Matthew 3
3
Te tuufaki ranga a John te Faka uku
(Mak 1.1–8; Luk 3.1–18; Jon 1.19–28)
1Ta i te vasia ai, ko John te Faka uku ne au ki te ngangea tulaavaki i Judea o tafito o tuufaki. 2#Mat 4.17; Mak 1.15.Muna atu rei koia, “Taafuri kese mai i otou sara, natafito te Kainanga o te Vaerangi ku piri mai!” 3Ko John te tangata noko rau ko ʻprophetʼ Isaiah i na vasia noko muna iei:
“Te tangata e forua i te ngangea tulaavaki:
‘Pena pena te riu ara mo te Ariki Tapu,
pena faka tonu ke au o poi iei!’ ”
4Ko John ana suru ne pena kia raukiri o te manu e ati te ʻkameleʼ, e takai i na kuanga na tautu, ana kai a moa ma ʻhaniʼ fuarei. 5Te kano fenua ne oomai kiei mai Jerusalem, mai ia ngangea i Judea katoa rei, ma rake motu ngangea e piri piri atu ki te Vai saria i Jordan. 6Koratou ne tara ko aratou sara, kae faka uku uku ea koia koratou i te Vai saria i Jordan.
7 #
Mat 12.34; 23.33. Vasia ko John ne ono ki nga Pharisee ma nga Sadducee ku kapi mai ke faka uku ea koia, muna atu rei koia kia ratou, “Kotou nga sineke! Koai ne nai faka aria atu kotou ka sao mai te faka pariki anga a Tupua ku piri ke fakkau mai? 8Fai koa nea ke ravea ina kotou ku taafuri kese maori rei mai otou sara. 9#Jon 8.33.Kae kau see maanatu kotou ka sao mai te faka kiro o muna ko Abraham totou puna. Kuou ka faka ari atu kia kotou, Tupua e ma fai ke sau koa fatu o furi saki ke fai a afu o Abraham! 10#Mat 7.19.Te toki ku pena ke taa ki raro a raakau ia ratou vai aka; ma a raakau katoa rei see fua laoi ka taa ki raro rakuna rei ki roto afi. 11Kuou e faka uku kotou kia vai ke iroa ina kotou ku tara otou sara ki tua, kae koia rei ka au i oku tua ka faka uku kotou ma te Mauri Tapu o Tupua ma te afi. Koia e sapa kese rei ma kuou; kuou se tau fangatasi moa rei ke sau ko ana rafi vae. 12Koia e fai tana faka manga faa ke seru kese koa witi mai ana penu penu, ma ke firi kese a fatu kai ke taanaki ki tana fare kai, kae susunu arei koa ana penu penu ki te afi ka si see mmate rei.”
Te faka uku ranga o Jesus
(Mak 1.9–11; Luk 3.21–22)
13Ta i te vasia ai, ko Jesus ne oko mai mai Galilee o au kia John i Jordan ke faka uku ea koia. 14Kae muna atu rei ko John ke fai te atamai o Jesus ke siaki, o muna atu, “Kuou tonu e fetau fangatasi ke faka uku ea kee, kae au rei ko kee kia kuou?”
15Kae tongoi atu rei ko Jesus kia koia, “Tuku arei faka peinei. Ia fai maanatu nei kotaua ke fai te fifia o Tupua!” Tera ko John faka tonu arei kiei.
16I mo vakanga ko Jesus ne faka uku, koia ne au ki tua mai te vai, tera te vaerangi ku masara ifo kia koia, nai ravea rei te Mauri o Tupua e fena ifo pe te rupe o tuu kia koia. 17#Mat 12.18; 17.5; Mak 1.11; Luk 9.35.Tera muna ifo rei te reo mai te vaerangi, “Teinei taku Tama fangasere, ia koia kuou e vaki vaki maatea rei kiei.”
Àwon tá yàn lọ́wọ́lọ́wọ́ báyìí:
Matthew 3: TKP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2025 Wycliffe Bible Translators, Inc.