Luqasa 21
21
Budantti muxaate
(Mar. 12:41-44)
1Dure asi Xoozze Keetstsa muxaate saaxintte olodera Yesuusa dhoqi ga7i asuntsana bi7ida. 2Mahi fettii daha budantta lam77i sikkina olodera bi7i, 3«Ta yinttis turo ohine; hyanna daha budantta ubbannippa aatsii inggida. 4Akkos gayko, hyantsi asuntsi ubbanna faas yeze bazappa inggida, yezin iza fa facitippa, faas yeze yestto mulo inggida» yagayda.
Wurssutsi wode malla
(Maato. 24:3-14; Mar. 13:3-23)
5Yesuusa tamaaruntsappa fete fete Xoozze Keetsita gaama lo77ize shuchcharan asi Xoozis inggide imora lo77idanno ohinttane. 6Yezin Yesuusa, «Hyanna yin be7ize bazita ubbanna lanttikaayzara, shuchchi shuchchalla afa gimbbinttide fana hyannira attoose wode ye7oda» yagayda.
7Unttin, «Asttamaarizayo, hyanna ubbanna hyanodanna ayde? Mahi hyanna hyanodannis mallita akko?» yaga7i oocida.
8Yesuusa yaga7i unttis mahe inggida: «Balinttaame gaar naaginttote. Gaamuntsi fana, ‹Ta Kiristtoosa, wodita ukkida› yaga7ite ta suntsite ye7oda, yezin yin unttana kaallippete. 9Yin olabazin as iitatitsi si7ize wode tannippete. Yinna tiinidhii yi7odanna attaamebaz maaqqade gisho wode wurssutsita ellisii ye7oos» yagayda.
10Kaallin, «Worzha worzhalla afa, ka7itumo ka7itumolla afa denddoda. 11Damma sa7a eni7e hyanoda, gado hyargge naye bay7en dumma dumma bessa gaammada, zhashize bazin damma malla saloppa benttoda. 12Yezin hyanna ubbanna hyanodannippa tiino ta suntsiti gisho ga7i asi yinttana baytsoda aykkoda. Ayhude woosa Keetstsa firddi achchi keetstsa yinttana oloda. Kaat tiinon worzha ahizuntsii tiino yinttana kanggoda. 13Yinnan ta baz yin unttis markkidhades lo77o oge maaqqada. 14Yinnii gisho, yin oocinttize wode waaga7i mahe immade ga7i yin wozintte un7inttaame fana qoppote.#Luqa. 12:11-12 15Akkos gayko, yin morkkuntsi yinttara eqinttodesin lallodes dandda7oosse doonan cinccatitsi ta yinttis inggoda. 16Melle atto yezin, yinttana yeliduntsi, yin ishuntsi, yin iginuntsi lagguntsi yinttana aatsii inggoda. Yin giddappa feta feta wodhoda. 17Ta suntsiti gisho asi ubba tiintte yin ixinttiduntsana maaqqada. 18Yezin melle atto yezin, yin omma isintsitippa feten dhaboos. 19Mintsii dandda7ara yin, yin shemppito ashshoda.»
Yerusalaame dhabe baz
20«Yerusalaame katamita allaga wottaddarera gasintti bettezin yin bi7iko iis dhabe ukkidanno erote. 21Ye wode Yihuda yeze ubbanna derego woxxii dhabo, katamite yezuntsi yeygappa kezo, gaxare yezuntsi katama gelippe. 22Akkos gayko, hyanna xaafinttidanna folinttode gaar yinna Xoozze kushe mahize wode.#Hose. 9:7 23Sa7alla afa damma madha ye7oda, hyannen asalla afa Xoozze baadditsi ye7oda. Yinnii gisho, wodatsi maachuntsisin dhantsizuntsis bade. 24Un mashshara hyayqqoda, asi ubbanna allaga sa7a yessada. Ayhude maaqqoosse asunts wodita folinttode wontsis Yerusalaame unttara yedhinttidanno maaqqada.
As Na7ay mahi yo7oda
25«Awan, aginan, xoolinttolla afa malla benttoda. Abbappan zuluntte en7e denddidannippa sa7a yeze asi un7inttoda yirggoda.#Isa. 13:10; Hiz. 32:7; Er. 2:31; Qon. 6:12 26Salo wolqqita buqunttode gisho asi zhashmoran sa7alla afa akko yi7adyessa ga7i naagora tannoda. 27Ye wode As Na7ay wolqqaran damma bonchchoran dhonnera ye7odera un be7ada.#Dane. 7:13; Qon. 1:7 28Yinttana ashshize ukkide gisho hyanna hyanizanna folinttodes aykkize wode giiginttii eqqote, yin ommito dhoqi yiizii bo7ote» yagayda.
29Kaallin, hyannigaara ga7i aazize ohida: «Belese minxan melle minxa ubba bo7ote. 30Un aacize wode torchche ukkidanno yin erane. 31Yinnii gaara hyanna hyanizanna folinttodera yin bi7iko Xoozze ka7itumo ukkidanno erote.
32«Ta yinttis turo ohine; hyanna ubbanna folinttode wontsis hyanna yeletitsita aadhoos. 33Salon sa7an aadhoda, yezin ta qaaltta aadhoos.
34«Yikke, bore baayze yessara, ushi gaantsera yesi bazis un7inttera yin wozintta aykkinttaame gaaran yinna qammita tiirikaayzin xike fana yinttana aykaame fana naaginttote. 35Yinna qammita sa7a kumutsite yeze ubbuntsalla afa yelloda. 36Yinnii gisho, ye7ize baz ubbappa attodesin As Na7a tiintte eqqodes dandda7inttode fana ubba wode miinggi woossote» yagayda.
37Awara awara Yesuusa Xoozze Keetstsite tamaarssite, qamma qamma Shamahe Derizella afa kezii aqane.#Luqa. 19:47 38Asi ubba eza si7odes wontta gooda eego Xoozze keetstsa ye7ine.
Àwon tá yàn lọ́wọ́lọ́wọ́ báyìí:
Luqasa 21: OydaNTL
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The word for the World Ethiopia