انجیل مَتّی 3
3
یحیای تعمیددَهندَه رَهِ مسیح آمادَه اَدَکو
1بُری سال از اُندَهِ آنایا اُ شهر ناصرَه گذشت. تِی آن رازیا یحیای تعمیددَهندَه اُمَ و تِی بیابُنِ یهودیَه شُ مردم تعلیم اَدَ. 2یحیی شَگُت: «توبَه بِکنی، اَسِی که پادشاهِنِ آسِمو، نَزیکِه.» 3اَسِی که یحیی مِئِه که اِشعیای پیغامبر دربارَه‌اش اُشگُتِه:
«صدای یَک نفر تِی بیابو که کال اَکو:
”رَهِ خداوندا آمادَه آکنی!
مَسیریاشا راست آکنی!“»
4یحیی جُمَه از پشم اُشتر شُبار اَکِه و تَسمَه چرمی شُ کُمَرُش اَبَست، خوراکُش مَیگِ و عسل صَحرو هاد. 5مِ موکَوا مردم از شهر اورشلیم و کُل منطکَهِ یهودیَه، و از هَمَهِ اطراف رود اردُن اُ حَدِ یحیی اَچِدِت و 6اُ گناهیاشو اعتراف شواَکِه، و از دست یحیی تِک رود اردُن غُسل تعمید شواَگِرِت.
7ولی وَختی یحیی اُشدی که بُری از عالمِی فِرکَهِ فَریسی و صَدّوقی شُحَد داندِت تا تعمید بِگِرِت، شُ آنایا گُت: «اَی شما که از تخم و تَرَکَئِه مار هی، کِ شُ شما هشدار دَ تا از غضبی که اُندا بِگُروخی؟ 8پَ کَرِی بِکنی که معلوم بِبِه توبَه تُکِردِ. 9و خاد خوتو مَگائی: ”اَما از نَسل ابراهیم پیغامبرِم.“ اَسِی که اُ شما اَگام، خدا شَشابِه از اِ سنگیَه‌وا اَسِی ابراهیم اولاد اُ وجود بیارِ. 10حتی هَمِ آلَه هم تیشَه اُ ریشَه درختیا رَسِدِ. هر درختی که میوَه خَش نِدَ بُلِدَ اَبِه و تِی تَش بِستَه اَبِه.
11«ما اُ شما اَسِی توبَه، وَ هُو تعمید اَتام؛ ولی کسی که بعد از ما اَدا کُدرتُش از ما بِشتَئِه؛ و ما حتی لیاکَت اُمنی جِتِنیاش واسیام، آنا اُ شما وَ روح کدّوس خدا و تَش تعمید اَدَ. 12آنا چَنگَکُش اُشبارِ و خَرمانُش پاک اَدَکو و گانومُش تِک انبار جمع اَدَکو، ولی کاها تِی تَشی که هِسوَخت خاموش آنابِه اَسُخِنِه.»
غُسل تعمید عیسی
13مِ موکَوا عیسی از منطکَهِ جلیل اُ رود اردُن حَدِ یحیی اُمَ تا از آنا تعمید بِگِرِ. 14یحیی سعی اُشکِه جلووِ اِ کَرِ عیسی بِگِرِ و شُ آنا گُت: «ماهام که باید از تو تعمید بِگِرام، تو حَدِ ما اُنداش؟» 15ولی عیسی جواب اُشدَ: «بِهِر آلَه اینا بِبِه، اَسِی که اَسِی اَما وَلمِه که هَمَهِ حُکم شریعتا اَنجوم هاتِم.» پَ یحیی راضی بو. 16وَختی عیسی تعمید اُشگِرِت، تا از هُو دَر اُمَ، جِخُو آسِمونیا لِی آنا واز آبُدِت و روح خدائا اُشدی که چُنِ کَموتَری زیر اُمَ و لِی آنا شَست؛ 17و از آسِمو صدایی اُمَ که: «اِئِه پُسِ عزیزُم که بُری از آنا راضیام.»
Àwon tá yàn lọ́wọ́lọ́wọ́ báyìí:
انجیل مَتّی 3: LAB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@ 2024 Korpu Company