GENESIS 2
2
1Ano osho ngeyi egulu nevi noongundu dhago adhihe odha pu okushitwa. 2Mesiku etiheyali Kalunga sho a tsakanitha iilonga ye ayihe yeshito, okwa vululukwa. 3Kalunga nokwa yambeke esiku etiheyali e te li yapula, oshoka okwa mana eshito lye alihe nokwa vululukwa kiilonga ye.
4Ndika olyo ehokololo lyeshito lyegulu nevi, sho ga shitwa.
Eyana lyaEden
Omuwa Kalunga sho a shiti egulu nevi, 5kevi kakwa li ku na iihwa yokelundu nenge omwiidhi komalundu, oshoka okwa li inaa lokitha manga omvula, nokakwa li ngoka a longo evi, 6ihe oshimuke osha zi mevi e tali tosima.
7Omuwa Kalunga okwa kutha ontsi yevi e te yi umbu omuntu. Okwe mu fudhile ombepo yomwenyo momayulu, omuntu nokwa ningi omunamwenyo.
8Nena Omuwa Kalunga okwa toto eyana muEden, kuuzilo, nokwa langeke mo omuntu ngoka e mu shiti. 9Okwa menithile mo omiti dhomaludhi gi ili nogi ili dho opala dhokutalwa nodhokuliwa. Pokati keyana okwa menithile po omuti gwomwenyo nomuti gwokutseya uuwanawa nuuwinayi.
10Omulonga gwa tondoka muEden e tagu tutike eyana. Handiya yaEden ogwa topoka miimpanalonga ine. 11Oshimpanalonga shotango oPishon tashi tondokele moshilongo ashihe shaHavila. 12(Oshingoli shoshilongo shika oshiwanawa, noku na wo iizimba iiwanawa nomamanya gondilo.) 13Oshimpanalonga oshitiyali oGihon tashi kunkula nevi alihe lyaKush. 14Oshimpanalonga oshititatu oTigris, shoka tashi tondokele kuuzilo waAssur, noshimpanalonga oshitine osho Eufrat.
15Omuwa Kalunga okwa langeke omuntu meyana lyaEden, opo e li longe ye e li keelele. 16Okwa ti kuye: “Lya komuti kehe meyana, 17kakele komuti gwokutseya uuwanawa nuuwinayi. Iiyimati yomuti ngoka ino yi lya; ngele oto shi ningi, oto si shili.”
18Omuwa Kalunga okwa popi e ta ti: “Inashi opala, omuntu i ikalele oye awike. Otandi mu shitile omukwathi e mu opalela.” 19Okwa kutha ontsi yevi e ta shiti iinamwenyo ayihe noondhila adhihe. Ayihe okwe yi eta komuntu a tale, nkene te yi luku omadhina gayo. Osho iinamwenyo ayihe oyi na omadhina gayo, ngaashi omuntu e yi luku. 20Omuntu okwa luku iinamwenyo ayihe, oondhila adhihe niiyamakuti ayihe, ihe ini imonena omukwathi e mu opalela.
21Omuwa Kalunga okwa kotheke omuntu omposi ondhigu, nomanga a li a kotha, okwa kutha mo olupati lwe lumwe nopehala mpoka e lu kutha, okwa thitike po nontumba. 22Olupati okwe lu shiti omukiintu e te mu eta komulumentu. 23Omulumentu okwa ti: “Ndika esipa lyomomasipa gandje nonyama yomonyama yandje. Na lukwe omukiintu oshoka okwa kuthwa momulumentu.” 24Omolwashika omulumentu oku na okuthiga po he nayina e ta kwatathana nomukadhi, oyo notaa ningi omuntu gumwe.
25Omulumentu nomukiintu ayehe oya li omudhuu, ihe inaa saathana ohoni.
Àwon tá yàn lọ́wọ́lọ́wọ́ báyìí:
GENESIS 2: ONDB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Oshindonga Bible © Bible Society of Namibia, 2008.