཤོ། ཉི་ན་ག་དམ་པའི་གཡོག་པ་ ཡི་ཤུ་ག་མཚན་ག་ཐུང་ཀེ་ཨ་ཉི་ རྫུ་འཕྲུལ་དང་ ཡིད་ཆི་ཝ་ག་ལའི་བ་ མཛད་པེ་རེ་ཆེན་དག༌ཉི།

31ཉི་རོག་ཏེ་བ་ཀི་ སྨོན་ལམ་ཞུ་ཉི་ཆུམ་དེན་གེ་ རོག་ཏེ་བ་ ཛོམ་ཁཱན་བཱརང་ཁེ་པ་ དྲེང་མ༌ལ། ཉི་རོག་ཏེ་བ་ ཐམས་ཅན་རང་ དམ་པའི་ཐུགས་ཉིད་གི་ཕུང་ཉི་ དཀོན་མཆོག་ག་གསུང་ཁེ་པ་ ད་སུ་རང་ཡོང་མ་ཁེ་ཝ་ཨ་ཉི་ བཤད་པེ་གོ་ཙུག་པ༌ལ༎

དད་པ་ཨ་ཁཱན་བ་ཀི་ རོག༌ཏེ༌བ༌ཀ་ རྒྱུ་ཅ་ལ་བ་བོང་མ༌ལ།

32ཉི་དད་པ་ཨ་ཁཱན་བ་ཀ་ སྡེ་ཚན་ཁེ་པ་ སེམས་མི་ཐང་དང་ རྣམ་ཤེས་ག་ཐུར་རི་ཝ༌ལ། རོག་ཏེ་བ་ཐུར་གི་རང་ རོག་ཏེ་བ་ཀ་ རྒྱུ་ཅ་ལ་ཁེ་པ་ རང་ཏེན་ག་ཨ་ཉི་ མ་ཙི་ལཱན་ རོག་ཏེ་བ་ཀ་ཆོ་ཁཱན་ ཐམས་ཅན་རང་ བཱརའ་ག་བོང་ཉི་བི་ཝ༌ལ། 33གནམ་མེད་ས་མེད་ དབང་ཚད་ཆི་ལུ་དང་ཏུ་ཉི་ སྐུ་ཚབ་བ་ཀི་ གཙོ་བོ་ཡི་ཤུ་ གཤགས་པ་གེ་ གསོན་པོ་ཨ་ཉི་སྐུ་བཞེངས་པ་ཀོར་གེ་ འཛོམས་དཔང་ཨ་ཝ༌ལ། ཉི་དཀོན་མཆོག་ག་ ཐུགས་རྗེ་ཆི་ལུ་ཁེ་པ་ རོག་ཏེ་བ་ ཐམས་ཅན་ག་ཐུང་ཀ་ཆོ་ཝ༌ལ། 34རོག་ཏེ་བ་ཀ་པོང་ཀེ་ ཨི་བི་རང་ ནང་དོག་ཁཱན་མཱན་ཆི། ཉི་ཕའི་དང་ ས་ཆོ་ཁཱན་བ་ཀི་ཙོང་ཐཱན་ 35ཉི་ཨོ་ཉ་ག་ཏི་རུ་ཁེ་པ་ སྐུ་ཚབ་བ་ཀ་ ཕྱག་ཀ་ཕུལ་བ༌ལ། ཉི་ཨོ་ཉ་ཏི་རུ་ཁེ་པ་ སོ་ངོ་བ་ནང་དོག་པ་དང་ཏུ་ཉི་ བོང་ཉི་གནང་མ༌ལ།

36སའི་པརཱས་གེ་ སོ་ངོ་ག་མིང་ ཡོ་སེཕ་དག་ཁཱན་ག་ སྐུ་ཚབ་བ་ཀི་ བར་ན་བཱས་དག་ཉི་ ར་ཝ་ལ་ (དེན་ཐ་ཤོ་ སེམས་གསོ་ཨ་ཁཱན་ག་ཟ།) ཉི་རོག་ཤོ་ མི་རིགས་ལེ་ཝི་དག་ཁཱན་གེ་ གི་ཝ་ཆོ་ཝ༌ལ། 37རོ་ཀི་རོག་ཏེན་ག་ས་ཙོང་ཐཱན་ ཨོ་ཉ་ག་ཏི་རུ་ སྐུ་ཚབ་བ་ཀ་ ཕྱག་ཀ་ཕུལ་བ༌ལ༎

Àwon tá yàn lọ́wọ́lọ́wọ́ báyìí:

མཛད༌པ། 4: TNTB

Ìsàmì-sí

Pín

Daako