NƲNƲLI 15
15
Zezwie -lʋa yɛ -ma Atiɔsɩ 'wlu gbënɩ
1-Bhaa do'o, nɩkpa -mʋmʋa 'bhönɩ -ma Zwidee dʋdʋ -gömö, 'n wa ji-e ma Atiɔsɩ ji. Wa nyini-e -ma, 'n wa ji-a -Lagɔdagwie ngli 'pa, wa nɛ naa: “Sa Moyizɩɛ gbö gba-a naa, wa -dɩ nɩkpaa zɔmö 'wʋ, a nɩ -sɩbha ajɩɛ zɔmö 'wʋ -dɩ a 'na 'pʋpʋɛ ghlɩ.” 2Pɔlʋ -yɛ Banabasɩ 'sɔ 'nʋa-a nglunʋ, 'n wa -nyʋa ji-a kpɛnɩ. Ɩ yɛ, 'n wa ji-a Atiɔsɩɛ nɩkpa ja -yɛ Pɔlʋngwa 'sɔ -ma Zelwizalɛmö tia, Zezwie tiatiangwa -yɛ -maa 'yuganɩngwa 'sɔ 'yɛ 'ma wɛlɩköbhë la'a yawʋ yɩlɩ. 3Pɔlʋngwa 'yɛ möö ji, -Lagɔzakpa-a kʋa-a 'yuo. Fenisi -yɛ Samalie dʋdʋ 'sɔ -gömö, -ma wa 'plɩnɩ -bha. Wa -wʋ-a mö 'le, -wa 'nɩ-a 'zwiföa glɩnɩ, sa wa 'bhɩla-a wa 'pɩ 'mö, ɩ 'dɩ wa -sanɩ-a -Lagɔdagwie -mʋabha, 'n ɩ jua-a 'mʋna dlɩ zɔmö 'pa. 4Wa nyini-e -ma Zelwizalɛmö, 'n Zezwie tiatiangwa -yɛ -Lagɔzakpa 'möö 'yuganɩngwa 'sɔ jua-a 'mʋna 'wʋ sulu. -Ɩ 'bhuo -Lagɔ nʋ-a wa de, 'n wa jiɩ-a -sa. 5'Zwiföaa -zakpa wa la-a falizɩɛ gla'aa nɩkpa -wa zʋ-a Zezwie -lʋa -dɩ-a gbʋ, wa nɛ naa: “-Wa 'nɩ-a 'zwiföa glɩnɩ 'bhë -wa jɩblɩnɩ-a -Lagɔ, wa -dɩ wa zɔmö 'wʋ 'bhë wa 'kʋa 'yɛ 'dɩ 'nyɛ naa, wa zʋ -bha Moyizɩɛ gbö.”
Wa yɛ -ma Zelwizalɛmö 'mɩ wɛlɩ yawʋ yɩlɩ
6Ɩ yɛ 'n Zezwie tiatiangwa -yɛ -Lagɔzakpöö 'yuganɩngwa 'sɔ ji-a 'wlu 'titanɩ, wa 'yɛ 'ma wɛlɩköbhë la'a yawʋ yɩlɩɛ yɛ. 7Wa -sasanɩ-a wɛlɩ -gömö kplokplo, 'n Piɛlɩ ji-a 'wʋ -sɔ. Ɔ nɛ naa: “-Abhɩayi, a 'bhï -ji sɛ naa, -Lagɔ sa'a-a -ma a 'gbamö -bhaa 'bɩ yɛ 'mö gwlɛ, -wa 'nɩ-a 'zwiföa glɩnɩ n 'kʋa Zezwie 'tɩtɩɛ -tɩtɩ 'nyɛ, wa 'kɔ dlɩ 'wʋ -ka. 8-Lagɔɔ 'bhë -ʋ -ji-a nɩkpɛɛ 'mlɩɛ dlɩ, mʋ-ʋ -sa-a wa 'dɩ sa ʋ -zʋya-a Zuzu 'Wlawla -gömö, -sɩbha ʋ zʋʋa 'yɛ-a -nɩ -gömö. 9-A -nyʋa 'sɔɔ do'o, -Lagɔ 'nɩ-ɛ -bɛ 'mö gbëzɩ. -Wʋʋ yɛ-a, sa wa ka-a Zezwi dlɩ 'wʋɔ yɛ ʋ yɛ wa dlɩa wɔlʋ 'bhë. 10-Sɩka'a-a 'mö, 'manɩɛ yɛ a 'yɛ-a -Lagɔ 'mö jɩla 'nɩ? Wɛlɩ -ɩ 'wɔlʋ-a 'wʋ e -bhlee 'gbluko 'kada, -ɩ -aa -lowlengwaa -lowlengwa 'nɩ la-a bhɛlɩ, -ɩ -aa 'bhï 'nɩ 'yɛ-a bhɛlɩ, 'manɩɛ yɛ a nʋ-a gbʋgblɩkaswɩ'ɩ Zezwie 'wʋbhlinɩngwa -swiɩ 'nɩ? 11-Ma ɩ 'möö 'bhë 'yɛ, -ma Nyininyɔ Zezwie ngazɩdlɩ mö -a kɩ-a dlɩ 'wʋ naa, a yɛ wa swɩ'ɩ 'pʋ 'bhë.” 12Ɔ gba-a -sɩbha, 'n wa 'bhuo ji-a ngo sɛ zʋ wa 'yɛ Pɔlʋ -yɛ Banabasɩ 'sɔ 'yukwli pönɩɛ yɛ. -Lagɔ 'plɩnʋa-a 'mö bhatɩ ʋ nʋ-ɔ -ma -wa 'nɩ-a 'zwiföaa 'gbamö, 'n wa ji-a ɩ 'tɩtɩ -sa.
Zaköö 'mösanɩwɛlɩ
13Banabasɩ -yɛ Pɔlʋ 'sɔ bhɩa-a gbagbɩɛ 'ji, 'n Zakö ji-a 'wʋ -sɔ. Ɔ nɛ naa: “-Abhɩayi, a -pönɩ'ɩ 'yukwli. 14'Pɩɛ tɛnɩde sa -Lagɔ yɩlɩ-a -gwlɩ 'klʋ, 'n ʋ ji-e -ma ɩ gla'a nɩkpa -sa 'n wa ji-a ʋ -lʋa zʋ, ɩ de Simo Piɛlɩ palɩ-ɛ -la -aa dlɩa. 15'Mɩ wɛlɩ la'a -yɛ -Lagɔɔ 'mögbanɩngwaa wɛlɩ 'sɔ -wʋ-a -bhlʋ. -Wʋʋ yɛ-a, sa'a ɩ 'cɛlɩɔ la-a naa:
-Lagɔ nɛ naa:
16-Mɩ la'a -yɛ 'plɩ 'bhë, n ji nimï ji,
n ji Davidɩɛ -pëpë -a bhli la-a 'wlu libhï,
'n n 'yɛ-ɛ -bha -glɔgba 'klʋ 'sɩbha,
17nɩkpa -mʋabha 'yɛ Nyininyɔ 'namaa yɛ,
wa -yɛ -gwlɩ bhuo -ɩ ka-a na 'nglɩ -gömö 'sɔ.
18-Sɩbha Nyininyɔ -ɔ nʋ-a -ɩ -la,
-ɔ slʋnʋɩ-a nɩkpa 'kɩkɩ gba -bha.
19Ɩ yɛ n'n-a 'jɩbha wa 'yɛ nɩkpa -wa 'nɩ-a 'zwiföa glɩnɩɛ gla'aa nɩkpa -wa 'nyɛ-a wajɩ -Lagɔ 'ye yʋlʋa. 20-A 'cɛlʋa 'wʋ naa: Wa 'na-a li -kʋnɩbʋbɔnʋnɩma -nɩ, wa 'na-a -sasanɩ 'ngwlɩ -yɛ nyɩbhɛlɩ 'sɔ -nɩ, wa 'na-a li nɩma -ɩ dlu 'nɩ-a 'mö 'wlʋ -ɩ tlɩ-a -yɛ dlu 'sɔ -nɩ. 21-Wʋʋ yɛ-a, tɛnɩ -benyido'o -n 'yɛ -zinɩ'ɩ 'wʋ nyini, Moyizɩɛ gböö nglipangwa-a -ma -gwlɩ 'bhuoo -gömö -gwlɛnɩzlɩa 'bhuoo 'mö 'n wa zɛlɩnɩ-ɛ -ma wa -Lagɔbudi'i Moyizɩɛ gbö.”
Wa yɛ Zezwie -lʋa -wa 'nɩ-a 'zwiföa glɩnɩ 'bɔgʋ 'wʋ 'pa
22-Ma ɩ 'mö, Zezwie tiatiangwa-a, -maa -lʋaa 'yuganɩngwa -yɛ -Lagɔzakpa 'bhuo 'sɔ zʋ-a wɛlɩ debhlʋ, 'n wa ji-e -bha wa gla'aa nɩkpa -sa wa -yɛ Pɔlʋ -yɛ Banabasɩ 'sɔ 'yɛ -ma Atiɔsɩ möö yɛ. Zwidɩ wa la-a Balɩsabasɩ -yɛ Silasɩ 'sɔ, mʋa-a -sɩbha. Wa 'sɔ -kpɔ, 'wʋ wa 'wɔlʋ la-a -ma -Lagɔdagwie gla'a. 23'Bɔgʋ wa 'nyʋa-a 'ye ʋ 'möö wɛlɩ-ɛ la'a: “Abha 'nɩ-a 'zwiföa glɩnɩ, 'n a glɩnɩ-a Zezwie yɛ -aa -dagwie, abha -wʋ-ɔ -ma Atiɔsɩ, -ma Sili -yɛ Silisi 'sɔɔ dʋdʋɩ -gömö, -abha a -Lagɔdagwie, Zezwie tiatiangwa -yɛ -Lagɔzakpaa 'yuganɩngwa 'sɔ, -a bhalɩya. 24Sa nɩkpa 'bhönɩ ma'a -aa 'bhɛyɩ, -a 'nʋa-a -lu 'wʋ tia 'bhë, 'n wa ji-a wa gbagbawɛlɩ nya a dlɩa ghayɩ -pa kwla'a mö 'n wa jɩɩ-a -kɔngʋʋ zʋa, mɩ -a 'nʋ -bhaa yɛ, 25-a 'titanɩ-a 'wlu, -a zʋ-a wɛlɩ debhlʋ, 'n -a ji-e ma'a -aa gla'a nɩkpa -sa, wa -yɛ -aa dlɩɛ sɛkadagwie Banabasɩ -yɛ Pɔlʋ 'sɔ yɛ mö. 26'Mʋa nɩkpa la'a wajɩɛ 'pɩ wa -sa-a -ma, 'n wa jiɛ-a -aa Nyininyɔ Zezwi 'Klie yɛ zʋ. 27Ɩ yɛ -a tia-a -ma a 'bhɛyɩ Zwidɩ -yɛ Silasɩ 'sɔ, wɛlɩ -a 'cɛlɩya-a 'wʋ wa 'kaya ɩ -bhlʋ -sanɩ. 28-A -yɛ Zuzu 'Wlawla 'sɔ, -aa -lɛ 'jɩbha -a 'kaya gba -möma -sulua, 'n ɛ nɩ -ɩ ka-a dlɩ yɛ glɩnɩ. 29Mɩ-ɩ -yɛ-a naa: a 'na-a li -kʋnɩbʋbɔnʋnɩma -nɩ, a 'na-a li 'yɛ nɩmadlu -yɛ nɩma -ɩ 'nɩ-a dlu 'mö 'wlʋ 'sɔ -nɩ, a'a -sasanɩ 'ngwlɩ -yɛ nyɩbhɛlɩ 'sɔ -nɩ. 'Mɩ -ɩ la'a a -kɩɩ yawʋ 'sakanɩ, mɩ-ɩ -ga-a a de cɛ. -A-a 'yɛ 'wʋ gbënɩ.”
Tiatiangwa yɛ -ma Atiɔsɩ nyini
30Wa kɩnɩ-a, 'n wa ji-e -ma Atiɔsɩ mö. Wa nyini-e -ma, 'n wa ji-e -maa -zakpa 'wlu 'titanɩ, 'n wa jua-a 'bɔgʋ la'a 'ye 'nyɛ. 31Wa zɛlʋ-a 'mö, 'dɩmözʋwɛlɩ ʋ ka-a 'möö yɛ 'mʋna-a 'lɩbhʋa -bha. 32Zwidɩ -yɛ Silasɩ 'sɔ, -Lagɔɔ 'mögbanɩngwa wa 'bhï glɩnɩ -bhaa yɛ, 'n wa jua-a wɛlɩɛ -bɛ 'mö 'dɩ 'mö zʋnʋ, 'n wa nɩma ji-a 'mö 'tamanɩ. 33'Ylɩ ja 'plɩ-a, 'n -Lagɔdagwie jua-a 'yuogblʋ 'nyɛ, wa 'yɛ -ma -wa tua la-aa 'bhɛyɩ nimï mö. 34Silasɩ 'jɩbha la ɔ 'yɛ sɛ glɩɛ yɛ, 'n ɔ ji-e -bha tʋ-ʋ. 35Pɔlʋ -yɛ Banabasɩ 'sɔ, -ma wa glɩ-a Atiɔsɩ yɛ, wa -yɛ nɩkpa -mʋmʋaa -bebe 'sɔ, 'n wa pa-a nɩkpa -Lagɔwɛlɩ ngli, 'n wa bia-a Nyininyɔɔ 'tɩtɩɛ -tɩtɩ.
Pɔlʋ -yɛ Banabasɩ 'sɔ yɛ yawʋ -sɔnʋ
36'Ylɩ ja 'plɩ-a, 'n Pɔlʋ ji-a Banabasɩ 'dɩ 'nyɛ naa: “-Gwlɩ -ɩɩ -gömö -a 'bhö-ö la-a -bhlʋ -bhlʋ Nyininyɔɔ 'tɩtɩɛ -tɩtɩ kwa kwla'a, -a mö -a 'kɩ yɩlɩ.” 37Wa 'yɛ möö ji, Banabasɩ 'jɩbha la ɔ -yɛ Za wa la-a Malɩkö 'sɔ 'yɛ mö. 38Pɔlʋ 'nɩɩ-ɩ 'wʋ nglu. -Wʋʋ yɛ-a, -ma Pafili Za 'bhönʋa-a 'bɩ, ɔ 'nʋa-a la-a 'mö -ma wa -Lagɔlibho 'mö kwanɩ. 39'N wa ji-a ngo'o köbhaköbhanɩ, 'n 'slaslʋ ji-e -bha wa nyɩdɩ bhlinɩ, 'n wa ji-a yawʋ -sɔnʋ. Banabasɩ 'libhï-a Malɩkö 'wʋ, wa -gbla-a bato 'mö 'n wa ji-a Siplɩ mö. 40Pɔlʋɔ -nɩ de, Silasɩ ɔ -sa-a -bha. -Lagɔdagwie 'pa-a ɔ 'wlumö -bɛlɩ -Lagɔ 'kɔ 'ji zʋɔ yɛ 'bhë, 'n wa ji-a mö. 41Ɔ-ɔ -Lagɔzakpö dlɩ mlɩ zʋ 'le, 'n ɔ ji-a Silie dʋdʋ -yɛ Silisie dʋdʋ 'sɔ 'mö -dɩ.
Àwon tá yàn lọ́wọ́lọ́wọ́ báyìí:
NƲNƲLI 15: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996