Ma-thi-ơ 7
7
Gruk jamrah mưnuix pakan
(Lu-ka 6:37-38,41-42)
1“Jôi jamrah thei, piêh ka khol hư klah di gok jamrah. 2#Mag 4:24.Kaywa khol hư jamrah mưnuix urang yau halei yơ khol hư lijang mưca gok jamrah yau nan, khol hư hakak ka mưnuix urang nưm halei yơ khol hư lijang mưca gok hakak vơk nưm nan. 3Habar khol hư ƀôh tahla dalam mưta dei ai, bloh gilaic ôh ƀôh gai nư dalam mưta drei? 4Habar hư hu mưda đôm thong dei ai: ‘Lôi ka dahlak mưk tahla truh di mưta xaai,’ dalam tuk gai nư jang dok dalam mưta drei? 5Hơic ra jalan adat baniai, dahlau yatha xang mưk gai nư tabiak truh di mưta drei mek, bloh mưng ƀôh pajip piêh mưk tahla truh di mưta dei ai bihu.”
6“Jôi brei ka athau dôm kaya likam, lijang jôi parah mưđet ka pabui, kađa laic nhu mưca jwak ala takai, thong payơng gaic kek hak khol hư kaic.
Likau, Dwah, Papoh
(Lu-ka 11:9-13)
7Xang likau, mưca bihu; xang dwah, mưca gōk; xang papoh, baƀang mưca pơh ka khol hư. 8Kaywa phak thei likau yơ bihu, thei dwah yơ gōk; thong thei papoh, yơ mưca baƀang bihu pơh. 9Hu thei dalam khol hư, tuk anưk drei likau tapei gilaic brei patau? 10Ngan nạn likau ikan, bloh gilaic brei ula kaic? 11Yau nan mưyah khol hư takrung nạn mưnuix jhak, dok thau brei ka anưk drei dôm kaya siam, laic haget Amư khol hư ngok thôr riga gilaic ôh brei dôm kaya siam ka dôm mưnuix likau di Bhô ô?
12 #
Lu 6:31. Ywa nan ka, pathar pathar kabha haget khol hư ưng mưnuix urang ngak ka drei, xang ngak kabha nan ka khol nhu, kaywa sani nạn hakum jakar thong panôic hôr.
Baƀang Ganik
(Lu-ka 13:24)
13Xang tamư baƀang ganik, kaywa baƀang lavah thong jalan lanưng lanôi#7:13 kaywa baƀang lavah thong jalan lanưng lanôi: Dalam tha thanôn blah vak tangin nạn kaywa jalan lanưng thong lavah. ba nao tal gruk thubang, urang tamư tak nan ka ralô. 14Dok baƀang xit thong jalan ganik ba nao tal gruk diup, mưnuix dwah bihu yơ takik.”
Ganap krưn thau ra hôr baniai
(Lu-ka 6:43-44)
15“Xang caga dôm hôr baniai, nạn dôm ra twak ao pabo mưrai thong khol hư, min gah dalam nạn mưnưng athau thing bhian kek hak. 16Khol hư krưn thau khol nhu nhơ di bingu boh khol nhu. Hu thei pek boh nho di libik rôm darôi, ngan pek boh hara libik rôm darôi nhal habiên? 17Yau nan, phun siam yơ pajiơng boh siam; dok phun jhak yơ pajiơng boh jhak. 18Phun siam ôh mưda pajiơng boh jhak, dok phun jhak lijang ôh pajiơng boh siam bihu. 19#Mat 3:10; Lu 3:9.Pathar pathar phun halei ôh pajiơng boh siam, yơ gok koh thong parah tamư apui. 20#Mat 12:33.Yau nan, khol hư mưca krưn thau khol nhu, nhơ di bingu boh khol nhu.
Ita ôh bik krưn thau khol hư
(Lu-ka 13:25-27)
21Ôh njaup pathar pathar thei đôm thong Ita laic: ‘Pô lơy, Pô lơy’, jang bihu tamư Dit Biya Thôr Riga ô; min ciêt mưnuix halei ngak tui jamal Amư Ita ngok thôr riga. 22Dalam harei nan, ralô urang mưca pathau thong Ita: ‘Pô lơy, Pô lơy! Khol dahlak krung hu ôh bhian nưmax angan Pô đôm hôr, nưmax angan Pô tiaup dôm ajin, nưmax angan Pô ngak ralô thunau crih nan ô?’ 23Tuk nan Ita bican jalang jalôi thong khol nhu laic: ‘Hơic dôm ra ngak ag, xang kadun tabiak truh di Ita, Ita ôh bik thau khol hư!’”
Xang ngak tui Panôic Pô Lingik
(Lu-ka 6:47-49)
24“Yau nan, thei pang panôic Ita thong ngak tui yơ drơh yau tha urang jag karag, darap thang drei ngok tathar patau. 25Mưyah hu hajān tuh trun, ia xwa blah mưrai, angin talơg katang, thang nan jang dang kajap, kaywa krung bihu darap ngok tathar patau. 26Dok thei pang panôic Ita, min ôh ngak tui, yơ drơh yau mưnuix gila gilit darap thang ngok cwah. 27Tuk hajān tuh trun ia xwa blah mưrai, angin talơg katang yơ thang nan mưca jalơh, rugi trak damak.”
28 #
Mag 1:22; Lu 4:32. Tuk Pô Yê-su bican dôm panôic nan bloh, bôl bhap plơng kadơng ka gruk Bhô pato pakai, 29kaywa Bhô pato ganap hu aco gon, mih ôh yau dôm gru pato adat.
Àwon tá yàn lọ́wọ́lọ́wọ́ báyìí:
Ma-thi-ơ 7: CJM2024
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 Bible Society Vietnam. All rights reserved.