Marku 1
1
Moetum mo Yohana ya Batisǝma
(Matiyu 3:1-12; Luka 3:1-18; Yohana 1:19-28)
1Ena a abu Fwa Esese a chu mo Yeso Kristi Nwen mo Ehwya, è tke ángá. 2Ge no ebam adi afketa mo efojan Eshaya jan,
“Ma tson etsonchi mam a kwafya mbo
nwene e bwe a se o efǝ mbo ángá.”
3“Ge no ebam efwe jan,
be nobǝ fo aken mo ende akan a
tswa ehwen jan anga,
‘Bwese efǝ nyi Yeso Etsodwe hon,
bwe ywa be efǝku mbwe hon ju nyi ye.’ ”
4No enona, Yohana ya Batisǝma è mbwibwa a tswa ehwen nè no du edgon a chu Fwa Esese mo Ehwya anga jan ne be nobǝ be e twa etwa mo be ebgen mo be, evǝa ge e bwe be batisǝma ngge Ehwya gwa a no be be ebgen mo be. 5Be nobǝ embo chá efa mo Yahudiya ngge Urishelima è ken a zǝn ye. Bè no janvǝ mo be a anga a chu ebgen mo be a bè bwe Ehwya, ngge Yohana è bwe be batisǝma a tswa Kǝn a Joda. 6Yohana è nggwa bwi mokàn a bè bwe ngge fǝfǝ mo gwemo a be fǝ́ anga rakumi. Gè tè bwi kanda a bè bwe ngge kpumo ángá a chin mbwe, mode mbwe è no embǝgwa ngge ngǝ̀ mo ju. 7Ena a edgon a gè du anga, “Ende akan nyabwa chashin mam, ge chakpo twafǝ̀ m. M chà kǝn m me e hò a sen evǝa me e fken dgomo mo kpumo a tkyafù mbwe ra. 8M bwe nye batisǝma ngge mbǝ, tea a ge ga bwe nye batisǝma ngge Engǝ́ Echanwenwen.”
Abu bè bwe Yeso Batisǝma ángá
(Matiyu 3:13—4:11; Luka 3:21-22; 4:1-13)
9Adi be tsǝnò hon, Yeso è vǝ a Nazarati a sǝnsen mo Galili bwa, Yohana è bwe ye batisǝma a tswa Kǝn a Joda. 10Abu Yeso è nyagwa a je a kǝn hon ángá, gè di kpe è fkigwa, Engǝ́ Echanwenwen è no nyashwa ye a ju abu eba. 11Kǝnggwa aken è shwa chá kpe jan, “A bo wa Nwen m, m dgyan o àywá, ngge m fo etkwa mbo.”
Abu Shetan è mbwadi Yeso ángá
12Kǝnggwa Engǝ́ Echanwenwen hon du ye ken a tswavǝ́n. 13Gè no a tswavǝ́n hon mo be tsǝnò gwi ndwe, Shetan è no mbwadi ye anga. Be nobǝ è fwa be a zǝn ra, kpwà be gwemo a tswavǝ́n, ngge be maleka mo Ehwya è bwa no dgon ye anga.
Yeso è fǝ́ be etsonchi ekwafya dwa
(Matiyu 4:12-22; Luka 4:14-15; 5:1-11)
14Chashin a bè twa Yohana ya Batisǝma no a àtá ehwyatu ángá, Yeso è ken a Galili nè no du edgon a chu Fwa Esese mo Ehwya anga. Ge jan, 15“Engga bwa ara, zǝnotì mo Ehwya bwa tén ara, twa etwa mo ebgen mo nye, ngge nye e tsǝ́ekǝ̀n a chu Fwa Esese hon.”
16Abu Yeso è no ken anga a buetkwa mo edan a Galili ángá, gè di be ya gwejo efum, Sima ngge nwenjin ye Andoro è no nggwa acha shi anga a tswa edan hon evǝa be e fu gwejo. 17Ge jan be jan, “Nye bwa ba m, ma bwe nye nya nga ya a fǝ́ m be nobǝ dwa.” 18Kè akan bè gwa acha mo be nè ba ye.
19Atan a gè ken bishi chafya ángá, gè di Yakubo nwen Zabadi ngge nwenjin ye Yohana a tswa ngga no bwese acha mo be anga. 20Myan myan, gè fǝ́ be dwa, bè gwa ate be Zabadi ngge be ya mochi mo be, nè ba ye.
Yeso è nyonvǝ́ engǝ́ esera a ju nobǝ akan
(Luka 4:31-37)
21Yeso ngge be ye è ba ye anga è ken a Kapanahum. Kǝnggwa Nò nya Etkem, Yeso è kwashi a àtá chuefǝnm, nè kwa ara moetum. 22Be nobǝ è tàn ebwikpe adi moetum mbwe, adia gè tú be mò hon abu ende e no ngge emwentì, fwa ye abu be etumo mo edon ra. 23Ende akan nwene è no ngge engǝ́ esera, è no a tswa àtá chuefǝnm hon, kè akan, gè tandwa jan, 24“Mò a o nda anga a zǝn je ángá a ano, Yeso ya a Nazarati? O bwa we tkò je? M yi ende hon a o no anga, wa Nobǝ Echanwenwen, Akan hon mo Ehwya.”
25Yeso tén ye dgyén ngge echakpo jan, “Kpo nya. Gwa a je a ju ye.” 26Kǝnggwa engǝ́ esera hon è zon ye ngge echafǝju kposhi a sen, nè gwa a je a ju ye ngge dwa etànm.
27Be nobǝ binbin è tàn ebwikpe àywá nè no ká so eka anga jan, “Mo ena a ano? Moetum efwe ngge emwentì. Ge kpon èé be engǝ́ esera dgyén, be tse ye.” 28Etkyen a chu Yeso è kpò myan myan kwa gu efa mo Galili.
Yeso è matswa be ya modwa embo
(Matiyu 8:14-17; Luka 4:38-41)
29Atan a bè nyagwa àtá chuefǝnm hon ángá, Yeso è kpu Yakubo ngge Yohana twa e ge, bè ken a mbwe be Sima ngge Andoro. 30Gwe Sima ndegwa è dwano a sen adi edgye, kè akan be nobǝ ya ehwyà è jantu Yeso fwa a chu ye. 31Yeso è ken a zǝn ye nè fu ye bu nè vǝ ye chu etkyen, edgye hon è gwa ye. Gè ken bwe mode no be.
32Edgó nò eni, a nò è kpo ara ángá, be nobǝ kpu be ya modwa embo ngge be ya è no ngge be engǝ́ esera ángá bwa a zǝn Yeso. 33Be nobǝ a tswa eten hon è fǝnno gu a fǝehwen mo mu hon a Yeso è no a ángá, 34Kǝnggwa Yeso matswa be nobǝ embo ya è no ngge be modwa echu echu ángá nè nyonvǝ́ be engǝ́ esera àywá a ju be nobǝ. Gè cha ye dwa be engǝ́ esera hon be e jan fwa ra, adia bè yi ara ende a gè no ángá.
Yeso ken bgó ebgo a zǝn a nobǝ è fwa be ra
(Luka 4:42-44)
35Akǝndon, a zǝn è chà nggacha ye ra, Yeso è nyi etkyen nè vǝ́ a je, nè ken adi zǝn a be nobǝ è fwa be ra, a zǝn, gè bgó ebgo. 36Kǝnggwa Sima ngge be shushwa ye è kwa ara ye etkundam. 37Atan a bè di ye ángá, bè jan, “Be nobǝ binbin tkunda o anga.”
38Tea Yeso è jan be, “Je e ken chá be eten efki abu me e jan be Fwa Esese gaten. Eni a mò e bwe m bwa ángá.” 39Gè tkukwa gu be efa mo Galili nè no jan Fwa Esese mo Ehwya anga a tswa be àtá chuefǝnm ngge be engǝ́ esera enyonvǝ́m a je a ju be nobǝ.
Yeso matswa ya modwa-ehwyá
(Matiyu 8:1-4; Luka 5:12-16)
40Ende akan, ya modwa-ehwyá, è bwa hò a sen chafya mo Yeso nè bgó ye jan, “Ano o dgyan anga, o bwe a ti m, me e no enachacha.”
41Ashi è mbo Yeso tsuruku, gè ywa bu yi ya modwa hon a ju, nè jan, “M dgyan anga, cha ematswam.” 42Kè akan modwa-ehwyá hon gwa ye, ge ben ematswam.
43Kǝnggwa, kè akan Yeso è du ye efǝ, nè twa ye echa echakpokpo jan, 44“Di jan, we jan mbo nobǝ akan fwa ena ra, tea ken tú chu o a zǝn ekǝ́n. We no mò etinom hon abu edon mo Mosa è jan ángá, ti e tú be nobǝ jan o ben ara ematswam.” 45Tea nobǝ hon è vǝ́ a je nè kwa ara be nobǝ embo fwa ejantum mo mò e bwe ngge ge ángá. Enona, Yeso è cha ye dwa ge e kwashi a tswa be nobǝ embo enggasansan ra. Tea gè no m̀ mbwe chá je mo eten efifi hon a zǝn nobǝ è fwa be ra ángá. Bi adi enó, be nobǝ e vǝ chagwa chagwa nè no bwa anga zǝn ye.
Àwon tá yàn lọ́wọ́lọ́wọ́ báyìí:
Marku 1: ICH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 Luke Initiative for Scripture Translation