ရှာန်လုကာ 8
8
အခန်း (၈)
ကိုယ်တော်ဒေကူညီသအီဘင်းအီးရှီတာတ်
1မာန်းရာတ်အစစ်ဆာမှါတ်မှါခ့်ခါ ကိုယ်တော်ယေရှုကား သာဝကရှစ်နူဘန်း ကလိန်းဟူးယောက်အတူတူ မြို့တေ၊ ထိန်တေ အနှံ့လာန်ဘန်း ဘုရားရှာန်ဘင်းသာသနာတော်အကြောင်း ဆတာန်းမလဲဒေ ဟောသကာ ဆွောန်သကာမှာ။ 2အန်ဘင်းအပြာန် ကမာရောဂါယောက် အမဲဘင်းနနူကပ်ပန်းနင်းဘင်းဟက် ကယာဟာန်းကြီးရီဘင်း အီးရှီစယ်ယာရီးဒါး ကိုယ်တော်ယောက်အတူတူ ဒီရာတ်ကြီးမှာ။ အန်ဘင်းအီးရှီတာတ်နောင်းဘေ အမဲဘင်းနနူ စစ်နူကပ်ခံဒီထှာဘင်းဟက် လွောပ်သည်ဘင်း မာဂဒလထိန်ဘင်းအီးရှီညယ်ကော်ဘင်း မာရိ၊ 3ရှာန်းပလာန်ရှာဟေရုဒ်ကျေမ်းဘင်း ကိစ္စတေဒေ စီစါန်သထှာဘင်း ခုဇပင်းအိတ် ယောဟန္နယောက် ရှုရှန္နတာတ်အပြာန် တခြားဘင်း အီးရှီကလောင်းတုံန်းရီးဒါး ပါသမှာ။ အန်အီရှီတာတ်ကား အန်တာတ်ပိုင်သဘင်း ပစ္စည်းတေယောက် ကိုယ်တော်ယေရှုယောက် တပယ့်တော်တာတ်တေ အွန်နောပ့်အီကြီးမှာ။
သတူဆက်ပင်းဆိတ်ဥပမာ
(ရှာန်မဿဲ ၁၃:၁-၉။ ရှာန်မာကု ၄:၁-၉)
4မြို့တေထိန်တေဟက် သမီဆာကလောင်းတုံန်းကား ကိုယ်တော်ယေရှုပါ စုရုံးသကြီးရီမှါခ့်ခါ ကိုယ်တော်ကား အန်တာတ်တေ ဥပမာပုဒ်အာယောက် ငှေါကာမှာ။ 5ကိုယ်တော်ကား “ပန်းနူမှါခ့်ခါ လပါးအွန်ဘင်းဆိတ်ဟော်ဝါကား ဟိန်လပါးကွာမ်းဘေ သတူတေဆက်ကူညယ် ပူလာန်ဘဲမှာ။ ဟိန်ကား သတူဆက်နာန်မှါခ့်ခါ စယ်ယာဘင်းသတူတေကား လမ်းစောက်ပေအက်နာန်ဘန်း သမီဆတာတ်ကောင်လားတေ ခံသထှာဘန်းနာ အူစိတ်ဆာတာတ် ကွန်ယုတ်ပင်းရီးဒါး ခံသထှာမှာ။ 6စယ်ယာဘင်းသတူတေကား လုံးကရှီခံသဘင်းကာစောက်ပေ အက်နာန်ဘန်း ကလွုန်တူရီဒီဒါး ဝဲကွန်းဂွန်းအလူဘင်းအတွာတ် အမှါတ်ကြီ ဆလောဘန်း ကူးလာန်ဘဲကြီးမှာ။ 7စယ်ယာဘင်းသတူတေကား စောဟားချုံနောင်းဘေ အက်နာန်ဘန်း စောဟားကလွုန်တေယောက်အတူတူ တူရီဘင်းအတွာတ် စောဟားချုံတာတ် ကာသပဲဘင်းဒေ ခံသထှာမှာ။ 8စယ်ယာဘင်း သတူတာတ်ကား ကာမဲဘင်းနေရာဘေ အက်နာန်ဘင်းအတွာတ် ကလွုန်တေတူရီဘန်း ရှရှီတေရီဒါး အဆပါတ်နူထုတ်ကွန်း ရှီကြီးမှာ” ညယ် မိန့်တော်မူသမှာ။ အန်နိမ်မိန့်သစီးမှါခ့်ခါ ကိုယ်တော်ကား “ကနားပါသဘန်း သက်ခါဘင်းသမီဆာတာတ်၊ အာရုံစိုက်သဘန်း သက်ကြီး” ညယ် ဆကလားဝါတ်ဆလာတ်တုံန်းယောက်ငှေါမှာ။
ဥပမာတေဘင်းရည်ရွယ်ချက်
(ရှာန်မဿဲ ၁၃:၁၀-၁၇။ ရှာန်မာကု ၄:၁၀-၁၂)
9စီးမှါခ့်ခါ ကိုယ်တော်ယေရှုဘင်း တပယ့်တော်တာတ်ကား ကိုယ်တော်ဒေ ဥပမာကား ဟမာန်ဒေငှေါကာတ်မှာငှေါဘင်းဒေ စိန်ယူကြီးမှာ။ 10အန်၌မှါခ့်ခါ ကိုယ်တော်ကား “ဘုရားရှာန်ကား ဟနိမ်တေ ဟိန်ဘင်းသာသနာတော် လျှို့ဝှက်နက်နဲသဘင်းအကြောင်းတေဒေ နားလည်သရန်ဘင်းအခွာမ်းတေ အီပဲဘန်းထှာမှာ။ အန်နိမ်စါန်းငှေါဒီ ငါကား ဥပမာတေဒေနပ်ပန်း တခြားဘင်းဆိတ်တာတ်တေ ဟောသကာဆွောန်သကာဘင်းအတွာတ် ကျမ်းကျိန်းနောင်းဘေ ရေးသပဲဘင်း
‘ယူဒီဒါး အကတုံန်ရန်၊
သက်ပူဒီဒါး အနားလည်သကြီးရန်’ ငှေါဘင်း အဘင်းကျမ်းကျိန်းကား ထှာရီဘန်းထှာမှာ” ညယ် မိန့်တော်မူသမှာ။
သတူဆက်ပင်းဆိတ်ဥပမာအဓိပ္ပာယ်
(ရှာန်မဿဲ ၁၃:၁၈-၂၇။ ရှာန်မာကု ၄:၁၃-၂၀)
11ကိုယ်တော်ကား ဆာတ်သဘန်း “အဘင်းဥပမာဆိုလိုသဘင်းကား အန်ဘင်းထှာမှာ။ သတူငှေါဘင်းနာကား ဘုရားရှာန်ဘင်း နှုတ်ကပါတ်တော်တေ ထှာကြီးမှာ။ 12လမ်းစောက်ပေအက်ပင်းသတူအဓိပ္ပာယ်ကား အာနိမ်သမီဆာအမျိုးတေငှေါလား ထှာမှာ။ အန်တာတ်ကား ဘုရားရှာန်ဘင်း နှုတ်ကပါတ်တော်တေဒေ သက်လူဒီဒါး အယုံကြည်သစိန်းကွန်းယောက် ကယ်တာန်သလား အခံသလူစိန်းဒင် မာရ်နတ်ကားထုတ်အီဘန်း အဆေင်နောင်းဟက် ဘုရားရှာန်ဘင်း နှုတ်ကပါတ်တော်တေဒေ လာလာန်ဘဲလား ခံသထှာဘင်း ဆိတ်တာတ်တေ ငှေါလားထှာမှာ။ 13လုံးကရှီခံသဘင်းကာစောက်ပေအက်ပင်း သတူအဓိပ္ပာယ်ကား ဘုရားရှာန်ဘင်း နှုတ်ကပါတ်တော်တေဒေ သက်ပူလူမှါခ့်ခါ မွန်းဘန်း လက်ခံသဘင်းဆိတ်တာတ်တေ ငှေါမှာ။ အန်နိမ်စါန်းငှေါဒီ အန်တာတ်ကား တကလပ်အဆပ်ခါဘင်း ကလွုန်တေနိမ် ခဏဆာယုံကြည်သကြီးဘန်း အန်တာတ်ကား ဒုက္ခတေယောက် ကတုံန်ကြီးမှါခ့်ခါ အန်တာတ် ယုံကြည်သပဲဘင်းနာတေဒေ ရပ်သကြီးရာန်ဘင်းဆိတ်တာတ်တေ ငှေါလားထှာမှာ။ 14စောဟားကလွုန်ကြားဘေ အက်နာန်ဘင်း သတူအဓိပ္ပာယ်ကား ဘုရားရှာန်ဘင်း နှုတ်ကပါတ်တော်တေဒေ သက်ပူလူဒီဒါး အဆေင်ကားထှာဘင်းတေ၊ ဆွာမ်းဘင်းနာတေယောက် လောကီစည်းစိမ်ခံစားသဘင်းတေကား ကာသပဲဘင်းအတွာတ် ဘုရားရှာန်ဘင်း နှုတ်ကပတ်တော်အတိုင်း အနင်းကြီးရန်ဘင်း သမီဆာတာတ်တေ ငှေါလားထှာမှာ။ 15အန်နိမ်စါန်းငှေါဒီ အော်ငှါဘန်း ကာမဲဘင်းနေရာဘေ အက်နာန်ဘင်းသတူအဓိပ္ပာယ်ကား ဘုရားရှာန်ဘင်း နှုတ်ကပါတ်တော်တေဒေ သက်လူစီးမှါခ့်ခါ အန်တာတ်ပင်း ဖြောင့်မတ်သဘင်း အဆေင်နောင်းဘေ မလဲကလဲပဲကြီးဘန်း ဘုရားရှာန်ဘင်းအလိုအတိုင်း နင်းကြီးဘင်းဆိတ်တာတ်တေ ငှေါလားထှာမှာ” ညယ်မိန့်တော်မူသမှာ။
ကုမ်ဟာန်းယောက်အွပ်ပဲဘင်းဝါမ်ပလုတ်
(ရှာန်မာကု ၄:၂၁-၂၅)
16ပန်းနူ ကိုယ်တော်ကား “ဝါမ်ပလုတ်တေ ဝါမ်တပ်ပန်း ကုမ်ဟာန်းယောက် ငွတ်ပန်းပဲဘင်းဆိတ် အန်နိမ်အချီ ခတာန်တွန်ဘေ ပဲဘင်းဆိတ်ညယ်အဘိုဝါး။ အန်နိမ်စါန်းငှေါဒီ ကျေမ်းနောင်းပါ ဆာန်ရီဘင်းဆိတ်တာတ်အတွာတ် ဝါမ်အရောင်တေ လူစိန်းဒင် ဝါမ်ပလုတ်တေ ဝါမ်တပ်ပင်းတိုင်စောက်ပေ ဝယ်ပဲကြီးဟာမှာ။ 17ဟမာန်တွာတ်ငှေါဘန်းတာတ်ငှေါ သန်လားအကတုံန်ဟာကွန်း ကဆွန်းပဲလားလူဘင်းနာညယ် အဘိုဝါး။ ဟာဟမဲစဲအမိန်းရှာတ်ခါကွန်း ကဆွန်းပဲလားလူဘင်းနာညယ်ရီး အဘိုဝါး။ 18အမှာတွာတ် ကနားစိုက်သဘန်းသက်ကြီး။ ဟမာန်တွာတ်ငှေါဘန်းတာတ်ငှေါ ငါဟောသကာ ဆွောန်သကာဘင်းတေဒေ နားလည်သကြီးကာတ်ပင်းဆိတ်တာတ်နင်း ဘုရားရှာန်ကား နားလည်သရန်ဘင်းတေ ပိုသောအီကူ။ အန်နိမ်စါန်းငှေါဒီ အနားလည်သကြီးကာတ်ပင်းဆိတ်တာတ်တေ ဘုရားရှာန်ကား အန်တာတ် နားလည်သပဲဘင်းနာတေဒေစဲ လာလာန်ဘဲကူ” ညယ် မိန့်တော်မူသမှာ။
ကိုယ်တော်ယေရှုဘင်းအမယ်ယောက် နရှီတေ
(ရှာန်မဿဲ ၁၂:၄၆-၅၀။ ရှာန်မာကု ၃:၃၁-၃၅)
19ကိုယ်တော်အမယ်ယောက် နရှီတာတ်ရီးဒါး ကိုယ်တော်ဒေ ကတုံန်ဒင် ဒီကြီးမှာ။ အန်နိမ်စါန်းငှေါဒီ သမီဆာပရိတ်သတ် ကလောင်းတုံန်းငှါဘင်းအတွာတ် ကိုယ်တော်ပါအထုတ်ခါ ငှါနင်းကြီးမှာ။ 20အမှာတွာတ် သမီဆာဟော်ဝါကား ကိုယ်တော်ဒေ “ကိုယ်တော်ဘင်းအမယ်ယောက် နရှီတာတ်ကား ကိုယ်တော်ဒေ ကတုံန်ကာတ်ပင်းအတွာတ် ပြာန်ဘေစပ်ပန်း ဒဲနင်းကြီးမှာ” ညယ် လျှောက်တာန်သမှာ။
21အန်နိမ်စါန်းငှေါဒီ ကိုယ်တော်ကား သမီဆာကလောင်းတုံန်းတေ “ဘုရားရှာန်ဘင်း နှုတ်ကပါတ်တော်တေဒေသက်ပန်း လိုက်နာသဘင်းဆိတ်တာတ်ကား ငါအမယ်ယောက် နရှီတေထှာကြီးမှာ” ညယ် မိန့်သမှာ။
လှိုင်းယောက်မုန်တိုင်းတာတ်ကားကိုယ်တော်ဒေ နာခံသကြီးဘင်း
(ရှာန်မဿဲ ၈:၂၃-၂၇။ ရှာန်မာကု ၄:၃၅-၄၁)
22မာန်းရာတ်ရအာမှါခ့်ခါ ကိုယ်တော်ကား ဟိန်တပယ့်တော်တာတ်တေ “အလေ အာမ်းပယ်အာပါ ယာပ်ကြီးမှါတ်” ညယ် မိန့်သမှာ။ အမှာတွာတ် အန်တာတ်ကား လှေတစ်စါန်းစောက်ပေဟယ်ဘန်း စသဘန်း ပူကြီးရီမှာ။ 23အန်နိမ် ယာပ်နင်းကြီးမှါခ့်ခါ ကိုယ်တော်ယေရှုကား အေ့ပ်ဘာတ်ပွတ်ပန်းနင်းမှာ။ စီးမှါခ့်ခါ ချတ်ချန်းငှေါနိမ် ဝဲအာမ်းဘေ မုန်တိုင်းတိုက်သည်ဘင်းအတွာတ် လှေကား ဝဲနစ်သကူနိမ်ငှါဘန်း အန်တာတ်ကား ဒုက္ခယောက်ကြုံသကြီးထှာမှာ။
24အန်၌မှါခ့်ခါ တပယ့်တော်တာတ်ကား ကိုယ်တော်ပါလာန်ဘန်း ကိုယ်တော်ဒေဆော်ပန်း “အိုးဆကြီး၊ အိုးဆကြီး အလေကား ရှီးထှာကဘန်း” ညယ် လျှောက်တာန်သဘင်းအတွာတ် ကိုယ်တော်ကား ရဲဘန်း ဝဲလှိုင်းတုံန်းတေယောက် မုန်တိုင်းတုံန်းတေ ရပ်သစိန်းဒင် အမိန့်အီရာန်မှါခ့်ခါ ချတ်ချန်း ဝဲလှိုင်းတုံန်းတေယောက် မုန်တိုင်းတုံန်းကား ငြိမ်သအက်လာန်ဘဲမှာ။ 25စီးမှါခ့်ခါ ကိုယ်တော်ကား တပယ့်တော်တာတ်တေ “ဟနိမ်ယုံကြည်သဘင်းနာကား ဟာပေကား” ညယ် စိန်ယူရာန်မှာ။ အန်နိမ်စါန်းငှေါဒီ အန်တာတ်ကား အကြီးကျယ်အံ့ဩသဘန်း စာတ်ပန်းနာ “အဘင်းဆိတ်ကား ဟာဟမဲကား။ လှိုင်းတေယောက် လေတေစဲ ဟိန်အမိန့်တေ သက်ကြီးထှာမှာ” ညယ် အချန်းချန်း ငှေါနင်းကြီးမှာ။
အမဲဘင်းနနူတာတ်တေ ငါတ်ပူဘင်း
(ရှာန်မဿဲ ၈:၂၈-၃၄။ ရှာန်မာကု ၅:၁-၂၀)
26စီးမှါခ့်ခါ ကိုယ်တော်ယောက် ဟိန်တပယ့်တာတ်ကား ဂါလိလဲပြေကမ်းပယ်အာဘင်း ဂါရစမြို့ပါ ရွက်လွာန့်သဘန်း လာန်ဘဲကြီးမှာ။ 27အန်ဘင်းဘေထုတ်မှါခ့်ခါ ကိုယ်တော်ကား လှေစောက်ဟက် ဆပ်နာန်မှာ။ စီးမှါခ့်ခါ အန်ဘင်းမြို့ဟက် အမဲဘင်းနနူ ကပ်ပန်းနင်းဘင်းဆိတ်ဟော်ဝါကား ကိုယ်တော်ပါ ဒီမှာ။ အန်အမဲဘင်းနနူ ကပ်ပန်းနင်းဘင်းဆိတ်ကား နိတ်တင် တော်ဒင်တေရီးအတော်၊ ကျေမ်းဘေရီးအနင်းညယ် ဆာန်းကျိုင်းဂူကြားဘေတေ ဟာဆုတ်ဆာတ်ပန်းနင်းဘင်းကား မှါတ်ပန်းနင်းဘန်းထှာမှာ။ 28အန်ဘင်းဆိတ်ကား ကိုယ်တော်ဒေ ကတုံန်မှါခ့်ခါ ကိုယ်တော်ဘင်း တာဟမုခ်ပေ သထူထောက်တာန်ဘန်း ဆကလားဝါတ်ဆလာတ်တုံန်းယောက် “အမြာန့်ဆုံးထှာဘင်း ဘုရားရှာန်ဆားတော်ယေရှု၊ ငါတေ ဟမာန်အွန်ကာတ်တေ၊ ငါတေအနှိပ်စာတ်သကွန်းအတွာတ် ကိုယ်တော်ဒေ တောင်းပါန်သမှာ” ညယ် လျှောက်တာန်သမှာ။ 29အာနိမ်လျှောက်တာန်သထှာဘင်းကား ကိုယ်တော်ကား အန်ဘင်းအမဲဘင်းနနူဒေ အန်ဘင်းဆိတ်ဟက် ပူလာန်ဘဲကွန်း အမိန့်အီရာန်ဘင်းအတွာတ်ထှာမှာ။ အမဲဘင်းနနူကား အန်ဘင်းဆိတ်တေ ပလန်းပလန်းငှေါနိမ် ကပ်နင်းမှာ။ အမှာတွာတ် သမီဆတာတ်ကား အန်ဘင်းဆိတ်ပင်း သဟူးတေ တာတေဒေ ဆိန်ကလာတ်ရာန်ဟာတ်တေယောက် ဟွတ်ပဲဘန်း ဒဲနင်းကြီးဒီဒါး ဟိန်ကား ဆိန်ကလာတ်ရာန်ဟာတ်တေဒေ တွပ်ပန်း သမီဆာထုတ်လားစစ်ပင်းအရပ်ပါ အမဲဘင်းနနူကော်လားဒေ ခံသထှာမှာ။
30ကိုယ်တော်ကား ဟိန်ဒေ “နာန်နာမယ် ဟာနိမ်ကော်ဒေ” ညယ် စိန်ယူမှါခ့်ခါ အန်ဘင်းဆိတ်ပေ အမဲဘင်းနနူကလောင်းတုံန်း ဆာန်ဘန်းနင်းဘင်းအတွာတ် အန်ဘင်းဆိတ်ကား “လေဂေါင်#8:30 လေဂေါင် - အမဲဘင်းနနူကလောင်းတုံန်း ကပ်ပန်းနင်းဘင်းအတွာတ် လေဂေါင်ညယ် ငှေါလားထှာမှာ။ လေဂေါင်ငှေါဘင်းနာကား ရောမစစ်တပ်ပေငှါဘင်း ကလောင်းတုံန်းငှါဘင်းစစ်သားအဖွဲ့တေ ရည်ရွယ်သလားထှာမှာ။ လေဂေါင်တပ်စုတစ်စုဘေ စစ်ဆားလေးထောင်ယောက် ခြောက်ထောင်းကြားဘေငှါမှာ။ထှာမှာ” ညယ် ပြန်သဘန်း လျှောက်တာန်သမှာ။ 31အန်ဘင်းအမဲဘင်းနနူတာတ်ကား အန်တာတ်တေ အမဲဘင်းနနူတေဒေ အပြစ်အီဘင်း အကြီးကျယ်ထိန်ဘင်း သော်ဟွာန်နောင်းပါ အဆာတ်ကွန်း တောင်းပန်သကြီးမှာ။
32အန်၌မှါခ့်ခါ ဝါတ်အဆာန်းတစ်ဆာန်းကား ကုန်းရှရှာစောက်ပေ ယုတ်ပန်းနင်းကြီးမှာ။ အမှာတွာတ် အန်ဘင်းအမဲဘင်းနနူတေကား ဝါတ်တာတ်နောင်းဘေ ဆာန်လူကွန်း ကိုယ်တော်ဒေ တောင်းပန်သကြီးဘင်းအတွာတ် ကိုယ်တော်ရီးဒါး အခွာမ်းအီရာန်မှာ။ 33အမဲဘင်းနနူတာတ်ရီးဒါး အန်ဘင်းသမီဆာဟက်ပူဘန်း ဝါတ်တာတ်ပါ ဆာန်လာန်ဘဲကြီးမှာ။ စီးမှါခ့်ခါ အန်ဘင်းဝါတ်အုပ်တစ်အုပ်လုံးကား ကမ်းပါးတစ်လျှောက်ပေငှါဘင်း ဝဲအာမ်းနောင်းပါ ဝါးဆပ်ပန်း ဝဲနစ်သလာန်ပဲကြီးမှာ။
34အန်၌မှါခ့်ခါ ဝါတ်ပူဘင်းဆိတ်တာတ်ကား အန်ဘင်းထှာရီဘင်းနာတေဒေ ကတုံန်ငါန်မှါခ့်ခါ ကာတ်လာန်ပဲကြီးဘန်း အန်ဘင်းဆတာန်းတေ အန်တာတ်ပင်းမြို့ယောက် အန်တာတ်မြို့ပတ်ပတ်လည်ဘေငှါဘင်း ထိန်တေပါ လာန်ဘန်းငှေါကြီးမှာ။ 35သမီဆတာတ်ကား အန်ဘင်းအဖြစ်အပျက်တေ ကတုံန်ရန်ကွန်း မြို့နောင်းဟက်ပူကြီးရီမှာ။ အန်တာတ်ကား ကိုယ်တော်ယေရှုပါ ထုတ်ကြီးရီမှါခ့်ခါ အမဲဘင်းနနူပူလာန်ဘဲစီးဘင်းဆိတ်ကား နိတ်တင်တော်ဒင်တေတော်ဘန်း ကိုယ်တော်ယေရှုဘင်းတာဟမုတ်ပေ မလဲအတိုင်းထုံးဘန်းနင်းဘင်းနာတေ ကတုံန်ကြီးမှါခ့်ခါ အန်တာတ်ကား ကိုယ်တော်ယေရှုတေ အကြီးကျယ် စါတ်ပန်းနင်းကြီးရာန်မှာ။ 36အန်ဘင်းအဖြစ်ပျက်တေဒေ ကိုယ်တိုင်ကတုံန်ရာန်ဘင်းဆိတ်တာတ်ကား သမီဆတာတ်တေ အမဲဘင်းနနူကပ်ခံသထှာဘင်းဆိတ် ဟာနိမ် ကယာရာန်ဘင်းနာတေ ငှေါကာကြီးမှာ။ 37အန်၌မှါခ့်ခါ ဂါရစမြို့ပိုက်ပင်းအရပ်တေဟက် ဒီကြီးဘင်းသမီဆာတာတ်ကား အကြီးကျယ်စါတ်ပန်းနင်းကြီးရာန်ဘင်းအတွာတ် ကိုယ်တော်ယေရှုတေ အန်တာတ်ဟက်ပူလာန်ဘဲကွန်း တောင်းပါန်သကြီးမှာ။ အမှာတွာတ် ကိုယ်တော်ယေရှုရီးဒါး တပယ့်တော်တာတ်ယောက်အတူတူ လှေစောက်ပေဟယ်ဘန်း အန်ဘင်းအရပ်ဟက် ပူလာန်ဘဲကြီးမှာ။
38ကိုယ်တော်ယောက် တပယ့်တော်တာတ် အပူလာန်ဘဲကြီ အမဲဘင်းနနူကပ်ပင်းဟက် လွောပ်သလာန်ဘဲဘင်းသမီဆာကား ကိုယ်တော်ယောက်အတူတူ ဒီရာတ်ကူညယ် တောင်းပါန်သမှာ။ အန်နိမ်စါန်းငှေါဒီ ကိုယ်တော်ကား 39“နာန်ကျေမ်းပါလာန်ဟာန်းဘန်း နာန်စောက်ပေ ဘုရားရှာန်အွန်အီရီဘင်းနာ ဆွန်ကွန်းတေ သမီဆာ၌တိုင်းတေ ငှေါကာရာန်” ညယ် မိန့်သဘန်း ဟိန်ဒေ တာတ်ခါန်းငါန်မှာ။ စီးမှါခ့်ခါ ဟိန်ရီးဒါး လာန်ဟာန်းဘန်း ဟိန်ဘေ ကိုယ်တော်ယေရှုအွန်အီရီဘင်းတေဒေ မြို့အနှံ့ငှေါကာမှာ။
ယာဣရုဆအိတ်ယောက် ကိုယ်တော်ဆာန်ဆုန်တေ ထိတာန်ဘင်းအီးရှီ
(ရှာန်မဿဲ ၉:၁၈-၂၆။ ရှာန်မာကု ၅:၂၁-၄၃)
40စီးမှါခ့်ခါ ကိုယ်တော်ယေရှုကား အာမ်းအန်းကမ်းပါ ထုတ်ခါန်းရီမှါခ့်ခါ ဟိန်ဒေဒဲနင်းကြီးဘင်း သမီဆတာတ်ကား ကိုယ်တော်ယေရှုတေ ဒဲဘန်းလာပ်သနင်းကြီးမှာ။ 41စီးမှါခ့်ခါ ယာဣရုညယ်ကော်ဘင်း ဓမ္မာရုံတာဝန်ခံဟော်ဝါကား ကိုယ်တော်ပါထုတ်အီဘန်း ကိုယ်တော်တာပိုင်းဘေ သထူထောက်သဘန်း ကိုယ်တော်ဒေ ဟိန်ကျေမ်းပါ ကြွဒီကွန်းအတွာတ် တောင်းပါန်သမှာ။
42ဟမာန်တွာတ်ငှေါဘန်းတာတ်ငှေါ ဟိန်ဘင်း ရှစ်နူဘန်းကလိန်းပီးအရွယ် ဟော်ဝါဆာငှါဘင်း ဟိန်ဆအိတ်ကား ရှီးကူနိမ် ငှါနင်းဘင်းအတွာတ်ထှာမှာ။ အန်ဘင်းကျေမ်းပါ ကြွသမှါခ့်ခါ သမီဆာကလောင်းတုံန်းရီးဒါး ကိုယ်တော်ပတ်ပတ်လည်ဘေ ဝိုင်းသဘန်းတိုးသကြီးဆွန်နီမှာ။ 43အန်ဘင်းသမီဆာတာတ်နောင်းဘေ ရှစ်နူဘန်းကလိန်းပီး ဆယ်ဆပ်ပင်းရောဂါ ထှာနင်းဘင်း အီးရှီဟော်ဝါရီးဒါး ငှါနင်းမှာ။#8:43 မောရှေပညတ်ကျမ်းဘေ ဆယ်ဆပ်ပင်းရောဂါ ထှာနင်းဘင်းဆိတ်တာတ်တေ အသန့်ရှင်းသဝါးညယ် လာယုတ်ပင်းအတွာတ် ဟာဟမဲတေစဲ ထိသလားအလူဝါး။ ဟာဘင်းနာတေစဲ ထိသလားအလူဝါး။ ဝတ် ၁၅:၁၉-၃၀ အန်ဘင်းအီးရှီကား ဟိန်ဘေငှါဘင်းဖူးတေဒေနပ်ပန်း အုတ်ဆရာကြီး ကလောင်းတုံန်းယောက် ကုသဒီဒါး#8:43 စယ်ယာဘင်းကျမ်းတေဘေကား ဟိန်ပိုင်သဘင်း ဖူးတေဆွုန်ကွန်း အုတ်ဆရာကြီးကလောင်းတုံန်းယောက် ကုဒီမှာငှေါဘင်း ကျမ်းကျိန်းကား အကာပဲရား။ ဟာဟမဲစဲဒါး ဟိန်ရောဂါကယာကွန်း အကုသအီရန်နား။ 44အန်ဘင်းအီးရှီကား ကိုယ်တော်ဟလိန်းပိုက်ပါ ထုတ်ကွန်းလာန်ဘန်း ကိုယ်တော် တော်ဘန်းပဲဘင်း ပြာန်ဘင်းဆာန်ဆုံတေ သဟူးယောက် ထိတာန်ဆယောက် ချတ်ချန်းညယ် ဟိန်ဆယ်ဆပ်ပင်းရောဂါကား ကယာရာန်မှာ။
45အန်၌မှါခ့်ခါ ကိုယ်တော်ကား “ငါတေ ဟာဟမဲထိဒီတေ” ညယ် စိန်ယူရာန်မှာ။ သမီဆတာတ်ရီးဒါး အန်တာတ်အထိသဝါးညယ် ငြာမ်းသကြီးမှာ။ အန်၌မှါခ့်ခါ ပေတရုကား “အိုးဆကြီး၊ ကိုယ်တော်ပတ်ပတ်လည်ဘေ သမီဆာကလောင်းတုံန်းကား တိုးကျိတ်သပန်းနင်းကြီးမှာ” ညယ် လျှောက်တာန်သမှာ။
46အန်နိမ်စါန်းငှေါဒီ ကိုယ်တော်ယေရှုကား “ငါတေ ဟော်ဝါးဟော်ဝါ ထိတာန်မှာ။ ဟမာန်တွာတ်ငှေါဘန်းတာတ်ငှေါ ငါဟက်တန်ခိုးတေ ပူလာန်ဘဲမှာငှေါဘင်းနာဒေ ငါမိန်းရှာတ်ခါဘင်းအတွာတ်ထှာမှာ” ညယ် ငှေါမှာ။
47အီးရှီကား အန်ဘင်းဒေ ကတုံန်မှါခ့်ခါ အအွတ်ပဲရန်ဘန်းနာ စါတ်ကားဆန်သဘန်း ကိုယ်တော်မန်းဘေ တထူထောက်တာန်ဘန်း ဆာန်ဆုန်တေ ထိတာန်ဘင်းယောက် ဟိန်ရောဂါချတ်ချန်း ဟာနိမ်ကယာရာန်ဘင်းတေ သမီဆတာတ်မန်းဘေ ငှေါကာမှာ။ 48အန်၌မှါခ့်ခါ ကိုယ်တော်ကား အန်ဘင်းအီးရှီဒေ “ဆအိတ်၊ နာန်ယုံကြည်သဘင်းနာကား နာန်ရောဂါဒေ မဲဟာန်းစိန်းလားထှာမှာ။ ငြိမ်းငြိမ်းချမ်းချမ်း လာန်ဟာန်းစိတ်” ညယ် မိန့်သမှာ။
49ကိုယ်တော်ယေရှု အန်နိမ်မိန့်သနင်းမှါခ့်ခါ ယာဣရုကျေမ်းဟက် သမီဆာဟော်ဝါ ထုတ်အီဘန်း ယာဣရုတေ “နာန်ဆအိတ် ရှီးပါန်၊ အိုးဆကြီးဒေ ဆာတ်သဘန်း အနှောက်ယှက်သဆိတ်” ညယ် ဒီဘန်းငှေါမှာ။
50အန်ဘင်းတူးဒေ ကိုယ်တော်ယေရှုသက်ပူမှါခ့်ခါ ယာဣရုတေ “အစာတ်ဆာ။ ယုံသဘန်းနာဆာပဲ။ ဟိန်ပြန်သဘန်း နင်းမဲဟာန်းရီကူ” ညယ် မိန့်သမှာ။
51စီးမှါခ့်ခါ ကိုယ်တော်ကား ယာဣရုကျေမ်းပါ ထုတ်မှါခ့်ခါ ဟိန်ယောက်အတူတူပေတရု၊ ယောဟန်၊ ယာကုပ်ယောက် အီးရှီရှာအမယ်ယောက် အဝါတာတ်ဟက်လွဲသဘန်း ဟာဟမဲတေစဲ ကျေမ်းနောင်းဘေ အဆာန်စိန်းယုတ်အား။ 52အန်ဘင်းဘေငှါဘင်း သမီဆာ၌တိုင်းကား အန်ဘင်းအီးရှီရှာအတွာတ် အကြီးကျယ်အဆေင်အမဲငှါဘန်း ဟပ်ပန်းနင်းကြီးမှာ။ အန်နိမ်စါန်းငှေါဒီ ကိုယ်တော်ကား “အဟပ်ကြီးဆာ၊ အဘင်းအီးရှီရှာကား အရှီးနွန်း။ ဟိန်အေ့ပ်နင်းလားထှာမှာ” ညယ် မိန့်တော်မူသမှာ။
53သမီဆာတာတ်ကား အန်ဘင်းအီးရှီရှာ ရှီးဘန်းငှေါဘင်းနာတေ မိန်းရှာတ်ခါပဲဘင်းအတွာတ် ကိုယ်တော်ဒေ နီးကြီးမှာ။ 54အန်နိမ်စါန်းငှေါဒီ ကိုယ်တော်ကား အန်ဘင်းအီးရှီရှာသဟူးတေ ငါတ်ပန်းနာ “အီးရှီရှာ၊ ရဲစိတ်” ညယ် ဆကလားဝါတ်ဆလာတ်တုံန်းယောက် မိန့်တာန်မှာ။ 55အန်ဘင်းအီးရှီရှာကား အဆာတ်စားဟာန်းရီဘန်းနာ ချတ်ချန်းရဲဘန်း ထုံးရာန်မှာ။ စီးမှါခ့်ခါ ကိုယ်တော်ယေရှုကား အီးရှီရှာဒေ ယုတ်တင်စယ်ယာ နောပ့်အီဒင်အတွာတ် ဟိန်အမယ် အဝါတာတ်တေ ငှေါရာန်မှာ။ 56ဟိန်အမယ် အဝါတာတ်ကား အကြီးအကျယ်အံ့ဩသကြီးရာန်မှာ။ အန်နိမ်စါန်းငှေါဒီ ကိုယ်တော်ကား အဘင်းထှာရီဘင်းနာဒေ ဟာဟမဲတေဆဲ အငှေါဆာညယ် အန်တာတ်တေ မိန့်တော်မူသမှာ။
Àwon tá yàn lọ́wọ́lọ́wọ́ báyìí:
ရှာန်လုကာ 8: ZKD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kadu Bible by Beyond Translation is licensed under Creative Commons Attribution-ShareAlike 4.0 License.