Эге дөс 1
1
Өртемчейни чаяаганы
1 # Ин. 1:1Эң эгезинде Бурган дээр биле черни чаяап каан.
2Черниң ужу-бажы билдинмес, ээн турган. Дүп чок далай кырынга дүмбей турупкан; а сугнуң кырында Бурганның Сүлдези#1:2 Азы: «Бурганның чоруткан хады». ужуп турган. 3# 2 Кор. 4:6«Чырык чырып келзин» – деп, Бурган чугаалаан. Ынчан чырык көстүп келген. 4Бурган чырыкты экизинип көрген. Оон чырыкты дүмбейден аңгылап каапкаш, 5дүмбейни «дүн» деп, а чырыкты «хүн» деп адап каан. Кежээ дүшкен, даң аткан: бирги хүн ол болган.
6Оон Бурган мынча дээн: «Суг ортузунга бопурук дээвиир тывылзын, ынчангаш ол сугну сугдан аңгылазын». 7# Ыд. ыр. 148:4Бурган бопурук дээвиирни чаяап кааш, ооң адаанда турар сугну ооң кырында турар сугдан аңгылаан. Шак-ла ындыг апарган. 8Бопурук дээвиирни Бурган «дээр» деп адап каан. Кежээ дүшкен, даң аткан: ийиги хүн ол болган.
9 # Ыд. ыр. 135:6Оон Бурган мынча дээн: «Дээрниң адаанда суглар чаңгыс черге чыглып келзин, оон кургаг чер тывылзын». Шак-ла ындыг апарган. 10Бурган кургаг черни «чер» деп, а чыылган сугларны «далайлар» деп адап каан. Ол бүгүнү Бурган экизинип көрген. 11Оон Бурган мынча дээн: «Чер кырынга үрезинниг үнүштерниң база чимистиг ыяштарның бүгү хевирлери өзүп үнзүн, оларның шупту янзылары өзүп таразын». Шак-ла ындыг апарган. 12Чер үрезинниг үнүштерни база чимистиг ыяштарны өстүрген, оларның янзылары тарап эгелээн. Ол бүгүнү Бурган экизинип көрген. 13Кежээ дүшкен, даң аткан: үшкү хүн ол болган.
14Оон Бурган мынча дээн: «Дүннү хүнден аңгылаар база үелер, хүннер, чылдар демдеглээр чырымалдар дээрге турзун; 15олар черни дээрден чырыдар чырыткылар болзун». Шак-ла ындыг апарган. 16# Ыд. ыр. 8:4; 71:5; 103:19; 135:7-9; 148:3; Иер. 31:35Бурган ийи дээди чырымалды чаяап каан – хүндүскү үени башкарары-биле улуг чырымалды, дүнеки үени башкарары-биле биче чырымалды. Сылдыстарны база немей чаяаган. 17-18Бурган оларны черни чырытсын дээш, дүн биле хүннү башкарбышаан, чырык биле дүмбейни аңгылазын дээш, дээрге салып каан. Ол бүгүнү Бурган экизинип көрген. 19Кежээ дүшкен, даң аткан: дөрткү хүн ол болган.
20Оон Бурган мынча дээн: «Сугга эңмежок дириг амытаннар тывылзын, черниң кырында бопурук дээрге куштар ушсун». 21Бурган далайга улуг амытаннарны, сугга янзы-бүрү дириг амытаннарны база аңгы-аңгы чалгынныг куштарны чаяаган. Ол бүгүнү Бурган экизинип көрген. 22# Э. д. 8:17«Далай-сугга өзүп-көвүдеңер-ле, а куштар черге өзүп-көвүдезиннер» – деп, Бурган йөрээген. 23Кежээ дүшкен, даң аткан: бешки хүн ол болган.
24Оон Бурган мынча дээн: «Янзы-бүрү дириг амытаннар: мал-маганның, аң-меңниң, соястаарларның аңгы-аңгы уксаалары чер кырынга тывылзын». Шак-ла ындыг апарган. 25Янзы-бүрү дириг амытаннар: мал-маганның, аң-меңниң, соястаарларның уксааларын Бурган чаяаган. Ол бүгүнү Бурган экизинип көрген. 26Ооң соонда Бурган мынча дээн: «Бистиң овур-хевиривис-биле, Биске дөмейлештир кижи амытанны чаяап каалы#1:26 Бо домактан хөйнүң санында «Бисти» янзы-янзы кылдыр билип турар (ол ышкаш 3:22; 11:7; Иса. 6:8 көр). Чамдык тайылбырлакчылар мында хөйнүң саны Бурганның өндүр-бедиин онзалап демдеглээн деп бодап турар. Өскелери Эрги Чагыг-керээниң «Бурганның оолдарының» (Иов 1:6; 2:1) дугайында демдеглээнинче кичээнгейни углап турар. Бурган делегейни чаяап турда, Ооң оолдары өөрүп алгырышкан (Иов 38:7). А ол ышкаш Дээрги-Чаяакчы «дээрниң аг-шерии-биле» сүмележип турар (3 Хаан. 22:19-22). Шак ол демдеглээшкиннер ёзугаар хөйнүң санында «Бис» мында Бурганга болгаш Ооң дээрде төлээлеринге хамааржыр деп база билип ап болур. Христиан чаңчылда бо домакта «Бисти» хаая эвес Бурган Адаже, Бурганның Оглунче болгаш Ыдыктыг Сүлдеже айыткан кылдыр билип ап турар.; ол далай-сугнуң амытаннарын, дээрниң куштарын, мал-маганны, соястаарларны – черниң бүгү дириг амытаннарын чагырып, бүгү бөмбүрзекке тергиидеп чорзун». 27# Мф. 19:4; Мк. 10:6Бурган Бодунуң овур-хевири-биле, Бодунга дөмейлештир кижи амытанны – эр биле кыс кижини чаяап каан. 28# Э. д. 9:1-2Алгап-йөрээвишаан, Бурган оларга мынча дээн: «Өзүп-көвүдеңер, черниң кырын ээлеңер, далай-сугнуң амытаннарын, дээрниң куштарын, соястаарларны болгаш черниң бүгү-ле дириг амытаннарын чагырып тергиидеңер». 29«Бо-дур, силерге Мен бүгү үрезинниг үнүштерни, үрезинин тарыыр чимистиг ыяштарны бердим: олар силерге чем болур – деп, Бурган чугаалаан. – 30А черниң бүгү дириг амытаннарынга база дээрниң куштарынга, чер кырында аң-меңге Мен бүгү-ле ногаан үнүштерни чем кылдыр бердим». Шак-ла ындыг апарган. 31Ынчан Бурган Бодунуң чаяап кааны бүгү чүвезин көөрге, шуптузу аажок таарымчалыг болган. Кежээ дүшкен, даң аткан: алдыгы хүн ол болган.
Àwon tá yàn lọ́wọ́lọ́wọ́ báyìí:
Эге дөс 1: Ы.Б.2025
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Институт перевода Библии, 2025