མཛད༌པ། 5

ཧ་ན་ནི་ཡ་དང་ས་ཕི་ར།

1དག་པ་ཀབ་ཉི་ ཧ་ན་ནི་ཡ་དག་ཁཱན་ སོ་ངོ་ཐུར་དང་ རོ་ཀ་མེ་ཝག་ཙ་ས་ཕི་ར་ རོག་ཉིག་ཙིང་གི་ རོག་ཉིག་ཙིང་ག་ས་ཙོང་མ༌ལ། 2རོ་ཀ་མེ་ཝག་ཙ་ཀབ་ཉི་ ཏུན་ཆ་དྲིག་ཐཱན་ ཨོ་ཉ་ས་ག་ངེ་ལོང་གེ་ ཏི་རུ་ད་སུར་ རོག་ཏེན་ག་དེན་གེ་ཐཱན་ཐཱན་ ཉི་བཱརའ་ལཱན་ཇུ་ལུས་ཁཱན་བ་ཤོ་ སྐུ་ཚབ་བ་ཀ་ཕུལ་བ༌ལ།

3པ་ཏྲུས་གི་ རོ་ཀ་གསུངས་མ་ལ་ ཧ་ན་ནི་ཡ་ དམ་པའི་ཐུགས་ཉིད་ཀབ་ཉི་ སོ་ད་ཕི་ཉི་ ས་ག་ངེ་ལོང་གེ་ད་སུར་ ནཱན་ཏེན་ག་དེན་གེ་ ཐ་ལེ་ག་ཆཱས་ཁེ་པ་ སེ་ཏཱན་གི་ ན་ག་སེམས་ཀ་ ཧང་ཏེན་ཙུག་པ་ཡ། 4ནཱན་གི་ ཨོ་ཉ་ས་ཁེ་པ་ མ་ཙོང་མེ་གོ་མ་ ན་ག་གི་ཝ་ཆོ༌ཝ། ཉི་ནཱན་གི་ཙོང་དེན་གེ་ ཨོ་ཉ་ཏི་རུ་བུ་ ན་ག་རང་གི༌ལ། ཉི་ལ་ ནཱན་གི་ཧང་ཨ་ཉི་ ཨུ་ཉུ་ད་བུ་ ཨ་ལེ་དག་ཉི་མི་ཝ་ཡ། ནཱན་གི་ སོ་ངོ་ག་ཏཱན་ སོ་ད་ཕི་ཝ་མང་གི་ དག་པ་ཀབ་ཉི་ དཀོན་མཆོག་ག་ཏཱན་ སོ་ད་ཕི་ཝ་གི་ལ་ཨ༌ཉི།

5ཧ་ན་ནི་ཡ་གི་ ཨོ་ཐ་བ་ ན་ཐ་ལ་ཀབ་ཉི་ རོག་ས་ག་ཐང་ཇོང་ཐཱན་ ཤི་ཝ༌ལ། ཉི་ཨོ་ཐ་ཀོར་གེ་ ན་ཐ་ཁཱན་བ་ ཐམས་ཅན་རང་ གནམ་མེད་ས་མེད་ ཡོང་ཁེ་ཝ༌ལ། 6ཡམ་ལང་ཚེ་བང་ནང་ཀ་ཨུ་ཉི་ རོ་ཀ་རོ་ཁེ་པ་ ཁ་ཤ་གི་ཆོམ་ཐཱན་ ཕིས་ཀ་བང་བུ་ཉི་ ཝང་ཕིན་ཐ་ཝ༌ལ།

7གཱན་དྲ་སམ་ཕང་ག་ཚི་ངེ་ རོ་ཀ་མེ་ཝག་ཙ་གི་ ཧང་ཇུང་མ་གི་ལ་སྨོ་ ཨོ་ཉ་ཀོར་གེ་ ཧང་རང་མ་སེ་ལཱན་ ཕའི་ནང་ཀ་ཤེག་པ༌ལ། 8པ་ཏྲུས་གི་ རོ་ཀ་ཇི་མ་ལ་ ཇ་ག་ཡེག་ཅོ་ ནཱན་དང་ན་ག་ཕེ་ཝག་ཙ་གི་ ས་ག་ངེ་ལོང་ཨོབ་ཏུར་ག་ ཙོང་མ་གི་ལ་སྨོ་དག༌ཉི།

ཉི་རོ་ཀི་གི་ལ་ ཨོམ་ཏུར་ག་ ཙོང་མ་གི་ལ་དག་ཉི་ ཞུ་ཝ༌ལ།

9དག་པ་ཀབ་ཉི་ པ་ཏྲུས་གི་ རོ་ཀ་གསུངས་མ་ལ་ ནཱན་དང་ན་ག་ཕེ་ཝག་ཙ་གི་ གཙོ་བོ་ག་ཐུགས་ཉིད་གེ་ རྒྱུགས་ལ་ལེ་ག་ཏུན་ཆ་ ཧང་ཏེན་དྲིག་པ་ཡ། གོད་ཅོ་ ན་ག་ཕེ་ཝག་ཙ་ ཝང་ཕི་ཁཱན་བ་ ཀོ་ར་ག༌ཅ། ཉི་རོག་ཏེ་བ་ཀི་ ནཱན་བུ་ ཕིས་ཀ་བང་བུ་ཉི་ ཝང་ཕི་ལེ་ཨ༌ཉི།

10ཨོ་ཉ་ཐྲེ་ཀེ་རང་ རོག་པ་ཏྲུས་ག་ ཞབས་ར་ག་ཐང་ཇོང་ཉི་ ཤི་ཝ༌ལ། ཉི་ཨོ་ཉ་ཡམ་ལང་བ་ ནང་ཀ་ཨོ་ཕ་ཀབ་ཉི་ རོག་ཤི་ཝ་ག་ཐོང་ཉི་ རོག་ཏེ་བ་ཀི་ རོ་ཀ་རོ་ཕིས་ཀ་ཏཱན་ བང་བུན་ཐཱན་ རོ་ཀ་ཕེ་ཝག་ཙ་ག་ར་ག་ ཝང་ཕི་ཝ༌ལ། 11ཉི་ཨོ་ཐ་ཀོར་གེ་ ན་ཐ་ཁཱན་ ཆོས་ཚོགས་དང་ བཱརའ་སོ་ངོ་བ་ ཐམས་ཅན་རང་ གནམ་མེད་ས་མེད་ ཡོང་ཁེ་ཝ༌ལ༎

རྫུ་འཕྲུལ་དང་ཡིད་ཆི་ཝ་ག་ལའི༌བ།

12སྐུ་ཚབ་བ་ཀི་ སོ་ངོ་བ་ཀ་པོང་ཀ་ རྫུ་འཕྲུལ་དང་ ཡིད་ཆི་ཝ་ག་ལའི་བ་མང་པུ་ཐུར་ མཛད་ཉི་གནང་མ༌ལ། དད་པ་ཨ་ཁཱན་བ་ ཐམས་ཅན་རང་ སོ་ལོ་མོན་ག་གཡབ་རིང་ག་ ཏབ་ཐུར་ཛོ་མ༌ལ། 13སོ་ངོ་བ་ཀི་ རོག་ཏེ་བ་ཀ་ གུས་ཞབས་ཨན་ཐཱན་རང་གི་ནེ་བུ་ དད་པ་མ་ཨ་ཁཱན་བ་ ཐུར་གི་རང་ རོག་ཏེ་བ་ཀ་དྲེ་ཀ་ ནུ་ཕེ་མར་བ༌ལ། 14ཨོ་ཉེ་རང་གི་ནེ་བུ་ ཕེ་ཝག་ཙ་དང་ མེ་ཝག་ཙ་མང་པུ་ཐུར་གི་ གཙོ་བོ་ག་དད་པ་ཨ་ཉི་ དད་པ་ཨ་ཁཱན་བ་ཀ་ སྡེ་ཚན་ག་དྲེ་ཀ་ སོ་ངོ་མང་པུ་མང་པུ་ པོན་ཉི་རང་དི་ཝ༌ལ། 15ཨོ་ཉི་ཨ་དེན་གེ་ པ་ཏྲུས་ ལམ་གེ་བྱོན་མ་ཀབ་ཉི་ རོ་ཀ་ཡོང་གི་ ནཱད་པ་ཚེ་བང་ག་ ཁེན་ཆེན་དག་པ་གི་ རོག་ཏེ་བ་ཀི་ སོ་ངོ་མར་ཁཱན་བ་ གཞུང་ལམ་ག་ཕཱན་ཐཱན་ པ་ལང་དང་ཏཱན་ག་ཐུང་ཀ་ ཐང་ཉི་ཐ་ཝ༌ལ། 16ཡ་རུ་ཤ་ལེམ་ཁོར་ཀ་ཁྲོམ་ཁོན་ཆོ་ཁཱན་ སོ་ངོ་མང་པུ་ཐུར་ ན་ཚ་ཁེ་ཉི་མར་ཁཱན་དང་ རྣམ་ཤེས་མ་ཙང་མ་བ་ཀི་ ཙུང་ཁཱན་བ་ ཉ་ག་ཤེག་ཉི་ ཉི་རོག་ཏེ་བ་ ཐམས་ཅན་རང་ དྲག་ཉི་གནང་མ༌ལ༎

སྐུ་ཚབ་བ་ཀ་ལུ་ཏཱད་པ༌ལ།

17ཉི་བླ་མ་གོང་མ་དང་ རོ་ཀ་ཕརའ་ཁེ་ལའི་ཨ་ཁཱན་ ས་དུ་ཀི་པ་ག་ཚོགས་པ་བ་ སྐུ་ཚབ་བ་ཀབ་ཉི་ གནམ་མེད་ས་མེད་ ཕྲག་དོག་ཨ་ཝ༌ལ། 18ཉི་རོག་ཏེ་བ་ཀི་ སྐུ་ཚབ་བ་ཙུང་ཐཱན་ ཡཱན་མུ་ཨ་ཝ་ཆོ་ཁཱན་ བཙོན་ཁང་ག་ཙུག་པ༌ལ། 19དག་པ་ཀབ་ཉི་ ཨོ་ཉ་ངེ་རི་ གཙོ་བོ་ག་ ཞིང་ཁམས་ག་འཐེན་པ་གི་ བཙོན་ཁང་ག་ཀོ་ཕེག་ཉི་ སྐུ་ཚབ་བ་ ཕིས་ཀ་ཤོན་ཕཱན་ཐཱན་ གསུངས་མ་ལ་ 20མཆོད་ཁང་ག་དི་ཉི་ ཐིང་ཐཱན་སོ་ངོ་བ་ཀ་ ཨོ་ཐ་ཚེ་སིང་མ་ག་ཀོར་གེ་ ཐམས་ཅན་རང་ ཡེག་ཅོ་དག༌ཉི།

21ཉི་སྐུ་ཚབ་བ་ཀི་ རོ་ཀི་གསུངས་ཁཱན་ག་ ཆ་གནས་ཐ་ཉི་ མིང་ཏེག་ཏེན་གེ་ མཆོད་ཁང་ག་བྱོན་ཐཱན་ ཡེ་ཉི་གནང་མ༌ལ།

བླ་མ་གོང་མ་དང་ རོ་ཀ་ཕརའ་ཁེ་ ལའི་ཨ་ཁཱན་བ་ཀི་ ཚོགས་འདུ་ཆི་ལུ་ ཚོགས་པེ་དེན་གེ་ ཡ་ཧུ་དི་པ་ག་ སོ་ངོ་ཆི་ལུ་བ་ ཐམས་ཅན་རང་ར་ཝ༌ལ། ཉི་སྐུ་ཚབ་བ་ རོག་ཏེ་བ་ཀ་གུབ་ཀ་ ཕ་ལེ་དེན་གེ་ སོ་ངོ་ཚེ་བང་ བཙོན་ཁང་ག་ཀུན་ཏི་ཝ༌ལ། 22དག་པ་ཀབ་ཉི་ བཙོན་ཁང་ག་ཤེག་ཉི་ གོད་པ་ཀབ་ཉི་ འགོ་དཔོན་བ་ཀི་སྐུ་ཚབ་བ་ བཙོན་ཁང་ག་མ་ཐོང་མ༌ལ། ཨོ་ཉི་ཨ་དེན་གེ་ རོག་ཏེ་བ་ ལོག་ཉི་དིན་ཐཱན་ ཞུ་ཝ་ལ་ 23ཨ་ཧ་བ་ བཙོན་ཁང་ག་དི་ཉི་ གོད་པ་ཀབ་ཉི་ བཙོན་ཁང་ཁེ་པ་ དེ་མེ་ཁེ་ཉི་ དམ་ཐ་ཝ་ཆོ༌ཝ། ཉི་བཙོན་ཁང་ཁུང་ཁཱན་བ་ ཕིས་ཀ་མ་ཀོ་ར་ག་ ཐིང་ཉི་ཆོ་ཝ་ཆོ༌ཝ། དག་པ་ཀབ་ཉི་ ཨ་ཤི་ཀོ་ཕེག་ཉི་གོད་པ་ཀབ་ཉི་ ནང་ཀ་ཨི་བི་རང་མཱན་ཆི་ཨ༌ཉི།

24བླ་མ་ཆི་ལུ་དང་ མཆོད་ཁང་ཁུང་ཁཱན་ག་ འགོ་དཔོན་གི་ ཨོ་ཐ་ཆཱས་ ན་ཐ་ལ་ཀབ་ཉི་ ཨོ་ཐ་ཚི་ངེ་ ཧང་ཇུང་མེ་གི་ས་དག་མི་ཉི་ ངང་པ༌ལ། 25ཉི་སོ་ངོ་ཐུར་ནང་ཀ་ཨུན་ཐཱན་ རོག་ཏེ་བ་ཀ་ ཞུ་ཝ་ལ་ སྙན་གསེང་ཅོ་ ན་ཤི་བཙོན་ཁང་ནང་ཀ་ ཙུག་ཁཱན་སོ་ངོ་བ་ མཆོད་ཁང་ནང་ཀ་ སོ་ངོ་བ་ཀ་ ཡེ་ཉི་ཆོ་ཝ་ལ་དག༌ཉི།

26ཉི་འགོ་དཔོན་གི་ མཆོད་ཁང་ཁུང་ཁཱན་དམག་མི་བ་ རིག་བུན་ཐཱན་ སྐུ་ཚབ་བ་ལོག་ཉི་ཕ་ཝ༌ལ། ཉི་སོ་ངོ་བ་ཀི་ རོག་ཏེ་བ་ཀ་ ལུ་ཤི་དྲོམ་དུ་དག་ཉི་ ཡོང་ཁེ་ཝ་ཨ་དེན་གེ་ རོག་ཏེ་བ་ཀི་ སྐུ་ཚབ་བ་ཀ་ཐུང་ཀ་ བང་མ་ཙོང་མ༌ལ། 27རོག་ཏེ་བ་ཀི་ སྐུ་ཚབ་བ་ནང་ཀ་ཕཱན་ཐཱན་ ཚོགས་འདུ་ཆི་ལུ་ག་གུབ་ཀ་ ཐིང་མེ་བི་ཉི་ ཉི་བླ་མ་གོང་མ་གི་ རོག་ཏེ་བ་ཀ་ དྲི་ཝ་ཇི་མ༌ལ། 28རོ་ཀི་གསུངས་མ་ལ་ ཨ་ཤི་ ན་ཧ་ཨོ་ཐ་སོ་ངོ་ག་མཚན་ག་ ཧང་རང་མ་ཡེ་དག་ཉི་ བཀའ་ན་སྒྲིང་སྒྲིང་ཨ་ཉི་ བི་ཝ་ཆོ༌ཝ། དག་པ་ཀབ་ཉི་ ན་ཤི་ཡ་རུ་ཤ་ལེམ་ ཐམས་ཅན་རང་ ཆ་པ་ཨ་ཉི་ཡེ་ཝ༌ལ། ཉི་ན་ཤི་ རོག་ཤོ་ ཨ་ཤི་ཨ་ཉི་ ཤེ་ལེ་ཙུག་པ་གི་ལ་ཨ་ཉི་ ཡེག་པེ་གོད་ལ་དག༌ཉི།

29པ་ཏྲུས་དང་ བཱརའ་སྐུ་ཚབ་བ་ཀི་ ལན་གནང་མ་ལ་ ཨ་ཤི་ཤོ་ སོ་ངོ་ག་ ཆ་གནས་ཐ་ལེ་མང་གི་ཝ་ དཀོན་མཆོག་ག་ ཆ་གནས་ཐ་ལེ་ཁེ༌ལེ། 30ན་ཤི་ ཡི་ཤུ་ཁྲིམས་ཤིང་ཐུང་ཀ་ཇཱན་ཉི་ བཀྲོངས་དེན་གེ་ ཨ་ཧ་ཕ་མ་བ་ཀ་ དཀོན་མཆོག་གི་ རོག་གཤགས་པ་གེ་ ལོག་ཉི་སྐུ་བཞེངས་ཉི་གནང༌མ། 31ཨིས་རེལ་ག་སོ་ངོ་བ་ སྡིག་པ་གེ་ལོག་པེ་ག་ གོ་སྐབས་གནང་ཉི་ ཉི་རོག་ཏེ་བ་ཀ་ སྡིག་པ་བཤགས་པ་གནང་མེ་དེན་གེ་ དཀོན་མཆོག་གི་ རོག་ རོ་ཀ་ལ་ཉོང་ལོ་ཀ་ཏཱན་ འགོ་དཔོན་དང་ སྐྱབས་མགོན་ཨ་ཉི་ ཐཱན་གནང་མ༌ཅ། 32ཉི་ཨའི་ཤོ་ ཨོ་ཐ་བ་ཀ་ འཛོམས་དཔང་གི༌ལ། ཉི་ཨི་བི་གི་ དཀོན་མཆོག་ག་བཀའ་ག་ ཆ་གནས་ཐཱན་ཅ་གི་ལ་སྨོ་ ཨོ་ཉ་སོ་ངོ་བ་ཀ་གནང་ཁཱན་ དམ་པའི་ཐུགས་ཉིད་བུ་ འཛོམས་དཔང་གི་ལ་ཨ༌ཉི།

33ཚོགས་འདུ་ཆི་ལུ་ག་ ཚོགས་པ་བ་ཀི་ ཨོ་ཐེན་ན་ཐ་ལ་ཀབ་ཉི་ རོག་ཏེ་བ་ གནམ་མེད་ས་མེད་ རོ་ཙིག་ཉི་ སྐུ་ཚབ་བ་ བཀྲོངས་མེ་ག་ སེམས་ཨ་ཝ༌ལ། 34དག་པ་ཀབ་ཉི་ ཚོགས་འདུ་ཆི་ལུ་ག་ ཚོགས་པ་བ་ཀ་པོང་ཀེ་ ཕ་རི་སི་པ་ ག་མ་ལི་ཨེལ་དག་ཁཱན་ ག་ཐིང་མ༌ལ། ཉི་རོག་ཤོ་ བཀའ་ཁྲིམས་ག་ སློབ་དཔོན་དང་ སོ་ངོ་བ་ཀི་ གནམ་མེད་ས་མེད་ཙི་ཁཱན་ སོ་ངོ་ཐུར་གི་ཝ་ཆོ་ཝ༌ལ། ཉི་རོ་ཀི་སྐུ་ཚབ་བ་ རེབ་ཀིན་ཐུར་ག་དེན་གེ་ ཕིས་ཀ་བུའི་དག་ཉི་ བཀའ་གནང་མ༌ལ། 35ཉི་རོ་ཀི་ ཚོགས་འདུ་ཆི་ལུ་ག་ ཚོགས་པ་བ་ཀ་ གསུངས་མ་ལ་ ཇ་ག་ཨིས་རེལ་ག་སོ་ངོ་བ་ ན་ཤི་ ཨོ་ཐ་སོ་ངོ་བ་ཀ་ ཧང་ཨ་ལེ་ཅམ་པ་ཅ་གི་ལ་སྨོ་ ཨོ་ཉ་ག་ཤེག་པ་ ན་ཧ་བ་རིག་པ་སྒྲིམ༌ཅོ། 36ཨོ་ཐ་གེ་གོ་མ་ ཐུ་དཱས་དག་ཁཱན་ སོ་ངོ་ཐུར་གི་ རོག་གནམ་མེད་ས་མེད་ ཆི་ལུ་གི་ལ་དག་ཉི་ ཙིན་ཆོ༌ཝ། ཉི་སོ་ངོ་ 400 ཕང་ རོ་ཀ་ཕྱག་ཞུ་ཁཱན་རི༌ཝ། དག་པ་ཀབ་ཉི་ རོག་ཤེ༌ཝ། ཉི་རོ་ཀ་སློ་མ་བ་ ཐམས་ཅན་རང་ཏོར་ཉི་ ཧང་རང་མ་ཝ་རི༌ཝ། 37ཉི་ཨོ་ཉ་ཚི་ངེ་ མི་རྩིས་ཕི་ལེ་གང་ཀ་ ག་ལིལ་པ་ ཡ་ཧུ་ད་དག་ཁཱན་ཐུར་གི་ ག་ཐིང༌མ། ཉི་རོ་ཀི་ སོ་ངོ་མང་པུ་ཐུར་ རོ་ཀ་ཕྱག་ཞུ་ཁཱན་ཅོད༌པ། དག་པ་ཀབ་ཉི་ རོག་བུ་ཤེ༌ཝ། ཉི་རོ་ཀ་སློ་མ་བ་ ཐམས་ཅན་ ཏོར་ཉི་ཇོང༌མ།

38ཨོ་ཉི་ཨ་དེན་གེ་ ཇི་གི་ ན་ཧ་ཡེག་ཅ་ ཨོ་ཐ་ཤེག་པ་བུ་ ཨོ་ཐ་སོ་ངོ་བ་ཀ་མ་ལེག་པ་ ཧང་རང་ཨ་ལེ་མ་ཁེ་ལ་ ཉི་རོག་ཏེ་བ་ཐར་ཀུན་ཏི། ཧང་ཡ་དག་ནེ་ལ་ རོག་ཏེ་བ་ཀི་ ཙམ་ཁཱན་དང་ཨ་ཁཱན་བ་ སོ་ངོ་གེ་གི་ནེ་ལ་ ཨོ་ཉ་བ་ དེན་ཐ་མ་འགྲུབ་ཕ། 39དག་པ་ཀབ་ཉི་ དཀོན་མཆོག་གེ་གི་ནེ་ལ་ ན་ཤི་རོག་ཏེ་བ་ ཕ་མེ་མར༌བ། ཨུ་ཉུ་ཨ་ནེ་ལ་ ན་ཤི་ དཀོན་མཆོག་ག་ དགྲ་ཨ་ཝ་ཆིན་མེ་དག༌ཉི།

40ཉི་ཚོགས་འདུ་ཆི་ལུ་ག་ ཚོགས་པ་བ་ཀི་ རོ་ཀི་ཞུ་ཁཱན་སྙན་གསེང་པ༌ལ། ཉི་རོག་ཏེ་བ་ཀི་ སྐུ་ཚབ་བ་ནང་ཀ་རཱན་ཐཱན་ ཀོང་མ༌ལ། ཉི་ཡི་ཤུ་ག་མཚན་ག་ སོ་ངོ་བ་ཀ་ མ་ཡེག་ཅོ་ཨ་ཉི་ བཀའ་གནང་ཐཱན་ ཐར་ཀུན་ཏི་ཝ༌ལ།

41ཚོགས་འདུ་ཆི་ལུ་ ཐུབ་ཐ་ཉི་བྱོན་ཅ་ཨ་ཉི་ དཀོན་མཆོག་གི་ རོག་ཏེ་བ་ ཡི་ཤུ་ག་མཚན་ག་ དཀའ་ཝ་ཅཱད་པེ་ག་ རུང་ཁཱན་ཨ་ཉི་ ཙི་ཝ་ཨ་དེན་གེ་ སྐུ་ཚབ་བ་ གནམ་མེད་ས་མེད་ ཤོ་ནང་ཕེ་ཝ༌ལ། 42ཉི་ནོང་དྲང་རང་ མཆོད་ཁང་དང་ སོ་ངོ་བ་ཀ་ཕའི་ཁོན་བྱོན་ཉི་ ཡི་ཤུ་ཤོ་ ཁིརིས་གི་ལ་ཨ་ཉི་ཡེ་ཉི་ ཉི་འཐེན་ལེག་པུ་བཤད་ཉི་རང་ བཞུགས་པ༌ལ༎

Àwon tá yàn lọ́wọ́lọ́wọ́ báyìí:

མཛད༌པ། 5: TNTB

Ìsàmì-sí

Pín

Daako