Marku 5
5
Yeso nyonvǝ́ be engǝ́ esera àywá a ju ndedon akan
(Matiyu 8:28-34; Luka 8:26-39)
1Yeso ngge be etsonchi mbwe è penyi edan hon, nè ken a efa sǝnsen mo Garisana. 2Abu bè no nyagwa a je adi ngga hon ángá, kè akan, ndedon akan è no ngge be engǝ́ esera a ju ye, è vǝ chá afkudì nyabwa, abu ge e bwa e ben Yeso. 3Ndedon hon è no anga a afkudì hon, nobǝ akan è tè ti ye ye efwe ra, èé ngge be awya. 4Bè no hwyafu bwi ye bu tangge fù anga ngge awya, tea gè no vǝten gu be awya hon nè kǝnbǝ bwi be tutse hon anga a fù mbwe. Nobǝ akan è cha kǝn ti ye kpo, ge e fu e pe ye ra. 5Ènò ngge etsǝ, nobǝ hon è no anga a engga mo be dì ngge be hwì, gè no tandwa anga nè no sen ju ye anga ngge be ten.
6Atan a gè di cha kǝn Yeso adgya ángá, gè tse fǝton nè ken nggwa ekpanvǝ mbwe chafya mo nó. 7Gè tandwa ngge echakpo n jan, “Mò a o nda anga a zǝn m ángá a ano Yeso, Nwen mo Ehwya Egǝ̀n ti ara? Fan efan adi ti mo Ehwya jan wa tswa m ekan ra” 8Adia Yeso è jan fwa ara engǝ́ esera hon jan, “Gwa a je a ju ndedon ena, a bo engǝ́ esera.”
9Kǝnggwa, Yeso è ká ye eka jan, “Ti mbo jan ara?”
Gè janfwe ye, “Ti m jan Embo adia je fí ara ángá.” 10Kǝnggwa gè no bgó Yeso anga abu ge nyo e vǝ́ ye be, a je mo zǝn hon ra.
11Atan enò, etso efifi mo be efika è de mode anga adi efa hwì tenten a zǝn hon. 12Kǝnggwa be engǝ́ esera hon è bgó Yeso jan, “Du je, je e ken a engga mo be efika ngge we gwa je e kwa a tswa ju be.” 13Gè cha be dwa, be engǝ́ esera hon è gwa a je nè ken kwa a tswa mo be efika hon. Be efika hon è kengga echo fà (2,000) bè tse ken kposhi a tón evuru mo edan hon nè tkò gu a tswa mbǝ a zǝn.
14Be ya e dgon be efika hon anga è tse kwa a tswa eten ngge be eten nwofyan ya è dwa a buetkwa ángá, nè jan be nobǝ mò è bwe ángá. Be nobǝ è vǝ́ a je nè ken a zǝn evǝa be e di mò hon è bwe ángá. 15Atan a bè bwa a zǝn Yeso ángá, bè di ende éè no ngge be engǝ́ esera embo ángá chuno a zǝn ngge mokàn esese a ju ye nè no a tswa engà mbwe, bè tse etsentsen. 16Be ya e di mò a Yeso è bwe ángá, è jan be nobǝ abu mò è bwe ngge ende éè no ngge engǝ́ esera a ju tangge mò è bwe ngge be efika hon ángá. 17Kǝnggwa be nobǝ hon è kwa ara Yeso ebgom jan ge e nya e gwa sǝnsen mo be.
18Abu Yeso è kwashi anga a tswa mo ngga ángá, ndedon hon nwene éè no ngge engǝ́ esera ángá è bgó ye jan ga ken ngge ge. 19Tea Yeso è cha ye ye dwa ra, nè jan ye jan, “Ken a mu a zǝn ya mbwe o, jan gu be, be mò a Ehwya bwe o ngge abu ge di ashi mbo anga.” 20Enona, ndedon hon è nya m̀ mbwe, nè kwa ara be nobǝ a tswa eten gwi a be fǝ́ anga Dekapoli fwa ejanm a chu mo be mò echa echa a Yeso è bwe no ye ángá. Kǝnggwa, be nobǝ binbin è tàn ebwikpe.
Yeso matswa ndegwa nè fǝ́zǝ nwen ndegwa bwa angǝ
(Matiyu 9:18-26; Luka 8:40-56)
21Atan a Yeso è penyi edan hon twabǝ vǝ́ ara jengǝ̀ chá akan efwe adi ngga ángá, be nobǝ embo è bwa fǝn ngàhwya ye atan a gè chà no a tón mo edan hon ángá. 22Nobǝ akan éè no chu mo àtá chuefǝnm akan mo ya a Yahuda, a bè fǝ́ anga Jayiru ángá, è bwa a zǝn. Abu gè di gu Yeso eno, ge nggwa ekpanvǝ mbwe a sen a chafya mbwe, 23nè bgó ye ngge tsuruku akan jan, “Nwen m ndegwa nwofyan fǝ anga. M dònvǝ, bwa tu ye bu a ju abu ge e ben ematswam ngge nya.” 24Yeso è nya ngge ge.
Be nobǝ embo è ba ye nè no fa ye anga finfin. 25A tswa mo be nobǝ embo hon, ndegwa akan è no a zǝn, a ngǝ è no vǝ́ ye anga. Atan enò, ngǝ evǝ́m hon e kengga ara je gwi chu fà. 26Gè ngǝ ara ekan àywá a bu mo be ematwa, nè gu gu ara mò a kpwabu mbwe, nè ben ye ematswa ra, tea modwa hon è tubi kpwà etubim. 27A tan a gè fo fwa a chu Yeso ángá, gè bwa chashin mbwe a engga mo be nobǝ embo hon nè bwa yi a ju mokàn mbwe, 28adia gè ka anga jan, “Ano m yi a ju mokàn mbwe kpwà ara, ma ben ematswam.” 29Kè akan, ngǝ evǝ́m mbwe hon è kǝn tén ekǝnm, gè fo a ju ye jan ge kwa ara ju ngge modwa hon.
30Kè akan, Yeso è fo jan echakpo vǝ́ ara a je a ju ye, nè bwe ara mochi. Gè twanga a tswa engga mo be nobǝ embo nè ká eka jan, “Ende e yi adi mokàn mam ángá a ara?”
31Be etsonchi mbwe jan, “O di be nobǝ embo e no fa o anga na mbo, tea o ká eka jan, ‘Ende e yi m a ju ángá a ara?’ ”
32Tea Yeso è no dise be nobǝ éè ngàhwya ye no anga, evǝa ge e di ende hon éè yi ye a ju ángá. 33Kǝnggwa ndegwa hon è yi ara mò è bwe a ju ye ángá, gè bwa hò shi a chafya mbwe, ju ye è no bu emme anga a tswa etsentsen. Gè jantu gu ye ebi mo be mò è bwe ye ángá. 34Yeso è jan ye, “Nwen m ndegwa, chaebi mbo matswa ara o. Ken a tswa adgye, ekan mbo gwa ara o.”
35Atan a Yeso chà jan fwa ngge ndegwa hon anga, be nobǝ ya ehwyà è vǝ a mbwe Jayiru chu mo àtá chuefǝnm, bwa jan ye, “Nwen o ndegwa fǝ ara, we fa mbo etumo efwe ra.” 36Tea abu Yeso è fo fwa mo be anga, gè jan Jayiru jan, “Tsen mbo etsentsen ra, tsǝ́ekǝ̀n kpwà ara.”
37Gè cha ye dwa ende akan e ba ye ra kpwà Bitru, Yakubo, ngge Yohana Nwenjin Yakubo. 38Atan a be bwangga ara a mu Jayiru ángá, Yeso è di zǝn bgen gu ara, be nobǝ è no kǝndwafǝ nè no kpedwa anga ngge dwa etànm àywá. 39Gè kwashi a tswa mu hon, nè ká eka jan, “Ano bwe a ge zǝn ena bgen no ngge dwa ekpem? Nwen hon chà fǝ ye ra, ge dwa anga dan kpwà ara.” 40Tea bè tson ye tsen.
Chashin a gè du be vǝ́ gu ara a je ángá, gè ti ate mo nwen hon ngge ayi ye ngge be etsonchi mbwe ta hon ya è no ngge ge ángá, bè kwashi a tswa àtá a zǝn a bè twà kǝn hon no ángá. 41Gè fu bu mo nwen hon, nè jan ye, “Talita kum.” (Engà mo nó jan, “Nwen ndegwa nweshan, m jan o nyi etkyen”). 42Kè akan, nwen ndegwa hon è nyi etkyen nè kwa ara kèn ekenm. (Je mbwe è no gwi chu fà.) A chu mo mò ena, be nobǝ è tsen etsentsen nè tàn ebwikpe àywá. 43Gè twa be echa echakpokpo jan be e jantu e didi be ende akan mò ena ra, nè jan be e no ye mode ge e de.
Àwon tá yàn lọ́wọ́lọ́wọ́ báyìí:
Marku 5: ICH
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 Luke Initiative for Scripture Translation