Matiyu 20
20
Hufwa a chu be ya mochi tse, a wá enabi
1“Zǝnotì mo Ehwya no abu yagwamo kpèn akan è vǝ́ a je anofon tàtà, evǝa ge e bo be ya mochi ya a wa ye wá tse, a wá enabi mbwe ángá. 2A gè sen ara vǝ ngge be ya mochi hon jan ga kpwa be tse dinari akan nò a zǝkpe ángá, gè tson be ken a kpèn hon.
3“Tse chwen a ndwe mo anofon, gè vǝ́ a je, nè di be ya mochi efki ywano a afyan, nè bwe be mò akan anga ra. 4Gè jan be jan, ‘A nye gaten, nye ken bwe m mochi a wá enabi mam, ma kpwa nye mò a m di se me e kpwa nye ángá.’ 5Be nobǝ hon è chadwa nè ken a kpèn hon.
“Beti bishi, a nò è sen ara a kpe ngge tse ta, a nò è hwya ara ángá, gè bwe abu gé bwe ekwafya ángá. 6Abu tse chwen mo edgó, gè vǝ́ a je nè ben be nobǝ efki è ywano nè bwe be mò akan anga ra. Gè ká be eka jan, ‘Ano bwe a ge, nye ywano ana, nye no kpo nò anga kukwa?’
7“Bè janfwe ye, ‘Adia nobǝ akan cha ti ye je mochi ra ángá.’
“Gè jan be jan, ‘A nye gaten, nye ken bwe m mochi a wá enabi mam.’
8“Atan a nò è kpo ara ángá, yagwamo kpèn hon è jan chu mo be ya mochi a kpèn mbwe jan, ‘Fǝ́ be ya mochi hon dwa we kpwa be tse mochi mo be, tke a chu be ya ḿ kpu kǝn-etkyen, ti kengga a chu be ya ekwafya.’
9“Be ya mochi ya a bè kpu be mochi tse chwen mo edgó ángá, egwa egwa mo be, è cha dinari akan. 10Atan a be ya gè kwafya kpu adi mochi hon bwa ángá, bè ka anga jan tse mo be fí a tkyan. Tea bè no egwa egwa mo be dinari akan gaten. 11Abu bè cha tse hon ángá, bè chin etu ngge yagwamo kpèn hon. 12Bè jan, ‘Be ya è bwa kǝn-etkyen na, bwe mochi mo awa akan kpwà ara, o kpwa be kan esoso ngge je, ya é bwe mochi a tswa ekan, a tswa nò é fken twafǝ̀ chu ángá.’
13“Tea gè janfwe akan mo be jan, ‘Shushwa m, m bwe mbo esera ra. Jé chà sen je vǝ ngge bo jan ma kpwa o dinari akan mo mochi mo nò a zǝkpe ra? 14Cha tse mochi mbo we nya. M dgyan a me, me e no ende é bwa ekǝn-etkyen abu ḿ no o ángá. 15M fwa m ngge efwa me e bwe mò a m dgyan anga ngge tse mam ra? Eno e ra, o ngǝ engǝbgen anga a chu esese a m bwe na?’
16“Tea embo mo be ya e no chafya asuswana ángá, twabǝ bwa a no chashin, be ya e no chashin asuswana ángá, twabǝ bwa a no chafya.”
Yeso fijan adi e ta abu ga fǝ ángá
(Marku 10:32-34; Luka 18:31-34)
17Abu Yeso è nyavǝ́ a Urishelima ángá, gè fǝ́ be gwi chu fà hon dwa ken a buetkwa nè jan be jan, 18“Nye di, je nyavǝ́ a Urishelima, zǝn a a me Nwen Nobǝ, be tsǝ a du m abu mo be Ekǝ́n echa ngge be etumo mo edon ángá. Ba kpèn m kǝ́nfǝ jan be e gu m, 19na ti m a du a bu mo be ya e fwa be ya a Esǝrela ra ángá, evǝa be e fke m, be e bu m mò, na ken a fu m a chu eswafǝ. Tea tsǝnò adi e ta Ehwya a ti m a nyi etkyen a dì angǝ.”
Ebgó a ayi Yakubo ngge Yohana è bgó ángá
(Marku 10:35-45)
20Kǝnggwa gwa Zabadi, è bwa a zǝn Yeso ngge mbǝgya ndedon mbwe fà. Gè nggwa ekpanvǝ mbwe a sen nè bgó jan Yeso ne bwe ye mò akan a gè dgyan anga.
21Yeso è ká ye eka jan, “Mò a o nda anga me e bwe o ángá a ano?”
Gè janfwe ye, “M dònvǝ, gwa mbǝgya ndedon fà mam ena, akan ge e chu chá budgo mbo, akan ge chu chá buhwyá, atan a wa dwatì a tswa zǝnotì mbo ángá.”
22Yeso è jan mbǝgya ndedon fà hon jan, “Nye yi nye mò a nye bgó anga ra. Nye ngǝ a ti mò a tswa kǝnggwe ekan a ma ngǝ ángá?”
Bè janfwe ye, “Je ngǝ a ti.”
23Gè janfwe be, “Eshwen, nya ngǝ mò a tswa kǝnggwe mam, tea adi echum chá budgo mam eno e ra chá buhwyá mam, fwa ye adi emwentì mam ra. Be zǝn hon ena, a ḿ mo be ya Àtà m è bwenyi ara be ángá.”
24Atan a be etsonchi gwi ya è dan è fo enò ángá, be bgen tsuruku àywá ngge be nwenjwa fà hon. 25Yeso è fǝ́ be etsonchi gwi chu fà hon dwa fǝn a zǝn akan, nè jan, “Nye yi jan be chutì mo ya e yi be Ehwya ra, tswa ya be dwatì no a chu be ángá, ekan anga. Be nobǝ echa mo be, tú emwentì anga a chu be. 26Tea a engga mo nye ge e no ye enò ra. Ende e dgyan anga ge e no nobǝ echa a engga mo nye, ge no kenm, ga no ende a bwe be nobǝ mochi ángá. 27Ende e dgyan anga ge e no chu a engga mo nye, ge no kenm ga no fí mo nye. 28Abu a me, Nwen Nobǝ hon, m̀ bwa m evǝa be e bwe m mochi ra, tea me e bwe be nobǝ mochi ngge me e ti nya mam e no, evǝa me e ti e vǝ́ be nobǝ embo.”
Yeso matswa be ndedon fà ya fǝzǝn ebwibwi
(Marku 10:46-52; Luka 18:35-43)
29Abu Yeso ngge be ya è ba ye anga è nyagwa eten a Jeriko anga, be nobǝ embo è ba ye. 30Be ndedon fà ya fǝzǝn ebwibwi è chuno a buetkwa mo efǝ. Abu bè fo jan Yeso ne twafǝ̀ nyaken a ge ángá, bè tandwa jan, “Nwen mo Dawuda, Etsodwe, di ashi mo je.”
31Be nobǝ embo hon è tkyá be etkya nè jan be e kpo nya. Tea bè tàngǝ́shi dwa jan, “Nwen mo Dawuda, Etsodwe, di ashi mo je.”
32Yeso è ndnya nè fǝ́ be dwa bwa a zǝn ye. Gè ká be eka jan, “Ano a nye nda anga me e bwe nye?”
33Bè janfwe ye, “Etsodwe, je dgyan anga we fki fǝzǝn mo je evǝa je e di zǝn.”
34Yeso è di ashi mo be nè yi bu a fǝzǝn mo be. Kè akan, bè diben zǝn nè ba ye.
Àwon tá yàn lọ́wọ́lọ́wọ́ báyìí:
Matiyu 20: ICH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 Luke Initiative for Scripture Translation