NƲNƲLI 17
17
Pɔlʋngwa yɛ -ma Tesalonikö mö
1Wa 'plɩnɩ-a -gwlɩ wa la-a Afipolisɩ -yɛ Apoloni 'sɔ 'mö, 'n wa ji-a -glɔ wa la-a Tesalonikö nyini. -Ma 'zwiföa ka la-a -Lagɔbudu. 2'N Pɔlʋ jua-a -ma ghlɩ, sa ɔ nʋ la-a 'kɩ. -Gwlɛnɩzlɩa ta -ɩ -gaganɩ-a 'wʋɔ 'mö, 'n ɔ -nyʋa 'sɔ ji-a -Lagɔwɛlɩɛ 'bɔgʋ 'möö wɛlɩ -gömö -sasanɩ. 3'N ɔ slʋnʋa-a ɩ zɔmö, 'n ɔ tulua-a naa, Puanyɔ -ɔ -Lagɔ -sa-a -bha, yʋlɔ ɔ ji la -bha, ɔ -yɛ tlɩ 'bhë ɔ 'yɛ -ma 'kudungwa 'gbamö 'wlʋ. 'N ɔ nʋ-ɔ -bha wa de naa: “Zezwi -ɔɔ gbʋ n -wʋ-ɔ la'a a de gba 'le, mɔ-ɔ glɩnɩ-a 'mɔ Puanyɔ -ɔ -Lagɔ -sa-a -bha.” 4'N wa gla'aa 'jaja jiɩ-a 'wʋ nglu. 'N wa ji-a Pɔlʋ -yɛ Silasɩ 'sɔ -gömö bhlinɩ, wa -yɛ 'glɛköaa -bɛ -wa bʋbɔ-a -Lagɔ 'sɔ, 'nglɩmöngwlɩɛ -bebe -mʋmʋa 'yɛ. 5-Ma ɩ 'mö, nglʋnyinye bhlinɩ-a 'zwiföa dlɩ zɔmö, 'n wa ji-e -bha 'gbëë 'du 'mö kpakpanɩkpa 'wʋ 'libhï, 'n 'mʋa nɩkpa ji-a 'gbë ghayɩ 'pa, 'n jɔ ji-e -ma 'wlʋ. 'N wa ji-e -ma nɩkpɛ -bhlʋ wa la-a Zasɔɔ 'ligbë'ë mö, wa 'jɩbha wa 'yɛ la ɔ -budu wla wa 'yɛ -ma Pɔlʋ -yɛ Silasɩ 'sɔ -sa wa 'kʋa -ma -gwlɩ dlɩ'ɩ kwa. 6Wa 'nʋa-a -ma ghlɩɛ yɛ, 'n wa ji-a Zasɔ -yɛ -Lagɔdagwie -mʋmʋa 'sɔ -ma -zijlitungwa dlɩ'ɩ kwa, wa-a la'a nyla 'le, wa nɛ naa: “Nɩkpa -la -wa vɩ-a 'pɩ-ɩ bhë mʋa-a ji-e la'a ma'a 'mʋa Zasɔ zʋ-ɔ -ma ɔ 'ligbë'ë yɛ. 7Nɩkpa -la 'bhuo 'nɩ zʋ -bha dʋdʋnyininyɔ 'kadɔɔ gbö. Wa nɛ dʋdʋnyininyɔ -mʋmɔ -bhlɩ-a, mɔ-ɔ -yɛ-a Zezwi.” 8Wa wɛlɩ la'a nɩkpaa -zakpa -yɛ -glɔlowlengwa 'sɔɔ dlɩ ɩ 'pa-a ghayɩ. 9'N wa ji-a Zasɔ -yɛ -mʋabha 'sɔ 'dɩ 'nyɛ naa, wa zʋ mëni. Wa kɛ zʋ 'bhë 'n wa jua-a 'ji 'tati.
Pɔlʋ -yɛ Silasɩ 'sɔ yɛ -ma Bele nyini
10Sɛ julu-a, -bha -gaganɩlɩ'ɩ 'n -Lagɔdagwie ji-a Pɔlʋ -yɛ Silasɩ 'sɔ 'yuo kwa, wa 'yɛ -glɔ wa la-a Bele möö yɛ. Wa nyini-e -ma, 'n wa ji-e -ma 'zwiföaa -Lagɔbudu'u pla. 11-Maa nɩkpa -ga la cɛ wa zi Tesaloniköö -lʋa 'wʋ. 'Jinanɩswɩ'ɩ wa pönɩ-a -Lagɔwɛlɩ 'yukwli. Sa zlɩ zɩ-a, -sɩbha wa yɩlɩ-ɛ -ma -Lagɔwɛlɩɛ 'bɔgʋ 'mö, -ɩ wa -wʋ-a wa de gba 'le -yɛ 'dɛdɛ'ɛ glɩnɩɛ yɛ. 12'N wa gla'aa nɩkpaa -bɛ ji-a -Lagɔwɛlɩ 'wʋ nglu, 'glɛköngwlɩ -wa mö-a 'nglɩ -yɛ nyɩbhɛlɩɛ -bebe 'sɔ. 13-Ma ɩ 'mö, Tesaloniköö 'zwiföa jɩblɩnɩ-a sɛ naa, Pɔlʋ-ɔ -ma Bele -Lagɔwɛlɩ gbanɩ 'le-e, 'n wa ji 'yɛ-ɛ -maa nɩkpa ghayɩ -paa mö, 'n wa ji-e -ma jɔ -la. 14Ɩ yɛ, 'n -Lagɔdagwie ji-e -bha -gaganɩlɩ'ɩ Pɔlʋ gïnyie 'jibhɛyɩ 'yuo kwanɩ. Silasɩ -yɛ Timote 'sɔ, -bha wa tʋ-a -nɩ. 15-Wa kwa la-a Pɔlʋ 'yuo, -ma wa nyinianɩɔ-a -glɔ wa la-a Atɛnɩ 'mö. Wa 'yɛ nimï jie ji, 'n Pɔlʋ jua-a wɛlɩ -sulua naa, Silasɩ -yɛ Timote 'sɔ -gaganɩ 'wʋ wa 'kɔ -ma ghlɩ.
Pɔlʋ yɛ -ma Atɛnɩ -Lagɔwɛlɩ gbanɩ
16Pɔlʋ -wʋʋa -bhla -ma Atɛnɩ -kʋnʋ 'le, ɔ yɩlɩ-a -glɔ la'aa 'möö nɩkpaa -kʋnɩɛ -zunɔ 'wʋ, dlɩ-ɩ yeo-a ngo. 17-Ma 'zwiföaa -Lagɔbudu'u ɔ -yɛ 'zwiföa -yɛ -wa 'nɩ-a 'zwiföa glɩnɩ -wa bʋbɔ-a -Lagɔ 'sɔ, 'n wa -sasanɩ-a -Lagɔwɛlɩ -gömö. 'Bhë 'n ɔ nyɛ-ɛ -bha 'gbëë 'du 'mö 'plɩplɩngwa -Lagɔwɛlɩ. 18'Bɔgʋjingwa 'kadɩ wa la-a epikuliɛ -yɛ -mʋa wa la-a sitoyisiɛ 'sɔ, 'n wa -nyɔɔ ji-a kpɛnɩ. Wa gla'aa -mʋmʋa nɛ: “-Bebe 'wʋɔ 'mösanɩnyɔ -la nɛ 'manɩ bhe 'nɩ?” -Mʋabha nɛ: “E -bhlee kabölagwɩɛ gbʋ ɔ -wʋ yɩ gba 'le.” -Wʋʋ yɛ wa gba-a -sɩbha, Zezwi -yɛ 'kudungwaa gluwlʋgbʋ 'sɔ Pɔlʋ -wʋ la-a gba 'le. 19Wa 'libhïɔ-a 'wʋ, -gɔgɔgbʋ -ʋʋ 'klʋ wa tunʋ-a -zijli wa la-a Aelopazɩ, 'n wa jio-o -ma kwa. 'N wa jio-a ngli 'jɩbha naa: “Nglipalɩ -lili -n -su-o -la, -n bhɛlɩ -n -kaya ɩ zɔmö -slʋnʋ 'nɩ-ɩ? 20-Wʋʋ yɛ-a, -ɩ -a -wʋ-ɔ -la -ma -na ngli 'nʋnʋ 'le, ɩ -nɩya cɛ'ɛ -ji, -a 'jɩbha -a 'kɩ jɩblɩnɩ.” 21-Ma Atɛnɩɛ nɩkpa 'bhuo -yɛ lagangwa -wa glɩ-ɛ -ma 'sɔ, dɩlilie -sasɩɛ -yɛ ɩ 'yukwlipönɩlibho 'sɔ wa ka la -bha.
22Pɔlʋ 'nɩgbönɩ-ɛ -bha 'du 'mö ghayɩ-ɛ, ɔ nɛ: “Atɛnɩɛ nɩkpayi, -ma -li 'bhuo 'mö, n -ji sɛ naa bʋbɔbʋbʋɛ a 'jɩbha-a tenyi. 23-Wʋʋ yɛ-a, n -wʋ-ɔ ma'a a 'gbë 'mö namö 'le, n 'namanɩ-a a bʋbɔli 'ji yawʋ-ɔ, -bha a bʋbɔnʋde -bhlʋ yawʋ wɛlɩköbhë 'cɛlɩɔ-ɔ -bha n yɩlɩ-a ma-a -yɛ-a: -Lagɔ -ʋ wa'a -ji. -Ɩ la'a a'a -lɛ-a -ji 'bhë a -wʋ-a bʋbɔ 'le, ɩ gbʋ n ji-e la'a a de gba. 24-Lagɔ la'a -ʋ nʋ-a 'pɩ-ɩ bhë -yɛ ɛ 'möö -li 'bhuo 'sɔ nɛ, -ʋ -yɛ-a -Lagɔtapɛ -yɛ dʋdʋkpata 'sɔɔ Nyininyɔ, ʋ'ʋ gʋ-ʋ -ma nɩkpasɩbhabudi 'mö. 25Ʋ'ʋ -lɛ nʋ wa 'nyʋ -lu nʋ, ʋ'ʋ-ʋ -lu bɔ. Mʋ-ʋ nyɛ-a nɩkpa 'bhuo -bhlɩbhlɩɛ, nyɛpɛnyɔmʋ -yɛ -li 'bhuo 'sɔ. 26Mʋ-ʋ nʋ-a nɛ -ma dlu -bhlʋ 'mö, 'n nɩkpa 'bhuo ji-e -ma 'wlʋ, 'n wa ji-e ma'a dʋdʋkpata -gömö ba. Mʋ-ʋ -dɩ-a zlɩa -kanɩde, 'n ʋ ji 'yɛ-a nɩkpaa -banwɩ palɩ. 27Ʋ nʋ-ɔ -sɩbha wa 'yɛ la -Lagɔ 'namaa yɛ -bha, wa -yɛ -ma dlɩ zʋ wa 'yɛ bhöbhlɩnɩ, mʋa-a -yɛ bhɛlɩ wa 'kʋ ghlɩɛ yɛ. -Mɩlado'o -Lagɔ -köpanɩya yawʋ -bhlʋ -bhlʋ. 28Ʋ yɛ -a -bhlɩ -bha, ʋ yɛ -a bhö-a -gbawʋ, ʋ yɛ -a glɩnɩ-a nɩkpa. -Sɩbha a gla'aa -bhlɩbhlɩngwa -mʋmʋa gba-a naa:
Ʋ gwie -a glɩnɩ 'yɛ-a -nɩ.
29-A -yɛ-a 'mö -sɩbha -Lagɔɔ 'gwie glɩnɩ-ɛ, -a 'na-a 'pa dlɩ -nɩ naa, lɔlʋ, 'ngïmë, 'tɩkpa 'slɛlɛkangwa tɛlɩ-a, -ɩ la'a 'bhuo nɩkpɛ pa-a dlɩ 'wʋ ɔ nʋ-a nɛ, 'mɩ -Lagɔ -nyɩɩ 'wlʋnʋ -bha -nɩ. 30La nɩkpa 'nɩ la-a -bhla dlɩ sɛ ji-e, -Lagɔ 'nɩ-ɛ -bhaa -li gbʋ 'wʋ -dɩ. -Sɩka'a-a 'mö, ʋ nɛ nɩkpa 'bhuo, de 'bhuo la wa -yɛ -wʋ, wa 'bhɩla wa dlɩa 'mö. 31-Wʋʋ yɛ-a, 'ylɩ -bhlʋ ʋ -dɩ -bha, nɩkpɛ ʋ -sa-a -bha, ʋ 'kɔ 'mö 'plɩnɩ ʋ 'yɛ 'pɩ-ɩ bhë 'bhuo 'möslɛnɩswɩ'ɩ -zijle tunʋ. -Ɩ tulua nɩkpa 'bhuoo de naa 'dɛdɛɛ -bha, 'mɔ nɩkpɛ tlɩ-a, -ma 'kudungwa 'gbamö ʋ -sɔɔ -bha.”
32Wa 'nʋ-a 'kudungwaa gluwlʋwɛlɩɛ 'köbhë-ë, gla -mʋmʋa 'suluo-a 'mö, -mʋabha nɛ -bha ɔ de naa: “Kabözlɩ mö -a -jimö-a -ɩ -laa de 'yukwli pönɩɛ.” 33-Bha Pɔlʋ 'wlʋnʋa-a gla'a. 34'Bhë, 'n 'jaja ji-a ɔ wɛlɩ 'wʋ nglu, 'n wa jio-a 'bɩ bhlinɩ, -zijlitunyɔ 'kadɔ -bhlʋ wa la-a Denisɩ, 'nglɔ -bhlʋ wa la-a Damalisɩ, wa -yɛ nɩkpa -mʋmʋa 'sɔ mʋa-a -sɩbha.
Àwon tá yàn lọ́wọ́lọ́wọ́ báyìí:
NƲNƲLI 17: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996