Marku 3
3
Yeso matswa ya bu engǝfǝfǝ Nò nya Etkem
(Matiyu 12:9-14; Luka 6:6-11)
1Nò nya Etkem efki, Yeso è ken kwashi a àtá chuefǝnm akan mo ya a Yahuda efwe, nobǝ akan a bu mbwe è ngǝfǝ ara ángá, è no a zǝn. 2Be nobǝ ya ehwyà e nda efwa anga be e fu Yeso ngge edan. Bè no dise ye anga ano ge ma a tswa ya modwa hon Nò nya Etkem. 3Yeso è jan ya bu engǝfǝfǝ hon jan, “Bwa ywa etkyen a chafya mo be nobǝ binbin.”
4Kǝnggwa, Yeso è ká be nobǝ hon eka jan, “Mò a edon a Ehwya è no Mosa cha je dwa je e bwe Nò nya Etkem ángá a ano, je e bwe esese nè, je e bwe esera, be dgon nya ne, be gu nó?” Tea bè jan di be ye a vǝ ra.
5Gè fǝnshwa nè di ngàhwya gu be a tswa tsuruku efkum ngge nya ebgenm àywá adi chu echam mo be. Kǝnggwa gè jan ya bu engǝfǝfǝ hon jan, “Ywa bu mbo,” Gè ywa bu hon, bu hon è twanga bwa gu esese ngge echafǝju. 6Kè akan be Farisi è vǝ́ a je nè kwa ara fuchin etem ngge be ya è dgyan Tì Hiridu anga abu be e gu Yeso.
Be nobǝ embo è ken a zǝn Yeso
7Kǝnggwa Yeso è gwa zǝn hon ngge be etsonchi mbwe ken a edan a Galili hon, be nobǝ embo è ba ye. Bè vǝ chá be sǝnsen mo Galili, Yahudiya, 8eten a Urishelima, sǝnsen mo Idumiya ngge chá notà mo Kǝn a Joda, èé be ya chá adabonbon mo chá mo Kpan abu Taya ngge Sidon, bwa. 9Adia be nobǝ è fifi re ángá, gè jan be etsonchi mbwe jan ne be e ti ngga nwofyan akan e bwa e nyi e bà shi ye, afwa be nobǝ hon a fa ye. 10Yeso è jan enò, adia ge matswa ara be nobǝ embo, ngge be ya modwa efki è no tsǝ sojube bwa anga tenten ngge ge abu be e yi ye a ju. 11Abu atan engǝ ra, a be ya engǝ́ esera è no be ju è di ye ángá, engǝ́ esera hon è du be, be kposhi a sen a chafya mo Yeso nè no zon ju be anga, ngge dwa etànm jan, “A bo wa Nwen mo Ehwya hon.” 12Tea ge twa be engǝ́ esera hon echa echakpokpo jan be e jan be nobǝ akan ende a ge no ángá ra.
Yeso è swa be nobǝ gwi chu fà be e no be etsonchi mbwe
(Matiyu 10:1-4; Luka 6:12-16)
13Beti bishi, Yeso è tonvǝ́ a buetkwa mo hwì nè fǝ́ be ya gè nda anga dwa, kǝnggwa bè bwa a zǝn ye. 14Gè swa be nobǝ gwi chu fà nè du be be e no be etsonchi mbwe. Gè jan ba no anga ngge ge abu ga tson be be e ken jan be nobǝ Fwa Esese mo Ehwya, 15ngge ga no be echakpo a be ti nyo a vǝ́ be engǝ́ esera. 16Ena a ti mo be etsonchi gwi chu fà hon,
Sima (nwone a ge tso nó ti Bitru ángá),
17Yakubo ngge Yohana be mbǝgya ndedon mo Zabadi (ya a gè tso be ti jan Boanaji, tú anga jan, “mbǝgya ndedon mo Chukpondgyen”),
18Andoro,
Filibu,
Batolomi,
Matiyu,
Toma,
Yakubo nwen Alfiyu,
Tadiyu,
Sima (a chifǝ eten),
19ngge Yahuda Eskariyoti nwone è bwa tsǝ du Yeso ángá.
Be nobǝ è jan Yeso no ngge Bayezebu a ju ye
(Matiyu 12:22-32; Luka 11:14-23; 12:10)
20Kǝnggwa Yeso è kwashi a mu akan, efwe efim mo be nobǝ ya è fǝnno a zǝn ángá è bwe Yeso ngge be etsonchi mbwe ben be efwa mo mode edem ra. 21Atan a be ya kpenmu mbwe è fo ara enò ángá, bè ken evǝa be e ti ara ye a zǝn adia bè ka anga jan gè fwa ye a tswa engà mbwe ra.
22Tea be etumo mo edon ya e vǝ chá Urishelima shwa ángá, è jan, “Bayezebu Tì mo be engǝ́ esera kwa ye no a ju, eni a mò e no ye echakpo ge ti nyonvǝ́ be engǝ́ esera anga.”
23Enona, Yeso è fǝ́ be etumo mo edon ngge be nobǝ dwa, bwa a zǝn ye nè kwa ara be fwa ejanm adi hufwa jan, “Bwe engǝ Shetan nyo a vǝ́ Shetan? 24Ano be ya e no adi zǝnotì akan, nggakwa ara, zǝnotì hon a dwa ye ra. 25Ano be nobǝ a tswa akanmu akan nggakwa ara, mu hon a dwa ye ra gaten. 26Ano Shetan nggakwa ara chu ye, ga no ye efwe ra, ekǝn-etkyen mbwe bwa ara. 27Ebi, ende nwene a kwashi a ti a àtá mo ya echafǝju na tso be atkimo mbwe ángá fwa ye ra, kpwà tén ge kwafya tè ara ya echafǝju hon sangǝ́, gè chà a tso kpu be atkimo mo nobǝ hon. 28Me e jan nye ebi, be gwa a no be nobǝ binbin be mò ebgen ngge ejanpin a bè jan a chu Ehwya, 29tea ende e janpin Engǝ́ Echanwenwen, be gwa a no di be ye nó ra. Be bwe ara edan a Ehwya gwa a no ye ra.”
30Yeso è jan be enò adia bè jan, “Ge no ngge engǝ́ esera a ju ye.”
Ayi Yeso ngge be nwenjwa ye
(Matiyu 12:46-50; Luka 8:19-21)
31Kǝnggwa ayi Yeso ngge be nwenjwa ye è bwangga a zǝn. Bè ywano chá je mo àtá hon nè tson ende akan e shi e fǝ́ ye dwa. 32Be nobǝ embo hon ya è ngàhwya ye no ángá, è jan ye jan, “Ayi o ngge be nwenjwa o ndedon no a je, be dgyan anga be e di o.”
33Gè ká be eka jan, “Ayi m hon ngge be nwenjwa m ndedon hon a be ara?”
34Kǝnggwa gè nggwa be ya è chu ngàhwya ye no ángá fǝzǝn a ju nè jan, “Ena a ayi m ngge be nwenjwa m. 35Adia ende e bwe be mò a Ehwya dgyan anga, a no nwenjin m ngge ayi m.”
Àwon tá yàn lọ́wọ́lọ́wọ́ báyìí:
Marku 3: ICH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 Luke Initiative for Scripture Translation